جُمِّلْت... أخلاقها //باللهجة العراقية //

حلقة (57) جزء، الثاني

༺༺༺༺༺༻༻༻༻༻༻
حلقة (57)

# جُمِّلت أخلاقها

✍🏻كاتبة الجنوب
______________بسمه تعالى _____________

أيادي ابي المرتجفة صوته المرعب يتكلم بحرقة قلب ورعشة أعصاب، لم أراه يوماً يسب أحد بهذه الطريقة لكن اليوم فعلها، يبدو الأمر خرج عن السيطرة ارتعبتُ من منظره العصبي ابي يمتلك أنقى قلب لكن عند الخطأ يقسى قلبه حتى على اولاده،

نرجس: اي وشنو گال

_هذا ابد ما متربي ما احترمني وآنه عمه وغلط وتجاوز عليه

_مو اكول لو ما ضاغط على وتر الحساس جان مغلطت عليه هيج غلط

_يستاااااهل انتي مشفتي شلون اسلوبه شفته بطريقي كلت اشوفه ليش هيج مسوي ب بتي بدل ما يعتذر سبني يعني فوگ الحگه دگه گاتلها ويريدها تبقى بيته عجيب شهل بشر،

حور تبقين يمي ماكو رجعه اله ما متعاجز من لكمتج ولا ارجعج يمه،

_اي وهذا لبطنها

_عسى لا إجه للدنيا

_استغفرالله، مهما كان هذا ابنه!!!

تقرب يم حور مسح دمعتها

_لا تخافين يبنيتي ما يكدر يوصلج وآنه موجود.

حضنته وبقت تبجي

_لو شكد ما أكبر يبقى حضنك أمان!!

_أفااا حضني مفتوحلج بكل وكت يبنيتي، اهدي لا تخافين بوجود ابوج ولج آخذ حگج من حلك السبع واليوم اسويلهم العمايل، مسحي دموعج ما يستاهل دموعج

_يباا هبار مريض مو صاحي لو صاحي ميسوي بيه هيج

_مخبل هذا مردت انطيج بس انتي جبرتيني وإلحاحكم سيطر عليه

نرجس: بعد هذا قدرج ما نكدر نغيرا

بسه: اكثر صفة اكرها بنفسي من اشوف واحد يبجي گبل ابجي وياا!!

دموع حور خلتني ابجي وياها وأتختل حتى لحد يشوف دمعتي ابوي العصبي نطفت نار اعصابه بحضنت حور رخى جسمه وتغيرت نبرة صوته العصبيه الى برود، بس حتى  تهدأ محد يعرف بجرح داخل حور شكد عميق بقت يمنه ايام بس ما شفنه الفرحة بعيونها، ابوي قافل ما  ترجع وأخذ سالم وراح لأبو  بس ابو متبري منه ومن أفعاله

ماكو حل غير اصير عشاير بس امه صارت كل يوم تجينه وتتعذر وتتوسل ترجع حور لهبار لا يوم ولا يومين كل يوم تجي وما ملت وابوي رافض وهو ابد ما وصل يدز امه  وبيوم تفاجأنه من تصرف حور

_يبو سالم ترى مو حلوا بتكم تبقى يمكم حامل بأبنه والولد ايريد مرته ألعن شيطان

_ابنج ضربها وآنه بناتي ما ينضربن آنه ابوهم من كبرن لحد الآن ولا يوم ماد ايدي عليهم مو يجي ابنج المتوحش وما مخلي عضمى صاحيه بيها