#البارون
وأنتبه لعيون ناسك من تطيح
لمَعه بعيون اليحبك تنرسم
اليبني بيته ويقتصد يم الأساس
يخسر أضعاف البناء الينهدم
لا تهتم ولا تهم بالما يحَبونك
بعض الخَساير ربح
كُل دمعه تنزل ترا تغسلك عيونك
*********
هالة
...😶🐾ويحدث أن من يؤلمك 🍂في أثمن ماتملك هو ذاته الثمن...
امي راحت تواصل كرايبنا عدهم فاتحه وأخذت مرت أخوي وياها أبوي مريض وماكدر يروح بس أخوي الجبير راح امي اكلت رأسي توصيني على بابا اكله وشربه والعلاج لازم بوقته اني مالي خلك روحي انوب اداري أبوي كعدت بغرفتي أدرس واخابر بصديقاتي وابوي كل شوي صايحلي طلعها لروحي شهالازعاج
- بويا هيلة وين رحتي
= ها يابة متكولي شتريد كل شوي صايحلي عندي دراسة لخاطر الله
- أريد كلاص مي كتلني العطش
= يعني الثلاجه مويمك ماتكدر تمشيلك خطوتين الا تصيح صخيمه
- منيتي من هسة
= هاك فدوة يابة لتصيحلي أريد ادرس ماعندي وقت
- أي بويه
دنك رأسه وضاج والله يا الله بتكم لو خدامه شفت راشد الفقر متصل عليا
= الو متكولي شعندك بس تدك
- كولي الله يساعدك شلونك كلمه حلوة متعرفين تكولين
= اهوو ميوكل خبز هذا الحجي ماله داعي
- اوف منج مشكلتي احبج هذا المصبرني عليج
ضلينا نسولف أبوي يصيحلي اني اغلس عليت صوت التلفزيون علمود إذا سألني اكوله ماسمعت لأن صوت التلفزيون عالي صار وقت الصلاة ماصليت ماملتزمه بصلاتي طلعت اشوف أبوي لازم انطيه العلاج واسويله غدا لكيته ياكل كيمر بس لاهذا الي جان للصبح مكشف بالمطبخ عزاا
= يابة منين هذا
- لكيته بالمطبخ
=ليش أم اكلت جان انتظرتني
صرت عصبية هو انقهر كلش اني لساني طويل وكلامي جارح
- ناديتج بس مااجيتي جعت كمت للمطبخ اكلي لكمه انمعط كلبي من الجوع يوميه امج هيج وقت تسويلي غدا وتطيني العلاج
= يبوي على حظي شلون اكلت الكيمر هسة بلة صار بيك شي تطيح براسي ومااخلص من الملامه اطيته العلاج شربه وصلى ونام وضل ساعه كاملةيلقي محاضرة علمود أصلي هو شعليه بيا لليل اجو أهلي من الفاتحه وابوي نايم بعده امي اول مااجت ضلت تستجوب بيا لأن شافت أبوي نايم هالوقت ومو من عوايده خافت عليه وبنص اليل أبوي تخربطت وضل يتقيأ امي غمتني وضربتني على ظهري كالتلي بسيطه اني شعليا رفعت أخذه وشدوله مغذي والصبح هم أخذوه يقيسون الضغط والسكر وامي ماسكتت عني موتتني بالغلط واللوم وكل ساعه تكفخني كفخه
*********
ضياء
... واني لأتألم لألم محبوبتي...
درر ماطلعت ماشفتها أعتقد بسبب رجلها ماكدرت تمشي رحت للشعبه شفتها نايمه عالرحلة حجيت وياها بالكوة حجت وياي اخذناها للادراة وكلت اني اخذها لأهلها وإذا تأزمت صحتها عادي اخذها للمستشفى وعلى مسؤؤليتي درر ماقبلت وكلنالها عن رقم ولي أمرها اي شخص من أهلها يكدر يجي بس هي ماقبلت وأصرت تكمل الدوام للنهاية قلقي استمر وطول الوقت عيني على ساعتي شوكت يخلص الدوام شلون تروح وحدها للبيت منو ياخدها توتر صدع راسي الطالبات كل شوي وحده تسألني أعيد الدرس لأن بالي جان مويمهم وماكدرت اشرح بصورة صحيحه خلص الدوام شفت درر من طلعت وي الطالبات اكو ٢بنات وياها ساعدنها كان باعتقادي ذولي صديقاتها وحيروحون وياها للبيت عالاقل يوصلوها بقيت اراقبها وانظرلها لحد ماوكفت يم ولد فضولي وصل للهستيريا منو هذا أخوها إبن عمها اني من رحت لبيتهم شفت ولد عمها بس مو كلهم ياترى منو هذا بطريقه أو أخرى لكيت نفسي واكف قريب منهم
- درر منو هذا
...نظرات ذابلة تنبع بالتعب والإرهاق والصدمه تصادمت التساؤلات منها ومني في كلا الحالتين انا من له حق السؤال وأريد الإجابة...
الولد الي وياها باوعلي رافع حاجبه كنت اباوع شلون هما لازمين ايد بعض هي مستندة عليه وبنظرتها خوف وخجل
_ منو حظرتك
- أستاذها أنت المنو مو اني
... بدأت همسات الغضب تتجمع لتخلق مالاتحمد عقباه لكن فراشة الربيع منعت...
= أستاذ هذا إبن عمي هو دايما يوصلني
_ وعلى شنو تكوليله هو شعليه استاذج بالمدرسة بحدود الدراسة
- اممم ابن عمج شكله عصبي شدعوة تنرفز
_ أنت شكو جاي تحقق وياها شنو علاقتك
= رفعت لخاطري
لزمت ايده وهمست بصوت ناصي إسمه مثل إشارة تنبيه منها انو يهدأ هو سكت وخلاها تحجي
= شكرا أستاذ لاهتمامك اني صحتي زينه الحمد لله وليضل بالك ابن عمي وياي هو يوصلني للبيت
- من واجبي الإنساني كمدرس إني أراقب الطالبة الي قد تكون محتاجه مساعده بس الظاهر إبن عمج مايفهم بهاي الأمور
= أسفه أستاذ أعتذر بالنيابة عنه وهسة من رخصتك
استعجلت لأن إبن عمها جان غضبان نظراته حادة عبالك راح اخطف درر منه هذا شبيه شكد نرفزني همجي وغبي مااعرف ليش كرهته
... كانت نظرات الغيرة كفيلة بقتل كائناً يقربكِ ...
وبقت صورتهم ببالي شلون لازمته وإذا ابن عمها ليش ماسك ايدها بيا حق بيا حق أعصابي يادوب مسيطر عليها صعدت سيارتي اباوع للمراية عيوني دم حمر شرايين أيدي بارزة وكلبي يدك سريع ليش هيج يصير وياي جنت أريد أصرخ أريد اتخلص من هاي الأمور اريد شي يوخرها من عقلي ليش ماجاي تطلع من بالي ٢٤ ساعه بتفكيري بكل تفصيلة هي موجودة كلما أبتعد الاحظ نفسي جاي أضحك على نفسي ماراح أخلص من هذا العذاب مارجعت للبيت خابرت مرام مااعرف ليش بس حسيت هي راح تفهمني
- الو
= شبيه صوتك
- مرام تكدرين تجين
= أي عادي بس كولي شبيك
- تعبان أعصابي تلفانه من التفكير تعالي اسولفلج كل شي
= نص ساعة زمان وتلكاني يمك بس وين أنت
- بمطعم،،،،
= أوك
*********
مرام
... الحجي الماينحجي يمك حجيناه الأمان الجنه نفتقده لكيناه...
اداوم بشركه تابعه لخالي موظفه من رجع ضياء اني كرهت السفرةكلها أصلا اني رحت بس علموده رجعت امي واختي ماتوقعن ارجع بهالسرعه وماكلتلهن عالسبب حجيت وي امي على موضوع عنود
= ماما حاجي عنود خليها تخفف من عصبيتها ميصير هيج كل يوم شكوى
- هذا الموجود هي تداوم بفلوسهها إحنا دافعين فلوس وغصبا ماعليهم يتحملون شنو شصار بنية تدافع عن نفسها لوتريديها مثلج فاهية وحقها دايما ضايع
= شكرا الج لأن بكل مرة تغثيني وتجرحيني بكلامج
- عنود أحسن منج اني أريدها هيج مااريدها تتنازل عن حقها أي شي تريدها تاخذه يعني تأخذه لو تنطبق السما عالارض هاي بنتي خو مو إنتي من أول مشكلة تنسين كل شي وماتدافعين عن شي ترديه
= شنو الي تحصليه من هذا الحجي بس أريد أفهم
- بلكي تتغيرين ولو اني فاقده الامل منج
= أروح لدوامي أحسن
- أي طبعا أحسن شكو كاعدة على كلبي روحي شوفيلج زنكيل وفرحيني شيصير حتى عنود أحسن منج
= اها يعني تعرفين بطلعاتها وي الولد والفلوس الي تحصلهن من عدهم يعني عادي عندج تستغل الولد بس علمود تحصل موبايلات وفلوس وذهب
- أي عادي بنتي سباعية لو ألف علاقه وي ولد بعدها بنية مو ينضحك عليها بشكم كلمه حلوة مثل باقي الناس خليها تضحك ماينضحك عليها وبعد الأحسن تكون خاينه وماتتعلق باحد وتالي يخونها مثلي ومثلج
= جاي تصدميني عنود بعدها صغيرة والشي الجاي تسويه غلط ماما ميصير هيج
- مالج دخل أريدها قوية مثلي
= إنتي تعتبرين نفسج قوية كل شهر تتزوجين واحد علمود فلوسه مايبقى وياج بس كم يوم شهوة واستغلال وقرف لاعبالج اني اشوفج قوية من تسوين هيج
- مراااام
ضربتني راجدي وطلعت اني بحيت وياريت البجي يغير شي من حقيقتنا امي من طلقها أبوي وهي تريد تنتقم منه بكل طريقه حاقدة عليه وعلى زوجته وبنته كل شي تسوي حتى تشفي غليلها وشافت انو تخونه مثل ماخانها عبالها بهالطريقه ترتاح كل شهر تتزوج واحد غني زواج متعه بالسر محد يعرف بس صديقاتها وخالاتي للأسف عنود شافت هالشي قوة وصارت مثل امي بس بغير طريقه داومت واتصل عليا ضياء فرحت بدت مشاعري تتحرك تجاهه اعجابي بيه كان واضح من أول لحظه شفته عبالي إعجاب بس اكتشفت انو حب من أول نظرة هو كلما أحاول اتقرب منه يبتعد ويصدني يتجنبني بس اني حبيته وحاليا بديت اتعلق بيه بطريقه عحيبة مااعرف اسيطر على مشاعري وهو ماعنده اي ذرة إعجاب بيا حسيته يحب والي يحبها محتلته احتلال ومايكدر يشوف غيرها ابد هو لحد الان ماحاجيلي عنها بس أصدقائه كالو عليه شكد هو متغير وصارله هواي ممصادق اي بنيه حتى علاقته بيهم مومثل قبل حيرتني ياضياء خابرني متضايق صوته مخنوك ومبحوح خفت لاصاير بيه شي اختلطت مشاعري بين الفرح والخوف عليه فرحت لأن اتصل بيا وطلب نلتقي رحت للمطعم الي كالي عليه شفته يدخن ومو من عوايده الي عرفته عنه هو يحب يهتم بمظهره وصحته وعمره ما ممدخن شنو سالفته
*********
درر
بالإدارة ماقبلت أروح لأن ما أريد أضيع دروسي كابرت واتحملت عادي بس ألم رجلي اذاني رجعت لشعبتي حتى ماطلعت للساحه مابيا حيل اتبهذل بالعكازة ماعندي صديقات كلهن علاقتي بيهن سطحية وعلى كد السلام من طلعنا البنات ساعدني شفت رفعت ارتاحيت وماادري منين طلعلي أستاذ ضياء وصار نقاش حاد ماله داعي أصلا الأستاذ شعنده شنو دخله بيا رفعت صار عصبي كعادته وبالكوات هدأت الوضع ورحت وياه بس خفت لا انكشف أصلا كل طلعاتي وي رفعت غلط بغلط ولا تناسب عاداتنا وتقاليدنا
= رفعت شبيك
- وجهج اصفر لا تتخربطين
= لا عادي بس دايخه شوي
أخذني لعيادة قريبة قاس ضغطي الدكتور كالي ضغطج هابط وشاف عيوني وسألني كم سؤال كالي عندج فقر دم حاد انطاني فيتامينات ومقويات ورفعت ماقبل أدفع فلوس العلاج شكد صرف عليا والله استحيت الدكتور كال اشوف رجلج كلتله لا حتى رفعت ماقبل لأن هناك بمنطقتنا اكو مضمدة هي وزجها
= رفعت ليش بعدك ضايج
- اش يلا استندي عليا خلوصلج تأخرتي
= حاجيني وباوع بعيوني شبيك
- درر اسكتي
= ليش بعدك عصبي اني شعليا متجاهلني
-إنتي موبحال اتناقش وياج بعدين نحجي
= عالاقل باوعلي ليش داير وجهك عني حط عينك بعيني
- اوف هذا ابن ال،،، شعنده وياج شيريد منج إنتي جاي تستوعبين تصرفاته لولا
= منو
- استاذج
= أنت تشك بيا يعني
- مو شك بس نظراته تصرفاته كل شي واضح مثل وضوح الشمس
= هو تصرفاته هيج اني شعليا بيه
- بس وياج إنتي بالذات ماكو اي أستاذ بالدنيا هيج يهتم بطالبه حتلو كرايب بس إنتي
بقيت ساكته لأن كل كلامه صح بس شسوي كل إلي اكدر اسويه ابتعد عنه ومااحجي وياه بالبيت لكيت عمي ورشيد وزيدان ومااعرف زيد ماكو عمي من شافني بهالحالة نظرلي ببرود عادي وزيدان لازم موبايله ويخابر دخلت لغرفتي ماطلعت إلا ثاني يوم على صراخ أم غيداء كعدت من النوم مرعوبة كل بالي راح يم خليل لأن بالمستشفى وتوه مسوي عملية طلعت من الغرفه شفت زيدان ورشيد مخبوصين وركضوا حتى محد كالي شكو عمو ماموجود وكفت بالباب شفت ناس وسيارات
- طبي جوة وين طالعه
= شكو شصاير زيدان كلبي حيوكف من الخوف
- طبببي جوة
عاط بيا وطبيت جوة انوب اجه رشيد ركع الباب
- شعندج بالباب موتعرجين طبببي لج
= شبيكم عالاقل كولو شصار منو مات
سد الباب وطلع من البيت عاط بيا
- إذا شفتج فاتحه الباب اكسرلج رجلج الثانية
صعدت فوك السطح اباوع من فوك احسنلي شفت هوسة وخطية أم غيداء تصرخ بالشارع غيداء بالكوات لازمتها وابو غيداء عصبي يعيط عليها يكوللها طبي جوة فضحتينا وهي تصرخ يمه زهير رحت مني عززززا زهير مات خطية شموته ذاك اليوم عزل ببيت وحده مدري أجر اوف حالتهم تكسر الخاطر منين اجتهم هاي المصيبة شفت زيد موجود انوب اجت دوريات شرطه خفت لا يلمحني رشيد مخبل هذا يشمرني من فوك السطح زيدان شافني بس بسرعه دنكت ربع ساعة وكل الناس راحت أبو غيداء راح واخذ أم غيداء يعني غيداء بقت وحدها لازم أروح بس كون يخلوني نزلت لبست أسود وأخذت وياي ملابس لغيداء اجوي ولد عمي شافوني لابسة أسود
- وين؟ عليمن لبستي أسود
= أريد أروح فدوة زيدان خليني
- يمعودة وين متشوفين نفسج
= عادي مصايرة وإذا أعرج
- يلا روحيلها خطية غيداء وحدها
رحت فتحت الباب غيداء حضنتها وكامت تبجي مصدومه مامصدكه زيدان هم عزاها وراح بقيت اعزل بالبيت على مااكدر أحس اليوم صحتي تمام العلاج والراحه جابت نتيجه وحتى رجلي الورم راح الحمد لله
- اليوم دوام ليش مارحتي
= مااكدر اعوفج وحدج بهاي الحالة
- درر أخوي زهير
وكامت تبجي خطيه حضنتها وكمت أصبر عليها ورى شوي جابو الجنازة واجت نسوان ترسن البيت وجهال وام غيداء تخربطت واخذوها للمستشفى وراحت غيداء وياها شيعوا جنازته ومن خلص التشييع بعد ماكدرت أبقى بالفاتحه تأخرت ساعه ب٣ الظهر اجه زيدان أخذني بالكوات فتت ماكو طريق كلها زلم
- بعد ماكو طلعه
= سجنوني بعد مابيها شي
- دنجبي
= اكولك زيدان وين زيد ورشيد
- زيد جان يم خليل بالمستشفى وبعد ما ادري على أساس اليوم يطلعونه من المستشفى بس ماكدروا يجيبونه هنا اخذوه لبيت أخوه الجبير ومحد كاله على زهير لأن بعده صحته موتمام
= خطيه ميستاهلون
- رشيد راح يشرب كالعادة
= وعمي
- خابرته كلتله زهير مات كالي طبه مرض شعلينا بيه
= ياا
- يلا حروح للفاتحه اساعدهم خطيه
= ليش زيد مايجي
- يمعودة زيد هم نفس حجايه أبوه يكول اني أعرف بس خليل شعليا بأهله ورشيد مايهتم لأكبر واحد ولايحترم فات من التشييع مشغل أغاني فشلنا
= صدك جذب تخبلو
- سدي الباب ولا تطلعين
= أوك
خابرت رفعت وكلتله ضاج لأن يريد يشوفني بقيت احجي وياه كام لحد صلاة المغرب صليت وكعدت أدرس ودك فوني أستاذ ضياء هذا شبيه سويت الموبايل صامت وغلست شربت علاجي واكلت زين شفت رجلي صارت زينه شمرت العكازة لأن متت منها بهذلتني دهنت رجلي وطلعت تمارين من اليوتيوب كلهم سويتهم لعبت رياضه أخير فترة صحتي تدهورت لازم أنتبه واداري نفسي زين محد يفيدني من لعبت رياضه أحس صارت عندي طاقه ونشاط شربت كلاصين حليب ونمت والصبح خابرت حبي كلتله لا يجي قريب من المنطقه لأن أخاف ولد عمي يشوفونه وتصير مشكلة كعدت كلي نشاط وحيوية دخلت للمطبخ اجت ببالي فكرة ليش مااسوي حلاوة الطرشانه إلي يحبها رفعت بس لازم استعجلت الحمد لله لكيت كل المواد ماناقصني شي هو يحب الجوز كثرتله وفستق و حبشكلات مدللني ويصرف عليا واني كل شي مامسويتله بس اقهر بيه ويومية مزعلته خلصت تذوقتها اممم طيبة ياترى شنو يحب بعد الكنافه لازم اسويها بس موهسة بعدين عبيت الحلاوة بعلبة وضميتها بجنطتي
- صباح الخير
= صباح النور البارحه جنت نايم بالفاتحه
- بعدني منايم اجيت أنام بالبيت
= أكو بيض سلك إذا جوعان أكله
- أوك اكولج محد اجه
= لا
- خوش عندج مصرف
= أي عمي انطاني مصرفي من شهر وبعدني ممخلصته
- أوك
= زيدان البارحه اجت غيداء
- أي باليل رجعوا لبيتهم امها موزينه صعد عدها السكر وصارت بيها جلطه
= افف افف
- من ترجعين من المدرسه روحيلها خطية خاف محتاجين شي
= ان شاء الله
*********
زيدان
رجعت من الفاتحه هلكان ردت انام شفت فوني كومه اتصالات من ترانيم حبيبتي شيء اكيد قلقانه وتفكر ليش مخابرتها وليش مارديت دزيتلها بصمه وطمنتها
*********
ترانيم
عمري ١٨ سنه أبوي عربي وامي كردية مواصفاتي شكرة عيوني خضر وشعري قصير كيرلي وزني ٦٥ هههه شوي مدبدبة عندي غمازات أعيش وي امي وابوي واخوي الصغير عمره ٥ سنوات بالروضةواختي الجبيرة من أبوي إسمها مرام تعيش ويانا لأن علاقتها بامها موتمام وهي أقرب لبابا أكثر وعندي أخت إسمها عنود علاقتي بيها ابدا موزينه تعيش وي امها ومتحب بابا للأسف بسبب غيرتها مني بابا وماما متزوجين عن حب بابا قبل لايتزوج امي جان متزوج وماكدر ينسى امي وتزوجها امي هم جانت متزوجه بس تطلقت بسرعه وبعدين تزوجت بابا وصارت مشاكل هواي مرام أختي مسالمه وهادئة ماتحب المشاكل وهي تكون صديقه ماما تحبها وتحترمها هههه امي دايما تكولي صيري مثلها على كلبي مريومه ماما كلامها مكسر لأن كردية واني هم أعرف احجي كردي رغم مشاكل عدنا بس سعيدين بحياتنا وزيدان تعرفت عليه صدفه قبل سنه ونص اجوي خوالي من السليمانية وكالولي تعالي ويانا رحنا اني وماما واخوي ومرام بابا ماكدر يجي لأن عنده شغل رحنا نتونس طلعت اني وخالي الصغير واخوي عالشلاشلات نصور ومرام وامي راحن يفرفرن بالمولات عشقهن موديلات الملابس الجديده والمكياج هههه أخوي حرك وميكعد ماجنت رايدة أخذه وياي لأن اعرفه حيشلع كلبي بس شسوي امي جبرتني أخذه هناك تاه مني ضليت ابجي وخالي ضل يلوم بيا خابرت ماما وصعد عدها الضغط ورى شوي اجه زيدان وبيده اخوي وايده مجروحه
- هذا ابنكم؟غير تنتبهون عليه لكيته واكع بالكاع وداخله بيده كزازة وبس يبجي شنو هذا الإهمال
= وين لكيته عزاا العزاني كله من وراي مشكور أخوي ماقصرت
- أي انتبهي مناه وهيج
خالي جان مايعرف عربي بس قليل واني احجي وي زيدان واترجم لخالي وانوب تعاركت وياه
= هسة أنت منيت علينا مو شكرناك
- أي انتبهوا مو بس حايرة بالعدسات
= لا والله موعدسات عيوني
خالي صافن علينا شنحجي مايفهم كلامنا وزيدان هههه ماراد يروح من أول ماشافني حبني وضل يلف ويدور بس علمود ياخذ رقمي
- مو عيونج
= لا حول الله انت شنو دخلك
- هاج حلويات اشتريتهن لاخوج
= لحظه خالي يريد يحجي وياك
- شفهم منه
= اني اترجملك
خالي كال خلنعزمه عالعشا هو وافق وتعرف على باقي خوالي وضليت اباوعله من بعيد هيبة حلو تصرفاته عجبتني رجولته بس خالي الجبير يعرف عربي وتعرفوا عليه كلش حبوه واخذوا رقمه وحلفوه كلما يجي للسليمانية يمر عليهم ثاني يوم بابا خابرنا ورجعنا ومر كم يوم دايما يخطر على بالي وصدفه صديقه ماما عزمتها على عرس بتها ورحت اني وياها هناك شفت زيدان موجود وانطاني رقمه وبدت علاقتنا تعرفنا على بعض وحبينا بعض كلش بس بابا مااعتقد راح يوافق لأن متعصب وبباله السني ياخذ سنية وكذلك الشيعي ياخذ شيعيه وميصير غير هيج بكل شي بابا متساهل بس هاي الأمور عنده خط أحمر وماادري ليش
... يتبع
توقعاتكم للبارت الجاي 😘😍
