Babysitting the Billionaire

Kabanata 29

Kabanata 29

"RUBY, IYONG MGA bilin ko sa'yo, ha? Ite-text mo kami nila Mama kapag nasa Manila ka na." Sumunod ako sa kuwarto niya. "Tatawagan kita kaya wag kang magpapatay ng cell phone. 'Tapos iyong—"

"Ate, kahapon ka pa nagpapaalala sa akin. Memorized ko na po." Hindi na ako pinatapos ni Ruby sa pagsasalita. "Don't worry ka na lang diyan, okay? KKT! As in Keri Ko To." Nakangiti ang kanyang mga mata habang nakatitig siya sa akin.

Parang noong isang araw lang ay mangingiyak-ngiyak pa siya sa tuwa dahil nabunot nga ang sa raffle ang black ticket niya. Hindi niya akalain na ang pagbili niya ng T-shirt para kay Amang ang magbibigay sa kanya ng chance na maka-date si Terrence Montemayor Saavedra, makatungtong sa Montemayor Cruise, at magka chance na makita ang buong banda ng Black Omega Society.

Napabuga ako ng hangin nang makita ko ang maleta na nasa gilid ng kama niya. Iyon siguro ang maleta na dadalhin niya sa Manila. Magtatagalan kasi siya ng tatlong araw sa Manila dahil bukod sa one-day-date with Terrence, ilang days rin ang ii-stay niya sa Montemayor Cruise. Napakagat-labi ako at saka ko sinalo ang kanyang mga mata. "Basta, Ruby, wag mong kakalimutan iyong huling bilin ko."

"Alin ba ron? Andame e."

Lumapit ako sa kanya. "Iyong tungkol kay Jumbo."

Lumawak ang kanyang ngiti. "Don't worry, ate. Hindi ko ipapaalam sa kanya na ikaw babysitter niya dati."

Napangiti na rin ako sa sinabi niya. "'Lika nga rito..." pagkatapos ay niyakap ko siya. Mahigpit. Mahigpit na mahigpit. Gusto ko siyang tirisin! Kung pwede nga lang ay sabunutan ko siya at sakalin! O kaya ay ingudngod sa lupa at saka sipa-sipain!

"Ah, ate... hindi na ako makahinga..."

Dapat lang sa'yo yan! Malandi ka! 

Kumalas ako sa kanya. Sana pwede kong hiklatin ang talukap ng mga mata niya.

Humagikhik siya. "Wait, te, puntahan ko lang si Baby Quiro sandali! Muah!" 

Napaupo ako paglabas niya ng kwarto. Naiinggit ba ako? 

Inabot ko ang black ticket na nasa ibabaw ng bag ni Ruby.

My precious...

Charot!

Hindi. Ayoko na nga di ba? Matagal ko nang pinilit ang sarili na makalimot. Sumubok na nga ako ulit kay Paolo, di ba? At hindi naman porke't break na kami ni Paolo ay aasa na ulit ako kay Jumbo. Walang ganoon.

Hindi nagbabago ang katotohanan na malayo ang agwat namin ni Jumbo sa isa't isa. Kaya nga kahit hindi natuloy na pakasalan ang ina ng anak niya, pinigilan ko pa rin ang umasa. Mahal niya man ang ina ng anak niya o hindi na, labas na ako roon.