🍒 الفصل الثاني: إعتذاري منكي لن ينسيكي
فنفس اللحضة فبيت عصام لي مازال جثة هامدة ماكيتحركش وجهو صفر وتحت عينيه كوحل منعسينو بالمهدئات حيت إدا ماداروهومش كينوض يغوت ويضرب فحال المسعور. كيبغي يجري ويطج ماباغيش يبقا تما رابطينو بالسلاسل باش قادرين يخليوه فبلاصتو.
جالسة قدامو ذكرى شادة فيديها قرأن كتتلى عليه بعض الأيات وحيت هو ناعس ماكيدير حتى ردة فعل لكن ملي كيكون فايق ماكيتقبلش يسمع القرأن
ذكرى سدات المصحف وقربات ليه دارت يديها على خدو متلمسو وعينيها عامرين دموع : الله على وليدي خمس سنين ونتا معدب وحنا ماسايقين خبار. خمس ونتا السحور كياكلك وحنا ماعارفينش.
نهار نسيتي حبيبتك وكرهتيها كان خاصني نعيق . نهار جيت من السفر شاد ليها فيديها كان عليا نعرف حيت عصام مستحيل يتخلى على سحر بخاطرو. سحر كانت هي روحك هي قلبك كنتي ماتنعس حتى تنعس هيا وماتاكل حتى توكلها ونهار تكون مقلقة تدير المستحيل باش تفرحها . كانو عينيك كيبريو ملي كتشوفها كتضحك وتهضر وتعاود لينا على شيحاجة. أنا ماكونتش كنحضيها هي فديك اللحضة. أنا عيني كانت كتكون غير عليك. كيفاش كتشوف فيها ومبتاسم على هضوراتها عينيك كانت كتخرج منهم فرحة كبيرة بسبابها. لكن نهار جيتي وحتاقرتيها وهنتيها وكرهتيها كان خاصني نعيق كان خاصني نعرف ولدي مكيضيع. (بدات كتبكي) أهئ أهئ . أنا لي كان خاصني نبحت مالك. ماشي سحر أهئ سمحليا أوليدي خليتك كتعذب سمحليا
(دارت يديها على وجهها وبدات كتبكي)
غير بدات تبكي سمعات شي تنخصيص علات راسها وهي تلقى براءة وليليان واقفين حدا الباب كيبكيو فتحات ليهم يديها وجاو كيجريو لحضنها وعنقوها
براءة:أهئ أهئ ماما خويا غادي يموت
ذكرى: لا أماما خوك غادي يرجع كيف كان وحسن كاع
ليليان كتمسح فدميعات : وعلاش رابطينو هنا راه حشومة علينا
ذكرى: خاصنا ضاروري نربطوه ماشفتيهش ملي كيفيق شنو كيدير كيولي بحال الوحش مانقدروش نشدوه
ليليان: واسدو عليه غير الباب بساروت وفكو ليه هاد السلاسل
ذكرى: لا أماما مايمكنش حيت يقدر يتلاح من البالكون
براءة : ماما ملي غادي يفكوليه السحر غادي يرجع كيف كان
ذكرى حركات ليها راسها : أكيد غادي يرجع كيف كان
براءة وليليان جلسو فالأرض وربو رجليهم مع الأرض فيها الخشب ماكاينش البرودة
براءة: وغادي يتفكر سحر
ذكرى: ضاروري مايتفكرها . أصلا عصام مستحيل كان ينساها بلاما تديرلو الدواء والسحر.
ليليان: كان كيبغيها أماما
ذكرى بتاسمات وتنهدات: كان كيموووووت عليها عليها. كانت هي كلشي فحياتو . كيعيط ليها غير مشيشتي. وحتى سحر ماكانتش هاكا . كانت صغيورة وبريئة بزاف وغير إدا نهض فيها وغوت عليها تبكي وتغضب وماتسكت حتى يجي يحزرها هو.
ههههه ونهار تعصبو ويضربها ومايبغيش يحزرها. واخا هاكاك واخا ضاربها تمشي بليل كتنخصص وتخشا حداه وحتى يعنقها عاد تنعس وفالصباح ترجع تغضب وتقلب وجهها عليه
براءة: وااايلي ونتي منين عرفتي هادشي
ذكرى: ههههه كنا كنباتو حاضيينهم أنا وباباك فالكاميرات
براة: ياك قلتو لينا الكميرات ماكيشوفهم حد إلا إدا وقع شي مشكيل
ذكرى: لا ماكانشوفوهمش لكن ملي كتدخل عندو سحر ضاروري نحضيهم عندك تطرا بينهم شيحاجة
ليليان بضحكة: وكانو كيديرو شي حااااجة . عافاااك عافاك أماما عاوديلنا
ذكرى: شوووفيلك الممسوخة
ليليان: عااااافاك عافاك أماما عاودي
ذكرى: ماكانوش كيديرو شيحااااجة غييير
ليليان: شنووووو
ذكرى:غير البوساان
براءة: واااااايلي وكنتو كتشوفوهم
ذكرى: هههههه اه وباباك عيااا يخاصم عليه. وهاد صعصع راسو كان قاصح كيجي حتى لحدا الكاميرات ويهزها ويبوسها
ليليان: نارييي ماكانش كيحشم .
ذكرى: داكشي لي دوزوه علينا كان بزاااف كل ليلة واحد كيبات فايق كيعس عليهم وهي العفريتة ماكانش كيجيها النعاس غير معاه كانت مولفاه بزااااف
