شلون احبك؟
يا طَريقة التغَري گلبك
تريد بِـ خيوط الشَمس
يَمتزج شعرك
تريد ارسملك نجوم
شوية حمرة بلون خدّك
تحب اجيبنلك حواري ؟
يحضرنلك حتى أكلك
اني حاضر
گلي هسة شلون احبك؟
# البارت ٥٢
*********
درر
يوم جديد موببيتي ببيت زيدان
كعدت الصبح لبست وردة حتى تروح للروضه وماقبلت نور يروح خفت عليه
لبست شالي ووكفت بالباب
مناه لمن اجه الباص
محد بالبيت عمي نايم
وترانيم هم نايمه
زيدان من الصبح رايح لشغله
شفت رفعت استوه طالع من البيت
فتح باب سيارته وبالصدفه شافني
دخلت وسديت الباب أرجع أنام أحسن شي
ووين ماتصير خلتصير
اندك الباب
ببالي يمكن وردة ناسية شي
بس شفته رفعت
درر-" نعم!؟
رفعت-: جاي اتطمن على إبني
درر-: نايم
رفعت -: البارحه بس لخاطر امي وابوي خليتج تباتين هنا
بس ثقي بالله إذا رجعت من شغلي ومالكيتج بالبيت
درر-" اي اي كمل شتسوي
رفعت-: درر لا تستفزيني والاحسن مانكبر المشكلة لمصلحتنا ولمصلحه أطفالنا ولاتنسين الطفل الي ببطنج
بقيت ساكته
وبداخلي إصرار قوي عالعناد ورفض كل شي يكوله مااعرف ليش
اريد بس اكوله لا
بوقتها يمكن هرمونات الحمل مأثرة علية
ومخليتني مثل المخبلة بس عصبية واتعارك ومااكدر أفكر بأي شي
رفعت-: حبيبتي إنتي حامل واني أخاف عليج
درر-: رفعت ماارجع اريد أرتاح منك تعبت
رفعت-: آسف والله غلطان حقج تزعلين بس موهيج ولا بهاي الطريقه
درر-: لا بهاي الطريقه الشي السويته مو هين وروح يلا
ماطايقه أشوفك
راح وكلش ضايج
أريده يحس بحجم الخطأ الي سواه
ومااريده يتكرر
رجعت نمت
مر اليوم مثل ماهو
بدون أحداث أو أي شي
مناه لحد ما رجع رفعت من شغله اني اباوعله
من شباك الغرفه الفوك
وحاسة بشي راح يصير
زيدان من رجع انصدم لأن بعدني موجوده وما رحت
هو بطبعه مايحب المشاكل
العصر اجه عمي وعمتي ورفعت مو وياهم
حاولوا يقنعوني أرجع وياهم مافاد
بعد صعب اتنازل
درر-: عمي والله جيتكم على عيني وراسي بس ماارجع
اعذروني
عمي وعمتي اصلاً ماراضين على رفعت ضايجين منه
ومن كلتلكم ماارجع اتقبلوا موقفي وماعارضوني
راحوا وبوسوا نور ووردة
ورى شوي واجه رفعت يصيح بالباب فضحنا
فتحله الباب زيدان
زيدان-: شبيك تخبلت مناه الناس عيب عليك عندك شي ادخل جوة واتفاهم وي مرتك
رفعت-: وينها بنت عمك طايحه الحظ
زيدان-: مااسمحلك تتجاوز عليها كدامي
طلعت كبل اجاني لزمني من أيدي
رفعت-: هسة تجين وياي البيت لا وحق محمد انهيج إنتي والبطنج
زيدان-: اكولك شو أنت مصختها عوفها
درر-: لحظه زيدان اني اتفاهم وياه
زيدان صار عصبي
ورفعت نار
درر-: من اكول ماارجع يعني افتهم شنو معناها لاتبقى تكبر المشكلة
رفعت-: ترا ماكو مرة تطلع من بيت رجلها وهو رافض الطلعه نهائي درر الخاطر ربج افهميني اعتذرت كافي ارجعي
درر-: ماارجع وكلتلك مااكدر محروك كلبي على إبني وتريد الصدق حاقدة عليك وكارهتك شلون انطاك كلبك تسوي بابنك هيج اني ماجبته بسهولة جبته بشلاع الكلب بالكوة حافظت عليه رفعت صعب تفهم شعوري والله العظيم أخاف عليهم البارحه اليل كله سهرانه اباوع لوجهه اباوع لخياط البخده شنو ذنبه
شنو موقفه إذا واحد سأله وكاله منو سوى هذا الأثر بوجهك اني عانيت بطفولتي وتكدر كل شي تكول علية مخبلة بية عقدة حالة نفسية شتريد تكول كول
بس مااريد أطفالي يعيشون العشته
وعسى مااسوي المستحيل
رفعت-: واني امنيتي ماتختلف عن امنيتج اني هم اريدهم يعيشون بسعادة ليش تحسسيني بس إنتي المسؤؤلة عنهم لعد اني وين عنهم
درر-: اي بس المسؤؤلة عنهم مناه وهيج
رفعت-: درر شنو قصدج
درر-: أنت مالك دخل الأب إلي يسوي هيج بابنه
هذا ماعنده حس مسؤولية
لزمني من أيدي بقوة
درر-: اني أخاف عليهم أكثر منك واكدر اعيشهم وخدي عندي فلوس وعندي شهادة اكدر اتعين واصرف عليهم ولعلمك حتى مابقى هنا عايشة اكعد ببيت وحدي
بلمح البصر ضربني راجدي خدي انسطر سطر
بقت اذاني تون والكاع تفتر بية
بهالاثناء نطقت بكلمه رفعت محلفني مااكولها ومحرمها على لساني
درر-: طلقني
عيني بعينه وكلي ارجف من العصبية
رفعت-: لو تموتين مااطلقج روحي اركعي راسج بألف حايط
درر-: موبكيفك والله اشتكي عليك
كتمت كل القهر بكلبي موهينه يضربني واني حامل وبعد هاي السنين
وبعد ماصرت ام جهاله
رفعت-: الظاهر إنتي من شفتيني ساكت وانطيتج مجال هواي كمتي تتجاوزين حدودج وتتباهين بحلال ابوج
اني جهالي اربيهم واصرف عليهم من فلوسي
درر-: بس جهالي مالك حق بيهم
كبل جرني من أيدي وصاح بعلو صوته
رفعت-: نورررر جيب أختك وتعال بسرعه للبيت
نور اباوعله يرجف هو واخته
ورفعت يجرجر بية نزلت من الدرج امشي علة كيف أخاف اوكع
زيدان شافه تعارك وياه وصارت مشكلة كبيرة
وتعقدت الأمور صار غلط وحجي زايد
زيدان كال بنت عمي ماتطلع من بيتي
ورفعت يكوله مرتي وغصباً عنك أخذها
طبعاً من العياط والصياح الدنيا افترت بية ووكعت
وبقيت واعية شوي أسمع جهالي يبجون وترانيم تعاتب برفعت وزيدان تكوللهم كله منكم
البنية تخربطت
عيوني الغواش سيطر عليهن وردة تبجي فاقدة
نور معلمته إنه هو الجبير وإذا صار موقف صعب هو يسكت اخته
ماانتبهت بس إلي عرفته رفعت شالني واخذني للمستشفى
عرفته من عطره
الدكتور كال فقر دم حاد ونفسيتج تعبانه
وصفلي مقويات وفيتامينات وكالي لازم اكل كرفس ولحم
رفعت اختفى من المستشفى ماشفته
بس زيدان وترانيم وجهالي
رجعنا
من جد جانت فترة صعبه علية اموت قهر من اشوف إبني شلون وجهه خرب
يعني تقريبا نص كلاص كزاز دخل بخده وضل أثر
كلما أشوفه أموت ألف موته
وأفكر اكول هاي لو وردة صاير بيها هيج يمكن رفعت حتى اشتكي عليه للشرطه
لأن البنت مومثل الولد
البنت شكلها مهم بالنسبة الها وخدها كل شي يبين جمالها
الولد عالاقل يكبر ولحيته تغطي الأثر
من فكرت هيج شوي ارتاحيت
علاقتي وتواصلي برفعت انقطعت صارت مشاكل
رفعت لو يتعارك وياي لو وي زيدان
عمي وعمتي كالوا مانتدخل الظاهر مزعلهم رفعت بسبب عصبيته وتهوره كلما يروح لشغله اباوعله من الشباك
بأخير فترة تغير حتى مايزين لحيته ويروح مبهذل ملابسه يلبسهن بلا كوي
انقهر واتأذى
بس مااعرف شسوي
كلما يجي لبيت زيدان يريد يشوف حهاله وهم ميقبلون يخافون منه
أخير مرة تعارك وياي وكالي إنتي كرهتيهم بية
درر-" تعرفني كلش زين اني ما احب اخرب تربية أولادي بهالامور التافهه أنت ردت تشوفهم وخليتك
رفعت-: اي واضح
درر-: حقهم يخافون
رفعت-: إنتي وين تريدين توصلين بالضبط يعني معقولة جاي تتحججين بس علمود تطلقين وترتاحين
درر-: شتحسبها احسبها
رفعت-: لاتستفزيني ترا أعصابي تلفانه وماعندي صبر
درر-: من تهدأ نتفاهم مااعرف احجي وياك وأنت عصبي لأن ما راح نوصل لحل وتتعقد المشكلة بدل ماتنحل
رفعت-: درر شنو غيرج وين درر مرتي الي طول عمرها احسها طفلة مطيعه مايوم عاندتني
درر-: اني كبرت وصرت ام والدنيا هواي علمتني أشياء خلتني اصير قاسية حتى على نفسي لاتستغرب
رفعت-: ارجعي لبيتج والله مشتاقلكم ماتشوفين حالي شلون صاير
درر-: والله مااكدر
كمت ابجي وهو هم بجى
رفعت-: شسوي وتنسين
درر-: مااكدر أنسى لحد الان كلبي متوجع موبيدي
رفعت-: إنتي لأن حامل هيج تفكرين
درر-:لا رفعت اني اريد اتطلق رجاءا احترم قراري
مااكدر أكمل وياك تعبت طلقني حتى اثنينا نرتاح
كدامنا طبلة وعليها غراض كلبها وكسر كل شي
ضل يشمر بالغراض مثل المخبل
واني راكبه راسي
وصممت اتطلق
راح رفعت واني اليل كله سهرانه من وجع بطني
كلما أدخل بشهر اتوجع واتأذى أكثر
الأفكار تأخذني وتجيبني
ثاني يوم طلبت من زيدان يجهزلي سالفة الطلاق
أريد اخلص بسرعه
مااعرف بشنو أفكر
كل إلي أعرفه فكرة الطلاق انطبعت ببالي
زيدان تناقش وياي وقنعني ماكو فايدة
عمي وعمتي هم اجو وحجوا لمن ماملوا
واني ثابته على قراري
ومااريد اغيره
...يتبع
