__❄عيون_الجليد❄__

01

لحلقة1:
««الدنيا هادي مترحم حد..تخليك تعيش ابشع الاحاسيس بيدين مكتفين..تحطك فموافق ضعف تدمرك و متقدر تدير والو..تشوف و تسكت..تتقبل قدرك بفم مغلوق..اما القلب فياااا نااااارك عليه..لا يعرف لا قانون و لا دستور..ميفرق لا بين حرام و لا حلال..هو يخير و نتا تتقبل و ساكت..و الامر انو عمرو ما يخير الساهل..هو دايمن يخيرلك المحرم عليك لي يشويك..و نتا تخير..يا اما تسمح فقلبك و حبك..يا تشمر على يديك و تقاتل..»»
وسط هاديك الظلمة..فهاديك القاعة الباردة..تسمع غير صوت طكطكة الساعة..رامي بدنو كامل على هاداك الكرسي..يخبط بصبعو عالطابلة..يستنى فيهم يحكو..و يقررو بعد اجتماع دام لساعات..و اخيرااا نطقو..بعدما نفد صبرو و كان نايض..
_كيما تعرف حنا منظمة عندها تنظيمها و قوانينها..و ادا نتا بديت بأول خطوة و خالفت القانون فكامل راح يتمردو..و كامل راح يعصو..و بصراحة حنا معندناش استعداد لحرب داخلية بسبتك..سي هشام الراشدي
طلع حاجبو لفوق..مشي عاجباتو الطريقة لي قاعد يحكي معاه بيها..
هشام: يعني ؟
_بعد موت ياسين قايد لي نظن كان يدك اليمين فحسب القانون نتا راح تولي تتعامل معا مرتو..راح تكمل مهمتو..
نفخ بالقاوي..لعصب ماكنو..مشي متقبل فكرة انو يخدم معا مرأة..عدا يدو على وجهو..
هشام: بصح ا...
_مكااانش فالقانون لكمة بصح..كاين تنفيذ و هذا اخر قرار المنظمة..يا اما تنفذ يا نعتبروك متمرد
رمالو الدوسي قدامو..
_و هادا كلش على زوجة ياسين قايد..الاجتماع خلاص و القرار قرارك يا تنفذ يا تتمرد
لز على سنيها مالداخل..حتى برز فكو اكثر..عينيه لڨري يلمعو مالزعاف..نطر الكرسي وقف..شد الدوسي في يدو..خرج يعفس عالجمر..يغلي من راصو لساسو..يتمشى للباب و صوت صباطو تاقب الدنيا..يسمع فيه يحكي موراه..
_راح تتحمل مسؤوليتها بنفسك..اي غلطة منها نتا تتحمل المسؤولية
كبس عالدوسي فيدو اكثر..صبعتيه راح يخترقوه..خرج لبرا..تنفس بالقاوي..غمض عينيه..لعبت بشعرو رياح روما..لعبت بشعرو رياح هاد لمدينة لي دافنة فقلبها اسرار..و عباد و مآمرات..هاد المدينة لي جمالها مخبي بشاعة واش صاري فأعماقها..فتحلو واحد مرجالو الباب..طلع..ديمارا الشوفور..فتح هاداك الدوسي يقرا فيه..طاحت عينو على اسمها.."فيرا قايد" و بعد موت راجلها رجعت "فيرا جبروت"..ابسط الامور كاينين عليها..وين تروح و وين تجي..واش تاكل و واش تشرب..نفخ بالقاوي..تمتم بين شفافو..
هشام: مكفاااش مرأة و زيد عمرها ما ستعملت سلاح..
عض لسانو مالعصب..كمل يقرا..ودنيه حمارو وقت شاف عمرها 20 سنة..رمى الدوسي على طول يدو..ناقصو غير يخدم معا لفروخة..تنهدبالقاوي..بكبسة زر صغيرة فتح التاقة لي تفصل بينو و بين الشوفور..
هشام: بدل الطريق روح لروما لقديمة شارع **** دار رقم 34
_خاضر
رجع غلقها تكى لتالي..رفد يدو شاف الساعة..عوج فمو..ميعجبوش لعجب..
واقفة فالبالكون..ريح هاد المدينة تلعبلها بشعرها..هي و روما وجهان لنفس العملة..كيما هي..مدينة الجمال..مدينة اسمها يخليك تحس بقوتها..فالوقت لي هي مالداخل رقيقة بزاف..تنهدت..نزلت دمعة تحرق من عينها..حضنت روحها..تمتم بين شفافها..
فيرا(vera): 47 يوم على غيابك
زمت شفافها تمنع فدموعها..دارت موراها دخلت للبيت..طاحت عينها على تصويرتو..تحس فنار شاعلة فقلبها..بخنقة..فلحظة الدموع لي كانت شادتهم..نزلو شلااال..صح عمرها ما حباتو..بصح كان عندو بلاصة خاصة عندها..حماها مالدنيا ولي فيها..أواها..كان ليها الصدر لحنين لي تهرب ليه..صح عمرها ما عشقاتو..بصح بلاصتو كان وحدها..كان كاامل واش عندها فالدنيا..يمكن علاقتهم كانت اقرب لعلاقة الاب و بنتو اكثر من كونها علاقة راجل و مرتو..طول عملو يعاملها كيما بنية صغرونة..حتى من شعرها هو لي كان يمشطلها فيه..سرحت شوية تحاول تتفكر ملامحو بالتدقيق..صوتو..صوتو لي قريب تنساه..و هادا الشئ لي حارقها كتر..
فيقها من دوامة الحزن صوت الباب..عقدت حواجبها..تتساءلشكون حيزورها فوقت هكا..هبطت تتكعبر..شعرها رايح جاي معاها..تمشي على طراف صبعتيها..حفيانة..تقول طفلة صغيرة و صح هي هكاك..متعرف مالدنيا والو..فتحت الباب..طلعت راصها من رجليه حتى لوجهو فتصوير بطيئ..لحقت لعينيه لي تركزو فعينيها..عينيه الرمادية لي خلات جسمها يقشعر من نظرتهم..نظرتهم لي فلاتها..و عراتها..بلعت ريقها بالسيف..تحوس على المخرج الصوتي لي تخرج منو لحروف..
فيرا: شكون نتا !
تبسم على جنب..متوقعهاش تكون تحكي دزيري مع انها ايطالية..حكى بكل برود و عينيه فعينيها..
هشام: شيطانك
معا كلمتو رجليها تخرفو..قالها بنبرة باردة بصوت خشين رجولي..ببحة رجل شرقي تقهر..خلاتها تبلع ريقها للمرة الالف مالدقيقة لي تحطت عينها فعينو..لكلام هربلها و يدها لي كانت عالبوانيي طاحت فالهواء..تحس فقلبها يخبط فالاميتين..تحسوراح يخرج مبلاصتها و قاعدة تسمع حتى فصوتو..
★★★