Babysitting the Billionaire

Kabanata 24

Restored copy/deleted comments/Let's make new memories :)

Kabanata 24

ISINAMA KO SI JUMBO SA PALENGKE. Ako kasi ang inutusan ni Mama na bumili ng rekados sa lulutuin niyang mga ulam bukas. Nagbebenta na rin kasi kami sa harapan namin ng ulam tuwing tanghali. Pandagdag income din. Ako madalas ang magbantay kapag may pasok si Mama sa sabungan bilang tagalista pag may sabong.

Pauwi na kami ni Jumbo nang bigla na lang siyang huminto. Meron siyang tinitingnan nakung ano. Nang sundan ko kung saan nakatuon ang kanyang mga mata ay isang malaking poster ang aking nakita. Nakadikit iyon sa ibaba ng dinadaanan naming building malapit sa sakayan ng jeep.

Natigilan ako nang makita ko kung ano ang nasa poster. Photo iyon ng Montemayor Cruise at ng isang babaeng naka-uniform ng pangkapitan sa tabi nito.

"Jumbo..." maya-maya ay bulong ni Jumbo. Titig na titig siya sa picture ng malaking kulay puting barko na nasa daungan.

Nang tingalain ko siya ay kitang-kita ko ang pagniningning ng kanyang mga mata habang nakatitig siya sa poster. Hindi ko siya masisisi, kahit ako ay natutulala sa ganda ng luxury ship na ito. Ang laki nitong barko na kulay puti. Ipinakita na ito sa mga news, ang ganda ng loob nito, parang 5-star hotel, at maraming pool. 

Humawak ako sa kanyang kamay. "Alam mo ba, Jumbo? Pangarap kong makasakay sa barkong iyan."

Napatingin siya sa akin, nasa mukha niya ang pagtatanong.

"Jumbo, kahit sino naman ay gugustuhing makasakay diyan." Napayuko ako. "Pero para sa mahirap na tulad ko, hanggang pangarap na lang siguro ang makatungtong sa isang luxury ship na tulad niyan."

Bumaling muli siya sa poster at itinuro niya ang bold letters na binubuo ang salitang 'Montemayor'.

"Ah, Montemayor kasi ang pangalan ng barkong iyan. Montemayor Cruise. Pag-aari iyan ng mga Montemayor-Saavedra. Ang dalawang pinakamayamang angkan sa Asya. Marami silang ari-arian bukod pa sa barkong iyan. May mga mall sila, hotel, ospital, at iyan ngang cruise line." 

Lalong nangislap ang kulay tsokolateng mga mata ni Jumbo.

"Nakikita mo ba itong babaeng ito?" Itinuro ko ang babaeng nakadamit na pangkapitan. Lumang photo iyon, throwback. "Siya si Aria Montemayor-Saavedra, ang first child ng mga Montemayor. Nakikita ko lang siya sa commercial noong bata pa ako, noong may TV pa kami sa bahay. Mayaman siya, Jumbo. Siya at ang asawa niya ang unang kapitan sa Montemayor Cruise," kwento ko sa kanya na para bang nauunawaan niya ang sinasabi ko.

Tumagilid ang kanyang mukha at saka siya nagkamot ng ulo.

Wala sa loob na napatitig ako sa naka-side view na mukha ni Jumbo. Hindi ko alam kung namamalik-mata lang ba ako na parang kamukha niya si Aria Montemayor-Saavedra. Ah, siguro dahil matangos ang ilong nila, saka iyong itsura nila, parang hindi purong Pinoy. Ah, baka nga ganoon lang.

Binasa ko ang nakasulat na tagline sa ibaba ng poster. "Montemayor Cruise, the cruise of lost and found love..."