لحلقة16:
اول ما وصلت عندها ترمات عليا..حضنتني بكل قوتها..لفت يدها على رقبتي و يد حطتها على شعري..رفدت يديا بالسيف حطيتهم على ظهرها..غرست راصها فرقبتي تشم فريحتي و تحكي..
ليديا: توحشتك..توحشتك بزاااف
كبست على جنابها بعدتها شوية عليا نزلتها..نشوف معاها..حطت يديها على وجهي تحكي..
ليديا: سامحني..سامحني هشام على اخر مرة والله ما كان قصدي..غير كنت حابة نشوفك
انا: كيفاه عرفتيني جيت ؟
ليديا: العساس قالهالي..كنت موصياتو
انا: واش قالك بالضبط
ليديا: والو غير قالي جيت
تنهدت..جاب ربي مقاللهاش بلي مكنتش وحدي..رجعت حكات..
ليديا: هشام سامحني..متعاقبنيش ببعدك صدقني ندمت..
محبيتش ناقشها..خصوصا هنا..جيست هزيتلها براصي ايه..ضحكت..عينيها لمعو..
ليديا: سامحتني ؟
انا: مممم
رجعت ترمات عليا عنقتني..مرات تغيضني..مشي ذنبها انها حبتني و مشي ذنبها انو قلبها ختارني..مع اني منبادلهاش نفس الشعور..جبدت روحها شوية تحكي..
ليديا: هايا خلينا نروحو
طلعت حاجبي..
انا: وين !
حطت يدها على صدري تحكي..
ليديا: توحشتك و الله..حبيت نجوزو شوية وقت معا بعض..
نزلت بعينيا ليدها لي تمشي فيها على صدري..سؤال واحد ضرب فراصي و حاجة وحدة خبطت فمخي..علاه..علاه مشي نفس الاحساس..علاه وقت نكون معا ليديا مشي نفس الاحساس وقت نكون معا فيرا..علاه لمستها هادي متحرك فيا حتى شعرة..و علاه لمسة فيرا تروهجني و دخلني بعضي..علاه هاد الاختلاف..
محسيتش لروحي كيفاه حطيت يدي على يدها..كبست عليها..طلعت راصي لشباك الدار بالصدفة..طاحت عيني فعينها..قلبب دق بالقاوي..الدم جمد فيا..ريقي شاح..واقفة عند الشباك و تشوف معايا..لكلام هربلي..نسمع فيها تحكي..
ليديا: هشاام هااياا
نزلت بعينيا ليها..كنت راح نقول لالا..سكت شوية..علاش نقول لالا..خاطر قلبي دق..ولا خاطر فيرا شافتني ؟ شكون فيرا اصلا..نقول لالا خاطر لمستها متأثرش فيا كيما تأثر لمسة فيرا ؟..امبوسيبل
خذيت نفس و زوج و ثلاثة..نحب نطفي هاد النار لي شعلت فيا و نحبس هاد الصراع..رجعت حطت يدها على خدي..تعدي فابهامها على شفافي..
ليديا: خلينا نروحو
أنت تقرأ
__❄عيون_الجليد❄__
Action#منقولة __❄عيون_الجليد❄__ معروف عن المافيا الايطالية ان تنظيمها بالرُتب..و لكل عضو رتبته الخاصة و من بين اهم قوانين المافيا الايطاليا🔪😱ان العميل اذا مات تتولى مهامه زوجته😈🔥..و تعرف بعدها بإسم عيون_الجليد❄💣✌.. 🌸انطلاقا من ها...
