🍒 الفصل الثاني: إعتذاري منكي لن ينسيكي
فهد وسحر من بعد مدة طويلة و هوما على نفس الحالة اخيرا بدا كايبان ليهم بحال جزر بعاد مفرقين على بعضياتهم، تنهدو كايحاولو يجدفو ليهم غير قربو شوية دار فهد يديه فوق عينيه مغطي الأشعة باش يشوف و هي تترسم على وجهو واحد الإبتسامة عريضة حتا الغمازات بانوليه مع قليل فاش كيضحك سحر جاتها غريبة
سحر : فهد شنو كاين؟ قولي شي حاجة تفرحني حيت قلبي مابقاليه والو و غادي يوقف
فهد : ههههه لا هاذ المرة إذا ما كدبتش غادي تفرحي ، شوفي ديك الجزيرة هاداك الجبل لي كايبان بعيد، هذاك نيتو الجبل لي ملي بحتنا إذا عقلتي لقينا داك الساحر غادي يكون فالراس ديالو،
سحر : بصااااح! آه آه عقلت عليه هو نفس الشكل نفس كلشي أنا متأكدة
فهد : هاد المرة وقف معانا الزهر، إذن هادشي كامل لي دورنا مزيان لينا حيت أي حاجة دزنا منها كانت وسيلة باش نسلكو هاذ الطريق، حيت بلا هادشي مستحيل كانت تطيح علينا نمشيو من طريق صعيبة بحال لي دزنا منها
سحر :الحمد الله،. دابا نتمناو نتلاقاو مع داك الساحر و يقد يعاوننا بعدا
فهد : إن شاء الله
بقاو كيجدفو ب يديهم مقربين داك الجزيرة، ملي شافو الخشبة غير مكاتزيد تعطلهم تلاحو من عليها و بقاو كيعومو ب سرعة كيجدفو هاذ المرة بيديهم و رجليهم حتا وصلو ل شاطئ ديك الجزيرة و نزلو كيقطرو بالمااا،
جلسو و تنفسو الصعداء كيجهزو راسهم للطريق لي تابعاهم ما هي إلا دقائق حتا كانو وقفو متوجهين ل داك الجبل ماعندهمش الوقت لي يزيدو يضيعوه فالراحة مادام بان ليهم الهدف فين هو إذن خاصهم يساليو المهمة اليوم بأي طريقة كانت، وصلو ل قاع داك الجبل كيقلبو على الطريق لي غادي طلعو منها، بانتليهم غير واحد الطريقة ضيقة كاتساع غير لواحد.وزيد التربة ديالها باينة رطبة بزاف و عامرة غير حجر الطريق مكرفسة، ولكن كيف ما سبق و قلت مابقاش عندهم الوقت باش يفكرو ف شي حل آخر لقاو هادي إذن ماغاديش يقلبو على شي طريق آخرى لي معارفينش واش كاينة
فهد : طلعي نتي اللولة انا عادي نبقا وراك باش نشدك إذا فقدتي التوازن
سحر قلبات فيه عينيها : شغادي تشد راااه أنا لي نشدك وابقا حاكرني
فهد : ياك عاد كنتي ساكتة و كتقولي غير آه ولا ديك الساعة حيت الذياب أما هذا غير فهد، زيدي لمك قدامي قبل مانهرسلك شي ضلعة مابقاتليش الكانة د شي حد يتعاند معايا
سحر مازادتش معاه الهضرة ملي شافتو بصح معصب توكلات على الله و رمات خطواتها ف ديك الطريق مخليااا فهد تابعهااا، الطريق كانت ضيقة ل درجة واحد مايقدش يمشي عادي خسو يمشي مجنب و شاد غا فالحيط د جبل، هاكاك دارو ب جوج بيهم طلعو معافرين كيحاول يشدو فأي حجرة بانتليهم باش تعاونهم فالطليع ، و التربة كاتزلق بزز باش كيشدو التوازن حيت راه ضربو مسافة يعني إذا غير سهاو غادي يطيحو من المنحدر ديريكت لمن هو ربك،
فهد : سحر ردي البال مزيان، قبل ماتلوحي الخطوة عرفي فين ماشي غير تزيدي كي شي بهيمة
سحر : ياااك عاد كنتي باغي تهرسني و دابا خيفان علياااا غير بلاش من خوفك
فهد : راااه أقسم بالله حتا كاتعصبيني بهدرتك راه أنا ماشي بحالهم هوما صابرينلك على هبالك، أنا كنعرف سحر وحدة هي ديك سحر د قبل 6 سنين لي كانت كتعيطليا غير خويا فهد خويا فهد، تزيدي كلمة وحدة معايا دابااا راه غادي نلوحك من هنااا و مانعقلش عليك كاتعرفي ملي كاتطلعلي القردة للراس و الله حتا نديرها
سحر : ههه عارفاااك ماتديرهاش و لكن صافي هانا ساكتة ماتكون غير على خاااطرك أ... خويا فهد هههه
بقاو مكملين طريقهم ف هدوء سحر عينيها غير على الأرض حاضية الخلفة أما فهد ف عينيه غير على سحر حاضيها غير هي خايف عليها كتر ماخايف على راسو، حاسبها كتر من ختو هي أمانة من عمو أولا و من والديه ثانيا جوهرة مكنونة خسو يحفضها كيف ما هي حتا يرجعها منين جابها، فخور بها و بالشخصية لي كوناتها واخا مكايبينش ليها مي هو ديما ضد الوحدة لي ماتشبتش بالأنوتة ديالها. كيعرف البنت خاصها تكون حنينة وتهدر بشوية وتلبس لبس أنيق هو عارف سحر كانت هاكاك وهاد الشخصية لي هي فيها دابا ماشي ديالها. الكارو و تخسار الهدرة هادو كايشوفهم حاجات كينقصو من أنوثة البنت ماشي كيبينوها واعرة، البنت بالنسبة ليه خسها تكون محترمة و متخليش الواحد يضسر عليها و ماتعطيش الدخلة لمن ماكان هادشي كامل ف سحر ولكن الكارو وتخصار الهضرة حالف ب حلوفو ما يرتاح حتا تبعد منو
