قرابة الثانية صباحا كان أرمان ناعس فغرفته على ظهره فوق سريره، مادازتش مدة طويلة باش غفى حتى بدا يفتح عيونه على حركة وصوت الباب لي تحل مفيقه من نعاسه، رجع سدهم بلا مايحتاح يشوف شكون، عارف تمااما شكون غادي يكون، عارف الشخص الوحيد لي عنده الجرأة والثقة يدير بحال هاد التصرف بهاد الطريقة وفي هاد الوقت ....
دخلات هي لابسة پيجامة شورط فوق الركبة وطوب نص كم في اللون الوردي عليهم رسومات بالأبيض، شعرها الأشقر مطلوق جارة في الأرض دمية دبّ بني، كاضرب به بعشوائية
لي جا فطريقه دايخة بالنعاس، وصلت حدا سريره، وطلت على وجهه مقربة كاتعافر بعيونها نصف مغمضين لقاته ساد عيونه، رمات دميتها في الأرض وطلعات عنده، دورات رجليها جالسة فوق كرشه قبل ماتسرح كاملة على صدره مدورة عليه يديها ورجليها وخاشية وجها فعنقه، لحظات قليلة حتى بدا تنفسها البطيء كايتسمع دليل على نومها، كمل نعاسه هو الآخر موالف على تصرفاتها.
صبح الحال قدر أرمان يتفلت من ماريا مخليها غاارقة تكمل نعاسها فوق سريره مسرحة على ظهرها مجبدة يدياتها ورجيلاتها، ناض هو للحمام قبل مايلبس عليه ملابس رياضية وينزل متجه لصالة الرياضة في أحد ملحقات القصر، سالا ورجع طلع لغرفته دوش ولبس عليه وخرج هابط للتحت للحديقة يفطر، جالس على طاولة لفطور كايرشف من كاسه وكيف العادة كايقرا في اللوح الإلكتروني رن هاتفه، طل عليه وهزو فاتح الخط
أرمان: وي دينا ؟؟
دينا: صباح الخير!
أرمان: صباح الخير
دينا:احم... ق..قالي إيفان زولتيني من السفرية ديال اليونان ! علاش ؟؟
أرمان( بصرامة ): علااش؟؟؟ محتاج نقولك علاش ؟
دينا:لا..زعما ءء..غ..غي زعما ...بغيت نعرف علاش تبدلات الفرقة ؟ أكيد كيف العادة غادي نحتاجه طبيب فيها!!
أرمان (باستعباط ): ونتي بوحدك لي طبيبة ؟؟
دينا: ل..لا ماشي هاكذاك ...ولكن الناس لي كايمشيو فهاد الحالات قلال....وأدريان لي درتي بلاصتي مايمكنش له يمشي عندو مشكل ....
أرمان (تنهد وبعد مدة قال): أنا غادي نشوف ...
دينا : واخ ...سمحلي صدعتك مع صباح ...نخليك...
قطع معها بقى شحال كايشوف في الفون بتفكير، هي لي كانت في المهمة في الأول وهو لي حطها وهو لي زولها من بعد من باب الاحتياط باش يتجنب المشاكل بحكم غاذي يدي مي، حافظها وعارفها مزيان عشرة سنين طويلة...
