أحاديث المساء(قصص،خواطر،مقالات، قصائد)

الكلمه الحلوه فين

الكلمه الحلوه بقت نادرة ليه فى زمانا، يعني الواحد لما يروح  يسأل عن شخص يقلولك دا فيه وفيه وصفته وشكله وهيأته كذا وكذا بكل الصفات السيئه، تروح الشغل يقولوا دا عصفور ودا متكبر ودا كشري ودا منافق ودي كذا وفلان فيه من الصفات النيله كتير،  طب ايه المانع لما نتكلم عن الناس بكلمه حلوه، ونقابل بعض بوجه طلق وبشوش، فيها ايه لما نطبطب على بعض بالكلمه الحلوه، نجبر بخاطر بعض، ونضحك فى وش بعض، مش لازم عشان نصلح عيب موجود فى شخص اننا نفضحه على الملأ ونقعد نخوف الناس منه ونقطع فى فروته، ومش لازم يعني نحلل شخصيات زمايلنا فى الشغل مع كل حركه بيعملوها ونحاسبهم كمان على نياتهم اللى مش شايفنها، نحاول ليه دايما اننا نبقى الشخص العارف الفطين الذكي صاحب الخبره فى  ان فلان دا هيبقى شخصيه انتهازيه او فلانه دي هتبقى كذا او كذا، من فضلكوا سيبوا الناس فى حالها يا تقولوا كلمه حلوه يا تسكتوا، دا حتي الكلمه الطيبه صدقة، يعني هواحنا   خلصنا كل مشاكلنا  وحلناها وبقى الشخص دا مشكلة فى الحياة،  بيتصرف ازاي شوف، دا فلاح ودا همجي ودا عربجي ودا انتهازي ودا فروفور، ودا واد سيس، ودي بنت اخلاقها مش كويسه، ودا مستخبيه ورا النقاب، ودا مستخبي ورا اللحيه، ودي لبسها مش عاجبني، ودى لبسها مش على قد سنها، ودا بيقول كلام حلو عشان يظهر بس بشكل الصالح قدامنا اللى بيعمل خير وهو اسوء خلق الله  بعيد عن العيون، ودا اشترى ليه الحاجه دي، ودا نقل فى شقه جديده، ودي اتجوزت عريس لقطه ما تستاهلهوش،  بقينا بنحكم على بعض بافتراض سوء النيه كل كلامنا مفيهوش شيء من حسن الظن ولا حتى الطيبه والفطره السليمه، سيبوا العباد والحكم عليهم ومحاسبتهم لرب العباد ما تدخلوش جوا سرائر الناس ونفوسها، انت ليك فقط معامله حسنه من اللى قدامك باسلوب كويس وانت كمان مطلوب منك كدا مع غيرك، اتعاملوا مع بعض برحمه ولين، الدنيا همومها زادت وبقت صعبه بسبب  حاجات كتيره  سيئه احنا بنعملها من ضمنها فساد نفوسنا  وتغيرها، وسوء الظن اللى بقا منتشر زي الوباء ما بين ناس كتير، غير الحقد اللى بقى موجود ما بين اقرب الناس لبعض بسبب ايه بسبب بعدنا عن دينا وتعاليمه، وعدم الرضا  ، انتشر مابينا الكلام السيء من كتر ترديده والتعامل بيه، عاوزين نرجع تاني للفطره السليمه اللى ربنا فطرنا عليه، وتعاليم دينا اللى بتحثنا دايما على حسن الاخلاق والرحمه واللين والمعامله الطيبه والكلمه الحلوه، ودايما بتناهنا عن سوء الظن وسوء المعامله، تعالوا نرجع تاني نخاف على بعض ونحب لبعض الخير، نساعد بعض ولو بكلمه حلوه، الكلمه الحلوه والابتسامه فى وشوش بعض بتجلب الفرحه والسعاده، دايما الكلمه الحلوه مطلوبه حتى مع الاشخاص اللى بيظهر منه سوء اخلاق لان وقع الكلمه الطيبه بيقعد فتره كبيره وممكن بسببها تتحول شخصيات سيئه للأفضل، والكلمه السيئه عمرها ما كانت سبب فى تصحيح خطأ او  تغيير شخص من سيء لأفضل، بل بالعكس دايما مردودها بيكون سريع وعكسي ومنفر،  عشان كدا  تعالوا نرجع تاني الكلمه الحلوه ما بينا فى كل تعاملاتنا اليوميه، فى البيت مع ولادنا نشجعهم حتى لو حسينا انهم مش قادرينا ينجحوا خللى كلمتك تكون دافع انه يجتهد ويحاول تاني وشجعه، اجبر بخاطره، مع جيرانا خلى كلامك الحلو يرجع الجيره الحلوه بتاعت زمان، اللى هو جارك  دارك  ودارك جارك، يعني اقرب الناس اللى هتقف جنبك فى فرحك واحزانك هو جارك، وكمان اسلوبك الحلو فى الشغل مع زمايلك ومع المترددين عليك هيكسبك  ثواب كبير وراحه نفسيه، لأن  قضاء حوائج الناس شيء عظيم ما بالك تقضي حوائج الناس دوز ان تكدرهم وتزيد من هموهم بل تخفف عنهم وتجبر خاطرهم ولو بكلمه طيبه، واقع الكلمة الطيبه عظيم  وثوابها كبير، ولا ننسي إن دينا العظيم نهانا عن الغيبه والنيميمه وذكر مساويء الغير والتقليل من شأنهم او تحقيرهم، وإن اقرب الناس مجلسا من بينا محمد صلى الله عليه وسلم  يوم القيامة هم أحسن الناس أخلاقا، وان الله سبحانه وتعالى وصف خلق  نبينا فى القراءن  بقوله وإنك لعلى خلق عظيم، فهيا بنا لنقتدي باخلاق نبينا فى المعاملات كلها، لنرتقي فيما بيننا وتعم علينا بركات المحبة والسلام.