__❄عيون_الجليد❄__

31

الحلقة31:
واقفة مقابلة لمرايا..رفدت يدي عديت صوابعي على الوشم فرقبتي بلعقل..غمضت عينيا نتبسم وحدي..مع انو جازو يومين..يومين كاملين على هاداك النهار..اما لتو نحس فشفافو عليه..لتو نحس بلمستو..فتحت عينيا بلعقل..نزلت صبعتيا لجنبي..رفدت يدي الثانية حطيتها على فخذي..على تراس صوابعو لي مزالهم على بدني وقت رفدني هاديك الليلة و كبس عليا بكل قوتو..مزلت نشم فريحتو انا..مزلت نحس بوجودو..معا انو بعد ما وصاني لدار لا زاد عيط و لازاد بان..تنهدت..رفدت الروب من فوق الكرسي نلبس فيها..تعودت على طبايعو..كل مرة يعملها..يقرب مني لاقصى درجة..و منبعد يبعد و ميزيدش يبان..يخليني نعيش يامات فراقو على ذكراه وقت كان قريب ليا..كل ما يقرب ليا و نفرح ندفع الثمن غيااب بعدها..فراااق يحرق و يشوي..غلقت الروب ملور..رفدت يديا نمشط فشعري و نشوف معا روحي فرد وقت..عملت زوج دفاير..ضحكتو انا نوف فمنظرهم وقت كملت..شخال عندهم فخاطري و حابة نعملهم..بعدت ملمرايا..قربت لسرير رفدت الفاست جين لبستها فوق هاديك الروب الحمراء..نزلت نلبس فكونفارسي حمراء بلبيض..عدلت شعري..اول ما قربت للباب باش نخرج سمعت صوت تيليفوني..قلبي دق بالقاوي..للحظاتفكرتو هو..منعرف كيفاه جريب لتيليفون..رفدتو فيدي..بلعت ريقي بالسيف و انا نقرى فاسم "مهدي"..واش فكرو فيا دك..تي حتى هو من هاديك الليلة معادش شفتو ولا تصل بيا..فثواني النفس تغلق عليا مالخوف..حطيت يدي على رقبتي..خذيت نفس طويل..رفدت بالسيف..نسمع فيه يحكي..
مهدي: الو
انا: وي
مهدي: فيرا سافا ؟
انا: سافا مهدي و نتا ؟
مهدي: سافا..فيرا نسقسيك
انا: وي !
مهدي: نهار الحفلة كي طاحلك تيليفوني مشفتيش كارت ميموار ؟
قلبي دق بالقاوي..رجليا ترخفو..قعدت عالسرير..بلعت ريقي نحكي..
انا: نو مشفتش اصلا طاحت غير لاباتري
مهدي: مممممم
انا: علاه ملقيتهاش ؟
مهدي: وي ملقيتهاش
انا: بالاك مكانتش لتم مقبل
مهدي: اممم بالاك
انا: كان فيها حاجة مهمة ؟
مهدي: تقدري تقولي..
انا: ديزولي اما مشفتهاش
مهدي: معليش مشي مشكل..اصلا كنتي ديخانة..لمهم ادا تفكرتي اي حاجة قوليلي
انا: اكيييد
مهدي: ميرسي..باي
انا: ب باي
غلق..نزلت التيليفون بلعقل من يدي..كبست عليه بكل قوتي..سلكت فاخر لحظة..عالاقل مشكش فيا..رجعت وقفت..رفدت صاكي قدامي..و نزلت..قربت لبيتها..دقيت..شوية و سمعت صوتها وقت قاتلي ادخلي..فتحت الباب..طليت عليها..
انا: خالتي راني خارجة
تنهدت..حطت لكتاب من يدها..نحات نواظرها..تحكي..
وردية: يعني بعد ما حكينا الصباح مزالك مصرة على رايك انك تروحي
هزيتلها براصي ايه..كملت نحكي..
انا: ليوم انا حابة ندفنو صح..ليوم راح نحطو فقبرو صح
خذات نفس طويييل..هزلت راصها بإستسلام..
وردية: واش راح نقولك..ديري لي تحسيه راح يريحك
انا: ميرسي
تبسمتلي..رديتلها التبسيمة..بعدت و غلقت الباب مورايا..رفدت مفاتحي من فوق الطابل و خرجت بالزربة..ركبت..رميت ساكي قدامي و ديماريت..بلاصة وحدة بين عينيا..نسوق طايرة فالطريق..نستنى غير وقتاه نوصل..ليوم راح ندفن اخر ذكرياتي معاه..ليوم راح نخرجو من حياتي بصفة نهائية..و راح نحط حد لكلش..ليوم راح نغلق الدفتر تاعو..و تخلاص هنا..
شظيت فران وقت وصلت..حطيت يدي عالباب..قلبي يرجف..مترددة..خذيت نفس طوييل نقوي فروحي فتحتها و نزلت..طلعت راصي للبلاصة..للمقبرة..غمضت عينيا بقوة و رجعت فتحتهم..كل خطوة نعمل فيها جيهة قبرو نحس فرجليا يرزنو اكثر..و النفس يتغلق عليا..وقفت سواسوا قدام قبرو..مقابلة اسمو.."ياسين قايد"..تبسمت على جنب..ضميت يديا لصدري..عينيا تعمرو بالدموع..دموع قهر..دموع حڨرة..و استغلال..
انا: هاني رجعت..رجعت باش نشوفك..ههه تعرف.. اليوم من عامين انا تزوجتك..كيما نهار ليوم بدات لعبة الاستغلال تاعك..تعرف واش اكثر حاجة متمنيتها دك ؟ انك تكون قدامي..مشي خاطر توحشتك..ولا خاطر حابة نشوفك..جيست باش نسقسيك..نسقسيك علاه خدعتني هكاك ؟ علاه رميت بيا لهاد النار ؟
رفدت يدي نمسح فدموعي لي نزلو..كملت نحكي..
انا: مرات..مرات انا نقول دارها بلعاني..تزوج بيا عن قصد خاطر كان عارف روحو راح يموت و كان حابني انا ندخل لهاد الجحيم..مرااات نقول نتا دخلت تخدم معاهم غير باش تحصلني انا..
رجعت مسحت دموعي لي زادو اكثر..نزلت اجونو قدام قبرو..رفد يدي عديتها بلعقل على ترابو..كبست على حفنة تراب في يدي..كملت نحكي..
انا: تعرف انتقامي منك كيفاه حيكون ؟؟ علابالك كيفاه ؟..راح نحوس عالسبب لي خلاك تستغلني و تتزوج بيا..متأكدة كان عندك هدف من مور هاد الشئ..راح نعرفو..راح نعرف كلش مخبيه..و تعرف موراها واش حندير ؟؟
خذيت نفس طويل..تبسمت على جنب وقفت و باقي حفنة من ترابو فيدي..
انا: راح ندمر هدفك..لي كنت حاب توصلو فهاد السنين انا راح ندمرو..لي كنت حاب تديه راح نوصلو..منعرف واش كان بالضبط الهدف تاعك لي يهمني انو مهما كان راح نعمل عكسو..شايف ترابك هادا لي فيدي ؟؟ راح نخلي اهدافك يتبخرو هكا كيما هو و يروحو معا الريح..عمري ما نغفر استغلالك ليا..
طلقت التراب من يدي..داه الريح و راح فالهواء و مولاش موجود..
انا: يمكن لوكان كنت حي مكنتش تصدق اني فيرا لي تعرفها..فيرا لي كنت حريص على انك تخليها ضعيفة باش متقدرش تعيش بلا بيك..فيرا هاديك ماتت..فيرا هاديك جا لي قواها..جا لي رجع نفسها و روحها و كلش عندها..ياسين قايد..فيرا لي راهي هنا..هي الطفلة لي حياها عشق هشام..هي نفسها لي راح توصل لادق تفاصيل اسرارك..
تنهدت..نفظت يدي من ترابو من غير ما نزل عيني من اسمو..عارفة اني قاعدة نحكي معا الريح..عارفة انومشي قاعد يسمع فيا..اما هاد الهدرة شحال عندي حاكمتها فقلبي..و كان لازم نفرغ..كان لازم نحكي لي عندي و نرتاح من هاد الهم لي حاكماتو فقلبي..رجعت خصلات شعري لتالي..عطيتو بالظهر و رحت..رحت من غير ما نتلفت للور من غير ما نرجع نشوف فيه..انا ليوم بديت بداية جديدة فحياتي..ليوم بديت فطريق جديدة..طريق مسحت منها كل ذكرى لواحظ اسمو ياسين..دك الحاجة الوحيدة لي تقدر تجمعني بإسمو..هي اسرارو لي كان مخبيها قبل موتو..
خرجت مالمقبرة..ركبت طونوبيلتي..رميت يدي لصاكي جبدتو ليا..خرجت منو دبوزة الماء..شربت منها..و رجعت نزلتها..خذيت نفس طويل نهدي فروحي..رجعتها لبلاصتها..و رجعت ديماريت..
منعرفش كيفاه لقيت روحي قدام باب دارنا لقديمة..رفدت صاكي..هبطت..طلعت راصي ليها..تكيت عالطونوبيل مورايا..غمضت عينيا بقوة و رجعت فتحتهم..تعدات بين عينيا الليلة لي جيت فيها لهنا اول مرة..الليلة لي دخلت فيها لهاد الدار بالروب البيضاء..تنفست بالقاوي..هزيت براصي لالا..نحاول نخرج هاديك الليلة من راصي..و زادا لي صرا فيها..قربت بخطوات رزان للباب..فتحت لابوات تاع تريسيتي لي قدام الباب..عضيت شفتي..حاجة ما تبدلت..حتى من المفتاح مزالو هنا..تماما كيما هادوك اليامات..جبدت المفتاح..حطيتو فالباب..فتحتها..حطيت يدي عالبوانيي..يدي ترعش..بلعت ريقي..طبعتها بالسيف..تفتحت قدامي..تفتحت و تفتحو معاها ابواب تاع ذكريات..حتى من صوتو..حتى من صوتو رجعت سمعتو..عملت خطوة بالسيف..دخلت..نفس تغلق عليا و انا نسمع فصوتو..صوتو و هو يسقسي فيا ادا طاب لعشاء..صوتو و هو يقولي انو خارج..ريحتو..ريحت الماكلة..دقفت فنص الكولوار..ندور فراصي على كامل لبلايص..تصاورنا فكل بلاصة يتعداو بين عينيا..نشوف معا كل شبر مالدار..قدام هاد الباب كدب عليا و قالي عندي عملية راني خارج..و فهاد الزاوية باسني من راصي بوسة الغدر هاديك و قالي نحبك..و فهاد الكوزينة قعدنا و كلينا..تنهدت بحرقة..بحرقة ناار شاعلة فيا و غدر طعني فظهري..و وجع شواني..عديت يديا على وجهي..نهدي فروحي..نزلت بيها لرقبتي..نتنفس بالقاوي..تلفت جيهة المكتب تاعي..الخطوة نعمل فيها بالسيف..خطواتي نحس فصوتهم يرن فودني..وقفت سواسوا قدام المكتب تاعو..رفدت يدي ترعش حطيتها عالبوانييي..غمضت عينيا بقوة و رجعت فتحتهم..فتحتها و دزيتها بيدي..نزلت راصي نشوف معا رجليا..عملت اول خطوة دخلت بيها لبيروه..قلبي دق بالقاوي..اول مرة ندخلو..من اول يوم حطيت رجلي فهاد الدار منع عليا ندخل لهاد البيرو..عمري ما جات رجلي فيه..عينيا دارو عليه كاامل و رجعت تركزت فكرسيه..تبسمت على جنب..بإنكسار..هاني دخلت..وين راه باش يمنعني..قربت للبيرو هاداك..وقفت قدام الكرسي..رفدت يدي عديت صوابعي عليه..رجعت تبسمت..فداخلي حاسة بالرضى..حاسة بالرضى عالنفس..فرحانة بروحي انا قدرت نواجه..قدرت نجي لهنا..نزلت براصي للبيرو..يدي تحركت تلقائيا..حطيت يدي عالقجر..فتحتو بلعقل..عينيا وسااعو وقت طاحت عيني على شارة البوليس..قلبي دق بالقاوي..الدنيا دارت بيا..رفدت يدي بالسيف عديتها عليها..النفس راحلي مالصدمة..فمي تحل شطر..شارة بوليس ؟؟؟..مستحيل..ستندت بيديا عالبيرو..نحكم فروحي..بوليسي..يقدر يكون ياسين بوليسي ؟..مستحيل..كيفاه هكااا؟..راصي حسيتو بلوكا..نسمع فدربات قلبي لي قاعدين يتسارعو..
قطع حبل افكاري صوتو..صوتو لي طاح عليا كيف الصاعقة..
هشام: فيرا
شهقت..طلعت راصي بالزربة ليه..متكي عالباب..يديه فالجياب..مركز معايا..مركز معايا لاقصى درجة..بلعت ريقي بالسيف..واش جابو..علاه راهو هنا..كيفاه عرفني هنا..لحقني ؟..علاه قاعد يشوف فيا هكا ؟..علاااه هاد النظرة فعينييييه..رجع حكى..
هشام: توحشتيه ؟ توحشتيه لدرجة انك تروحي لقبرو و تجي لهنا ؟ لهاد الدرجة مزالك تحبيه ؟
فمي تحل من كلامو و من بحة صوتو..صوتو لي خرج بوجيعة..لي خرج بقهر..لا اراديا هزيتلو براصي لالا..دموعي نزلو وحدهم..حسيت بيهم سخونين يحرقو..عقد حواجبو..بعد مالحيط..يقرب مني و يحكي..
هشام: اششش علاه راكي تبكي ؟؟ هادا كاامل شووق ليه ؟؟ توحشتي حبيب قلبك لهاد الدرجة ؟
مقدرتش نحي عيني من عينو..مقدرتش زادا نحكي..من جيهة مصدومة من لي شفتو فلقجر و مشي عارفة ادا لازم نقولو ولا لالا..و من جيهة مصدومة من كلامو و قاهرتني نبرة صوتو و قاتلني عجزي اني نعترف..وقف قدامي قد قد..طلعت عينيا ليه..تبسم..تبسم هاديك الابتسامة لي تحرقني فقلبي..غمضت عينيا بقوة..غلقت لقجر من غير ما ينتبه..منعرفش علاه درت هاكا..اما هادا لي جا فبالي..رجعت فتحت عينيا..نزلو معاهم دموعي اكثر..رفد يدو..حطها على خدي..يتبسم بإنكسار و يحكي فرد وقت..
هشام: متبكيش..عاادي توحشتيه اما متبكييش دموعك غاليين بصح مراحش يرجعوه ليك اشششش
عضيت شفتي بقوة..نبرة صوتو موس و تغرس فيا..كلامو نار و شعلووها داااخلي..
انا: ه هشام
الابتسامة لي كانت على شفافو تمحات..نزل يدو من خدي بلعقل..يهزلي براصو لالا..عقدت حواجبي..نحاول نفهم واش راهو يدير..شدني من يدي..حط صبعو على شفافي يسكت فيا..يحكي فرد وقت
هشام: اششش متجبديش اسمس على لسانك..متنطقيييش اسمي و نتي فالدااار لي كنتي فيها احت ذمتو..متنطقييييييش ## اسممممممي هناااااا ###
تهزييت و تنظت على عياطو..على اخر جملة لي قالها بعياط هز حيووط الدار..عينيا وساااعو..جبد يدو لي على شفافي..كمل يحكي..يحكي و يعيط و معا كل كلمة يكبس على يدي اكثر..
هشام: مانطقيييش اسمي هنااا..متجبدييينييش هنااا..
تلفت للكرسي..رفد يدو يشر عليه..و يحكي..
هشام: فهااد الكرسي هوو كان يقعد يخدم و نتي تجيبيلو القهوة و تبوسيه صح ؟؟ قوولي صح ؟
عينيا وساعو من كلامو..قلبي حسيتو خرج مبلاصتو..لكلام هربلي..مصدومة و كلمة مصدومة قليلة فحقي..هزيتلو براصي لالا..مرجعليش..مشاااافش فيا اصلا..صح عينيه فعينيا اما مكانش يشوف فيا..عينيه فارغين..جامدين..حمووراا..مزاد حتتى حرف..جبدني من يدي..يمشي و يجر فيا موراه..صبعتيه خترقو يدي..عيطتلو..حاولت نحبسو..اما والو..والو مكانش يسمع فيا..وقف عندباب الكوزينة..يحكي و يوريلي بيدو..من غير حتى ما يشوف معايا..
هشام: هنااا هنااا فهاد الكوزينة كنتو كل يووم تفطرو كيف كيف و يوكلك بيدو صح ؟
طلق يدي..خلاني مسمرة فبلاصتي عند الباب و دخل..وقف عند البوطاجي..خبطو بكل قوتو..يعيييييط..
هشام: هناااا كااان يقعدددك و يوكلك هناااااا..
دموعي شلال..قلبي نحس فيه يحررق فيا يوووجع..لكلام وحل فحلقي و معادش قدرت نخرجو..جيست نهزلو براصي لالا..شهقاتي ماشيين و يعلاو..النفس يروح و يوليلي مالصدمة..واجعني قلبي على حااالتو و حااالتي..على لي قاااعد يحس فيييه..تلفت ليا..بزوج خطوات كان قدامي..رجع شد يدي..يمشي فيا موراه..وقف فصاالة..شايديني من يدي عند الباب و يوريلي بيدو..
هشام: هناا كنتو تشوفو فلي فيلم كيف كيييف و يعنقك هناااا فيرااا هنااااا..رااكي تشوفي ؟ هااني انا قاعد نشووف فيكم كيف كيف لتم
انا: ه هشام
تلفت ليا..من غير سابق انذار..عيط فوجهي بكامل صوتو..غمضت عينيا بقوة..نفسو سخون يحرق فيا..
هشام: ### متجبديييييش اسممممي متفهمييييش !!
مقدرتش حتى نفتح عينيا..جيس هزيتلو براصي ايه..نحس فروحي حنطيح..راصي قاعد يتزير عليا..ما حسيت بيه غير وقت زاد جبدني معاه..فتح الباب البيت..فتحها و خبطها على طول يدو..ضخك وقت قابلنا السرير..ضحك بهستيريا..بأعلىصوتو..يدو لي كانت كابسة على يدي ترفخت..و حتى نفسو تقطع..خلاني مكوانسية فبلاصتي..مسمرة لتم..و قرب هو..دخل و انا نشوف معاه..تكيت بيدي عالباب نوازن فروحي..نشوف فيه وقف عند السرير..عاطيني بالظهر..فتح يديه..رجع حكى..
هشام: و هناااا..هنااا هو باااسك..هناااا هووو عنقك..هنااا نتي وليتي مرتوو و ملكك هنااااا كنتي ليه و بين يديه..هناااا فيراا هنااا

صوتو و كلامو ضربوني فراااصي..يرنوو فراصي و وجعي زااد..حابة نعيط..نعيط و نقولو لالا..نعيط و نقولو عمرو ما مسني..حابة نحبسو..حابة نسكتو..حابة نحبس وجعي و وجعو..حاسة بيه..حاسة بقلبو لي قاعد يحرق..حاسة بغيرتو..حاسة بنارو..حااابة نطفي نارو و ناري..حابة نروح نعنقو و نحبسو..اما مقدرتش..مقدرتش نقرب ليه قوتي خانتني..و صورو تضببت بين عينيا..صوتو نسمع فيه بعيييد و ابدنيا قاعدة دور بيا..محسيت غير ببدني وقت ترخف..و ضربت فراصي صوت الخبطة وقت طاح بدني عالارض..الدنيا دور بيا و راصي نحس فيه تقييل..عينيا يتغمضو وحدهم..سمعت صوتو..سمعتو وقت عيط بإسمي..كيما حسيت بيديه لي رفدو راصي..حسيت بيديه لي دارو بيا..و بجسمو السخون وقت لسق جسمي لي معادش حسيت بطرافو من البرد..حسيت بيديه لي تحطو على وجهي و صوتو لي يعيطلي..اما مقدرت نتحرك ولا نحكي..عينيا تعمضو..و بعدها محسيت لوالو..ستسلمت للوجع لي قاعدة نحس فيه فراصي و قلبي..و خليت حبيبي هكاك يتحرق بنار غيرتو غصب عليا و مرتش نطفي حرقة قلبو..
★★★