🍒 الفصل الثاني: إعتذاري منكي لن ينسيكي
بقا هكاك كيطبطب على ضهرها وهي ناعسة فوق صدرو كتشهق حتى نعسات . هو غير حس بيها ترخات تنهد بقا مدة كيفكر فيها وفماضيها وكيفاش غادي تكون عاشت . فالأخير غمض عينو حتى هو ونعس.
غير غمض عينيه هو حلاتهم هي لي فالأصل ماكانتش نعسات نزلت ليها الدمعة لي كانت واقفة فعينيها وسرحات بخيالها بعيد كتفكر بعض من الأحدات الماضي الأليم ديالها
(فالدوار الشتاء خيط من السماء مع الفجر. كلشي فدارو مكمد فالمانطات وطفلة فعمرها 12 سنة. جالسة فالوسعة لي حدا الدار لابسة بيجامة قديمة و كلها ساردة بالشتاء حداها بانيو عامر بالحوايج كتصبن فيهم يديها ورجليها الحفيانين زراقو بالبرد وشنايفها كيترعدو زورق سنانها كيطقطقو مع بعضياتهم وخدودها مشققين كلها كتفيفري والشتا فوق راسها. جالسة كتفرك بيديداتها الصغيورين حتى سمعت مرأة باها كتعيط ليها من الباب فرحات ناضت كتجري حساب ليها غادي تدخلها. غير وصلت عندها مدات ليها جوج مانطات كبار
مرأة الأب: صبني حاتا هادو وعانداكي تاني غير تغطسيهم فالماء وتهزيهم
الطفلة كلها كترعد بالبرد: مرأة با. فيا البرد والشتا بزاف
مرأة الأب بحدة: وشكككون غادي يصبنهم لمك أنا
الطفلة ببكاء: والله ما أنا لي بلت عليهم. وحق الله أصلا أنا كنت ناعسة فالكوري وماعنديش المانطات
مرأة الأب هزات يديها وعطاتها تصرفيقة بقوة حتى طاحت :داااابا نتي يا المنحوسة غادي توريني شكون بال فيهم. دابا أنا كدابة هزاتها من شعرها ودفعاتها حتى طاحت تاني. دااااابا يتصبنو وماتطلع الشمس حتى يكونو منشورين. يالاااااه تحركيييي .
دخلات لدار وشعطات الباب على الطفلة خلاتها هاكاك فالبرد والشتاء كتصبن حتى سلاتهم ونشراتهم عاد رجعات نالكوي كلها كترعد بقات هاكاك كتساين حوايجها يشتافو حيت ماعندها ماتلبس)
(مراة الأب : إدا شقيتي وكملت جميع الدار كلو وخليتيها تشعل . فالعشية ملي يجيو العيالات غادي نخليك تدخلي تحضري عيد ميلاد خوك
الطفلة بفرح : حلفي بالله أ مرأة با حتى أنا غادي ندخل
مراة الأب : علاش عمرني كدبت عليك
دخلات الطفلة كتجري غادي تطيييير بالفرحة جمعااات الدار غسلات الماعن جففات خملات البيوت نكسات الكوري سيقات الوسيعة لي قدام الدار. حطات الطابلة طباسل دالحلوى والمملحات والموناضة كتشوف فداكشي وفرحانة كتساين غير إمتى يبداو يجيو الناس باش حتى هي تحضر وتاكل هادشي لي عمرها كلاتو
غير جات العشية وبداو يدخلو العيالات مع ولادهم مشات كتجرى لورا الدار طلقات الروبيني كتغسل رجليها ويديها ووجهها بالتيو دالماء . دخلات نالكوري كتنقز الفرحة غادي تخرج ليها من عينيها . مشات لبلاصة لي كتنعس فيها حلات واحد الميكة كحلة كانت عندها مخبية وجبدات واحد الكسوة كانت لقاتها فالمزبلة واخا مقطعة من يديها جابتها وصبناتها وخباتها. لبساتها وطلقات شعرها الأورنج لبسات فرجيلتها صنادتها دالميكة ومشات لدار قلبها كيضرب أول مرة غادي تحضر لعيد ميلاد وصلات لباب حطات الصندالة ودخلات غير شافتها مرأة باها دخلات ناضت كتجري وهزات العود دالشطابة درباتها بيها لصدرها حتى تدفعات على برا الدار
الطفلة : مراة با .خليني ندخل. نتي قلتي ليا إدا كملت الشقا غادي نحضر حتى أنا لعيد ميلاد وأنا كملت كلشي
مراة الأب: مابقا ليا غير المنحوسة تحضر ليا لعيد ميلاد ولدي . خرجي عطيني التساع
الطفلة بدات تبكي: عافاك عافاك أهئ أهئ خليني حتى أنا ندخل والله ماندير البسالة ههنننن غادي نجلس غير حدا الدراري
مرأة الأب بصراخ: غادي تعطييييني التساع ولا نضرب مك بهاد العود
الطفلة : أهئ عافاك عطيني واحد الحليوة
مرأة الأب هزات يديها حتى لفوق ونزلات عليها بداك العود لصدرها حتى طاحت الطفلة لأرض : هاهي حليوة
دخلات وسدات الباب وخلات الطفلة منشورة فالأرض كتنين ماقادراش توقف عيات كتحاول وفالنهاية وقفات بشوية شادة على صدرها لي كيضرها ماقادراش حتى تحرك ولا تزيد . تمشات بشوية جيهة الكوري وعينيها كيقطرو بالدموع النفس ماقادراش تطلعها من قوة الألم ).
نهاية الفلاش باك
خرجات ليليان من هاد شوية من الذكريات لي دوزات فحياتها كلها كترعد وحمرة عينيها عامرين دموع حتى فزكات تيشرت ديوسف . طفلة مادوزاتش القليل عانات بما فيه الكفاية . غمضات عينيها وزادت تنخششات فيوسف باغية تهرب بالنعاس باش ماتعاودش تفكر الماضي
#يتبع
