Zawgyi
ဆံပင်မရှိသည့်ဦးခေါင်းကိုဟူဒီခေါင်းစွပ်တစ်ခုတည်းနှင့်သာကာကွယ်ထားသောမင်းဆက်ရာကြောင့် နားထင်ကိုအသာကုပ်မိရင်း ချမ်းမြေ့စေ အခန်းထဲကသူ့ဦးထုပ်ကိုသွားယူလိုက်သည်။
"အပြင်မှာအေးတယ် မင်းဆက်ရာ"
ပါးစပ်ကလည်းပြောရင်း အနက်ရောင်အနွေးဦးထုပ်ကို ဖိနပ်ထိုင်စီးနေသောမင်းဆက်ရာရဲ့ဦးခေါင်းထက် နဖူးဖုံးသည်အထိအသေအချာဆောင်းပေးလိုက်၏။ ထို့အပြင် ဟူဒီခေါင်းစွပ်ကိုလည်းအပေါ်ကထပ်ကာ ကြိုးနှစ်စကိုပါချည်တုပ်ပေးလိုက်တော့ မင်းဆက်ရာရဲ့မျက်နှာမှာ လေမဝင်အောင်ထုပ်ပိုးထားသည့်ငှက်ပျောထုပ်လေးကဲ့သို့ဖြစ်သွားပေပြီ။
"ဘတ်စ်နဲ့ပဲသွားရအောင် စေ … ကျွန်တော် စေနဲ့ဘတ်စ်ကားအတူစီးဖူးချင်လို့"
ချမ်းမြေ့စေက ကားသော့ဆီလှမ်းနေတဲ့လက်ကိုပြန်လည်ရုတ်သိမ်းလိုက်ပြီး …
"မင်းသဘော"
တိုက်ခန်းအပြင်ကိုရောက်သည်ဆိုရင်ပဲ မင်းဆက်ရာက ချမ်းမြေ့စေရဲ့လက်ဖဝါးကိုသူ့လက်နဲ့ခပ်တင်းတင်းဆုပ်ကိုင်ပြီး အင်္ကျီအိတ်ကပ်ထဲကိုထည့်လိုက်သည်။
"မင်းတော့ဒရမ်မာကြည့်တာများသွားပြီနဲ့တူတယ်"
"မဟုတ်တာ … စေအေးမှာစိုးလို့ပါဗျ။ ဒါတွေကရင်ထဲကထွက်လာတဲ့အနှစ်တွေ သိလား"
ချမ်းမြေ့စေက မင်းဆက်ရာရဲ့လက်မောင်းကိုသူ့ပုခုံးနဲ့တွန်းတိုက်ရင်း နှာခေါင်းလေးရှုံ့ကာဆိုသည်။
"ကိုရီးယားကားတွေထဲမှာလည်းဒီလိုအခန်းတွေပါတယ်လေ။ ကျွန်တော်တော့ မင်းအဲ့ဒါကိုအတုယူပြီးလိုက်လုပ်တယ်ထင်တာပဲ"
"ဒါဆို ကိုရီးယားကားတွေထဲမှာ ဒီလိုလမ်းပေါ်မှာနမ်းတဲ့အခန်းတွေလည်းပါတယ်လေ"
မင်းဆက်ရာဆိုလိုချင်သည့်အဓိပ္ပါယ်ကိုသိသောချမ်းမြေ့စေမှာ အိပ်ကပ်ထဲကနေမင်းဆက်ရာရဲ့လက်ဖဝါးကိုလက်သည်းနှင့်ဆွဲစိတ်လိုက်ပါသည်။
"စေနော် … သူ့နိုင်ငံမှာဆိုတိုင်းလူကိုအနိုင်ကျင့်နေတယ်"
