Babysitting the Billionaire

Kabanata 20

Restored copy/deleted comments/Let's make new memories :)

Kabanata 20

NAGNAKAW NG GAMOT si Jumbo? Alam kong may sakit sya sa pag-iisip, pero paano nya magagawa iyon gayong hindi naman nya alam ang gamot? At paano nya nalamang sa drugstore makakakuha ng ganoon?

Saka unti-unting nagrehistro sa maliit kong utak ang sagot sa aking mga tanong. Naalala kong isinama ko nga pala sya noon sa drugstore sa di kalayuan kung saan nadampot nya roon ang isang paracetamol at ipinaliwanag ko pa sa kanya kung ano iyon. Napagtanto ko rin kung bakit nya hinahalungkat ang mga gamit bago sya umalis kagabi. Marahil ay hinahanap nya iyong pera na ibinigay sa kanya ni Mina para ibili ng gamot. Ang kaso, hindi nya ito nakita at sa sobrang taranta nya, hindi na sya nag-aksaya ng panahon para hanapin pa ito dahil agad syang nagtungo sa drugstore.


Habang pinagtatagpi-tagpi ng mahina kong utak ang mga ito ay ganoon din ang pagsisisi na aking nararamdaman. Halos humagulhol na ako sa dibdib ni Maximus na kasama ko ngayon at narito kami sa loob ng tricycle patungong presinto.

"Maxine, si Jumbo... kasalanan ko kung bakit sya nakulong..." 

"Shhh... hindi mo kasalanan. Wala sya sa tamang pag-iisip at hindi nya alam na nagnakaw sya..."

"Kasalanan ko dahil nagkasakit ako...!"

Humigpit ang pagkakayakap nya sa akin. "Rosenda naman... stop flaming yourself."

Flaming? Hindi ba blaming?

Umangat ako at saka pinunasan ang sariling mga luha. "Salamat, Maxine."

"Tsk." Hinaplos nya ako sa braso. "Alang-alang sa abs ni Jumbo, gagawin ko ang lahat para makatulong."

Kamuntik ko na syang makutusan.

"Ito naman di na mabiro!" sabay halakhak nya.


Hindi ko naman sya masabayan sa kanyang pagtawa dahil mabigat talaga ang dibdib ko. Nag-aalala talaga ako kay Jumbo. Mayamaya lang ay narito na kami sa police station at halos liparin ko ang daan patungo sa police desk. Ni hindi ko nga namalayang naiwan ko na si Maximus sa pagmamadali ko.

"Sir, dito po ba nakakulong si Jumbo?" tanong ko agad sa dalawang police sa front desk. Natataranta na ako. 

Nangunot ang mga noo nila at nagkatinginan. "Jumbo?" magkapanabay pa nilang tanong.

Napasentido ako. Wala nga pala sa hulog ang aking tanong  dahil malay ba nila kung sinong Jumbo ang tinutukoy ko. 

"Jumbo, ano? Anong apelyido?"

Naku! Hindi ko pa pala nabibigyan ng apelyido si Jumbo. Ano kaya?


"Miss? Anong apelyido?" 

Isip, Rosenda! Isip.

"Hotdog po." Mabilis kong tugon.

Goodluck.

"Miss, maraming nakulong dito kagabi. I-describe mo na lang sa amin kung anong hitsura nya." 

"Malaking lalaki po sya. May magagandang mga mata, mahahabang pilik mata, matangos ang ilong at mapupula ang mga labi. Malapad ang dibdib nya, mapipintog ang mga abs, malalaki ang biceps at matambok ang pwet."

Miss ko na sya.

Ewan pero pinagtatawanan ako ng dalawang pulis na ito. Perpekto naman ang pagkaka-describe ko kay Jumbo. May itinuro sila sa aking karatula. "Nababasa mo iyan?"