Babysitting the Billionaire

Kabanata 3

Kabanata 3

"ROSENDA..."

Si Jumbo, binigkas niya ang pangalan ko. Matipuno siyang nakatayo sa tapat ng bintana ng kwarto ko habang nakahiga naman ako sa kama. Nakasarado iyon kaya't hindi ko mawari kung umaga na ba o gabi pa.

"Jumbo? Nakakapagsalita ka na?" pupungas pungas na tanong ko sa kanya. Isinuksok niya sa magkabilang bulsa ng sira-sira niyang pantalon ang kanyang mga kamay bago naglakad palapit sa akin. Titig na titig siya sa akin.

"Thank you, Rosenda," sabi niya nang tuluyang makalapit sa akin. Ang lagom ng boses niya. Lalaking lalaki.

"I said, thank you," ulit niya kasabay ang marahang pagpisil sa kamay ko. Tuluyan na akong napabangon mula sa pagkakahiga. Hindi ako makapaniwala. Ang bilis ng kabog ng dibdib ko, hindi ko alam kung dahil ba kinakausap ako ni Jumbo ngayon o dahil sa kuryenteng gumagapang sa kamay ko habang pisil-pisil niya iyon.

"Ha? Salamat saan? Wala naman akong ginawa. Tsaka, Jumbo ba talaga ang pangalan mo?"

Umiling-iling siya habang nakangiti ang natural niyang mapulang mga labi. Shet. Lalo siyang gumuwapo! Mayamaya'y biglang sumeryoso ang kanyang mukha. "You saved me."

Matapos niyang sabihin iyon ay bigla niya akong kinabig at hinapit palapit sa kanya. At sa isang iglap pa'y naramdaman kong hinahalikan niya na ako. Ni hindi man lang ako nagtangkang pigilan siya. Unti-unti akong nalulunod sa kahibangan ko. Habang tumatagal, mas lalong lumalim ang halik ni Jumbo. Mas nagiging maalab, at unti-unti na ring gumagapang ang kamay niya sa katawan ko at—

"Pabili!!!"

Napakurap ako. Ha?

"Pabili!" sabi niya ulit.

"Ha?"

"Pabili!!!"

NAPABALIKWAS ako ng bangon mula sa pagkakatulog. May bumibili. Pesteng Pektong 'to! Malamang ay siya na naman itong bumibili. Kahit kailan talaga, istorbo ang ungas na 'to! 

Tinungo ko ang tindahan namin. "Ano na naman, Pektong?" nakasimangot kong tanong sa kanya.

"Bakit ba ke-aga-aga eh - ang ganda mo?"

Napairap ako. Parang alam ko na eh. Mukhang mangungutang na naman ito. "Anong uutangin mo?"

"Pwede ba kong mangutang ng - pagmamahal..." nagpapa-cute pa si gago.

Ibang klase talaga bumanat ang kumag, ang korni! Ilang taon na bang nanliligaw itong si Pektong sa akin? Kumo't sya ang siga sa lugar namin ay sya lang din ang nakakalapit sa akin nang ganito sa kabila ng maliit nyang pangangatawan. Kataka-taka ngang bossing ito ng mga tambay dito sa amin eh.

"Ano, Rosenda? Namangha ka ba sa banat ko?"