Babysitting the Billionaire

Kabanata 30

Kabanata 30

HELLO, MANILA!!!

Buong biyahe sa eroplano ay hindi ko talaga binitiwan ang Black Ticket. Ayoko pa ring magising kung sakaling panaginip lang ang lahat ng ito. Biruin mo, sa milyong tao sa mundo na may hawak ng black ticket, itong black ticket na hawak ko ang napili sa draw. Grabe, kung hindi pa sign ito, ano ito? 

Pagbaba namin, kasama ko si Atty. Romualdez, ay sinalubong agad kami ng dalawang malaking lalaking unipormado. Dinala nila kami sa isang limousine car na itim at doon kami pinapasok. Nang makaupo ako sa loob ng sasakyan, nag-ring ang aking cellphone. Dali ko itong sinagot nang makita ko ang pangalan ni Ruby sa screen.

"Ano, Ate?! Nagkita na ba kayo?! Na-meet mo rin ba ang buong banda?! Update, ate!!!" Halos mabingi ako sa lakas ng boses niya.

"Nasa biyahe pa lang — "

Narinig kong inagaw ni Mama ang telepeno. "Rosenda, ikumusta mo ako kay Santi, ah!"

Hay naku!

Narinig ko rin ang ingay sa paligid na tila ba pinag-aagawan nila ang cellphone makausap lang ako. Sa huli'y mukhang may nanalo na sa pakikipagbuno maagaw lang ito. "Hello, Rosenda..."

Si Amang.

"Hingi ka ng picture ni Kyo, ah."

Grrrrr!

Maige na lang at nakuha muli ni Ruby ang linya. "Ate, ako kay Macoy."

Natatawa na lang ako sa kanila. Bigla ko tuloy silang namis. "Ruby, iyong mga bilin ko sa'yo. Si baby Quiro, wag mo hayaang maglikot. Ikaw na muna bahala sa kanila dyan habang wala ako..." biglang nabasag ang boses ko.

"Ate, naman... tatlong araw ka lang dyan, eh."

Matagal akong hindi nakapagsalita. "Kinakabahan ako, Ruby..." kinagat ko ang aking hinliliit na daliri.

"Ipanatag mo lang ang sarili mo, Ate. Ang importante, masabi mo sa kanya na siya ni Jumbo natin..."

"Pwede ko bang makausap si baby Quiro?"

Ibinigay niya ang telepono sa bata. "Elo, Nanay Senda..."

"Baby Quiro, wag ka papasaway kay Nanay Ruby, ah..." pumipiyok ako. Namis ko kasi siya agad. Miss na miss ko na siya agad. Hindi ko talaga kayang mawalay sa kanya kahit saglit lang. Pero kailangan.

"Opo. Di po ako pasaway. Si Bayug lang po lagi ko kasama."

Napapikit ako sa isiping pinaglalaruan na naman niya ang dumi nito. "Baka naglalaro ka na naman ng popo niya, ah. Mapapalo ka ni Nanay Ruby mo."