__❄عيون_الجليد❄__

04

الحلقة4:
دخلت موراه..مزالها متكية عالباب و هو مقابلها قاعد فوق الفاليز تاعو..رفد يدو فتح قفالي الشوميز لولين..راصها مطلعاتوش..اما حاسة بيه..حاسة انو نظرتو و هو واقف قدامها قاعدة تعري فيها..لا اراديا رفدت يدها تهبط فالروب هاديك..تبسم على جنب شوية و سمعت صوتو..
هشام: راح نطلعك على يدي
طلعت راصها بالزربة..طاحت عينو في عينها..عقدت حواجبها..
فيرا: واش معناها ؟
عوج فمو من بلاهتها..نظرة عينيها البريئة تلعبلو عالوتر الحساس تاعو..ميحملهاش..ميحملهاش حتى طرف خاطر مشي قادر يصدقها..ببساطة لانو طول حياتو عمرو ما عرف ناس بريئة..نفخ بالقاوي..حكى
هشام: نتي مشي اهل باش تكوني يدي ليمين
بلعت ريقها حكات بلهفة..
فيرا: يعني راح تخليني نروح !!؟
هشام: نخليك ##### مشي نخليك تروحي..متبدايش تخلطي ف###
عضت شفتها مصدومة من طريقة كلامو رجعت هبطت راصها..كمل يحكي..
هشام: ادا مكنتيش اهل لهاد المهمة معنتها انا راح نردك قدها
حكات من غير ما تشوف فيه
فيرا: ك كيفاه ؟
ضحك بخبث..
هشام: غدوا تعرفي..ابداي #### دك من قدامي منيش حاب نشوف ###
طلعت راصها..طلعت معاه كتافها تسأل فيه..فهمها..قلب عينيه..
هشام: هاااي دار قداام ### وييين جات روحي لمهم منشوفكش قدامي
تهزت و تنفظت على عيطتو..زربت بخطواتها تعداتو..و هو يشوف فيها من تحت رموشو..متبعها بعينيه..قربت لاول بيت جات على يدها..اول ما حطت يدها عالبواني..عيط..
هشام: ببببيتي هاااديك

صدرها طلع و هبط مالخلعة..مشافتش فيه كامل..دخلت ديراكت للبيت لي مقابلة..غلقت الباب و تكات عليها..دموعها نزلو معاها..رمات روحها عالبونك..غمت وجها..واش راهو صاري !!كيفاه وصلت لهنا ؟ منين خرجتلها هاد القصة؟ كيفاه ياسين خرج هكا ؟كيفاش قبل يخدم معاهم مع انو عارف ادا كاشما صرالو هي لي راح تباصي؟ كيفاه هانت عليه ؟؟ كلهم اسئلة فراصها..
شهقااها ماشيين و يعلاو..اسوء احساس..اسوء احساس انو تكون وحدك مقطوع من شجرة و الدنيا تعمل فيك لعمايل..وقت تكون ضعيف و لي يجي يعفس عليك و يعيشك كيما يهوالو..وقت تحس روحك نكرة ضعيفة..وقت تتغلق البيبان فوجهك و تحطك تحت الامر الواقع..يمكن تعداو ساعات عليها و هي فهاديك الحالة..خيوط الشمس دخلت لاشومبغ..و هي عينيها متغمضوش..
رفدت روحها بالسيف..عينيها دارو عالبيت..وقفت تمشي و تطايح..تسند فروحها عالحيط..قربت للباب فتحتو..كيما توقعت..دوش..دخلت بالسيف..وقفت عند لمرايا..تشوف معا روحها..عينيها منفوخين حمورا راح يطرطقو..شعرها مبلبز..كلش قاعدةتشوف فيه بين عينيها هوما تصاور ياسين..تصاورو برك..حطت يدها على قلبها تحس فيه يغلي..نااار..ناار قاعدة تحرق فيها..شافت معا المرش..دخلت تحتو..رمات يدها فتحت الماء..بااارد..بااارد قلاس هاابط عليها..طاحت معاه عالارض..تبكي بالصوت..و تحكي..بصوت مقهووور مشي مفهوم..بصوت متقطع بالبكاء..حاطة يدها على قلبها..
فيرا: اطفااي تعييشي اطفاااي متحرقيليش قلبي كتر..خلااااص خلاااص منيش حاابة نعيش كتر حرقتيني بما فيه الكفااية خلاص اطفااي
تحكي و تخبط فالارض..تترجى فيهاااا كأنو تترجى فإنساان عندو قلب و قاعد يسمع فيها..صوتها يروح و يولي..و الماء قلااااس هابط عليها و مخلط معا دموعها..
عمركم شفتو انسان يترجى فوجيعة قلبو و نارو باش تطفى ؟ خاطر يديه مربوطين و معندوش واش يدير اكثر من هكا ؟ العجز..القهر..الخيانة..و الالم..كلهم وقت يجتمعو مرة وحدة عليك..
طرافها بردو و مولاتش حاسة بيهم..مولاتش عندها قدرة تتحمل كتر من هكا..تكات للور..و مزال كلمة "خلاص" تتعاود بصوت مخنوق بين شفافها..نفسها رايح جاي..و عينيها يتغمضو..شكون هي و واش صرا فيها..وين راهي و واش لكدب لي عاشت فيه..كدبو و خيااااانتو و اااه من هاديك الخيااانة لي جات من عند اغلى غااالي عالقلب..حاجات قاعدين يطعنو فيها كأنهم سكاكن..
★★★