__❄عيون_الجليد❄__

20

لحلقة20:
بقيت واقف عن الباب..رفدت يدي بالسيف دقيت..9 ايام كاملين مشفتهاش فيهم..9 ايام و انا نفكر فلي لازم نعملو..مقدرتش نواجها..9 ايام باش قدرت نجمع قوتي باش ندخلها للدومان..9 ايام لا قدرت نشوفها ولا نسمع صوتها اما اخبارها يوصلوني بالحرف..يامات كلهم تعداو تخمام..تجبرت نتحط فموقف هاكا..معنديش خيار وحدوخر..هادي خدمتها و خدمتي..غصب عليا لازم نخليها تنفذ..حبيت و لا كرهت..قواعد لعبة شطرنج الموت مشي انا لي حاطيتهم..و مشي برضايتي..عارف روحي قاعد نغلط فحقها..عارفها مشي تاع هاد البلاصة و براءتها ملازمش تكون هنا..بصح القدر هو لي حطها فطريقي..لازم نعمل هكا..مشي غير خاطر خدمنتها..يمكن قاعد ندير هكا باش نغلب احساسي و نعفس قلبي لي قاعد يقولي بعدها..يمكن خاطر حاب نقتل هاد الاحساس لي قاعد ينولد فداخلي من جهتها..يمكن خاطر حاب نثبت روحي لرووحي..منعرفش بالضبط علاه و منعرفش ادا لي ندير فيه صح ولا غلط بصح هادو هوما القواعد..
فقت وقت تفتح الباب..
وردية: هشاااام عسلااامة
ترمات عليا حضنتني بالقاوي..لفيت يديا عليها..ندور فيعينا عالبلاصة..نستنى غير وقتاه نشوفها..شوية و جبدت روحها..تحكي و تغلق فالباب
وردية: ويين كنت هاد المدة كاملة..خليت الطفلة و رحت..
انا: وين راهي ؟
وردية: ههه راقدة
تبسمت..نعرفها..عشقها فالرقاد و الماكلة..رجعت حكات..
وردية: ادخل للكوزينة خلي نديرلك نعمرلك قهوة راهي واجدة
هزيتلها براصي ايه..تمشيت للكوزينة..ريحتها فكل بلاصة..كل بلاصة طابعة اسمها و ريحتها و حضورها فيها..جبدت الكرسي قعدت..تكيت لتالي..
انا: معملت والو ؟
وردية: نو كيما كنت نقولك غير فدار
حطتلي الكاس قدامي..نحكي
وردية: علاه مجيتش طول هاد المدة
تنهدت..
انا: تخمام..جيست حبيت فترة نعديها وحدي نخمم فيها
وردية: وين وصيلت بتخمام ؟
انا: وصلت لنقطة تخليني نحط حدود لعلاقتي بيها..لازم تكون علاقة بوس و عميل عندو لا اكثر لا اقل..
وردية: و الا ؟
انا: و الا راح نتحرقو كامل
تنهدت بحسرة..رجعت حكات..
وردية: و هاديك الروجية ؟
انا: ليديا ؟
وردية: ممم هاديك الهاملة مزادتش بانت
انا: تعيطلي تطمن و كل مرة تحبنا نتلاقاو نتحجج و نرفض
وردية: بفففف هشام بعد عليها احسن راهي متسواش
قبل ما نلحق نردلها ضربتني ريحتها..قلبي دق بالقاوي..تلفت بالزربة ليها..متكية عالحيط تشوف معايا..طاحت عيني فعينيها..عينيا دارو على وجها كامل..لمعت عينيها..عينيها لمكحلين..شفافها المحرمين عليا..شعرها الطويل لكحل لي نزل للور..نزلت شوية شوية للتحت..رجليها العريانين..الروب الميني لي لابستها..كبست عالكاس فيدي بكل قوتي..حاب نجبدها لعندي نغطس فيها..حاب نعنقها..لي ما نعني الاقتراب فهاد الحالات ممنوع..شوقي ليها من جيهة..و رغبتي فيها لي قاعد نقاوم فيها من جيهة تانية..و الكلام لي ناويي نقولهولها و المهمة لي تجبرت ناطيهالها غصب عني و فوق طاقتي من جيهة وحدوخرا..حاس روحي قاعد نغلط..حاس بنار شاعلة فيا لداخل..و معندي ما ندير..