الحلقة29:
فيرا تحكي:
قبل ما نلحق لباب لوتال..حسيت بيدو لي خطفتني من خصري..تخبطت فصدرو..غمضت عينيا بقوة و رجعت فتحتهم..طلعت راصي نشوف معاه..يحكي بصوت هادي باين عليه الزعاف..
هشام: بلا ما نوصي ###
قلبت عينيا..حطيت يديا على صدرو طبعتو لتالي..بعد شوية..رجع شدني من يدي..
هشام: فهمتي ولا نعاود ل ###
انا: مممم فهمت
تبسم على جنب..طلق يدي بلعقل..محبيتش نزيد معاه فالهدرة نعرفو مهبول و قادر ميخلينيش ندخل..لي يهمني درك اني ندير رايي و برك..عارفاتو مقلق..كيما عارفة انو الروب تاعي مشي عاجباتو..اما هو لي حب يتحداني..تلفت باش ندخل..سبقني فخطواتو..بقيت نشوف معاه..يمشي و راصو فالسماء..يديه فلجياب..الكوستيم هاداك مزير على بدنو..يفتق..ريحتو دوختني..شحال متنية نعنقو و نترمى فحضنو..بصح مستحيل..مستحيل نقدر نقرب بعد الحدود لي محطوطة بيناتنا..
وقف عند باب قاعة الحفلات تاع لوتال..تلفت ليا..بلعت ريقي و زربت بخطواتي ليه..وقفنا قدام بعضانا..مدلي يدو..شفت فيه..و رجع شفت فيها..شديتو من مرفقو..رجع دخلها داخل جيبو و انا شايدة فيها بيد و اليد الثانية شادة بوشاتي و طرف من الروب..فتحولنا الباب الحراس لي لتم..دخلنا..خذيت نفس طويل..رعشة خوف سرات فبدني فثواني..من غير ما نعرف علاه..طلعت راصي ليه..لقيتو مركز معايا..طمني بعينيه..فهمتو انو حس بيا..حس بخوفي كيف عادتو..تبسملي شبه تبسيمة..رجعت تلفت لناس..كلهم شخصيات باينين راقيين..مغطيين اعمالهم فالمافيا بالشركات و التبرعات..تنهدت..قربت معاه لطابلة كبيرة..وقفنا فيزوج..كامل تلفتو يشوف معانا..جبدت يدي من يدو..بقى يحكي معاهم..محاولتش حتى نركز فكلامهم..خاطر ميهمنيش..تهزيت و انفظت على يد تحطت على ظهري..تلفت بالزربة ليه..لقيتو هو..تبسملي..
مهدي: متوقعتش باش نشوفك هنا
انا: ههههه حتى انا متوقعتش راح نجي
مهدي: فرحت بشوفتك
انا: ههه حتى انا و..
قبل ما نكمل نحكي..شفت معا عينيه لي تركزو مورايا..جبدت روحي بخطوات..درت نشوف وين راهو يشوف..بلعت ريقي و انا نشوف فهشام يڨحرلو..تي راح ياكلو بعينيه..و حتى مهدي مشي احسن منو..بقيت واقفة فالنص..مرة نشوف فهشام و مرة نشوف فمهدي..فيزوج يڨحرو لبعضاهم..معرفت ما ندير..
مهدي: للاسف نتا منقدرس نكدب عليك و نقولك فرحت بشوفتك
هشام: حتى انا منظنش راح يجي نهار نفرح بيك غير ادا شفتك فسريري
غمزلو..شهقت..تي لا حشم و لا راعى وجودو..زايد منحرف و خامج فمخو..قبل ما يجاوبو مهدي..قاطعنا صوتها مورانا..
ليديا: هشاام
تلفتنا ليها في ثلاثة..مهدي ضحك..اما انا فقلبي عصر عليا و انا نشوف فيها..هزيتها و حطيتها..لابسة روب يادوب مغطية اللازم فاللازم..شعرها على وجها..مكياج غامق..تتبسم لهشام..تلفت لهشام..لقيت عروقو مكبوسة..فكو بارز اكثر..عرفتو عاض على لسانو مالداخل..و عرفتو مشي عاجبو الحال..رجعت تلفت ليها..ڨحرتلي..قلبت عينيا منها..قربت ليه..حطت مرفقها على كتفو..لاسقة فيه..تحكي فوجهو..
ليديا: مشي عيب عليك معرضتنيش..
أنت تقرأ
__❄عيون_الجليد❄__
Action#منقولة __❄عيون_الجليد❄__ معروف عن المافيا الايطالية ان تنظيمها بالرُتب..و لكل عضو رتبته الخاصة و من بين اهم قوانين المافيا الايطاليا🔪😱ان العميل اذا مات تتولى مهامه زوجته😈🔥..و تعرف بعدها بإسم عيون_الجليد❄💣✌.. 🌸انطلاقا من ها...
