البارون

❤❤البارت الرابع❤❤

#البارون
البارت الرابع
... ياقمري والقاف عين...
*********
زيدان
...لن أترك حلما من احلامي لغيري...
...وكأن الانتظار يمهد لي طريق الحرمان...
... دمتي لي شيئاً لاينتهي ...
...سنحارب معا القدر...
...ليتنا نهرب من كل مانكرهه وهو مكتوب لنا...
... انكِ بهجتي والروح وما أحب...
يوم حلو ومتشوق أشوف حبيبتي لأن تواعدنا نلتقي تعطرت ولبست لبس هي تحبها ولبست الساعه الي جابتها إلي هديه يعني صرت كشخه توب
- صباح الخير
= صباحو كشخه
- شلوني؟
= إسم الله الرحمن
- هههه تريدن اوصلج بطريقي
= لا أروح وحدي شكرا
- ليش
= اريد اتريك واراجع تالي أروح
- أوك براحتج
أول مطلعت شفت أم غيداء بالباب متوترة
- السلام عليكم
= هلا يمه زيدان شلونك
- الحمد لله خير محتاجه شي
= خليل من البارحه ماكو بلة متخابرلي زيد بلكي وياه
- لتخافين ماعليهم شي ابو غيداء وين
= برا البيت من البارحه ملافي علينا
- لتخافين خالة ان شاء الله خير
خابرت زيد ميجاوب لحيت عليه الا جاوب
= وينك؟ هسة تجي للبيت وخليل وياك لولا
- أي موجود.
= شوكت ناوي ترجع بلة
- بالطريق احنا ازدحامات بعدين احاجيك
سد الخط بوجهي
- بالطريق خالة بس ازحامات فد نص ساعة ويوصولون
= الله يحفظك خالة اخرتك
- ولو
رحت بسيارتي برأس الشارع شفت غيداء منتظرة يوكفلها تكسي الظاهر ابو الخط ميجيها هالايام
- تعالي اصعدي
= لا شكرا
- تعالي ماكو سيارات تفوت مناه وتاخرتي
= أوك
جانت مرتبكه كلش لأن أبوها ميقبل تختلط بعائلتنا بس استحيت اعوفها وحدها بالشارع
= أخاف تصير زحمه عليك
- لا عادي
بقينا ساكتين هي كاعدة ليورى سألتها عن الطريق لأن مااعرف وين جامعتها
= أخاف بعيده عن طريقك نزلني هنا اني اروح وحدي
- مومشكلة
= شكرا
- مسوينا شي صار أكثر من مرة تشكريني خليني اوصلج عالاقل لباب الجامعه واشكريني براحتج
= هههه
- على مااتذكر جان عندج خط رجال جبير بالعمر موصحيح
= أي بس زوجته توفت بابا هو يوصلني بس عنده شغل اليوم
- اها
وصلتها ورحت لموعدي والفرحه مواسعتني متشوق
أول مشفتها حضنتها حيل اوف فد مشتاقلها
- شخبارج حبيبتي
= مشتاقتلك
ماطولت كعدتنا ربع ساعة دك عليا رقم غريب زيد مسوي حادث عفت كل شي ورحتله للمستشفى خابرت رشيد وأبويا
= الو يابة وينك زيد مسوي حادث خابرني واحد كال بمستشفى ال ..
- شبيه زيد احجي
= يابة لتخاف ماكو شي
- شلون مااخاف اخوك شصاير وياه ويامن متعارك كولي أروح احرك بيوتهم عليهم احجي زيدان لتشلع كلبي ترا تعبان ومريض
= يابة و الله ماادري علمي علمك بس كالي ابنكم بفلان مستشفى وهسا رايحله بالطريق ليضل بالك
- خابر أخوك الاغبر رشيد شوفه وينه
= ميجاوب
- دزله رسالة هسة يشوفها ويجي حاظرني الأفندي
= صار يابة
وصلت للمستشفى صايرة هوسة شفت زيد رجله مكسوره وشوي رضوض ووجهه بيه جروح هواي تذكرت خليل وياه أول مشافني سألني عليه
= يعني تالي وياك زيد
- زيدان مووكتها تعبان ومتكسر
=؛ هالمرة عدت سلامات المرةالثانية خاسرينك خاسرينك
- خليل شلونه ذولي الدكاترة هنا مطاية مسطرة اكوللهم الولد الوياي مايدرون
= اهدأ أعصابك هسة أشوفه
- لتكول لأحد اني مسوي حادث
= كلت لابوي بالطريق
- اهووو المن كلتله
جاي نحجي ودخل علينا أبوي وياه رشيد أبوي مااتحمل حضن زيد وبجى يحبه لأن اصغرنا وأكثر واحد بينا مدلل بس من ماتت امي صارت حواجز لا إرادية عفتهم رحت اني ورشيد نسأل على خليل الدكتور كاللنا حالته خطرة وحيسووله عملية
- أنتم أهل المريض
= ليش دكتور
- إحنا بحاجه نسويله عملية بأسرع وقت
= راح ننطي خبر لاهله
خابرت أبوه ميرد وزهير كذلك خابرت أخوه الجبير إلي بغير منطقه كال اتأخر لحينا بالإتصال على أبوه لحد مااجه وأول مادخل تعارك ويانا رشيد صار عصبي راد يلز وياه بس هداته بالكوة ورى شوي الدكتور كال تكدرون تأخذون زيد اخذناه يرتاح بالبيت ومن وصلنا لكيناها هوسة ببابنا شرطه أمر بالقاء القبض على خليل وزيد لأن طاعنين رجال والرجال طلع نسيبه ضابط جبير اجت بنفس الوقت درر من المدرسه
*********
...
غيداء
الصبح انتظرت بابا يجي يوصلني بس مااجه واخواني مايلفون عالبيت بالسنه حسنه وصلني زيدان شنو طول
شنو رزانه هيبة وكشخه كلش استحيت منه بالجامعه خابرني بابا ماكدرت اجاوب لأن جان عندي محاظرة بالبريك رجعت دكيت عليه
= الو ها بابا
- هلا بنيتي داومتي
=أي
- منو وصلج
= وحدي
- اها
ماكلتله زيدان يبقى يحجي ومالي خلك مشاكل
= يابة البارحه ليش تأخرت وبتت برا البيت
- بابا عندي شغل بعدين احاجيج
= لحظه بس
- شتريدين
= خليل البارحه ماكو وضل بالنا يمه
- شسويله ولد شكبره شكده بطولي ضرب وضربته فلوس وانطيته زواج راح ازوجه شسوي أكثر من هيج اخوج فاشل ماتصيرله جارة مخلصها وي السافل زيد عركهم ونسوانهم على يا ساعه تطيح بينا كارثه من وراه بس الله ساترنا بستره
= وشلون يا بابا غير ابنك بس امي شايلة همه البارحه ليلها منامته
- امج من شفتها وشافتني تحب النكد والحزن مليت اني
= أوك بابا لتضوج
- شلعتوا كلبي
= الله يساعدك زين اليوم متجيني ورى الدوام
- أي ان شاء الله
خلص الدوام بسرعه بقيت منتظرته وماكو مااجه خابرته
- ها بابا وينج رحتي للبيت
= لا يابة منتظرتك مو كلتلي اجيج
- ها لا بابا ماكدر اجي صارت عندي شغلة مستعجلة
بهالاثناء سمعت صوت بنيه تكوله عمو هو سد الخط بوجهي رجعت دكيت عليه مارد خابرت أخوي زهير الي متزوج وعايش وياناا
=" الو زهير
- ها غيداء شلونج.
= الحمد لله تكدر تجيني للجامعه
- لا ماخذ زوجتي لأهلها وعيب اعوفهم
= اها أوك عادي
مفضل زوجته وأهله علينا امي حقها تنقهر لأن زهير صاير غريب عنا رحت وحدي بالطريق شفت بابا واكف يم محل لبيع مواد منزليه وياه ولد صغير تقريبا ٦ سنوات وبنت لابسه ملابس مدرسه يمكن متوسطه ومرة طلعت من المحل تحجي وياه بيده طفل رضيع حطيت ايدي على حلكي من الصدمه تمنيت خيال وجذب الي شفته كمت اضحك على نفسي واكول يمكن كرايب أو شوف شنو عادي يابة شكو بيها يجوز اني أشك عالفاضي رجعت للبيت اول مشفت امي حضنتها
جانت ضايجه وبالها مشغول
= شبيج يمه
- ضال بالي يم خليل
= هسة يجي
-الصبح زيدان خابر أخوه وكاله بالطريق وماكو بعدهم
= لتضوجين متغديه لولا
- لا مااشتهي روحي غداج بالفرن سخنيه واكلي
= إذا إنتي متاكلين اني هم مراح أكل
- وآلله مااشتهي
*********
...لا ولن اتركك حتى تتركني أنت...
زيد
عمري ١٩ سنة تركت المدرسه من الخامس ابتدائي بس أعرف أقرأ واكتب مواصفاتي ابيضاني وجهي مليان حب الشباب ومن غير آثار الضرب لأن جنت اتعارك وي أي واحد بالمدرسه هواي سويت مشاكل وبعدني لحد الان ماتغيرت بل زدت للسوء خليل صديقي من الطفولة جيران جنا بشقه واحد صديقنا مدللنا عالاخير شرب وتدخين للصبح ووعدنا بهواي شغلات تعجبنا بنات وكذا الصبح خابرني زيدان وكالي تعال كلت لخليل وطلعنا جان نايم لأن سهرات للصبح ودايخ من الشرب
= خليل كوم يلا نروح كمل نومتك ببيت أهلك
- روح أنت ماروح اني
= امشي يمعود
رحنا بدراجتي هو وراي ودايخ ازدحامات الشوارع أكو واحد بسايبة صدم الدراجه وعبر كدامنا صرت عصبي غلطت عليه وفشرت هو سمعني بس سكت لأن مكدر ينزل من السيارة يم السيطرة خف الزحام ولكيت الولد ابو السايبة منتظرنا على صفحه
- عليمن تغلط مساعه ها
= عليك وهسة شرايد
صارت غلط منه ومني وفشاير وسب تضاربنا خليل جانت عنده سجينه طعنه بجتفه قريب من ركبته كام يصرخ والتمت الناس إحنا انهزمنا وبسرعه بنص الطريق صار ويانا حادث
*********
درر
...أريدك الآن وغدا وللابد..ْ.
... حبيبي ورفيق دربي إني منك وبك لاتخدعك هفوات الحياة ...
...إني اخاطبك بأقل امكانياتي...
جان يوم النتائج متحمسه أعرف انو محد حيفرح غير رفعت أول مستملت النتيجه جنت متوقعه أخذ ٧٠ لو ٨٠ لأن أبقى بس على شرح أستاذ ضياء وماالحك أراجع بالبيت بس جانت درجتي ١٠٠ وباقي درجاتي كله بالسبعين والثمانين خلص الدوام
= أحبك قبل كل شي
- واني اموت عليج
= محضرتلك مفاجئة
- أي يا الله
= شوف نتيجتي وكولي رأيك
- تقريبا متوقع درجاتج
= أي صحيح اني كلتلك كل درجاتي بالامتحانات
- بس عادي أريد أفرح بيج
انطيته النتيجه شافها
= ها شلوني
- ليش بالإنجليزي ١٠٠
= لازم تفرح
- ليش حاطلج ١٠٠ إنتي درجاتج كله ضعيفه ترا
= قصدك غبيه
- لا
= لعد
- ممرتاحله
= حبي أنت حياتي ليش ضايج هسة
- ضايج من استاذج هذآ الطلعلي صفح
= شبيه
- مامرتاحله واضوج من تجين فرحانه بيه
= مفرحانه بيه بس اكولك هو حباب ودايما يساعدني
- ترا بس وياج هيج
= حبيبي عادي لتنسى المديرة تصير صديقه عمتي ويجوز هي موصيته عليا
- لعد وباقي للمدرسين ليش مامووصيتهم ليش بس هذا
= ترا خربت فرحتي والله
- تعاي اعزمج
=مااريد
- غير أخاف عليج حبيبتي
= من شنو تخاف
- تعاي خلنروح
= مااريد أروح لمكان
- موبكيفج
أخذني رحنا لمكاننا المتعودين دايما نروحله
= لوتدري شكد احب هذا المكان
- حتى اني أحبه وارتاح بيه
= رفعت ليش منروح للأمام الكاظم( ع) سوى
- ليش لا نروح بس شوكت صعبه شوي
= هالايام مدرستنا ناوية على سفرة اني مراح أروح
- حلو اتفقنا بأي وقت تردين كوليلي
= أحبك
- اعشقج
...مع كل ثانية من ثواني الساعه يزداد الحاحي بالدعاء استجب دعائي يا الله...
وصلت للبيت لكيت هوسة بباب بيتنا ودرويات شرطه
*********
ضياء
...رماد قلبي أصبح من فرط التعب...
...النظر اليك هو نعمه ورزق رزقني به الله دون البشر...
... إنتي الوحيدة ياصغيرتي التي أراكِ أجمل مافي الكون إنتي النقية اللطيفة والبريئه لكنكِ صنعتي نيرانً في قلبي لن تهدأ حتى تحرق كل شئ...
هواي شايف الأحلى منها والاذكى بالقاعه كل البنات حلوات وعيني ماركزت على أي وحده بس هي ماخذة كل تفكيري طول الدرس صافن عليها وابتسم اهتمامي بيها فاضحني حتى بدرجاتها اغش واكتب علامات كاملة من وين طلعتي يادرر اففف
...أرى الموت أرحم لي من تفكيري بكِ هو لم يكن تفكير كان بمثابة نار تلتهم الحطب ولاتبقي غير الرماد منه ...
...انقذني ياالله من هذا العشق...
... الإنتظار الشوق اللهفة كلها تأخذني إلى الضياع بكِ أكثر فأكثر هي إنتي لعنه حلت بي لتعاقبني...
...كل يوم اتوه بمتاهات التلذذ بعذاب هذا العشق...
...لالم الشوق لذة لايعرفها إلا من عشق...
...كوني لي أرجوك ِ...
...في بداية يومي ونهايته احبكِ لنفسي فقط...
...كيف أخرج هذا الجمر من باطن قلبي...
... لو كنت لامحاً نظرة حبٍ واحده منكِ لعبدتُ الله شاكراً ...
...ومالي غير تأمل تفاصيلك بدقه...
جان يوم النتائج لأول مرة العب بدرجات طالبة عندي وانطيها أكثر من حقها ماادري شنو خلاني اسوي هيج
*********
هالة ( أخت رفعت)
عمري ١٧ سنة مواصفاتي حنطاوية طويلة ضخمه شوي شعري كيرلي خشمي شوي جبير ادرس بمدرسة حكومية حالتنا المادية وسط طبعي عصبية وعنيدة وإذا شفت شخص وكرهته من أول نظرة بعد مااحبه أبد وأشد وياه عندي علاقه حب وي صديق أخوي راشد محد يعرف بس مرة أخوي لأن تصير بت خالتي وصديقات من زمان تعرفت عليه من جنت اروحلهم للبيت أخته تصير صديقتي وهما جيرانا كلما اروحلهم هو يسوي نفسه يدخل على أخته صدفه وبدون ميعرف يباوعلي ويتبسم إلا أن بيوم اجاني للمدرسة ولحكني اعترفلي بالبداية خفت وعفته بدون ماانطيه جواب أخته وياي بالمدرسة كل يوم تكولي يريد يعرف رايج كلتلها مااريد علاقه أخاف أهلي يعرفون باليل راسلني هو حجينا سوى كالي اخطبج بس يصير عندي فلوس جنت ممرتاحه كلش وخايفه بس وافقت مرات اجرجر رفعت بالحجي عن راشد يكولي هو يصادق بنات وعنده سوابق بس راعي وكفات دخل براسي الشك ماعندي ثقه باحد مرت أيام بعلاقتنا وكلتله أريد اشوفك ونلتقي عزمني بمطعم رحت بملابس حلوة مو ملابس مدرسة اتفقت وي أخته من أوصل للمدرسة انزع العباية
= شوفي بس أرجع كبل انطيني العباية
- خوش بس بسرعه مااكدر أنتظر هواي
= أي نشوف تاليها وي اخوج هذا
- شبيه معاجبج
= لا معاجبني ارتاحيتي
- دروحي يلا
اجه أخذني
= بعد وقت وين جنت
- حبي والله بالكوة صحتلي فرصة
= بجيت مو
- شبيج متنرفزة
= يلا خلنروح بس مو تأخذني لمطعم أخوي وحبيبته العوبة
- شبيج وياهم هههه تغارين
= هيهي ماكو شي يضحك والله
- يلا حبي
بالمطعم كاعدة اباوع عالبنات كلهن لبسهن أحلى من لبسي وكلهن حلوات
- عجبج المطعم ؟
= لا
- ليش
= متشوف شلابسات قابل مثلي
- شبيج حبيبتي
= البنات كلهن أحسن مني كل وحده حبيبها يجيبلها أشكال مومثل حظي
- شبيج هالة عندي ومقصر اني
= دسكت يمعود
-متشوفين درر أغنى من اخوج وفلوس عدها وهي الممنونه من اخوج
= اها درر ترا خبصتونا بالبيت أخوي درر يادرر وهنا أنت
- محد خاابصج بس اكولج البنية مايوم عيرت اخوج أو حسسته انو هو فقير بالعكس محترمته ومقدرته
= اهووو
- شنو تاكلين
= أي شي
أكلنا وطول الوقت ضايجه وراشد بس يمدح بدرر
- تونستي كلبي
=أي
- من ورى خشمج
= لازم اركص يعني حتى تعرفني متونسة
- اوف منج ومن لسانج صدك اخوج يريد يعرفج على حبيبته
= يعني المفروض افرح شنو على منو متعرفه مثلا على وزيرة
- شبيج اخوج لأن يحبج ويعزج كال اعرفها على حبيبتي
= ماادري ماكالي بس شي أكيد من يكولي أروح وياه واشوفها لست الحسن والجمال
- عفية
رجعت للمدرسة لبست عبايتي مجنت فرحانه بشي ولا راضية أول مدخلت للبيت رحت لمرة أخوي سولفتلها وهي لاتحل ولاتربط كل شي متفهم مااعرف كلش هادئة وحتى متناقشني ومتحجي هواي كلامها قليل عبالك روبوت بس تسوي أشياء معينه وروتينيه كالتلي ميصير غلط وعيب لايدرون اخوتج وتصيرلج مشكلة اني طنشت عفتها ومشيت رحت ادرس وامي صاحتلي أنظف الإستقبال حيجون خطار
= يمه منو جاينا
- كرايب ابوج
= شيريدون
- جايين يشوفون ابوج
نظفت بسرعه ورحت ادرس اكمل واجباتي اجوي خطار جهزت الضيافة أخذهم رفعت باليل راحو خطارنا سويت عشا وتعشينا مرة أخوي غسلت المواعين رفعت صاحلي
- هالة
= ها خير شتريد
- اكفخيني بعد
= شتريد خلصني أريد أنام تعبانه
- باجر تروحين وياي تتعرفين على درر
= أي عادي ليش لا
- حتحبيها
= ياريت بس شنو المناسبة ليش أتعرف عليها
- دايما اسولفلها عنكم كلكم وعلى سوالفي حبتكم دايما تكولي اتمنى أتعرف على أهلك واني مكدر اجيبها هنا فكلت اخذج تشوفيها وتتعرفين عليها
= أوك باجر؟
- أي باجر هسة اخابرها واكوللها
= خوش
اني نمت الفجر كعدتني امي للصلاة وبعد مكدرت أنام راجعت امتحاني وكلت أشوف رفعت ياخذني وياه اليوم بس امي كالتلي حبيبته ممداومه إبن عمها مسوي حادث وماكدرت تجي
يتبع ....🏵