بعد مرور 12 سنة
في إعدادية عامة من إعداديات مدينة الدار البيضاء داخل قسم من أقسام السنة الأولى، واقفة حدا الصبورة فتاة بشعر أسود مجموع لور، سروال أسود وطوب واسع أخضر زيتي، من مظهرها ماتعطيهاش 12 سنة ولي هو سن التلاميذ هاذ المستوى عامة، كاتبان أكبر شوية...
واقفة كاتحل تمرين رياضيات على الصبورة وجنبها الأستاذ جالس جنب على المكتب دياله وذرعانه مربعة، عيونه كانت مثبتة على كتابتها بتركيز حتى يالات وضارت عندو، قال بفخر
الأستاذ: ممتااز ..ممتاااز الباهي ...
(دار عند التلاميذ وكمل بفقصة)
الأستاذ: هادشي ماعرفتوش ليه ؟؟ هي كانشرح لها بالعربية ونتوما بالشينوية ؟ حتى واحد ولو واااااحد فيكم ماجاب التمرين صحيح من غير الباهي ...شنو عندكن فداك الدماغ ؟ لعجيينة ؟
تسمعت بعض الوشوشات والضحكات خلاته يزيد يتعصب وقال بسخط
الأستاذ: سكااااااااات ...مانسمعششششش حسكم ...تريكت لمصرفقين ...تفووووو
(دار عند مي وخفض صوته)
الأستاذ: صافي الباهي يمكلك ترجعي لبلاصتك
رجعات مي بلاصتها، جلسات فالمقعد الثاني في الصف الأول لي قدام المكتب ديال الأستاذ ...
كيف جلسات بان ليها فوق كتابها ديال الرياضيات دفتر ماشي ديالها هزاتو باستغراب ضارت شافت في الولد لي جالس على يسارها كايخربق فورقة ودارت على اليمين دارت نظرة شاملة على التلاميذ عاد رجعات حلاتو لقات فيه ورقة صغيرة مطوية، شافت فالولد لي حداها وقالت بتعجب
مي: شكون حط هاذا هنا ؟
شاف في الدفتر وطلع راسو فيها بانزعاج وجاوبها
الولد: لفوندو
رجعات شافت قدامها وحلات الورقة كاتقرا في نفسها شنو مكتوب
"مانجيبوش شي دويرة فشي برتوش مع 12 ؟ ماتخافيش كولشي بثمانو"
بقات كاتشوف فداك الورقة بملامح جامدة مبهمة للحظات شوية هزات ستيلو وكتبات ورا الورقة ورجعاتها فين كانت سدات الدفتر وخلاتو عندها....ورجعات منتابهة مع الاستاذ شنو كايقول ...دازت مدة قصيرة حتى جا الحارس العام دق باب القسم ، غير خرج عندو الأستاذ دارت مي لعند بنت جالسة وراها وقالت
