😘🌺
# البارت ٤١
*******
ضياء
نفس الروتين الممل والكئيب لمدة سنتين ماكو شي تغير
كنت كاعد عالقنفه واباوع عالبلازما وعنود طلبت عشا جاهز
عنود-: حبيبي اجيبلك العشا يمك نتعشى سوى
ضياء-: أي
عنود-: أحبك ان شاء الله الأكل يعجبك طلبته من مطعم معروف الكل يمدح بيه
أكلت وعيني على ماعوني وبالي مو يمها شنو تحجي
عنود-: اكول حياتي ليش مانطلع ورى العشا ضايجه خلينا نغير جو
ضياء ': لا
عنود-: لخاطري
ضياء-: منو كال الج خاطر عندي
عنود ': أوك
عافت الأكل وراحت للمطبخ موبايلها جان يمي واهتز بإسم مرام
ضياء-: عنود تعالي مرام اتصلت
أخذت موبايلها ورى شوي اجتني
عنود-؛ حياتي الأسبوع الجاي أروح لعرس مرام عزمتني
ضياء-: تروحين وحدج
عنود-: إذا اكولك تروح وياي ماراح تقبل ليش اعصبك وازعجج
ضياء-: اني أروح وياج شي أكيد عزمتني مرام مو صحيح
عنود-: ماكالت بس شي أكيد من عزمتني معناها إحنا الإثنين
ضياء-: اها أوك منو العريس
عنود-: دكتور قبل فترة كالتلي عنه وهواي مدحته تكول كلش اتفاهم وياه نفس التفكير ومن هالحجي حسيتها حابته من صدك وكلش مرتاحتله
ضياء -: حلو
عنود-: أي بابا بالبداية ماوافق بس أقتنع بالاخير
ضياء-: منين عرفته يعني شلون تعرفت عليه الظاهر كانت بيناتهم علاقه وتعارف
عنود-: أي حبيبي هم تفاهموا وفجأة قرروا يتزوجون يعني ماهمهم كلام الناس وشنو راح يحجون وهي تعرفت عليه من خلال صديقتها أنغام وبصراحه حسيت اختيارها موفق
ضياء-: أي
عنود-: أروح أجهز نفسي وأتفق وي ماما عالصالون وهالامور
ضياء-: أوك
مر أسبوع ورحت للعرس كان بقاعه مختلطه وشفت هناك إبن عم درر كان حاقد عليّ أول مادخلنا غلط عليّ وكالي تدفع الثمن ولو بعد حين ههه ضحكت عليه استفزيته
احتراماً للناس الي بالعرس سكتنا وماحبيت افتعل مشاكل
وكانت الصدمه درر اجت هي وزوجها من بعد هاليوم علاقتي بعنود زادت من سيء إلى أسوء يمكن كان أكو بصيص امل بس اختفى
بدأت المشاكل تزيد أرجع سكران أول ماادخل للبيت واشوفها اطردها بالشارع بملابس النوم والجيران ياخذوها يمهم يخابرون أهلها ويجون ياخذوها اقفل باب البيت وماادري شنو يصير مايصير
اكعد الصبح افتهم الي صار من الجيران وتبدي الملامه والحجي الزايد
اجت ام عنود تصيح بالشارع تغلط تفشر وخابرت خوالي وامي اجوي وكل واحد سوى روحه الكامل المكمل المعصوم
ويتكلمون وياي كأنما هم انقياء بلا ذنوب ومعاصي
ام عنود بقت تغلط على درر تكولي كاتل نفسك على وحده من الشوارع سافله وساقطه من رجال لرجال طفرت روح روحي اجيت إلا شوي اكوم اضربها لو مو خالي لازمني عفتهم وكلتلهم إذا اجي والكاكم هنا أطلق عنود وانتم بعد بكيفكم
أهل عنود كل شي ولا اكوللهم هيج عنود رعنه أقل شي ماتتحمل تروح تنتحر مرة أبوها اخذاها يمه وكاللها عوفي ضياء وعيشي حياتج هي هددته تحرك البيت وتنتحر لهذا ماعدهم خيار ثاني
كمية الحقد والكراهية والغيرة من رفعت كنت مااعرف شلون أتخلص منها ولاكنت مستوعب شلون هو ربح بدرر واني سويت كل شي علمودها
بقيت ادز رسايل لرفعت أحاول اقهره واوهمه بخيانه درر
حاولت بهواي طرق رخيصه اخلي رفعت يصدق إنه اني ودرر على علاقه سابقه وبليلة عرسه خابرته كنت منتظر ومتحمس أشوفه يطلقها وترجعلي درر بس ماصار شي وبقى مستمر زواجهم كنت مصدوم شلون رجال يقبلها على نفسه إنه زوجته عدها علاقه سابقه ومو بس هيج سمعته كلام ودخلت بقلبه الشك كلتله نمت وياها بعد مااعتقد اكو أكبر من هيج سبب يخليه يعوفها
هالشي مانفعني
ارقامهم عندي بس ماكنت أعرف أماكنهم خالي الصغير كالي اجيبلك أخبارهم أول بأول بس مستحيل انطيك عنوان بيتهم لأن يعرفني راح أسوي كارثه
استمر الوضع على هالحال وجربت ادز رسايل لخط درر وكل الرسايل كانت تبرهن إنه إحنا على علاقه حالية مستمرة بعد زواج كل واحد من عدنا
وهم مانجحت هالفكرة وفشلت
أكثر من مرة طلبت من عمي ينطيني عنوانهم بس ماقبل
لحد ما شفتها بالعرس
وبعد المشاكل الي صارت بيني وبين عنود رجعت للبيت
عادي ولا كأنه زوجتي هي تهتم وتحاول بكل الطرق بس بلا جدوى
إلى أن أمها كالتلها على حل يرضي جميع الأطراف
*********
رفعت
بعد مارجعنا من حفلة ختان ابن منتظر
يمكن أني الوحيد إلي كنت مااريد أرجع للبيت
كعدت وي امي وابوي ودرر بغرفتها حسيتها ضايجه وشابعه قهر وساكته تكابر
واني متهرب من زينب تأخر الوقت رحت للغرفه
كالعادة زينب أبنها يصرخ اليل كله والنهار وبتها تبقى سهرانه عالايباد وزينب تسميني خوية ناسية اني متزوجها وحتى الربطه ماتنزعها كدامي تستحي تبقى نايمه بيها
اليوم على اساس ليلتنا بالكوة ناموا البنت والولد
كنت محرج ومستحي أكثر منها وأبدا مامرتاح يعني بكل معنى الكلمه كنت حاسسها أختي وماعندي أي مشاعر تجاهه شلون اكون عائلة وياها
شعور صعب والقلة تمر بهيج إحساس
حاولت اتقرب منها بس أحس كل شي مقيدني والف صوت بقلبي وعقلي يصيح لا
ماكدرت ولا هي كدرت نمت بدون مااسوي اي شي
كعدت الصبح امي كالتلي على روحه النجف ودرر وياهم ياخذوها ماقبلت بس من شفت درر عيونها مورمه حسيتها محتاجه تزور وامي بقت تقنع لحد ماوافقت رحت لشغلي وكل شي مثل ماهو
من رجعت للبيت استحي اكول لزينب اسويلي غدا ومتعود كل شي درر تسويلي حتى دكم القميص هي تفتحهن
كلت لهالة وسوتلي أكل شلون ماكان حتى بارد
البيت بلا امي ودرر خالي ومابيه أي نكهه
خابرني منتظر كال خطار جايكم
اجوي يخطبون هالة
أهلي رجعوا من الزيارة درر ولا باوعتلي واني روحي ولهانه عليها
باليل كلمن راح بدربه بقيت بس اني حاير بزماني متزوج ثنين وكل شي مامستفاد وحده احبها واريدها بس الف حاجز وحاجز بيناتنا والثانية أحس بعدم وفراغ تجاهها مااريدها أصلا
رحت لجماعتي كلت بلكي اغير جو شفتهم كلمن يخابر حبيبته لو مرته ويتغازلون بس اني طاكني الجفاف
سألتهم على راشد لأن ماموجود خابرته مايرد وهو مناه أبوه مريض
مر وقت ضحك وشقا وي الولد
وبالصدفه سمعت موبايلي يدك لأن هوسة ماانتبهت
هالة تتصل
رفعت-: الو ها هالة شكو
هالة-: رفعت تعال للبيت شوف منو رجع
رفعت-: منو.
هالة-: تعال وانت تعرف منو بس بسرعه
سدت الموبايل
ورحت من وصلت للبيت سمعت صوت بجي ببيتنا ياستار
من دخلت شفته محمد!!!
وأخته حاضنته وتصرخ تشكيله حالها
سلمت عليه وخطية سولفلنا كل شي صار وياه
رفعت-: يا أخي قلقتنا عليك وماضل واحد ماسألناه ردنا بس خبر منك نريد نعرفك عايش ميت
محمد-: والله ياخوية من أول مارحت ووصلت لمصر انباكت محفظتي وكل شي بيها حتى الموبايل انباك
وضليت بالضيم لا من اكدر اخابر واحد منكم ولا من اكدر أرجع وخلف الله على الناس الطيبة الي ساعدتني
وبقيت ادرس وماكدرت اجيب ارقامكم انشغلت بالعيشة و٢٤ ساعه كنت مشغول حتى أحقق إلي أريده بصعوبه اتأقلمت وعشت الغربة صعبه ومااسولفلك شنو صار وياي هواي أمور وعراقيل واجهت مسيرتي بس رب العالمين ماضيع تعبي عالفاضي وكدرت أحصل شهادة الدكتوراه بفضل الله سبحانه وتعالى
والله وفقني بالزواج وتزوجت بنت مصرية وعندي ثنين بنات الحمد لله
رفعت-: تستاهل كل الخير بس كولي شلون اجيت وشلون عرفت مكاننا إحنا انتقلنا قبل فترة
محمد-: بصراحه أول ما حطيت رجلي بالعراق قررت أروح لزينب لأن كان كل ظني بعدها هناك بس من وصلت شفت بيت عيالها مهدوم ومن الجيران عرفت إنه الولد ميتين بعد المصيبة الي صارت والبيت انهجر ومن المطر البيت والسقف واكع والباقي من عيال زينب شالوا ومحد يعرف عنهم شي
لاتريدون حالي انهبطت وارتفع ضغطي ورحت للمستشفى شوي ارتاحيت
تالي اجيت لهنا وكنت ناسي منطقتكم والعنوان بس عن الطريق السؤال كدرت أوصل لبيتكم القديم من وصلت شفت منتظر وهو انطاني عنوانكم وشرحلي كل شي صار وي زينب راد يخابركم ويكوللكم عن جيتي بس حبيت اسويها مفاجأة
رفعت ': اشتاقينالك والله وشكد ضل بالنا عليك لحد مافقدنا الأمل برجعتك
محمد-: بعد عرفتوا الأسباب واني شفت حياتي بمصر واستقريت هناك بس بقى الناقصني أختي زنوبة هاي امانه عندي وريحه من امي وابوي كلش كافي الغربة العايشها ومااريد بعد فراق تعبت كلش
ضميري يأنبني كل هذا صار وي أختي واني ما ادري وماوكفت وياها باصعب ضروفها
رفعت-: محمد إحنا أهلها ليش بحجيك هذا تحسسنا غربة عنكم
محمد-: أنتم أهلي وعزوتي والنعم منكم ومن وكفتكم وي زينب لو ماانتم شمدريني بحال زينب شيصير
رفعت-: لاتتعب نفسك بالتفكير الي صار صار أخذ راحتي نام ولا تشغل بالك
عفته يسولف وي أخته يمكن بقوا اليل كله سهرانين
اني بقيت افتر وتالي رحت لغرفه درر
وراكبه رأسها ماتقبل ادخل للغرفه وتعاركنا
بس بالاخير خضعتلي
ليلتنا كانت من أحلى الليالي
بس ماكملت راحتي
الصبح اجاني إتصال مفاجىء من منتظر
منتظر-: الحكككك عليّ بيتي احترك
ركضت بدون مااكول لأحد ماردت امي وابوي يقلقون وهم مرضى
من وصلت شفت المنطقه من بعيد صايرة غيمه سودا
والبيت كاب كله والاطفائية بعدها ماجاية زوجه منتظر تلطم على راسها وتصيح يمه صوفي بقى بالحمام
الجيران يركضون بسطولة المي
منتظر بالبيت ردت ادخل للبيت والناس منعوني لأن كل شوي ينفجر شي والوضع خطير ومايبشر بخير
زوجه منتظر بالكوة لازماتها النسوان
لفيت على راسي خاولي مبلل ودخلت الدنيا صبح
بس بالبيت جان اضلم والكهرباء طكت الوايرات كلهن مايعات مااشوف أي شي الدخان أسود
رفعت-: منتظرررر
اسمعه يكح ومصطفى يبجي باب الحمام انقفل عليه
ولد جيرانا الشباب دخلو وياي وساعدوني فتحنا الباب منتظر أخذ ابنه وطلع بالكوة
اني والشباب بقينا نطفي بالبيت وقسم من الأغراض طلعناها
*********
درر
من ركض رفعت اجتني عمتي مفزوعه
ام رفعت-: شكو شصاير رفعت شبيه
درر-: عنه والله مادري منتظر خابره وبسرعه راح حتى ماكال شي
عمتي بسرعه صرخت وكامت تبجي كالت لعمي هسه تأخذني لبيت ابني خطية محمد من سمع كبل كال اني اخذكم واني بعد المن باقية هم رحت وياهم ومن وصلنا
سمعنا الناس تكول بيت احترق وكلها تتراكض
مااكدر اوصف حالي وحال عمتي
من شفت البيت ورفعت ماكو كبل ركضت مثل المخبلة اريد أدخل للبيت
لزمني نسوان محد خلاني افوت والبيت كله احترك وكل شوي نسمع صوت إنفجار
ملخت روحي أصرخ واكوللهم طلعوه أريد رفعت ومحد يسمعني لحد ما دخل منتظر
وطلعوا رفعت قميصه محترك عليه صدره كله دم وراسه ينزف ولا حس ولا نفس
...يتبع
