#بعد_مرور_11_سنة
وهاد المرة في مكان آخر وفي قارة اخرى، القارة الآسيوية، وبالضبط في بلد من بلدان الاتحاد السوفياتي سابقا، بلد أرمينيا
بلد كايتميز بثقافة وتاريخ عتيق، ولي يقول تاريخ يقول آثار ومباني، واتجاهنا واحد من هاد المباني، أو بتدقيق كثر واحد من قصور أرمينيا القديمة المنصوب على هاد الأراضي من مئات السنين ولي كايتوارث من جيل جيل بين افراد عائلة من العائلات العريقة لهاد لبلاد، ولي سلالتها كاتمتد بامتداد عمر عاد القصر، طبعا مع مرور السنين ضروري من الترميم ولكن كايبقى شكله من خارج عندو طابع أثري كلاسيكي.
في الطابق الأرضي لهاد القصر وسط غرفة شاسعة عبارة عن مكتب، أثاثه عصري بامتياز، لي كاتمتد على حائط من حيطانه طولا وعرضا مكتبة كتب، العدد ديالها صعيب يتحصى
امامها وعلى كرسي المكتب المميز، جالس رجل في أوائل الثلاثينات.
واضع مرفقه على المكتب، و ظهر صبعه السبابة على شفايفه كايدوز بخفة، عاقد حواجبه وملامح الجدية والتركيز باينة على وجهه، رجل كاتبان بنيته القوية والمتعوب عليها من البدلة السوداء لي لابس بقميص أزرق غامق، ملامحه بنية، وذقنه ملتحية، شعرو رطب وكثير شوية مرجعه اللور، ساهي كايحقق فلوح إلكتروني قدامه، فلحظة هز راسه في الشخص لي جالس قدامه وبانت عيونه الزرقاء المميزة، زرقة السماء الصافية. قال بملامح متعبة عاقد حواجبه
أرمان : صافي هادشي لي كاين ؟
أيمن: اه...الوراق لباقيين غادي يكونو واجدين كيف نوصلو للمغرب
أرمان (حك على لحيته ورجع لور رامي ثقله على الكرسي): قطعت في الطيارة العامة كيف قلتك ؟
أيمن: اه، واتصلت بالبيلوط الخاص وقلت له ان الرحلة تلغات ....
كون هاني كولشي كيفما طلبت ماكاين لاش تزيد تعيي راسك كثر مانتا عيان...
أرمان (بابتسامة متعبة تنهد ووقف كايشوف فساعته): الراحة هي لي ماكايناش
شحال باقي على الرحلة؟
أيمن (وقف حتى هو مع وقفة أرمان) : باقي 8 ساعات ...سير ارتاح شوية راه 48 ساعة هادي ماسديتي عينيك...
