🍒 الفصل الثاني: إعتذاري منكي لن ينسيكي
غدا صباحا.
فالمارشي كيف العادة مكتض بالناس الزحام والصداع واقفة صفاء قدام واحد الهوندا
الراجل: شوف اولي غادي تخرج الخناشي والصنادق وحطهوم ليا هنا.
صفاء:صاافي كون هاني الحاج
الراجل: عنداااك تضغط ليا الديسير ديرو هو من لفوق
صفاء: ماتخاافش الحاج السلعة كيفما خليتيها غادي تلقاها.
خلاتو ودخلات لابسة كيف ديمة سورفيت وكاسكيطة . تحنات بصعوبة هزات خنشة دالبصلة وعلاتها فوق كتافها وهي عاضة على سنانها حيت تقيلة عليها واخا هكاك متحملة خرجات بيها حتى فين كاين الهوندا. حطاتها كتنهج وفمها زرااق. أصلا غير كتبدا الخدمة وجهها كيصفاار وشنايفها كيزراقو. كتولي حاسة بالمواس كيدخلو فقلبها لكن ماعندهاش حل هادشي لي لقات قدامها. رجعات تاني لوسط المارشي كتنهج كتحاول تاخد النفس. كان خاصها تاخد رابوز كيعاونها فهاد الأوقات باش تتنفس مي معندااش فلوسو. اصلا قرب تاني يسالي الدواء و الرونديفو دالطبيب خاصها ترجع ليه وهي ماعندهاش باش ترجع . مضطرة تخدم تلاتة دالخدامي. وماكرهاتش تلقا خدمة ختى بليل ورا طناش تديرها ملي تسالي لبيع. لكن مالقاتش. هي دابا فأمس حاجة لدرهم . كتقتاصد الأقصى درجة فالمصروف تقدر تبقا نهار كل على بيضة ديال الفطور. لمهم ماتخصرش الفلوس لي كتجمع لدواء. هي عارفة راسها بلا دواء غادي تموت غير توقفو غادي تطيح. عارفة حالتها خطيرة. هي ماكاتخافش من الموت. لكن ولفات فحياتها تتحارب. وداكشي لي كتدير دابا. مادام قادرة توقف غادي تبقا مكافحة ومحاربة حتى لنهار لي تطيح داك الساع غادي تستسلم حيت ماغادي يبقا فيديها ما تدير
حطات الخنشة ورجعات تاني دخلات المارشي. هزاات الخنشة التانية فوق ضهرها كان فيها البطاطا. خرجات تاني معاقرة معاها. ماحلتها لتقل ماحلتها لحريق لي فقلبها حيت كتضغط عليه فوق ماكيتحمل. .
ماجات توصل لبرا حتى حسات بشي ركلة جاتها لضهر على إثرها طاحت هي على وجهها هي والخنشة فوق ضهرها . جات توقف مقدراتش مدات يديها فالأرض شدات فيها باش توقف يالاه تهزات على ركبتها وهي تحس تاني بركلة لضهرها ترضخات تانى جاتها جبهتها على الأرض داك الساع تضغضغت وزراقت
صعصع بالغوات: يااااااك قلت لقح*بة ممممك ماتجيييييش لهاد الجهة
صعصع هو زعيم الحمالة داير عليهم سيبيرا حيت قوي عليهم. وكيفتاخر بقوتو ضدهم
صفاء تقلبات على ضهرها كتحس بالألم باغيا غير تنوض: س سمح ليا أخويا والله ماكنت عارف هادي بلاصتك
صعصع هز رجليه ونزل عليها نالكرش حتى غوتااات حييت تزواات
صفاء: ااااعععععععععععع
صعصع: هااادو كلهم عااارفين ونتا ماعااارفش ولاا كتتحدانى اجي لممك لهنا
هزها من كمها حتى لفوق وجمع معاها بلكمة حتى رعفات. اصلا دمها سخون دغيا بدأ الدم ينزل
صعصع: وادبا لموووك غادي تعرف هادي بلاصتي
مشا وخلاها منشورة تما . وقفات بصعوبة وخرجات من باب المارشي بشوية شادة فقلبها نيفها كلو كيقطر . جلسات فباب دواحد الدار تم. عياااات كتحااول تصبر لكن ماقدراتش
تحنات حطات راسها بين يديها وبدأت كتبكي
