__❄عيون_الجليد❄__

11

الحلقة11:
هشام يحكي:
نزلت بعينيا ليدها لي شادة يدي..كابسة عليا تقول راح نهرب..يدها سخونة..طرية..غمضت عينيا و رجعت فتحتهم..دغدغتنس لمستها..رجعت شفت معاها..راقدة و محاسة لوالو..رفدت يدي حطيتها على جبهتها نتفقد فحرارتها..معندهاش حمى..رفدت روحي وقفت بلعقل..فتحتلها صبعتيها بلعقل جبدت يدي منها..حطيتلها يدها عالسرير..سقمتلها الغطى..وقفت شوية نشوف معاها..اكيد ضربها الريح لبارح فليل..منعرفش شحال قعدت تستنى فيا عند الباب..الجو بارد و الدار وسط الجبال..مفهمتش واش خرج #### لبارح..عديت يدي على وجهي..نهدي فروحي..خرجت من عندها..تقول هادا لي كان ناقصني..قاعدين نضيعو فالوقت..كل يوم يروح..شهر هنا و للدك مزال مقدرتش نقوويها..ولا ندير فيها ثقة انها قادرة تكون قد المهمة..دخلت للكوزينة..فتحت لفريجيدار نحوس على واش قادر نعمل..ترصاتلي نعمل فحسراء تاع خضرا على اخر عمري..محسوب كان ناقصني انا غير طفلة صغيرة نربيها و نرد بالي عليها..حضرتو كيما جا فنص ساعة..حطيتو فالصينية و رحت ليها..فتحت الباب..طلعت راصها شافت فيا..متوقعتهاش تكون فاقت..بقات تبع فيا بعينيها..حطيت السنيوة قدامها عالطابل دو نوي..قعدت قدامها..
فيرا: وين كنت !؟
قلبت عينيا..نتخنق من هاد الاسئلة..نفخت بالقاوي..
انا: فالكوزينة..لمهم سافا ؟
فيرا: ممممم
انا: حبس راصك ؟
فيرا: نقص لوجع
رفد يدي حطيتها على جبهتها..بقات مركزة معايا..محكات حتى كلمة..احسن شي مبداتهاش الحمى..نزلت رجعت رفدت الصينية حطيتها فوق حجرها..هبطت راصها شافت فيها و رجعت شافت فيا
فيرا: واش هادا !
طلعت حاجبي..
نا: واقيل مراهوش يبان بلي سوپ
فيرا: ناكلها !!
انا: لالا اتفرجي فيها
دناتهالي ليا..عملت ڨريماز بوجها..
فيرا: نووو منحبهااش
نفخت بالقاوي..نهدي فروحي..
انا: منيش نلعب معاك
فيرا: حتى انا منيش نلعب ياخي منحبهاش بالسيييف ! توكلهالي بالسيف ؟
طلعت حواجبي..الفرخة خرج لسانها طويل..عضيت شفتي كبست ملامحي..
انا: تاكلي و لا نوكلك بطريقتي ؟
فيرا: متفهمش نتا ؟ بالسيف ؟ منيش حابة معنتها منيش ح...
قبل ما تكمل شديتها من فكها..دخلتلها المغرفة داخل فمها..و حطيت يدي على فمها غلقتهولها..غمضت عينيها بقوة..بلعاتو غصب عليها..نحيت يدي..ضربتلي يدي..تمسح في فمها
فيرا: يااااعععععع مشي بنينة
قلبت عينيا..سكتت شوية..رجعت شفت معاها..عينيا وساعو وقت شفت عينيها تعمرو بالدموع..
انا: راكي تبكي !!
اول ما حكيت دموعها نزلو على خدها..
فيرا: ق قتلك م منحبهاش
رفدت يدها تمسح فدموعها و تڨحرلي..متوقعتهاش راح تبكي على حاجة هكا !!..كل يوم تصدمني فيها كتر..عديت يدي على وجهي..مزدت معاها حتى كلمة..رفدت روحي نضت قبل ما نخبطها و لا ندير فيها كاش حاجة..عطيتها بالظهر خارج..
انا: كولي ولا ### انا لي حابس نضيع فوقتي معا فرخة
عيطت بكامل صوتها..
فيرا: فلووووس
عقدت حواجبي..تلفت ليها..نشوف معاها كيفاه عاقدة حواجبها بزعاف..كلمتها ترن فودني..
انا: اه ؟
زادت حكات..
فيرا: متزيدش تقولي فرخة ياا لفلوووس (🐥💔)
شدني الضحك..معرفتش كيفاه جابت الكلمة هادي..و بالزيادة كيفاه عاملة وجها و تعاطي فيا..و حاطة يدها على نصها..مبوزة شفافها كيما دراري الصغار..معرفتش واش نقوللها..ڨحرتلها نغطي فضحكتي..مشي حابة نفتحلها العين..رجعت تلفت..خليتها و خرجت..دخلت للبيت..نضحك وحدي..مصيبة و بلاني بيها ربي..حتى كي تحكي تحسها طفلة صغيرة..كلماتها بريئة و تاع دراري صغار..ترميت عالفوتاي..رفدت البيسي و غطست فالخدمة..منيش حابة نفكر فيها خاطر نشعل بالزعاف..
فيرا تحكي:
خرج نزلت بعينيا لسوپ..المشكل مشي فيها..بنينة..بصح منحبهاش..تفكرني فيامات الميتم..تردني للور بسنييين و تفتح بزاف دفاتر غلقتهم..رجعت صورتو بين عينيا..عضيت شفتي..يمكن زعف مني..هو طيبها علاجالي..كان حابني ناكلها..بالاك تصرفي مكانش فمحلو..تنهدت.. رفدت المغرفة..حطيتها ففمي..غمضت عينيا بقوة..بلعتها..رجعت كليت الثانية و الثالثة و الرابعة..حتى خلاصت..تنهدت..شربت كاس الماء ماموراها..
نزلت بلعقل مالسرير..رفدتها فيدي خرجت..حطيتها فالكوزينة..خرجت راجعة..حبست شوية عند باب بيتو..مفتوحة شوية..حطيت يدي عليها مترددة..طبعتها..نشوف فيه عاطيني بالظهر..قاعد عالفوتاي..يحكي فتيليفون..تبسمت..كنت راح نرجع نغلقها..حبسني كلامو..
هشام: ابعتلي اخر مكالمات ياسين قبل ما يموت..شكي فيه كل يوم يزيد
تسمرت فبلاصتي..حتى اني مسمعتش بقية لكلام..مقدرتش نتزعزع مبلاصتي..لا قدرت نقدم ولا نوخر..حبط التيليفون من يدو..بلعت ريقي..قلبي يخبط و مشي فاهمة علاه..مقدرتش نرجع لتالي..مقدرتش نغلق الباب..مقدرتش نقاوم فضولي..شوية و سمعت صوت ميساج لحق للبيسي لي فوق حجرو..منعرفش واش كان يدير خاطر كان عاطيني بالظهر..ثواني و سمعت صوتو..صوت ياسين..دموعي نزلو معاه..حطيت يدي على فمي نمنع فشهقاتي..نسمع فيه و مشي مصدقة..«عارف..متخافش مسيطر عالامور..بالظبط هادا لي جيت حنقولو..المشكلة ف فيرا..ولات تشكل عائق قدام هدفنا..منعرف نظن راح نطلقها خلاصت مهمتها معايا.. يا ### رجعت حمل ثقيل على كتافي دموعها فطرطف عينيها كل شوية تبكي مبقيتش قادر نتحملها كتر.....»..
كل كلمة..و كل حرف..و كل تشكيلة..كانت كيف السهم لقلبي..موس و تغرس فيا..الدم حسيتو جمد فعروقي..نهز براصي لالا..مشي مصدقة لي سمعتو..ياسين ؟؟؟..هادا ياسين ؟..ياسين لي طول عمرو كان الصدر الحنين لي نتخبى عندو..هاداااا لي حكككى دك ياااسين !!!..رجعت بخطوات لتالي..زربت لبيتي..هررررربت لبيتي..هربت مالحقيقة..محاولتش حتى نسمع بقية كلامو..كلامو لي دبحني بالحافي..غلقت الباب تكيت عليها..نزلت معاها للارض..كلامو يتعاود فراصي حرف..«رجعت حمل ثقيل على كتافي دموعها فطرطف عينيها كل شوية تبكي مبقيتش قادر نتحملها كتر»