#البارون
البارت السابع
*********
...ياريت كل الناس يحبوني مثل حبك...
...
...بأي وجهاً كان سيكون الفرح جمالا له
الفرح بجميع الأشكال جميل...
رفعت
ورى ماوصلت درر رجعت للمطعم أعصابي منهارة شنو هاي إذا مدرسة أهلية وهيج لعد حكومية شيسون بيها واني درر أعرفها فقيرة وبسرعه تسامح الشخص اليأذيها فوك كل سوته البنية بيها ومتقبل يدزون على ولي أمرها بس أي بنت مثل درر تخاف من المشاكل لأن ماعدها سند قوي بس عمها ومايعرف عنها شي يادوب المصرف مالتها مطلعته منه اففف شوكت اتزوجها واخلص شافني راشد ضايج وبس أدخن
- خيرك شكو
_ ياخير
- شبيها درر
_ عوفني راشد أعصابي تعبانه وخاف اطك وياك وتسمعلك كلمه مني
- أوك براحتك بس لتدخن بالمطعم يشوفك المدير ويسويلك مشكلة
_ خ،، بعيشتي أي والله
طلعت برا شوي حاولت اهدأ شمرت الجكارة ورجعت للشغل اليوم كان أكو زخم والمطعم مليان ناس بقيت للعصر كنت بالمطبخ احضر بالمقبلات وطفل لزمني من بنطروني نزلته طفل صغير تقريبا عمره ٣ سنوات هيج
_ عمو متكولي شعندك هنا
- هذا منين
_ ماادري يجوز إبن واحد من الذبائن واجه هنا
- راح أخذه أشوف إبن من
_ أوك
راشد شال الطفل بس الطفل كام يبجي يمكن جوعان لأن من شاف الأكل كام ياشر ويكولي عم أخذته منه افتريت عالناس محد كال ابني والطفل بس يبكي بالمطبخ كعدته بحضني واكلته بالكوات سكت انوب من شبع حرت بيه شلون أهله وين هذا هم كام يبجي يريد امه كلت لرشيد راح اوكف بالباب بلكي أهله مضيعينه وقريبين من المطعم وإذا ماكو اشوف شسوي اجوي شرطه كالولي أكو طفل ضايع وامه تدور عليه كلتلهم هذا هم خابروها اجت بسيارتها بنية شابة شافت أبنها وكامت تبكي بالزايد الشرطه رزلوها كالولها مرة ثانية انتبهي زين راحو الشرطه وهي تشكرتني وانطتني فلوس رفضت
= مااعرف شلون اشكرك أقبل هاي الفلوس عالاقل
_ العفو أختي هذا واجبي ماسويت شي
= إذا تسمح ممكن تنطيني رقمك أخاف احتاجك
_ إحنا بالخدمة أختي تدللين
انطيتها رقمي مبينه بنت ناس وهو ودلال قمه الأدب والأخلاق بعد يوم طويل ومتعب رجعت للبيت هلكان من التعب صليت ونمت
*********
ضياء
إلي صار وي درر نرفزني نظرتها البريئه وشفتها من تبرطم شكد حبيتها اصريت انو ولي أمر هاي الي إسمها عنود يجي واني أعرف شلون اتصرف وياها واشوف شلون تتجرأ بعد عليها امي ماقبلت ولا درر لأن محد يحب المشاكل بس اصراري أكبر من هيج من خلص الدوام ركبت سيارتي واتجهت للجم بالطريق ضربت سيارة بنية بدون قصد نزلت عيطت عليها بعصبية لأن ماتعرف تسوق
- متكوليلي شنو قضيتج إذا متعرفين تسوقين ليش مورطه نفسج بسيارة
= ضياء؟ مو
- منو حظرتج ومنين تعرفيني
ركزت بملامحها مو غريبة مااتذكر وين شايفها بالضبط
= اني مرام شنو متذكرتني
- امم التقيت بيج بقاعه
= أي شعجب نسيتني
- مااتذكر غير الأمور المهمه والناس الاهم
= ماكنت أعرفك عصبي
- أصلا إنتي متعرفين هو مجرد لقاء تافه
= هدأ أعصابك حبي على شنو متنرفز سيارتك صار بيها شي
عفتها واجيت أصعد بسيارتي لأن فعلا ماطايق بشر رحت للجم أمي تخابر مالي خلك اجاوب أحد العصر رجعت للبيت سلمت على امي ورحت بغرفتي فتحت فوني لكيت إتصالات عالواتس من رقم غريب شفت الصورة نفس البنت الي صدمت سيارتها هاي شتريد مني دخلت للحمام سبحت خلصت أريد البس واطلع لأي مكان اغير جو بس كنت ناوي البس قميص معين بس مالكيته لبست البنطرون وبقيت بلا قميص رحت لامي اسألها بس نايمه ماهان عليا اكعدها هي تعبانه وموبايلي احترك من الإتصالات وفوكاها إتصال Camera فتحت كام بعصبية
- خير؟ ممكن أعرف منين جبتي رقمي
= هههه مرام اني مايصعب عليا أجيب رقم أي شخص
ضلت صافنه
= الظاهر تحب تلعب رياضة
- خابرتي علمود هالشي
= لا بس حبيت اتطمن عليك لأن كنت ضايج
- شكرا لاهتمامج بس مابيا شي
= سيارتك بيها شي عادي من باجر اصلحها
- لا ليضل بالج اني هم غلطان لأن كنت اسوق بسرعه كبيرة
= أحب صراحتك كلش
- نتشابه اني وياج بهالصفه
= راح تكتشف مع الوقت انو إحنا متشابهين بهواي أمور
- صحيح هيج الظاهر من البداية
= أنت مدرس بمدرسة،،،،
- أي شلون عرفتي
= أختي عنود أبوي نقلها لمدرستكم لأن يعرف والدتك
- اها عنود اختج ابد ممتشابهات
=ليش شمسويه عنود أختي شوي لسانها طويل عصبية متسكت إذا واحد تجاوز عليها
- تعرفين شسوت اليوم
= شسوت هي بلة متخلص مشاكلها إحنا كل يوم جايتنا شكوى من المدرسة وننقلها
- يعني عدها تاريخ
= هههه لتظلمها ترا عادي بهالعمر شوي الإنسان يصير عصبي
- لا عمر ولاهاي مرام اختج ميصير يكون تعاملها هيج وي غيرها
= اني مااعرف شمسوية بس هي أغلب مشاكلها وي البنات أو المدرسات كجدال حاد أو نقاش بس هيج
- اختج اليوم ضربت وحده من أفضل طالباتي
= واصلة للضرب بصراحه ماعندي خبر بهالشي
- هسة إنتي وين
= بغرفتي
- احجي وياها مااريد هذا الشي يتكرر مرة ثانية وبالذات مع هاي الطالبة إذا صار وتكرر فمن هسة شوفولها غير مدرسة
= لا كل شي ولاهاي تعبنا اني وبابا لحد ما لكينا مدرسة تعجبها
- أوك هسة أروح اني من رخصتج
= أوك حبي الله وياك
لبست وطلعت وي أصدقائي مأجلين سفرتهم للشمال علمودي اتفقت وياهم بعطلة نهاية الأسبوع بس جانو متفقين غير إتفاق قنعوني باجر أروح وياهم واخذت إجازة ٣ أيام ومااعرف شلون راح اقضي كل هذا الوقت بدون مااشوف درر امي ماعارضت بالرحلة أصدقائي كلهم اجو ويانا ٢ بنات وحده حبيبه صديقي والثانية مرام تونسنا الجو حلو الصبح خلصناها تصوير صديقي مصور وعنده أستوديو وجاب كامرته وياه صور المناظر تشرح الصدر والشلالات والزرع كلش حلو مو أول مرة اجي من جنت صغير امي تأخذني ومن كبرت تعودت عالاماكن امي ماتروح بس بالعطلة الصيفية لأن عدها شغل ومو دايما أروح وياها صار وقت الغدا اني كل ظني نتغدا بمطعم
- أعرف مطعم يخبل كل مااجي اروحله
= لا محلو هيج اني جايبة طبخ بيت يجنن خلنتونس هنا نكعد وناكل
الشباب حبو الفكرة وبالذات من طلعت جدورة الأكل من الثلاجه والسفرة كل شي محظرة على حسب الأصول ريحه الدولمه فاحت فدشي الشباب ماتحملو بدوا ياكلون ومسوية برياني كبة موصلية وصينية بقلاوة وزنود الست فرشنا السفرة كل الناس كاعدين والأطفال يلعبون واكو أزواج جدد جايين يقضون شهر العسل بهالمكان مرام شافت طفل يلعب وكع بقت تباوعله ونظرتها غريبة جانت ماعرفت افسرها كومته انطته جكليته واجت أمه أخذته منها بقينا للعصر سوالف ضحك ونسة خابرني واحد من الأساتذة الي بمدرستنا هذا واحد عند هوس بشغله ومايحب أي نقص كالي لازم تداوم باجر علمود متصير خربطه بالدروس ولازم نسوي خطه دراسية لأن الامتحانات حتبلش كلتله أوك العصر ادزلك جواب وفكرت كلت الغي إجازتي واداوم لأن ماكو فايدة الهدف إلي جنت أريده من هالرحلة فاقد الامل منه ماجاي اكدر أنساها كلما أشوف بنية اتخيلها درر هاي الأمور جنت إذا أشوفها بالأفلام أضحك بس صارت وياي مرام تسولف وياي وتضحك حتى نبره صوتها اتخيلها بمرام كلت إذا ابقى بعد راح اتكئب بالزايد رجعت ضايج وتعبان نمت تحلمت بدرر مااتذكر الحلم بس كعدت متضايق داومت شفتها تعرج
*********
مرام
عمري ٣٠ سنه مواصفاتي حلوة رشيقه جسمي مغري بشرتي بيضه شعري قصيرصابغته ثلجي أحب أهتم بنفسي وبجمالي اني وأختي عنود توارثنا هالشي من امي لأن معروفه بجمالها أعيش وي بابا وزوجته وبنتهم امي تطلقت من بابا وعايشه يم خالي وعدها مركز عناية بالبشرة سبب طلاقهم هو زواج والدي من حبيبته السابقة لأن مايحب امي او نكدر نكول يحبها فقط كأم لبناته هي من أقارب بابا كانت تحبه من زمان وأهله جبروه عليها بس هو مانسى حبيبته وبعد كم سنه تزوج عليها وامي ماكدرت تبقى وياه وصارت مشاكل هواي لأن امي إنسانه ماتسكت عن حقها حتلو وإذا حقدت أو كرهت شخص فمستحيل تنسى تنتقم منه وأختي عنود النسخه الأصلية منها واني مثل ماامي تكولي ماطالعه عليها ومااشبها نهائيا من بابا تزوج حبيبته امي مسكت وحاولت بطرق موزينه تخرب علاقته وحتى فلسته وهواي أشياء سوت للأسف ولحد الآن مستمرة وحاقدة على شريكتها وبنتها وهواي مكايد تسوي أختي عنود تكره زوجه أبوي وحتى أختنا إخوان ماعدنا اما حياتي الشخصية من كنت بالجامعه حبيت بس للأسف حبيت الشخص الغلط تخرجنا سوى وراها تزوجنا خالي وامي ساعدوه حتى يتعين وصار عنده شغل ومرت سنوات إحنا عايشين بسعادة إلى أن بيوم وليلة تغير كل شي كان يوم عادي وصلني لأهلي وكلتله حبات يمهم لأن حفلة الحنه مال بنت جيرانا وبنفس الوقت هي صديقتي هو وافق رحت للحفلة بس دخت وتخربطت امي وابوي اخذوني للمستشفى وطلعت حامل كنت طايرة من الفرح وماكدرت اخابر زوجي لو أنتظر لليوم الثاني حتى ابشره بهالخبر الحلو امي ماقبلت لأن دنيا ليل إني عاندت ورحت دخلت للبيت بسرية وبهدوء حتى اسويها اله مفاجئة بس أول مدخلت سمعت ضحكه بنية صوتها مو غريب للأسف نبضات قلبي احسها صارت ثكيلة بالكوة كمت أتنفس أريد أوصل للغرفة حتى أشوف واقعي المخزي والحقير حتى خطواتي صارت بطيئة كل خطوة بألف سنه من فتحت الباب شفت اقرف شي بكل حياتي صديقتي وزوجي بالفراش عفتهم ورحت بدون ميشوفوني ماكدرت اسوق سيارتي خابرت امي ارجف وابجي اجت امي فضحتهم بالمنطقه ماجنت رايدة افضحهم خابرت امي بس علمود تأخذني بس هي كالتلي لو يبقى آخر يوم بحياتها راح تنتقم من صديقتي وزوجي وماراح تعوفهم بحالهم إلا تشوفهم الويل وتندمهم على كل شي من بعد هاي اليلة تطلقت وحاليا عندي ولد عمره سنه ونص أول ماجبته للدنيا امي أخذته مني وانطته لابوه حتى ماتعذب بيه تمرضت وبجيت أخذت قطعه من روحي وشمرتها كالتلي باجر عكبه تتزوجين والولد ماراح تبقين دايمتله مع الأيام نسيت أو عالاقل تناسيت من علاقه لعلاقه بس محد عجبني ولا واحد مثل مااني أريد وأتمنى
*********
غيداء
على صوت صراخ امي كعدت مرعوبة كل ظني كنت بحلم وياريت كان حلم أخوي زهير توفى شلون وليش و شوكت كلها أسئلة أكلت دماغي قبل أسبوع أخوي أخذ زوجته وعزل بيها ببيت وحدهم لأن كثرت المشاكل بأخير فترة وزوجته كامت تتجاوز وتغلط على امي وامي تسكت بش اني مااتحملت وكلت لبابا وهو تعارك وياه بس هو الله يرحمه ماكان ينطي بزوجته واخذها وزعل من عدنا امي زادت همومها تخابره وميجاوب أخير مرة ردت زوجته وكالتلها أنسي ابنج وغلطت عليها وضلت امي بحسرتها تبكي ليل ونهار تريد تشوفه ومن صار الصار بعد تدهورت حالتها سبب وفاة أخوي على حسب كلام مرته دخل عليهم حرامي وقتله
*********
درر
دراستي أهم شي أكل دماغي رفعت بهاي الجملة بس و الله مليت مالي خلك بالبيت محد غير زيد انوب اجه زيدان باليل كلش اجه عمي سكران كلب البيت علينا كلاب كسر التحفيات والكراسي طلع بالشارع فضحنا كدام الناس هذا الشي عادي موجديد متعودين على هالامور دخلناه جوة زيدان وزيد كالولي حضريله الحمام هو كام يتقيأ دفعهم ورجع يكسر بالاغراض شمر عليا شيشه عطر كمت ابجي من الوجع بضرف ربع ساعه رجلي ورمت وصارت خضرة هم موزركه احس انعوجت حتى مشي مااكدر خطوة امشي زيدان سبح أبوه بالكوات شالوه ونيموه شلع كلبهم هو سمين وضخم
- امشي خلاخذج للمضمد
= مااكدر امشي
زيد كالي اشيلج اني ماقبلت بالكوات ضغطت على نفسي واتحملت الوجع بس شنو اعرج أعصابي كلها تشنجت المضمد انطاني مراهم وعصارتين وعكازة لأن كمت اعرج وامشي بتك رجل
... إلهي انني رضيت بكل شي ولكن لا تؤاخذني إذا زاد اختبارك ...
اليل كله اتلوى من الوجع حتى صخنت الوجع البرجلي موتني دهنتها بعصارة وميفيد توجعني شلون راح اداوم باجر اباوع لنفسي بالمراية وجهي صار اصفر وعيوني ذبلانه من البجي صارت ب٦ واني منايمه بس ساعه ونص حتى الإمتحان نسيته وماراجعت أي مادة رأسي حينفجر من كد مايوجعني لبست ملابس المدرسة حتى مالي خلك ارتب شالي زين شعري مامشطته ووجهي غسلته بس بمي محد بالبيت كالعادة حتى ما ادري وين راحو عسى مااموت محد يعرف رفعت البارحه ماخابرني طلعت بقيت منتظرته مااجه هاي أول مرة مايجيني انكسر خاطري اني بهاي حالتي محد وياي كنت محتاجه لو بس شخص واحد يهمه وجودي الأهل إذا راحوا محد راح يهتم بيك لازم تحير بنفسك تصارع تحارب هاي الحياة بس حتى تعيش وتأمن مستقبلك إذا اعتمدت على الأشخاص راح تخسر وتضيع داومت وحدي عانيت وبالكوة وصلت للمدرسة شافتني عنود وكامت تضحك نسيت موضوع رجلي وضل بالي يم رفعت بس لا بيه شي شعجب مااجه خاف صاير بيه شي ضلت الأسئلة والأفكار السودة تاكل بعقلي يارب يكون بخير معقولة زعل مني لا لا رفعت يحبني مستحيل أسباب تافهه تخليه يزعل وحتلو يزعل مومعناها يعوفني ياربي ميكون عافني امتحنا وماجاوبت أستاذ ضياء اليوم ممداوم طول الدوام دايخه ومامركزة بشي نعسانه لحد آخر درس طلعت بالكوة وعنود الخبيثه دفرتني ووكعتني بالكاع على ركبي والعكازة طاحت كامت تضحك عليا هي و صديقاتها شنو مشكلتها وياي اكو بنات ساعدني وكوّمني اني مشكلتي بسرعه ابجي وبسرعه أكبر بجيي يتحول شهكات بعدني مثل الطفل ليش هيج يمكن لأن يتيمه وذليلة أول مطلعت شفت رفعت انصدم من شافني بهالحالة
_ شبيج درر شبيج حبيبتي شنو صار وياج
بقيت ساكته دموعي على خدودي سندني ومشينا مارحنا لا مطعم ولاشي رحنا لمكاننا اشترالي مي وحلويات وأكل مسح دموعي وباس خدودي
= عوفني رفعت أنت هم مثلهم
_ زعلانه مني حقج والله بس أبوي تسمم والصبح محد بالبيت بس اني أخذته علكناله مغذي شلون يعني اعوفه وحده بيد النسوان منو ياخذه أخوي طالع للشغل قبلي
= مايشوف شر ان شاء الله
_ يلا هاج اكلي وسولفيلي كل شي ليش هيج اعوفج يوم واحد هيج يصير بيج
= تخيل إذا يوم واحد عفتني وهيج صار بيا شلون إذا عفتني بدون رجوع
_ منو سوى بيج هيج
سولفتله عن عمي ضاج وضلينا ساكتين مابيدنا شي
نمت على جتفه بس جنت نعسانه ودايخه وغفيت
_ حبيبتي نمتي؟
عبالي حلم جنت غافيه وبين دايخه مااميز حسيت ايد تتلمس بوجهي بدأ من عيوني بهدوء وخدودي لحد شفتي حاوطت خصري بإيده الثانية هدوء عميق لطيف تخلل ذاتي جسمي اتقشعر من البرد ويمكن الدنيا مطرت
= اف راسي وين اني
_ صح النوم
= نمت ؟
_ اي تقريبا ربع ساعة
= صدك؟ ولا أدري
_ مطرت الدنيا والجو برد كمتي تكحين وبلاعيمج مورمه
= مااكدر احجي ولاحتى ابلع ريكي
_ تعاي اخذج اجيبلج علاج شي مااتحمل أبقى مناه لباجر قلقان
= أريد أروح للبيت أرتاح
_ مجان ناقصج غير تتمرضين فوك رجلج شني السالفه
= شسوي هذا حظي
_ جاوبتي اليوم؟
= لا
وبجيت
_ ولايهمج حبيبتي
= مااعرف ماافتهم أبقى شكد أعيد بالمعادلة حتى حفظ احفظها بس مااستوعب شسوي كون أموت احسلي
_ نجبي كافي خلنروح اني راح ارتبلج كل شي ليضل بالج حياتي
وصلني للبيت طول الطريق يوصيني أهتم بنفسي بصحتي مااطلع من غرفتي يكولي لتسوين شي اكعدي واسكتي مناه لمن تطيب رجلج وصلت للبيت شمرت العكازة نمت بملابس المدرسه جانت ملابسي مبللة وصخنت وتمرضت بالزايد كعدت ب١٠ باليل راسي يوجعني حيل وتلعب نفسي جسمي كله صخن أحس نفسي أريد اتقيأ بالكوات جريت نفسي للحمام العكازة موتتني تقيأت وسبحت تذكرت صلاة الظهر والمغرب ممصليتها توضيت انوب طفت الكهرباء صارت ضلمه تخوف بألف يا علي وصلت لغرفتي شغلت لايت الموبايل ورجعت الكهرباء صليت حاولت أقرأ قرآن بس عيوني غوشت وبعدها نفسي تلعب خلصت ارتاحيت على جربايتي شعري مبلل مفتوح ماكدرت امشط رغم ماجسمي يرجف من البرد ومصخنه بس مختنكه نزعت البلوز بقيت بالكيمونه من اليوتيوب شغلت قرآن سورة البقرة حتى ترتاح نفسيتي مااعرف فقدت الوعي لوغفيت لأن محتاجه نوم جنت جوعانه بس مابيا حيل اكوم اسويلي أكل مرت كم ساعه كعدت من النوم وي آذان الفجر عيوني يوجعني جسمي عبالك متكسر راسي يوجعني شسالفه نظري مغوش رفعت متصل بيا أكثر من مرة وماادري اففف شهالحالة الاني بيها يربي كلت لازم أقاوم وأكل رحت للمطبخ لكيت بس برتقال وموز ونوتيلا دهنت نوتيلا بالخبز وطلعت موزة اكلتهم أحس بطني لوتني غيرت ملابسي بسرعه راسي حينفجر شهالصداع يمكن لأن نمت وشعري مبلل كالعادة التقيت برفعت الي تعارك وياي لأن مريضه لهاي الدرجه ومحد جايبلي علاج ولأن ماجاوبته البارحه ضال باله يمي ومنايم شفت عيونه حمر اوي حبيبي صرع راسي بنصايحه كالعادة دخلت للمدرسة شفت العوجه عنود حاطه الحمرة كلها عبالك مشايفه
- اكو ناس حوبتي بينت بيهم
كامت تشمر عليا حجي وصديقاتها يضحكن واني حتى صديقه وحده ماعندي سكتت لأن مابيا حيل اتعارك
- فوك ماهما موحلوين انوب الله عوجهم ههههه
= هيهي يمه متت من الضحك صايرة ضريفه وتضحكين بصديقاتج عليا
- ضوجه وين نروح
= روحي لجهنم لا تكابليني من الصبح وتتمضحكين
- منو غيرج يسوى أضحك عليه
= ليش تريدين اضحك عليج المدرسة كلها ماتجوزين مني احسنلج
- شوفي لج هذا لسانج اكصه الج إذا بعد تجاوزتي
= إنتي تتجاوزين وتسوين هواي شغلات واني ساكته لأن أخلاقي متسمحلي أتصرف تصرفات مزعطه مثلج لأن بكل عقليتي مثقفة مومثل تصرفات بعض الناس إلي عايشين دور البطولة كأنه فلم اكشن اصحي بيبي إحنا بمدرسة ماعبالي حاركه كلبج لهاي الدرجه
- ترا متعرفين اني منو اني عنود خافي مني كل شي سيء ببالج اسويه واسوي الاسوء والاسوء ماشي حبي
= سوي الترديه شايفه روحها وهي متلوح ظفري
عفتها ودخلت للقاعه لأن مااكدر اوكف هواي شفت الأستاذ ضياء موعلى أساس مأخذ إجازة ٣ أيام من شافني اجه
- هاي شبيج
= هلو أستاذ
- شلون صار بيج هيج
= وكعت
- متأذية راجعتي دكتور لولا
= أي
- تعالي اكعدي لتوكفين
= شكرا
- راح اساعدج بكل شي
= مامحتاجه شي لتتعب نفسك
- الأساتذة كلهم راح اوصيهم واكوللهم يمتحنونج مرتين لتخافين إنتي
= اني مم
- اش موبكيفج اسمعي كلام استاذج
= حاضر
- كلش اتأذى من اشوفج هيج
= بعد شسوي صدف موحلوة
- لا إنتي متنتبهين انتبهي أكثر أهم شي صحتج إنتي متعرفين أكو ناس تتأذى أكثر منج من تشوفج بهالحالة صدكيني إذا دمعه تنزل من عيونج أموت قهر أا قصدي يعني طالبة عدنا لازم هالضروف متأثر عليج وو أ شي أكيد من أشوف اي إنسان يتاذى طبيعي انقهر عليه
= اي
ماكدرت اخفي الصدمه من ملامحي شنو قصده اوف
= حروح أستاذ
- لحظه اساعدج
= لا لا شكرا
رحت لشعبتي بس صافنه ودايخه ثالث درس اجانا أستاذ ضياء وطول الدرس يفشل بعنود ويسمعها كلام يعني بس يريد حجه وسبب علمود ينتقدها جانت مكاتبة الواجب صار عصبي عليها وقارن بيني وبينها
- شوفي درر رغم ضروفها ووضعها الصحي بس ماهاملة دراستك على عكسج إنتي كل اهتمامج بالمشاكل ولا عبالج من فوتتلج ذاك اليوم معناها عادي ونتقبل تصرفاتج إحنا بمدرسة عيب عليج هاي الحركات السوقية
= أستاذ الموضوع خلص بس أنت كل مرة تفتحه ومااعرف شنو الغرض من هالشي
- حتى تتعلمين
= لو متعاركه وي وحدي غير درر مجان سويت هيج
الصف كله انصدم من جرأتها وي الأستاذ اني انقهرت ليش جاي تحجي هيج صار نقاش حاد وخلص الدرس بلا مانفهم شي وعنود ضلت تتوعدلي بقيت الدوام كله كاعده بالشعبه مااكدر أمشي وتعبانه نمت عالرحلة يمكن دقيقتين اجاني رفعت مثل الخيال فزيت لكيت أستاذ ضياء بديت أتضايق من تصرفاته
- صرتي زينه
= لا
- تكلمت وي المديرة واكدر اخذج للمستشفى على مسؤوليتي في حال اهلج مااجو
= ماعندي أهل
- اني اهلج
= ؟؟
دخلت عنود شافتنا ضلت تنظرلي نظرات موحلوة مااتحملت أخذت عكازتي ردت أطلع بس وكعت أستاذ ضياء راد يساعدني ماقبلت وعنود شالتني سحلتني سحل والأستاذ كال ناخذج للادارة ترتاحين اخذتني عنود وجانت متشمته بيا وبهذلتني تبهذل بالإدارة
- من طلبنا رقم أولياء الأمور هذا الرقم إلي انطيتيه؟
= أي صح هذا رقمي
- المفروض رقم واحد من اهلج بنتي
= ماعندي
- أوك أستاذ ضياء راح ياخذج على مسؤؤليته لبيتكم أو للمستشفى إذا تدهورت صحتج لاسامح الله
... يتبع
