جُمِّلْت... أخلاقها //باللهجة العراقية //

حلقة (16) الجزء الثاني

༺༺༺༺༺༺༻༻༻༻༻༻
حلقة (16)

#جُمِّلْت أخلاقها

✍🏻كاتبة الجنوب

____________بسمه تعالى ______________

خايفة وأتلمس بشي يحميني من كلاب التنبح لا حجر موجود ولا شي أدافع عن نفسي شارع وليل

ظلمة والدنيا تخنك لا سويت ذنب ولا ظلمت احد لفيت عباتي ولازمتها حيل احس حتى عباتي ما ساترتني وانا بالشارع،

باوعت لسمه نجمة بعيدة باقية وحدها منعزلة عن نجوم خاطبتها انتي مثلي وحيدة نعزلتي وحدج كلها عافتج  ملكيت شي اخاطبه غير هاي نجمه،

انتي هم خلوج مثلي انتي هم طردوج مثلي!!
لا تعوفني يا نجوم سمه ويا قمر زدني نور أخاف

من الظلمه بس انتم مضويلي خاف تخذلنه الشمس وتطلع ويه طلعتها تبدي وادم تروش، شگلهم لو سألوني زدت بجي،

ساعتها عبايتي ما تسترني الكل يحجي بصوب، واذا ردت اروح هلي لا أندل مكانهم ولا أكدر اعوف بتي عدهم من حركت گلبي بقيت ادك بابهم بأيديه لثنين

ولكم إن جان عدكم رحمه دخلوني، يتيمه وحوبتي ما تتخطاكم، لك كريم هاي وعودك الي تطردني

  زين رجعوني أهلي، أهلي يردوني ما ذابيني بالشارع مثل ما  أخذتوني من بيتي رجعوني لبيتي

ما لكيت اي جواب بقيت أبجي وادك بابهم بكل قواي وادعي ربي يعاين الحالي ويحنن كلبهم عليه  يبو خيمة زركه حلها وانت تعرف بحالي دخيلك ربي ما عندي غيرك انت سندي ومتكأي ومناي،

لا تعوفني وحيدة، بعدني أبجي وادك الباب سمعت صوت سركي ينفتح عرفت اكو واحد رف گلبه عليه كاعدة ومنطيه ظهري على باب ومنتجيه عليه

عبايتي على راسي وأنفتح الباب التفتت شفته معصب ولازم عصا بأيده صاح

_فوتي بتي الي يحجي وياج أطردة بشارع خييياس

باوعتله بجيت

_مشكور عمي بس رجعني أهلي ما أريد أبقى هناا

_تعاي دخلي وصباح رباح

دخلت أمشي بطيء وعمي كدامي

_ال يكسر كلمتي لو سمعتوها حجايه تغثها ما تلومون الا نفسكم ولكم بنيه طاردينها بنص الليل شنو من بشر انتم وانت كريم هاي مرتك ناس مأمنينها عندك والله طلعت مو كفو الا أرجعها أهلها

رفع راسه كريم صارت عينه بعيني باوعتله بقهر دنك راسه وطلع من البيت عاطت عمتي

_هججت الولد البومه

عاط عليها عمي

_سكتين لا هسه اكسر رجليج،

عساا لا رد كون

_ليش تدعي على ابنك الوحيد هذا

_انعلبوو لاأبو جابه امشي ولي ورا ما اريد اسمع صوتج