#البارون
😘😍 آنه اخاف مِن ألامان الماهو يمَّك
آنه كُل خنكَاتي چي ما جاي أشمَّك
شليّ بعيُوني؟ يَبعد عيُوني
إذا مُو بيّها أضُمك .
#البارت ٤٧
********
درر
عمتي ملت من هالة وطلباتها كل شهر تصرف عليها ٣٠٠ وبالكوة تكفي عطور ومكياج وملابس ومن غير مواعيدها وي دكتور الجلدية ومراكز التجميل صار عدها هوس مو طبيعي تلبس عدسات وكل شوي تلتهب عينها وهم اخذتها اني وعمتي لدكتور العيون وانطاها قطرات حتى يخف الالتهاب والتحسس واشترينالها عدسات طبية
البيت صار جوه ممل لأن مابيه أطفال
بس مع الوقت تعودنا وعمتي ليل ونهار تدعيلي بالذرية
اني هم ادعي ومخليتها عليك يا الله
علاقتي برفعت أحس شوي صارت زينه
كانت أمنيتي مايتغير الوضع وأبقى عايشة بهالسلام هذا
...ماكانت سوى أمنية بسيطه من إحدى حقوقي...
مثل كل يوم كعدنا العصر بالحديقه نشرب جاي وكعك
واجوي بيت منتظر وسوالف وضحك حلوة كعدتنا كلها ونسة
منتظر اجاه إتصال ومن صوت بناته يلعبن اشر بإيده عالهدوء
من شفنا اهتمام وتركيز منتظر عرفنا إنه الإتصال مهم وضروري كلنا مركزين على ملامح منتظر وحركاته إلى أن استبشر وابتسم ابتسامه دالة على بشرى سارة
سد الموبايل
منتظر-: ممصطفى أتحرك والدكتور كال احتمال يصحى من الغيبوبة
طبعاً أمه كامت تبجي وعمتي اشترت جكليت كلش فرحنا رفعت ومنتظر راحوا للمستشفى وافتهموا من الدكتور
رجعوا باليل كالوا انطوه علاج وكام يستجيب وحالته زينه
رجعوا باليل مستبشرين الحمد لله كم يوم ان شاء الله ويرجعلنا صوفي
عمي كال لعمتي باجر تروح للسوك وتتسوك للعزيمه
لأنه قرر يسوي عزيمه بثواب وجه الله تعالى
كلش فرحنا وبقينا سهرانين من الفرحه عمتي صلت صلاة الشكر
منتظر ومرته راحوا لابنهم ينامون يمه بالمستشفى وخلو أطفالهم يمنا
عمتي نيمتهم يمها
واني رحت لغرفتي شوي واجاني رفعت مااعرف ليش جانت عندي رغبة احضنه لأن هو فرحان واني هم فرحانه
أول مادخل وسد الباب
أيده بعدها عالباب وظهره علية
كمت من الجرباية بسرعه وركضت حضنته من ظهره
صوت ضحكه ناصي سمعت منه
درر-: أحبك بكل الأوقات
رفعت-: تذكرتي
درر-: هو اني ناسية حتى أتذكر
اندار علية وبقى يمسح بابهامه على خدي وبعينه حب
درر-: اكدر اكول راح ننسى كل شي ونعيش حياتنا
رفعت-: امم اي ياملعونه
درر-: أحبك
شالني وحضنته وكنت طايرة من الفرح والسعادة
عالجرباية متحاضنين وعيونا تباوع للسكف
درر-: بعدك تحبني!؟
سكت مخلية راسي على صدره وأسمع دكات قلبه
كررت السؤال مرة ثانية وهم ساكت ردت اتأكد عبالي نايم
بس كاعد ومفتح عيونه
درر-: مو احجي وياك ليش متجاوبني
غمض عيونه ورجع فتحهن كاشارة إنه اسكتي
سكتت بس بديت اكرص بركبته على كيف
وهم ساكت أوف باصبعي ارسم على صدره وركبته
ههه كل رسماتي قلوب واخير شي كتبت أحبك
وتسليت بهالشي وحسيته مو تافه واستمريت ارسم قلوب وبصف القلب اكتب رفعت لحد مااندمجت ونسيت كل شي
رفعت-؛ اكتبي أحبك عوفي إسمي شلزكتي بيه متكوليلي
كمزت
درر-: يمه إسم الله تنحنح تمحمح كبل حجيت مو صارلي ساعه احاجيك وماترد
هم رجع سكت هالولد خبلني
درر-: شتريد اكتبلك راح تبقى ساكت اوك اني احجي مو مشكلة قبل من كنت صغيرة عمو من يرجع تعبان من الشغل ادلك ظهرها لأن أشوف مرت عمي هيج تسوي واتعلمت منها ومرة توني راجعه من المدرسة وعمي جان موجود وهم توه راجع من شغله حضنته وبوسته ههه كبل كالي تعاي دلكي ظهري اني ادلك بظهره واسولف اكوله انطوني دروس كذا وكذا وردت أروح اجيبله القراءة بس مايقبل يكولي اكتبي على ظهري من أكتب هو يضحك يكولي تدغدغيني شكد جان يحبني
دمعت عيني على صدر رفعت هو باس راسي
وحاوط ظهري بإيده
درر-: من كبرت كل الأشخاص بحياتي تغيروا محد بقى على حاله ومايدرون شكد أحبهم ومستعده كل شي اسويلهم
رفعت-: اش لاتبجين كافي
ابجي واحجي بقهر
درر-: حتى أنت
رفعت-: خلص أنسي
درر-: اني نسيت بس انت ماتنسى رغم موضحتلك كل شي بعدك مامقتنع
رفعت-: اني مصدكج ونسيت خلينا نسدالموضوع
درر-: كرهتني!؟
رفعت-: ماكدرت والله اكذب عليج واطلع أكبر كذاب بالعالم إذا كلتلج اي كرهتج
درر-: يعني بعدك تحبني
رفعت-: أموت عليج
اباوع بعيونه مليانه حب وشغف نظراته توجهت لشفايفي
ختمنا سهرتنا قبل صلاة الفجر سمعنا صوت الله أكبر رفعت دخل للحمام سبح
واني من التعب والسهر غفيت هو صلى وخلص واني نايمه
رفعت-: ولج كومي
درر-: ما
رفعت-: صلي ونامي على راحتج
درر-: لاتزعجني
رفعت-: دتعاي
شالني واني مغمضه دخلني بالحمام وفتح الدوش مي بارد
كمت ابجي هههه
درر-: حقيررررر
رفعت-: هههههه هسة أحسن شوفي شكلج يضحك
درر-: مثل شكلك
رفعت-: يلا سبحي وصلي اني حنام مو اجي الكاج نايمه بالحمام مابية حيل اشيلج
درر-: نني نيني
رفعت-: تعيبين علية مو بسيطه
درر-: شتسوي
رفعت-: اطفي عليج الكلوب مالت الحمام
درر-" لا لا رفعت فدوة
رفعت-: هههه
عافني وراح للغرفه
سبحت وصليت لكيته متمدد عالجرباية منتظرني
درر-: غمضت لو بعدك مثل ألبومه كاعد
رفعت-: ياهو البومه ولج
درر-: اني اني بس لاتصير عصبي ولايتحمل شقى
رفعت-: شتحجين تدردمين مثل العجوز الماكلين عشاها
درر-: ولاشي
رفعت-: اممم أفكر
درر-: بشنو تفكر
رفعت-: تقربي واني اكولج
درر-؛ شنو
رفعت-: مشروع يعجبج
درر-؛"اي كول
تقرب مني وباسني
رفعت-: بيبي حلو مثلج
شلون تفكير هذا الظاهر نسى اني مااكدر احبل
وبقى مستمر واستحي اكوله مايفيد شلون سالفة الرياجيل شلون يفكرون
بكل لمسة يكولي راح يصير عدنا مو بس طفل واحد أطفال
اني بداخلي اكول هذا شبيه حلمان كل شي ماحجيت بس متفاعلة وياه لأن مرتاح ومتونس ليش اخربها عليه
ب٩ الصبح الا نمنا
ومر وقت لحد الساعه وحده تقريبا كعدنا
ومدري ليش أحس نفسي عروس وكأنما عرسان جدد
درر-: رفعت كوم حبيبي اكعد
كانت عنده عطلة لهذا ماكعد من الصبح
رفعت-: بعدين
درر-: بكيفك
رفعت-: احبج
درر-: اموت عليك بستها وكمت بقى بس أسبوع واحد لعرس هالة ودايما كل شي يتراكم علينا
عمتي لكيتها رايحه للسوك هي وعمي ومتسوكين يعني العصر عدنا عزيمه
منتظر خابر عمي وكاله مصطفى فتح عيونه بس بعده تعبان والدكاترة كالوا يسووله كم تحليل وبلكي هاليومين يطلع
الف الحمد لله والشكر
سوينا عزيمه عشا وعزمنا هواي ناس عمي كال لرفعت يخابر راشد وأبوه يعزمهم
هالة تغيرت ملامحها من سمعت بإسم راشد وتلاقت نظراتي بنظراتها
أفكر شلون وحده مثل هالة تترك شخص يحبها بس علمود الفلوس شكد كنت مقهورة على راشد وبنفس الوقت شفقانه على هالة لأن ماتدري شنو إلي راح تواجهه عقاباً لكل اخطاءها
رحت اني وعمتي للسوك هالة ماقبلت تروح تخاف من الشمس تسمرها
رفعت وصلنا وراح كال عندي شغلة اخلصها وارجع
من راح رفعت انتبهت لشخص بسيارته يباوع علينا ويخابر
نغزني كلبي لأن نظرات الرجال مصوبة باتجاهنا وبوضوح تام وظاهر
درر-: عمه شوفي هذآ الرجال شلون يباوع علينا
ام رفعت-: يجوز مشبه عادي
درر-: يا مشبه عمه فدوة اروحلج شوفي شلون يباوع ويخابر
ام رفعت-: وإنتي شعليج بيه خلي يخابر شكو خايفه
درر-: عمه ما ارتاحيتله والله اول مرة أشوفه بالسوك
ام رفعت-: هو السوك بس النا مسجل بإسمنا غير ناس تجي تتسوك وتروح
تسوكنا وبيا محل نروح أشوف الرجال ورانة وشكله يخوف مو مال واحد جاي يتسوك
يارب مايكون الي ببالي
من طلعنا من السوك بقينا واكفين بالكراج وهذا الكراج بالظهرية يفرغ من الناس وقلة القليل تشوف أحد
وهذا الرجال صعد بسيارته وبعده مراقبنا
عمتي من دوخه السوك ماانتبهت اكوللها وهي تكولي لا وعادي
انتظرنا رفعت تأخر علينا
وهذا الرجال تقدم علينا بسيارته من شاف سيارة رفعت راح وطول ماهو يراقبنا لازم موبايله ويخابر
بقيت متوترة وخايفه ردت اكول لرفعت بس ماحبيت اخرب عليهم فرحتهم
رجعنا للبيت وبقينا نجهز للعزيمه
باليل الناس كلهم اجوي ومن ضمنهم أهل أمير
وامير ماهو مااجه وياهم من سألوا الأب كاللهم وي جماعته ومن سألنا الام كالت راح لخواله
تاهت علينا
هالة خابرته ماجاوبها
تعشوا الناس وكلمن راح لبيته
ساعدت امي وكملت كل شي ورحت لغرفتي شفت رفعت يدخن وضايج
درر-: شبيك حبيبي
رفعت-: ماادري درر حال راشد ماعاجبني
ذبيت حسرة
درر -: الله يعاينله ويحل مشاكله
رفعت-: آمين يارب
لأول مرة أحس رفعت هو المحتاجني مو اني نام على رجلية وبقيت العب بشعره لحد مانام
مرت الأيام بسرعه واجه يوم العرس
وطاح براسي وراس عمتي مانلحك لشي ومرت منتظر ماكدرت تحضر
حفلة الحنه لغوها كالو ماكو داعي
كل شي سوينا بس علمود هالة ماتحس بنقص المكياج مضبوط عدسات أصلية طبية والبدلة أغلى وأحلى بدلة موجودة
من اجن اخوات أمير ماكدرن يعيبن أو يعلقن على شي وكفت مثل الشوكه ببلعومهن
ومن صارت الزفه قفلنا الباب ورحنا
الزفه صارت فدشي خرافي كومه سيارات كلش تونست وكعدت اني وعمتي بصف العروسة
هههه انجعصنا جعص والعريس كعد بالصدر
السايق نسيبهم وعينه زايغه بس يباوع من المرايا ويتمركص ويعلج
بس هم كلهم كشخه وحلوين ومابيهم عيبة
هالة بسياره عرسها والزفه والدنيا محتركه تعاركت ويانا
هالة-: المن صاعدات وياي منو كاللجن منو مودي عليجن وانتي إنتي درر بسيطه اني اعلمج شكو صاعده بالسيارة
درر-: لعد اعوفج وحدج عمتي كالتلي صعدي وياي وصعدت تريديني اعصي كلامها
وهالة عصبية اني أضحك عليها وكل شوي تريد تملخ شالي وعمتي تفاككنا بالكوة
هذا نسيبهم يباوع ويضحك لأن مركز علينا بس أمير بغير عالم وضايج
كاعدة يم شباك السيارة واصفك وأضحك من الفرحه حتى كمت اهلهل واباوع على أخوات أمير طلعن من الشباك يركصن والشعر يلعب بيه الهوى ورياجيلهن وياهن يركصون كلش منفتحين وسبورتيين
مرينا من السيطرة طلعوا يعرفونهم وطشوا جكليت عالسيارات وركصوا وياهم وسيارات ناس غربة بصفنا كاموا يهلهلون عالواهس ويانا هههه
وصلنا وبعدهم على نفس الردحه ولم ونسوان ماهدأوا ولا دقيقه العروس نزلناها اني وعمتي لزمت بدلتها وهي تغلط علية تكولي عوفي البدلة بهذلتيني أمير عافها ونزل من السيارة عبالك مو هو العريس ضيف شرف
البيت يخبل يشبه بيت عمي القديم
بس هذا بعده جديد
هالة كعدت عالقنفه رتبتلها المكياج عيونها دمعت من العدسات وماقبلت تنزعهن عاندت
راسي انسطر سطر من الديجي
مشغلين ٣ وجابوا شعراء ومطربين ونسوان مدري شنو شغلهن هم يشعرن ويركصن
اني وعمتي بس صافنين
صارت ساعه ١٢ الا كالوا صعدوا العروس لغرفتها
رحنا وياها وعمتي وصتها ونصحتها سلمنا عليها وطلعنا عمتي دمعت عيونها
دخل العريس
رفعت كل شوي وخابر حرك الموبايل علية رسايل واتصالات ومن الهوسة مااسمع
نسيبهم كال اني اوصلجن وخلف الله عالولد وصلنا
عمتي قبل لانروح وصت ام امير على هالة
بس خطية بقى بالها على هالة
رجعنا للبيت بالكوة نمشي روسنا تريد تنفجر اني كبل نمت حتى ماحجيت وي رفعت
كعدت على صوت الباب يدك
ماكدرت أفتح عيوني كلش يوجعني ورجلية هم من كد ما وكفنا
ام رفعت-: درر يمه كاعده
درر-: ها عمه
ام رفعت-" يلا يمه هميلا تأخرنا
درر-: عمه بعد وقت
كمت فتحت الباب
درر-: صباح الخير
ام رفعت-: صباح العافية
درر-" عمه مايكعدون هسة تلكيهم البارحه للصبح على فرد دبجه المن رايحين عبالج مثل قبل أهل العروس يروحون من غبشة الله يأخذون صينية الكيمر علمود يتريكون والهدايا
صارت قديمه العادات هاي وتقريباً انقرضت
ام رفعت-: اي والله حجيج صحيح
درر-: روحي ارتاحيتي والظهر نروح ان شاء الله
ام رفعت-: ان شاء الله
مر اليوم هادىء
جان البيت مليان ناس وشوي شوي راحوا هه
سبحان مغير الأحوال
الظهر رفعت كال هو يوصلنا ويسلم على أخته
ومناك ياخذ عمي ومنتظر لبيت راشد يزورون أبوه مريض كلش
اجانا منتظر مرته مو وياه بس خابرت عمتي وسالتها عالعرس شنو صار شنو ماصار
رحنا اني وعمتي وعمي والولد لبيت هالة
ورى ربع ساعة تقريبا بعد ماعمي وولده سلموا عليها راحوا
وكالولنا العصر نمر ناخذجن وعمتي اتفقت وياهم العصر تروح لبيت منتظر تشوف صوفي وتطمن عليه
هالة ضايجه عمتي سألتها
وصعدتنا لغرفتها
********
رفعت
راشد مختفي وكلما اكول أروح أشوفه ماتصحلي فرصة وتطلعلي الف شغلة
أبوي عزم أمير وعائلته وكالي خابر راشد واعزمه
خابرته
رفعت-: الو
راشد-: الو رفعت شلونك
رفعت-: عاش من سمع صوتك شهالغيبة ماتكول عندي صاحب خلي اسأل عليه أشوفه وين ماوين
راشد-: والله مشغول ومالي خلك خلكي تعبان
رفعت-: خير راشد صاير وياك شي محتاج مساعده كول بعد أخوك
راشد-: تسلم ياخوي بس الوالد مريض كلش حتى للشغل بالكوة اروح
رفعت-: مايشوف شر مابيه غيرالعافية ان شاء الله ليش ماتجيبه للمستشفى الي أشتغل بيها خوش دكاترة
راشد-: مايفيد هم الدكاترة كالو يابة خلو الرجال ببيته لاتعذبوه بالعلاج مايفيده
رفعت-؛ الله كريم الله يطول بعمره واي شي تحتاجه بس كول مايردك إلا لسانك راشد اني اعتبرك أخو لا تستحي
راشد-: والنعم منك أخوي وتاج راسي تسلم عالسؤال
سديت الخط منه واحس قلبي وجعني وانقهرت كلش أول مرة أحس براشد هيج محبط وفاقد الأمل ضل بالي يمه وماكدرت ابطل تفكير
وحتى استحيت اكوله عالعزيمه
أبوي سألني كلتله يابة أبوه مريض ومايكدر كالي لازم نروحله
ورى يومين رحنا لبيت راشد اني وابوي ومنتظر ادينا الواجب
بقى وضع راشد ماعاجبني ومااعرف ليش كلبي ينعصر بس من اتذكره
اللهم اجعله خيراً
طلع مصطفى من المستشفى والدكاترة كالوا لازم يبتعد عن الأتربة والغبار والهواء الملوث ولازم عناية مشددة
امه ماصدكت أبنها رجع لحضنها نست كل شي وحتى منتظر من يجينا ماتجي وياه وحرمت على نفسها الطلعه من البيت لحد ما أبنها يتعافى بالكامل و
قبل عرس هالة بيوم خابرت امي واعتذرت منها لأن ماراح تكدر تحضر العرس
وضعنا اني ودرر بعد معاناة أصبح مستقر تفاهمت وياها وكالتلي كل شي واني جربت اصدكها ومسحت الصور والمقاطع
ونسيت أفتح وياها موضوع الورث وهي من لوية العرس ناسية السالفه كلها ولا على بالها
مااتوقعت درر تكون قريبة من امي لهاي الدرجه ولكل مكان تروح وياها وتساعدها بكل الأمور
...يتبع
سؤال البارت/منو تتوقعون هذا الرجال الي يراقب درر ومنو دزه لو رجال عادي!!
