__❄عيون_الجليد❄__

08

الحلقة8:
فيرا تحكي:
تهزيت و تنفظت على صوت الباب لي تخبط..جيت قاعدة فبلاصتي..رفدت يدي نحك فعينيا..طلعت راصي..بلعت ريقي و انا نشوف فيه..واقف قدام الباب..مربع يديه يشوف معايا..خرجت هادوك لحروف بالسيف..
انا: و واش
هشام: اتحركي معنديش النهار كامل ليك
مفهمتش قصدو..باقي نشوف معاه مستغربة..عدا يدو على وجهو بغزول..
هشام: نووووووضي
من عيطتو محسيتش كيفاه جيت واقفة..شاف فيا ملفوق للتحت..نظرتو عراااتني..من غير ما نحس رجعت بخطوة للور..نفخ بالقاوي..
هشام: نص ساعة في يدك نلقاك عندي برا
قال كلمتو و عطاني بالظهر خرج..خبطت الارض برجلي مالزعاف..مشي عبد هادا..يخلع..حتى اسمو مزال معرفتوش..قربت لخزانة..جبدت حوايجي..دخلت بالزربة لدوش..ريقلت اموري..لبست سروال و تيشرت حكمت شعري لفوق و خرجت..نزرب فخطواتي باش منسمعش محضر من عندو..فنفس الوقت نحاول نتفكر الفيديو تاع لبارح خفت يسقسيني عليه..كنت خارجة ليه..رجعت بخطوات كي طاحت عيني عالطابل تاع الكولوار..محطوطين ورق لتم..قربت ليهم رفدتو..بطاقة تاعو.."هشام الراشدي"..يعني اسمو هشام..رجعت حطيتها..تلفت للكوزينة..وقفت نحكي شوية..معا روحي..مزال الحال مزال عندي وقت..دخلت و طبعت الباب مورايا..قربت ديراكت للفريجيدار فتحو..جبدت قرعة عصير..فرغت فالكاس رفدت الڨاطو من فوق الطابلة..تكيت عالرخامة ناكل و نجوز بالعصير..ما فقت غير عالباب تخبطت..كنت ناكل..حصلتلي مالخلعة..وليت نسعل..عينيا خرجو..رفدت الكاس بالسيف شربت منو..حطيتو..تنهدت حطيت يدي على رقبتي نرد فالنفس..طلعت راصي ليه..واقف عند الباب يڨحرلي (حقا تفكرت فليكومونتار بزااف روماركيت ميعرفوش واش معنتها يڨحرلي بوون هي كلمة تونسية بالدزيرية معنتها يبرمني يعني معلاباليش كيفاه نشرحهالكم شغل يشوف فيا بزعاف)..
بلعت ريقي بالسيف..صوتو خرج هادي بصح مكبوس مالزعاف
هشام: واش رااااكي ديري هنااا مشي قتتتلك تلحقيني
انا: ج جعت ع علاهاديك جي...
مخلانيش نكمل..قاطعني
هشام: اتحركي قدامي ###

بعد من قدام الباب..هبطت راصي جزت عليه خرجت..نسمع فخطواتو مورايا..فتحت الباب خرجت..حبست نستنى فيه يلحقني..سبقني رجع هو قبلي..يمشي و انا نتبع فيه..حتى و هو عاطيني بالظهر يخوف..منبان والو قدامو..حبس حبست موراه..تلفت ليا..
هشام: الفيديو تاع لبارح مزالك شافية عليه ؟
انا: ايه
هشام: واش من سلاح كان يحكي عليه ؟
انا: GLOCK 26
هزلي براصو ايه..شرلي بيدو جيهة اليسار..تلفت نشوف وين..كمل يحكي..
هشام: اجبديهولي من بين هادوك الاسلحة
تبسم..ساهلة..قربت ليهم..عقدت حواجبي و انا نشوف معاهم..رجعت تلفت ليه..
انا: بصح كاامل متشابهين !!
دار يديه داخل جيبو..
هشام: كاين GLOCK 26 واحد لتم نحب عليه دك
نفخت بالقاوي رجعت درت ليهم نشوف معاهم..نتفكر فميزاتو..الطول 160 ملم الوزن 560
سعة المخزن 10, 12 (المعلومات هادو صحاح متقولوش راهي تخرط علينا😂)..طولهم و وزنهم تقريبا نفسو مقدرتش نفرق..فتحتهم بالواحد نشوف شحال يرفد المخزن تاعهم.. صح واحد برك لي يرفد 10،12..عينيا لمعو تلفت ليه بالزربة..
انا: هااهو لقيتوو
هشام: جيبيه و ارواحي
قربت ليه..مديت يدي باش نمدهولو..طلع حاجبو..شاف فيه و رجع شاف فيا..شدني من يدي جبدني ليه و بعد للور..جا مورايا..
هشام: شارجيه
انا: اه ؟
مد يدو عطاني 3 رصاصات..درت ليه بالزربة..
انا: انا ؟
قلب عينيه بزعاف..شديتهم من عندو بالسيف..نتفكر فكل ثانية من هاداك الفيديو..حطيتهم فالمخزن تاع السلاح..مطلععش راصي معا اني حاسة بعينيه لي مركزين معايا.. انا: كملت
حط يديه على كتافي..دورني حكى فودني..
‏هشام: هدفك قدامك
‏بلعت ريقي..رعشت من غير ما نحس..سمعتو وقت نفخ بالقاوي..عرفتو حس بيا..حط رجلو بين رجليا..عينيا وساعومن حركتو..كنت راح ندور ليه..كبس على كتافي كتر مخلانيش..ضربلي رجلي بحركة خفيفة خلاني نفتحهم..رجعلي رجل وحدة للور..مقدرت نحكي حتى كلمة..نتبع فيه واش راهو يدير برك..
‏هشام: صوبي السلاح للهدف
‏رفدتو بالسيف صوبتو..
‏هشام: ركزي معاه
‏عضيت شفتي..كيفاه حابني نركز وويديه على كتافي و رجلو بين رجليا..نفسو يحرق فيا غرقبتي و يقولي ركزي..غمضت عينيا نحاول نتحكم فروحي..دايرة كامل جهدي باش نلغي حضورو..باش نحبس الرعشة هادي لي تتملكني وقت يكون قدامي..رجعت فتحت عينيا..جبدت زر الامان..يدي ترعش..محسيت غير على يدو لي مشات من كتفي حتى لصبعتيا ببطئ..شدلي يدي فوق السلاح..لحمي تشوك من لمستو..
‏هشام: حبسي ما ترعشي مقتلكش اقتلي كاش واحد قتلك تيري عالفراغ
‏بلعت ريقي..من غير ما نفكر ضغطت عالزناد..محسيتش لروحي كيفاه رميتو من يدي عيطت بكل قوتي و درت نجري..جيت فصدرو..كبست على تريكوه بكامل قوتي..مغمضة عينيا..معلاباليش واش تفسير حركتي هادي..مشي فاهمة علاه بدني تلقائيا تخبى عندو..متحركش مبلاصتو..معمل حتى غياكسيون..يديه مزال فجيوبو..فقت على روحي..جبدت روحي بلعقل..طلعت عينيا ليه..نظرتو وترتني اكثر..هبطت عينيا نجري..نلعب بصوابعي
‏هشام: كل مرة راح تيري فيها رصاصة راح تخافي و تروحي تتخباي ؟
‏كلامو خرجت بنبرة استهزاء..قلبت عينيا رجعت لاماش تاعي مور ودني..
‏انا: اول مرة..خفت
‏هشام: مممم
‏جبد روحو للور..طلعت راصي ليه..
‏هشام: كملي
‏انا: واش نكمل ؟
‏عملي براصو اشارة..تلفت نشوف فاللوحة تاع التصويب..الرصاصة مجاتش فيه اصلا..منعرف وين بحرتها..عضيت شفتي..
‏هشام: هاايااا
‏رجعت وقفت كيما لمرة لولة..نفس الحركات..عاودتها كتر من 30 مرة..تعودت عالصوت..معا اني كل مرة نتيري فيها نغمض عينيا بالقاوي و مرات يطيح السلاح من يدي..منعرف شحال تعدا وقت علينا لتم..فالاول مكنتش كامل نقيس اللوحة..و فالمرات لخرين ولا تجي فيها بصح متقيسش الهدف..اخر مرة جات فطرف اللوحة..نفخ بالقاوي..تلفت ليه..لقيتو مركز معايا..
‏انا: عييييت
‏عدا يدو على شعرو بغزول..