__❄عيون_الجليد❄__

32

الحلقة32:
هشام يحكي:
واقف فنص البيت نشوف معا هاداك السرير..نار شاعلة فبا ملداخل..نغلي..و كلمة نغلي قليلة فحقي..عمري ما عشت هاكا احساس ولا عرفتو..عمري ما عضت هاد لحريق لي شاعل فيا ولا هاد لوجع..عمري ما عشت الغيرة كيما عايشها دك..صورتها و هي بين يديه محبتش تتنحى من بين عينيا..قاعد نشوف فيهم فكل بلاصة فكل زاوية..نشوف فيه يمس فيها..نشوف فيه يعنق بيها..يبوووس فيها..هبلت فمخي..الفكرة هادي خرجتني من عقلي..مشي حاسة لروحي..و مشي حاس فاش قاعد ندير..حتى صوتي لي قاعد نخرجو مشي قاعد نسمع فيه..موليتش نشوف قدامي..منشوف والو من غيرهم هوما الزوج معا بعض..فقت..فقت على روحي من صوت الخبطة لي سمعتها..تلفت بالزربة ليها..عقلي بلوكا..الدنيا حبست عندي و انا نشوف معاها فالارض..روبتها مفرودة فالقاعة..و دفايرها و لا منعرف واش على وجها..ساعتها برك شفتها..و نتبهتلها..قلبي حسيتو طاح عالارض من منظرها..منعرفش على روحي كيفاه بزوج خطوات لحقت لعندها..هبطت عندها بالزربة..طلعتهالعندي..حطيت يدي ترعش على خدها..
انا: فيراااا..فيرااا فيقي تسمعي فياااا فيرااا
مردتليش..عينيها لي كانو مفتوحين شطر تغلقو و دمعة نزلت منها..حسيتها دخلت و تغرست فقلبي..علاش..علاش منتبهتش لدموعها..علاه منتبهتش لصواها و هي تعيطلي..علاه تعميت لهاديك الدرجة..معلاباليش كيفاه وقفت و هي فحضني..كابس عليها بكل قوتي..مغمضة عينيها و محاسة لوالو..خيطت الباب تاع الدوش لي لتم برجلي تفتحت..قربت لافابو بالزربة..قعدتهاعليها..تكيتها على كتفي..رميت يدي للعين فتحتها..نغسللها في وجها و نعاود..نحاول نفيقها..قلبي نحس فيه راح يخرج مبلاصتو..النفس ناخذ فيه بالسيف..حطيت يدي على وجها..نزلت بيها لرقبتها..
انا: فيرا..فيرا فيقي..متخلعينيش عليك م...
قبل ما نلحق نكمل كلامي..عينيا تفتحتو شوية..حسيت بيدها لي كبست على جنبي..قلبي دق بالقاوي..
فيرا: ه هشاام
من غير ما نزيد حتى حرف..جبدتها لحضني بالزربة..لفيت يديا على ظهرها..كبست عليها بكاامل قوتي..نحكي فودنها..
انا: خلعيتيني..خلعيتيني عليك بزاف..

دفارتيها حسيت بيهم وقت تغرسو فجنابي..عقدت حواجبي و انا نسمع فشهقاتها..شهقاتها لي كانو كيف الرصاص ليا..جبدتها شوية من عندي..طاحت عيني فعينيها لحمورا لمدمعين..قلبي عصر عليا..رفدت يديا بالسيف حطيتهم على خدودها..نمسح فدموعها..
انا: ### متبكيش..
بلعت ريقها..رفدت يديها حطتهم فوق يديا..يديها باردين ڨلاس..كبست على وجها اكثر..شوية و حكات..
فيرا: هشام ع عندي ما ن نقولك
عقدت حواجبي..هزيتلها براصي ايه..نستنى فيها تكمل تحكي..فثواني نفسها قوى فوجهي..هبطت بيدي من وجها لرقبتها متالي..نحاول نهدي فيها..
انا: اششش اهدي..احكي بلعقل
خذات نفس طوييل.. غمضت عينيها و رجعت فتحتهم..مركزة معايا..شوية و حكات
فيرا: هشام..انا..انا و ياسين م...
قبل ما تكمل تحكي..مفقتش لروحي كيفاه حطيت يدي على فمها سكتها..هزيتلها براصي لالا..عارفها واش راح تحكي..عارفها راح تقول مشي من حقك تحاسبني خاطر كان راجلي..عارفها راح تقول ايه توحشتو و مشي شغلك خاطر كان راجلي و من حقي نتوحشو..عارف راح تقول مدخلش روحك بيني و بين راجلي..منيش حاب..منيش حاب نسمعها من عندها..منيش حاب نسمعها من بين شفافها..منيش حاب نصمع اسمو من عندها..اصلا حاكم روحي بالسيف و نهدي روحي بالسيف..خذيت نفس و زوج و ثلاثة..نهدي فروحي..رجعت حكيت..
هشام: متهدريش..متقوليش فيرا..خليها هكا..
رفدت يدها حطتها على يدي..نزلتهالي شوية..
فيرا: بصح هشام ا....
حطيت يديا فيزوج على وجها..كبست عليها..بيناتنا سنتمترات قلال..نيفي يقيس فنيفها..نحكي فوجها..
هشام: متحكيش ### متحكيش متزيديش على لي بيا..متزيديش تجبدي ## هاد الموضوع قدامي..
سكتت..تشوف معايا..للحظات حسيتها حابة ترجع تهدر..حابة تقول حاجة..اما منيش مستعد..منيش مستعد لحرب داخلية جديدة..و منيش مستعد نرجع نسمع اسمو..عالاقل اليوم و هنا..
انا: خليا نروحو..
مخليتهاش حتى ترجع تحكي..مخليتها تزيد حتى حرف..منيش حابة نرجع نسمع اسمو من عندها..لفيت يدي على خصرها..رفدتها شوية..هبطتها للارض..
انا: تقدري تمشي ؟
هزتلي براصها ايه..نزلت بيدي ليدها..شبكت صبعتيا فصبعتيها..تمشيت و هي معايا..ولا واحد فينا رجع حكى..خرجنا من هاديك الدار و يدي فيدها..خرجت من هاديك الدار بكامل هاد لوجيعة لي قاعد نحس فيها فقلبي..خرجت منها بجمل ثقيييل قاعد ندير فكامل جهدي باش نخبيه..خرجت منها و الف سؤال و سؤال فراصي..خرجت بنار قاعدة تحرق فيا..و قاعد نحارب فروحي باش نطفيها..منعرفش واش صرالي بالضبط وقت شفتها هنا..حاس روحي كأني مكنتش فوعيي اصلا..مكنتش فايق على روحي حتى..جننتني..و طيرتلي طرف الصبر لي عندي..فكرة لي هي كانت بين يديه واحد النهار و قاسها..و عنقها..نحس فيها قاعدة تنخز فقلبي و تقتل فيا بالعرق..و كاتم لي فيا و ساكت..خاطر ببساطة مشي من حقي نحاسبها..اول مرة نعرف الغيرة..اول مرة نعرف العجز و ندوقو..و الاقسى انو فرخة قد صبعي من غير ما تشقى تعمل حتى حركة..هي لي خلاتني نعيشو..
طلقت يدها وقت لحقنا لطونوبيل.. جبدت يدها مني..بقيت نشوف فيها..كيما تمشات و هاديك الروب رايحة و جاية معاها..حتى اصغر حركاتها ولاو يأثروا فيا..تنهدت وقت ركبت..عديت يدي على وجهي و شعري نتمالك فروحي..لحقتها ركبت..ديماريت طااير..اعطيني غير نبعد من هاد الدار و ننسى لي صرا فيها..نسوق و نشوف فيها بطرف العين..متكية راصها عالتاقة..منعرفش فاش قاعدة تفكر بالضبط..ولا واحد فينا رجع حكى..
شديت فران وقت وصلت..تلفت ليها..عقدت حواجبي و انا نشوف فيها مغمضة عينيها..مديت يدي ليها..بعدت دفيرتها للور..منعرف كيفاه دربت فراصها دارتهم..تي تبان بنت ال5 سنين..عديت صبعي على خدها بلعقل..تبسمت تلقائيا..الفرخةرقدت..قربت ليها اكثر..طبعت بوسة على خدها..خذيت نفس طوييل من ريحتها..محلاها..ترد فيا الروح..كيف المهدئ تماما..جبدت روحي شوية منها..فتحت الباب جيهتي نزلت..رحت جيهتها..فتحت الباب..نزلت عليها اكثر..رفدتها فحضني..جبدتها..كبشت بيديها الصغار فصدري..غلقت الباب برجلي و تلفت دخلت..وقفت عند الباب..دقيت..و نزلت راصي ليه..نشوف معاها..راقدة مرتاحة كلي مصرا والو..كلي طفلة صغيرة رقدت مور ما عيات ماللعب..طلعت راصي عالباب لي تفتح..تبسمتلها..
وردية: اهلا..متقووليش راقدة هههه ؟
انا: ههه وي
ضحكت..بعدتلي مالطريق..دخلت..طلعت بيها للفوق..طبعت باب بيتها برجلي..غلقتها وقت دخلت برجلي..قربت لسرير حطيتها بلعقل..نزلت للتحت نحيتلها الكونفارس..قعدتقدامها..لفيت يدي بلعقل على ظهرها ملتحت..رفدتها ليا..طاح راصها على كتفي..تبسمت..والله لا فاقت ولا حست..كون يخطفوها هكا متفيقش..رفدت يديا بلعقل نحيتلها الفاست تاعها..نزلتها من يديها رميتها عالارض..و رجعت حطيتلها راصها..رفدت يدي عديتها على وجها بلعقل..نتبسم وحدي..شوية و حسيت بحاجة سخونة و طريية تحطت على يدي..رعشة سرات فبدني كامل..هبطت عينيا ليها..لقيتها كابسة على يظي بيدها الصغيرة..طلعت راصي ليها وقت سمعتها تحكي..فاتحة عينيها شطر يادوب تخرج فالكلام..