الحلقة9:
رقدت قدامها..حاط يدي تحت راصي..نخمم فلي جاي..شفت معاها بطرف العين..نيفها حمر مالبكاء..راقدة و تشهق..تنهدت..الشخص الغير مناسب فالمكان لي مينتميش ليه..منعرفش منا للفوق واش حيصرا..منعرفش ادا حتكون قدها..ومنعرفش واش مصيرها مور ما تخرج من باب هاد الدار..كيما منعرفش ياسين علاه دار هكا..غمضت عينيا نبعد فهاد الافكار..محسيتش لروحي كيفاه رقدت..
فقت صباح قبلها..اول ما فتحت عينيا تلفت جيهتها..لا اراديا عينيا هربو ليها..مكبشة فلمخدة..شعرها موزع عالبونك كامل..بقيت نشوف معاها شوية..تبسمت..نضت..دخلت لدوش غسلت وجهي و خرجت مالبيت..قبل ما ندخل للكوزينة..حبست نسمع فصوت تيليفوني يصوني..دخلت لصالة نحوس عليه..لقبتو فوق الطابل..رفدتو..قلبت عينيا وقت قريت اسمها..رفدت..
انا: وي
ليديا: هشااام و اخيرااا رفدت يااخي وين رااك نتا !!
نفخت بالقاوي..
انا: ليديا واش تسحقي ؟
ليديا: واالو غير توحشتك
انا: منيش لاتي دك مشغول
ليديا: بصح انا..
انا: ليييديا قتلك مشغووول كي نكمل انا نعيطلك
ليديا: صحا قولي برك مراكش فايطاليا ؟
انا: باي
قبل ما ترجع تهدر غلقت التيليفون..رميتو عالفوتاي..اكثر حاجة نكرها و تعصبني انو عبد يحاول يتحكم فيا و لا يملكني..عديت يدي على شعري رجعتو لتالي..تلفت على صوت خطواتها..درت نشوف معاها..حاطة يدها عالحيط مركزة معايا..طلعت حاجبي نسأل فيها..تلبكت هبطت راصها..
فيرا: و واش كنت ندير فبيتك ؟
عوجت فمي..
انا: خفتي و محبيتيش تطلقيني
عضت شفتها..
فيرا: د ديزولي
انا: مممم روحي بدلي و ارواحي تفطري تكمل تدريبك
طلعت راصها تجري..شوفت معايا..
فيرا: ليوووم تااان !!
انا: ليوم و غدوة و لي بعدو و حتى تتعلمي
مزادت حتى كلمة ڨحرتلي و تلفتت عطاتني بالظهر شعرها كامل دار معاها راحت تمشي و تخبط فالارض برجلها..بقيت سارح شوية..الفرخة يطلع منها !!..شو على ديك الخزرة كي تعصبت !!..و المضية تاع التڨوعير !!..صدمتني..فقت على صوت الباب لي خبطاتو في وجهي بكامل قوتها..الحيوط تهزو معاع..عضيت شفتي غمضت عينيا بقوة..نحاول نهدي روحي..الرجال مداروهاليش هاد الفازة..محسيتش كيفاه بزوج خطوات كنت قدام باب بيتها..
فيرا تحكي:
خبطت الباب..ربعت يديا..حيوان..منعرف واش حاط روحو..يتأمر و انا نفذ..ما فقت غير على الباب لي تفتح بكل قوتو حتى خبط فالحيط..تهزيت و تنفظت..تلفت ليه نجري..عينيا وساعو..واقف عند الباب الكور تاعو غطى الباب كامل..عروقو مكبوسين و عينيه مركزين فيا..نظرتو خلاتني نرجع بخطوات لتالي من غير ما نحس..قدم هو بخطوة..رجعت بخطوة وحدوخرا..هو يقدم و انا نوخر..حسيت بظهري تخبط معا لخزانة..مقدرتش حتى نرمش عينيا..مركزة معاه و برك..و حتى هو..رجع قدم بخطوة وحدوخرا..
انا: و واش
رجع قدامي قد قد..مولاتش مسافة بيناتنا..نزل راصو ليا..نفسو في وجهي..
هشام: شفتي الجاست لي درتيه دك !
بلعت ريقي بالسيف..صوتو خرج هادئ يخوف..
انا: م مدت...
مكملتش كلامي..شدني من كتافي بكامل قوتو..
انا: اااه يدي
طلعني ليه حتى وليت قدو فالطول..رجليا مولاوش يقيسو الارض..
انا: اطلقني ي ياخي و واش بيك
لكلام هربلي..صبعتيه تغرسو فيا..عينيه مرموش..من غير سابق انذار قرب وجهو لوجهي..خدو تحط على خدي..و راصي على كتفو..رجع شغل معنقني..همسلي فودني..
هشام: اقسم و تعاوديه مرة وحدوخرا اقسم غير تشوفي لي عمرك ما شفتيه
جسمي قشعر..و مشي عارفة علاه..ادا مالخوف لي تملكني من نبرة صوتو و تهديدو..ولا من خدو لي على خدي..ولا من نفسو لي فرقتي..
هشام: فهمتي ؟!
مرديتلوش..مقدرتش نخرج لكلام..كأني فعالم وحدوخر..كلش مركزة معاه هو نفسو السخون الهادي الرزين لي فرقبتي..
فقت وقت حسيت بسنانو تغرسو فالشمحة تاع ودني..عضني !!!..
انا: اااااه
وليت نفرفط برجليا ملوجع..عينيا تعمرو بالدموع..بعد فمو بلعقل كأنو متعمد يعمل فيا هاد الشئ..طلقني جيت واقفة عالارض..حطيت يدي على ودني..مهبطة راصي..محاولتش حتى نشوف معاه..
هشام: انطقي فهمممتي ولا نو !!
هزيتلو براصي ايه بالزربة..
هشام: كي نحكي معاك تشوفي فيا..
رفد يدو حطها تحت وجهي طلعلي راصي..دموعي نزلو بالوقت..عقد حواجبو..
هشام: دين ### علاه راكي تبكي دك ؟
عضيت شفتي نحاول نحبس دموعي..خرجت هادوك لحروف بالسيف..
انا: و وجعتني
ضحك على جنب..حسيتو يشمت فيا..رفدت يدي ضربتلو يدو..
انا: متزيييدش تقيسني..
رجع كبس ملامحو يحكي..
هشام: هادا اعتبريه تنبيه برك..المرجة الجاية تشوفي لوجع كيفاه داير
غمزلي..عينيا وساعو..وجهي نحسو راح يطرطق مالحشمة..جبد روحو عليا عطاني بالظهر..يحكي فرد وقت..
هشام: ربع ساعة نلقاك واجدة
خرج و غلق الباب..منحرف خامج..هااامل صااايع..قربت لمرايا نسمح فدموعي..نشوف معا ودني..حمرا..رفدت يدي نعدي فيها عليا..زح مزالها توجع..اثر سنانو مزال عليها..متوحش..آكل لحوم البشر ينخاف منو..بدلت حوايجي بالزربة مناقصنيش همو..درتش لشعري تخاس باش ميقلقنيش و خرجت ليه..
و كيما كان الحال..تدريب..و كل يوم تدريب و كل يوم نفس السيناريو يتعاود..تعدات 26 يوم فهاد الدار..حاجة متبدلت..نحكو عادي..مزدناش داربنا..كل واحد شايد بلاصتو..اليامات هنا يتعاداو فيسع..
حطيت السلاح وقت كملت ليوم تان..تلفت ليه..نسأل فيه بعينيا..شاف معا الهدف و زاد شاف معايا..
هشام: تحسن ملحوظ و مقبول تان..
تبسمت..رجعت تلفت للهدف..صح تحسنت الرصاصات مشي فالمركز سواسوا بصح عالاقل قراي ليه بزاااف..سرحت شوية ففرحتي..فرحتي بتحسني.. فالاول متوقعتش اني راح نفرح وقت نتقن هاد الحاجات..ليوم تأكدت من المقولة لي تقول "الوقت يداوي كلش".. صح الوقت كفيل انو يداووي اقسى الجروح..يمكن متنساش بصح تتعود..تتعود على هاداك لوجع حتى يولي ميوجعكش ولا يمكن تولي متحسش بيه..تتعود حتى تبرد..فقت على صوتو..
هشام: ادخلي
تلفت ليه..هزيتلو براصي ايه..تمشيت لدار..حتى هو تعودت عليه..تعودت على وجودو..دخلت لدار..جزت للكوزينة شربت لماء..ملتم رحت ديراكت لبيتي..عملت دوش بدلت حوايجي و خرجت للكوزينة..وقفت شوية عند الباب..نشوف معاه..تبسمت..كيما كل يوم..هو لي يدير لعشا..قربت جبدت الكرسي قعدت..تلفت ليا..حط لعشا و قعد..عديت لساني على شفافي وقت شفت السباڨيتي..عينيا ولاو قلوب..عمرلي..اول ما رفدت الشوكة فيدي..جا بين عينيا..حتى هو كان يحبو..عضيت شفتي نمنع فدموعي باش مينزلوش..رفدتها ناكل بالسيف..مقدرتش نكمل..حطيت من يدي تكيت لتالي..نشوف معاه..حطلع راصو وقت حسني مركزة معاه..عقد حواجبو..
هشام: واش بيك !
منعرفش كيفاه سألت و منعرفش كيفاه خرجت هادوك لحروف..
انا: كان سيئ لهاديك الدرجة !
عوج فمو..فهمني..حط من يدو..تكى بيديه عالطابلة..مركز معايا..
هشام: واش حابة تعرفي بالضبط ؟
انا: كيفاه كانت علاقتو بيك ؟
هشام: عادي علاقة بوس و مساعدو
انا: برك ؟
هشام: ممممم
انا: كيفاه م مات
كبست على يديا وقت خرجت الكلمة من بين شفافي..تنهد..
هشام: فإشتباك معا جماعة وحدوخرا..
بلعت ريقي..منعرف منين جاتني الجرأة باش سقسيت السؤال لي مخليني نسهر ليالي نخمم فيه..
انا: ت تصاور لي وريتهملي ! كانت هاديك هي حقيقتو !؟
هشام: قتل،شرب، سرق، خدع، بات معا بنات كيما اي رجل مافيا
كل حرف قالو قاسني فقلبي..دموعي نزلو..رفدت يدي مسحتهم بالخف..تبسمت بإنكسار..هبطت راصي..
هشام: كنتي تحبيه ؟
معا سؤالو طلعت راصي بالزربة..طاحت عيني فعينو..معرفتش واش قصدو بهاد السؤال..علاه سقساه..واش دخلو..كيما معرفتش واش لازم نجاوب..واش لازم نقولو..لكلام هربلي..وقف مبلاصتو..طلعت راصي ليه..قرب ليا و عينو متنحاتش من عيني..وقف قدامي قد قد..تكى يدو عالطابل و نحنى ليا حتى ولا وجهو معا وجهي..
هشام: جاوبي..
بلعت ريقي..لكلام وحل فحلقي و مشي قادرة نخرجو..كلما نجي نحكي حرف نرجع نسكت..شوية و تبسم..رجع جبد روحو..ابتسامتو مفهمتهاش..مفهمتش معناها..قادرة تكون كلش غير انا تكون ابتسامة رضى او فرح..منعرف واش بالضبط..طلعت عينيا ليه..حكى..
هشام: على كل حال حتى ادا حبيتيه ميهمش..خاطر ماليوم و طلع الحب نحيه من قاموسك..
عقدت حواجبي مستغربة كلامو..
انا: واش قصدك !
هشام: #عيون_الجليد ملازمهاش تعشق
بقيت مركزة معاه..معا حروفو المشفرة..
أنت تقرأ
__❄عيون_الجليد❄__
Action#منقولة __❄عيون_الجليد❄__ معروف عن المافيا الايطالية ان تنظيمها بالرُتب..و لكل عضو رتبته الخاصة و من بين اهم قوانين المافيا الايطاليا🔪😱ان العميل اذا مات تتولى مهامه زوجته😈🔥..و تعرف بعدها بإسم عيون_الجليد❄💣✌.. 🌸انطلاقا من ها...
