ليليث (بصدمة): كيفاش حاملة ؟ ...ما...مايمكنش...ه..هي...ماكاتولدش..
الدكتور: هادشي باش خصها ترد لبال لراسها ...رحمها مضرر بشكل كبير بزاف ...حالتها أكيد كانت غاتكون مشخصة بعقم ....ولكن ماشي أول مرأة غادي تكون استثناء ...وماشي أول مرة غادي نواجهه حالة بحال هاذي لي كايتعارض فيها القرار الطبي مع الواقع....كايبقى جسم الانسان عالم مامضبوتش بالكامل .....والتقارير الطبية كاتكون خلاصات علمية
مهم دابا هي ناعسة كاترتاح بمهدئات ملي تفيق نرجع عندها ونشرح لها بالضبط حالتها وشنو ...
حبس الكلام في النص بسبب ليليث لي ترخات غاطيح سخفانة، شداتها ماري بسرعة من ذرعانها مخلياها تلوح ثقلها عليها،
ماري: بنتييييي !! ليلييييث ...
طلب الطبيب من ممرضة تعاونها ورجعو دخلوها للغرفة لي حدا ديال مي، بعد فحص خفيف خبرهم بأن الضغط هبط لها ترتاح شوية وغادي ترجع تتوگض ، مدة قصيرة ورجع الطبيب لخدمته وماري بقات جالسة حدا راس بنتها حتى فاقت، بمجرد ما حست بها تحركات وقفات ماري كاتمسح على راسها
ماري : بنتيي ! كاتسمعيني ...
ليليث ( لحظات بعد ما استوعبت وبدات كاتبكي): حاملة ...حاملة أمااماا ...حاملة قبل مني....
ماري: شوووت تهدني أبنتي ...تهدني دابا نلقاو حل ...خصنا نتصرفو بزربة
ليليث (استقمت في الجلسة): آش غادي نتصرفو ! ماعندنا
مانديرو ....
ماري (شدات فيد بنتها ونطقات بتوتر) : علاش ماعندناش ...حتى حد ماعرف شنو وقع لها ...أناييس عند بالها ناعسة كاترتاح....احم ...ن...نشوفو شي حل....احم ...ي .. يطيح لها بيه لبيبي...
ليليث (خرجات فيها عينيها ناترة يدها منها) مااامااا ....واااش حماااقيتي ...نقتلو بيبي فشهرو الرابع ؟؟؟ أو ولد أرماااان من لفوق ....اناااا ماااااااشي مجرمة....ماتبقاااش تعمري لي رااااسي بهاااادشي ...اااناااا مااااشي مجرمة .....
ماري (رجعات قربات منها شاداها): صافي ...بنتي صااافي .. سمحيلي منقووولش....غي تهدني ....مانديير واالو ...صافي.
مدة وهي كاتبكي فحضن مها عاد بدات تهدن بشوية بشوية وترجع شوية عقلها لي بدا كايدي ويجيب في الأفكار، قالت بعد مدة بنبرة هادئة تعبة
ليليث: مايمكنش تكون فراس أرمان ومخليها في القصر بلا مايدير والو ...
ماري: تكون خباتها عليه زعما ؟؟
ليليث: ولكن علاش ؟ علاش غاتخبي حاجة بحال هادي لي ممكن تقلب كولشي...(وسعات عينيها على الفكرة لي دازت فبالها) من غيير ....الى كانت حتى هي مافراسهاش ؟؟؟
ماري: مانظنش ...داخلة فالشهر الرابع ومافراسهاش ؟؟ زعما ؟
ليليث(ناضت بسرعة من السرير): ماما !!! فييين الطبيييب ...الطبييييب لي دوز لها ...يالاه نمشييو عندووو !!
