بيرن، سويسرا
يوم جديد وسط ڤيلا كبيرة عصرية في حي راقي، فممر طويل في الطبقة الثانية كانت امرأة خمسينية بفستان كلاسيكي وشعر قصير مع نظارات طبية، خرجات من غرفة من غرف الممر بحذر كاتسد من مورها لباب، على بعد مسافة قريبة منها كانت امرأة أخرى أربعينية ماكايبانش عليها سنها، جميلة ومظهرها وأنيق، بشعر أشقر وعيون ملونة كبيرة كانت الأم ديال لارا
...واقفة بترقب وقلق كاتسنى الأخرى تسد لباب باش تهضر كاتفرك بتوتر أصابعها المطلية بالاحمر مع بعضهم
صوفي : شنو ؟
ليزا (تنهدات) : اوف..قدرت بعدا اليوم نخليها تاكل واخا غي شوية...كبداية مزيان مهم كاين تحسن ...
صوفي: خليني ندخل نشوفها...
ليزا( بصرامة) : صوفي !!! خرجي من هاد السوق...بلا مانفكرك شكون السباب حتى وصلنا لهنا.. هاد المرة خليني ندير خدمتي...قبل مانكون طبيبتها النفسانية أنا عمتها، وقلبي واكلني عليها وأنا كانشوفها فهاد الحالة...خليني ندير خدمتي ماتدخليش لا نتي ولا ولا داريو هاد المرة...
(رجعات خففات نبرتها كاتقاد نظاراتها فعيونها)
عارفاك مشغولة عليها ولكن هادي فرصة ماخصناش نضيعوها، هاد المرة هي ماباغياش تشوفو هادي نقطة لصالحنا
درتي شنو قلت لك بخصوص الولد ؟
صوفي (تنهدات بقلة حيلة) : اه ...تاصلت به وقلت له شنو قلتي لي وقلت له الولد غادي يشوفو ملي يرجع ....
ليزا: مزيان...ملي تولي شوية وترجع تهضر غادي نشوف الى بغات نديها معيا للدار...حيث كيف ما كان لحال يمكن شي مرة يجي هنا....داكشي باش قلت لك الولد ديه ليه مرة مرة باش مايفكرش يجي يقلب عليه....
صوفي: وعلاش مانخليوهش عنده هاد المدة ؟
ليزا: وااااياااك أصوفي تفكري ديري مصيبة بحال هاذي، لارا دابا باغية الولد...ماتصرفيش من راسك اصوفي غادي غير تزيدي تأزمي الوضع
(صوفي رمقاتها بحدة ودورات عليها وجهها)
ليزا: مالني قلت شي حاجة ماكايناش ؟ سحابلك داك لفشوش ديالكم هو لي غادي يعاونها، "لا ماما بغيت نولد بلا زواج"، "لا بابا حبسو مايرجعش لبلادو"، "لا حبسو عليه ولدو مايشوفوش" ....ونتوما تابعينها فحماقها...الى كان يسحابلك هاكا غادي تعوضوها على الوحدة والحرمان لي كبرات فيهم بسباب الاهمال ديالكم راكم غالطيييين ....الى سحابليك هكا غادي تمنعوها تحاول تنتحر مرة خرا كيف دارت هادي 6 سنين راكم غالطين وكوني متأكدة داك الولد لي باغية تصيفطيه لباه هو لي مانعها دابا تعاودها...
