جُمِّلْت... أخلاقها //باللهجة العراقية //

الحلقة الثامنة

#جُمِّلْت أخلاقها

✍️كاتبة الجنوب
____________

أغمضتُ عيناي  واذا بي اسير في طريق الطويل
التفت خلفي لأجد الورود الصفراء ذات عطر
جميل بقيت اسير والتفت خلفي خائفة أن ارى
شيئاً يرعبني او أن أقع وتتمزق ثيابي،  وحيدة في
السير بين هذا عالم الجميل لا اعلم متى سينتهي هذا طريق ذات ورود صفراء تحديتُ نفسي لأصل الى نهاية
لكن ياترى هل يبقى جميل ام هناك اشواك تصادفني؟ 
____________

ابو سالم:_لكيت المرا

قندة:_ هاا وين وشنو اسمها حلوا تعرف تطبخ

ابوسالم :_هههه على كيفج شويه شوي والله شكلج ضايجه من طبخ بنيتي

قندة:_ لا بس هيج مجرد سؤال

اجه يمي تربع وكعد وصاح حور وهي اجت ركض..
وبدا يسولف وهو يكول

ابو سالم:_ عندي صديق جيرانهم عندة بنات وباجر راح اروح واشوفهم بلكت ينطوني وحدة

قندة:_ هاا ان شاءلله خير

ابو سالم:_ اي يباا دعواتكم بلكت الكالي وحدة بت عالم وناس طيبة وصير الكم ام وتحتويكم

حور:_ اي وتطبخنه اكل حلو

قندة:_ وانتن ما عدجن غير اكل راكضات على بطنجن

حور:_ يباا غير اريد اخلص من اكل قندة مو بطني خاست من طبخها

قندة:_ يمه ليش ولج شبي طبخي معاجبج

حور:_ بشرفك يبااا اكو واحد يطبخ باميا وياها سمج سمج شجاب هاي على هاي بس هي بزون تحب زفر

قندة:_ جا غير ماعدنه لحم كلت احط بدال لحم سمج

اصلاً صارت تخبل وما ضل منها شي

حور:_ غير واحد مجبور وهو ياكلها بعدين شجاب سمج على لحم صح اثنينهم حيوانات بس واحد بري واحد بحري افهمي لا ضلين طبكين بكيفج

قندة:_ ههههه اهم شي مضلت يعيوني اكلتيها لو لا وبعدين هي صارت ليش يوميه عدتو السالفة ليكول ماكو غير قندة ما شوفون باقي اكلات ماكو احلى منهن

حور:_ هاا قصدج على مركت بربيين يابه هاي خضرة محسوبة على خضروات ما تصلح تكون مركة

قندة:_ ايباا غير شفت عمتي سوتها وماكو اطيب منها انتي وين تعرفين تاكلين

حور:_ غير هي عمتي نفسج هم ما تعرف تطبخ

قندة:_ اشوو بدل هل حجي فاضي وما عاجبج شي ليش ما تحركين ايدج وتشتغلين

حور:_ بعدني عنونه مو مال كراب مو صح باباتي

ابو سالم:_ ههههههه

قندة:_شوف هاي يا زغيرونه راح اصيرين اطول مني
حور:_ بتيفي

قندة:_ والله لو ما ابوي كاعد جان اعرف شسوي بيج
حور من ورا ظهر ابوي وسويلي حركات وابوي صافن علينه وانا فاير دمي على حور انتظر ابوي يطلع اله اشلع شعرها