جُمِّلْت... أخلاقها //باللهجة العراقية //

حلقة(30) جزء الثاني

حلقة (30)

#جُمِّلْت أخلاقها

✍🏻كاتبة الجنوب

____________بسمه تعالى _____________
قبل لا تبدون صلو على النبي الليله جمعه...

دارت الساعة وهاي انا اليوم عريس اصبع ايدي متحني بلون احمر لون الفرح بس كلبي متحني بسواد، الخنكه بصدري، وانا مبتسم بين الناس لبست قاط العرس واباوع على مرايا شكلي الحلو بالقاط الي اول مرة البسه، وانواع عطور فايحه وزينه تارسه الغرفة بس كلبي مو سعيد زهير وامين وايمن يرتبون بيه وانا مو يمهم انا بعيد كلش بعيد يحركوني مثل الجثه الهامده

ليش وهذا انا ردته انا ردت الغريبه الما تعرف امي ولا سوته امي ردت غريبه حتى ابدي وياها حياة جديده بس ليش شجاي ايصير عطت على ولد تركوني وحدي وهما ماكو مثل صمغ بيه،

وتحشيشهم مستمر تنهدت خلص هذا انا ردته ومحد جبرني عليه حياتي جايه راح تكون احسن، خبصة البيت وهوسه نسوان والهلاهل مرافقتني على طول وصوت طبول ترن بذاني وصوت آمنه

وباقي بنات وهي تغني "دوارا دورا يا دنيا دوارا، راح الحبيب الغالي وانكطعت أخبارا راح وسكن ليله اه يلي ناسينه.. بقيت صافن احس كل كلمه كالتها تمثلني ملكت غير هاي لغنيه تغنيها رجعت كالت..

" اسئل عليك الراح والجاي اي والله
ما ضل دمع بالعين لا والله لا والله.. 

صوتها بأذني يرن  والطبل بصوت هادئ بهدوء لحن اغنيه كلماتها وجعت كلبي ردت اطلع واصرخ تغيير لغنيه تقدمت خطوات وذكرني زهير انا وين وشنو وضعي

_لك سالم شنو اليوم ما ناوي تطلع اجيب عروستك

تنهدت خلص هاي هي يسالم اقبل بالواقع

_هاا زهير نرووح

_لا كمل صفنتك، مدري مستحي تطلع يم نسوان هيج لعد يم مرتك شلون

_لا هاي مرته ما يستحي

_وليي انت ثاني ماكو واحد ما يستحي
_امشي ولك انت غير رجال،  قابل مرا حتى تستحي امشي

جرني زهير وطلعنا والكل تباوعلي وبلشن بالهلاهل عمتي ومرت عمي ونرجس هلاهلهن ميخلصن الفرحه بوجوه الكل ابتسمتلهم وطلعت اليوم لازم اعيشه وبلحضة سعادة.

_لج آمنه وزعي طبول على باقي سيارات

_والله ما انطيجن انا اخت العريس

_واخته احنه هم بنات عمه

_ماكو تردن تبقن هناا

_راح اصيح سليم

_ضحى كتلج ما انطي وشتردين سوي والله يا الله هو عرس اخوي قابل اخوج

_اووف شكد خبيثه

_اي خبيثه

لهناك اجه سليم وهو معصب

_انطيني حاجزتهن شنو ما ادكليلي