Babysitting the Billionaire

Kabanata 43

Kabanata 43

BAGO PA LAMANG sumisikat ang araw ay ginising na ako ni Dangdang. "Ate, tanghali na..."

Sapu-sapo ko tuloy ang aking ulo dahil sa antok. Kamuntik pa akong mapatalon nang mamataan kong hindi lang pala si Dangdang ang nasa loob ng aking kwarto. Narito rin pala ang buong cast ng pamilya ko. "A-ano pong ginagawa nyo rito?" kay Mama ako bumaling na halatang excited.

"Iyong pasalubong namin?" ito agad ang bungad niya sa akin.

"Iyong autograph ni Kyo." Sabat ni Amang na kitang-kita rin sa mukha ang pananabik.

Napakamot na lang ako. "S-sandali lang po..."

"Ayos!" gumawa agad ng pila si Mama. Siya na ang nanguna. Para silang may pinipilahan sa mall na sale kung mag-agawan sila sa linya.

Dinampot ko ang aking sweater na may pirma ni Santi. "Ma, ito po ang sa inyo."

Namilog ang mga mata nyang hinalik-halikan ito. "Oh, Santi!"

Sumunod kay Mama si Ruby. Iniabot ko sa kanya ang jersey cap na ibinigay sa akin ni Macoy. Kilig na kilig siyang pinaghahalikan din ito. "I love you, Macoy!!!"

Pagkatapos ay inabutan ko naman ng bracelet si Dangdang mula sa idol nyang si Cloud. Kumislap ang kanyang mga mata na tulad nila Mama, hinalik-halikan din ito.

Ang huli ay si Amang. Pinagkiskis niya pa ang kanyang mga palad habang napapaindayog nang lumapit sa akin. "Asan ang sa akin, Rosenda?"

Ibibigay ko ba talaga sa kanya? Kailangan na rin ba na ngayon na?

"Rosenda, ano na?" untag sa akin ni Amang. Nasa mukha na ang pagkainip at pagkasabik. "Amin na iyong akin!"

Napapikit ako. Sana magustuhan niya ang pirma ni Kyo na nasa panty ko.

Pikit-mata kong inabot ito sa kanya. Hindi ito nagtagal sa mga palad ko dahil bigla niya itong hinablot. "Pirma ba ito ni Kyo?!" nanlalaki ang kanyang ilong.

Tumango ako dahil nangangamba ako sa gagawin niya.

Iniangat niya pa ito sa sinag ng araw na wari'y sinisipat. "Oh, Kyo ko!!!"

Sa kabilang banda ay hindi ko maiwasang mapangiti. Ito kasi iyong isa sa mga bagay na hindi ko kayang ipagpalit. Iyong makita ang mga ngiti sa kanilang mga labi. Na kahit nasasaktan pa rin ako, napalis ng mga ito sa isang saglit.

May batang lalaki ang sumulpot sa gilid ko. Kagigising lang nito at katabi ko ito sa kama. Pupungas-punga pa nang ngumiti sa akin. Si Baby Quiro. "Nanay Senda, asan po ang sa akin?" 

Napasuntok ako sa hangin. Oo nga pala. Ang idol ng bata ay si Jumbo. May naalala ako. Hinugot ko sa bulsa ng aking bag ang isang marker at iniabot sa kanya. "Ito po, baby. Ang marker na ito ang ginamit ko sa idol mo."