ماطلبت عذرك أنا نفسي عزيزة

Part : 4

اذن اذان الفجر وصحت كل الديره كالعاده

قامت ام سعود لغرفه هتان تصحي بناتها
وديان وهي مغمضه نص عين وفاتحه نص عين: يمه تكفين ابنام بعد خليني شويه الله يخليش
ام سعود : قومو يابناتي الله يهديكم قومو توضو وصلو الفجر
الهنوف فركت عيونها بنعس وقامت من مكانها: بروح اغسل وجهي وبتوضى يمه
ابتسمت ام سعود لبنتها وناظرت الاثنين المنخمدين سحبت منهم لحاف السرير بسرعه وفزو وديان وهتان من البرد
وديان : يمه الله يهديش ليه تسحبين الحاف برد ترا
ام سعود بشويه عصبيه : قوموا للصلاه
قامت وديان وقالت حاضر بتأفف من نوم اللي فيها
هتان كانت تناظر ومو مستوعبه شي بعدين استوعبت انها بالديره وعوايدهم يصحون من الفجر قامت بسرعه من مكانها ولحقت هتان ووديان للصلاه ام سعود ابتسمت وقالت الله يهديكم ويثبت قلبكم على الإيمان تحركت من مكانها وراحت تتوضى هي بعد
بنسبا للعيال صحى سعود على صوت الاذان وقرب من سياف وابتدا يصحيه سياف حس على صوت اخوه وكان يفتح عيونه بشويش وقال اذن الفجر؟
سعود هز براسه بمعنى ايوه جا سياف بيقوم من مكانه وحس بثقل على يده ناظر ليده وحصل ترف نايمه مسح على راسها وابتدا يصحيها ترف تروفه اصحي حبيبتي
ترف كان نومها جدا خفيف وتحس يوم حد يحاول يصحيها من اول مره صحت وناظرت للمكان وتذكرت انها شافت حلم وكانت خايفه وجت تنام عند اخوانها قامت وهي ماسكه الدميه الارنب وتفرك عيونها بيدها الثانيه بنعس سياف ابتسم لها وقال يلا تروفه قومي غسلي وجهش والحقي الصلاة هزت ترف راسها وقامت طلعت من الغرفه ناظر سعود لسياف . سياف حس بنظرات سعود تكلم سياف وقال ادري وش تفكر فيه بس مدري وشلون بنصحيهم سعود تكلم وقال تعبت معهم والله حتى المويه ماينفع معهم سياف تكلم وقال خلنا نخرشهم شويه سعود ابتسم وفهم اخوه وش يقصد قرب سعود من رائد وسياف من خالد همسو باذنهم بصوت عالي ابوي جا فز رائد وخالد بخوف وهم يقولون صحينا صحينا ضحك سعود بقوه سياف اكتفى بضحكه صغيره وقام من مكانه يلا اذن الفجر قومو بدلو ملابسكم وخلونا نلحق الصلاه ولحقه سعود خالد ورائد استوعبو انهم كذبو عليهم حتى يصحون قامو من مكانهم وهم يتوعدو بسياف وسعود كان الجد عبدالله وابو سعود واقفين عند لباب ينتظرون جاهم سياف وسعود وبعدهم بثانيه جا رائد وخالد
ابتسم الجد عبدالله وهو يقول : لحمدلله جا يوم وشفتكم مب متأخرين عن صلاه الفجر (كان يقصد رائد وخالد)
ابتسم خالد ورائد بحراج من نومهم الثقيل
وراحو لصلاه الفجر
خلصو البنات صلاه وراحو يصلحون الفطور
كانت ام سعود تخبز العجين وام هتان تصلح الشكشوكة
والهنوف كانت تزين الصحون وتقطع الطمام والخيار وتحط الجبن والمربى والعسل ووديان كانت تغلي الشاهي هتان راحت تجيب مويه من البير هتان كانت ماشيه وماسكه المويه بيدها الاثنين من ثقله وكانت شارده وحست انها صدمت بحد والمويه طاح رفعت هتان راسها وبلشت تهاوش
رائد بستغراب : تصدمين فيني وتهاوشيني صدق انش فاهيه
هتان ارتفع ضغطها من رائد : رائد ليه تحب تعصبني؟
رائد بستغراب اكثر : شسويت بضبط ؟ مخلص صلاة وراجع البيت الا اشوف خبله تصدم فيني وتجلس تهاوش بعدين ذا مو طريق البيت يالخبله
هتان استوعبت انها كانت مركزه بالمويه اللي شايلته وشارده وما انتبهت وين تمشى تكلمت هتان بكبرياء عشان تداري فشلتها عشان لا تبين نفسها غلطانه المويه طاح كله منك تعبت وانا اشيله
رائد: ابعدي انا بجيب المويه بعدين ياليت يوم تطلعين تجيبين مويه من لبير تغطين وجهش
هتان تذكرت انها طلعت للديره بدون تغطي وجها وركضت للبيت بسرعه ووجها احمر
ضحك رائد من رده فعلها ووجها الاحمر
جا من وراه خالد وضربه على كتفه: ضحكني معاك
رائد: تكلم وهو يمسح كتفه بألم بشويش على كتفي مافي حاجه بس الفاهيه هتان تحارشني كعادتها
تنهد خالد وقال: شريكات مب قرايب ماغير تتهاوشون
رائد ضحك وقال :مع ذالك ياحليلها تذكرني بوديان الخبله
خالد ابتسم بخيبه مصطنعة وقال :للاسف كنت بشبكم سوا
رائد: لا تكفى تعوذ من ابليس مابقى بدنيا غير هتان تشبكني معها؟ ياشيخ والله لو انها اخر بنات الديره ما احبها ولاني متزوجها اساسا اشوفها كاخت لا اكثر
خالد بضحكه وهو يركض : امزح معاك ترا وش فيك صدقت
رائد بصارخ: أصبر علي بس يالحيوان
من بعدها مسك سطل المويه وراح يعبي من لبير
هتان كانت تركض من فشلتها وصدمت بوديان وديان
استغربت من ركض هتان ووجها الاحمر
وديان بستغراب : هتان وش فيش؟ ووين المويه
هتان ناظرت وديان بحراج وعصبيه : كله من اخوك الحيوان
وديان: رائد ؟
هتان بعصبيه اكثر : اييي ومن غيره ذا الحيوان المتخلف
رائد جا من ورا هتان وهو ماسك المويه: عندش شي ثاني بتضيفينه؟ لحيوان ومتخلف ولا؟
هتان قلطت ام العافيه وصنمت مكانها
وديان : شصاير؟
رائد: ابد وانا اخوش وحده خبله صدمت بي وجلست تهاوش وهي من فهاوتها مضيعه طريق البيت
وديان وهي تنفجر من ضحك: هتان وربي انش فاهيه اكثر عني ذا وهم يقولون عني خبله طلع في حد اخبل مني لحمدلله
هتان كانت واقفه ماتدري وش ترد ووش تسوي ضلت واقفه مكانها ساكته من الفشله وتتمنى الأرض تنشق وتبلعها
رائد تحرك من مكانه وتقدم لوديان خذي ذي لمويه
وديان : مشكور وين الباقي ؟
رائد: اتوقع خالد دخل الغرفه ينام جدي ويبه والباقي واقفين عند المسجد يسولفون مع ابو سلطان
وديان : اها زين الفطور قرب يجهز بصلح لكم القهوة وبحطها بالحوش
ابتسم رائد وقال زين وراح لغرفته
هتان كانت بعدها على نفس الوقفه وديان ضربت هتان بخفه وهي تضحك وتقول راح خلاص تطمني
هتان : وديان تكفين ودي اذبحه
وديان: شفيش على اخوي المسكين
هتان : قولي الا سكين لمهم يلا تاخرنا لا تهاوشنا امي وامك
وديان: زين يلا
نروح لمكان ثاني عند عائلة تنوف
تنوف : كانت تشوف فلم في الايباد حقها
ابو تنوف كان يسوق ومركز على الطريق أم تنوف كانت نايمه لانها تعبانه شوي
وقف ابو تنوف عند كافتريا صغيره وطلب اكل وطلب له شاي كرك ولزوجته سال تنوف وش ودها تشرب وقالت شاي كرك معهم انتظرو دقايق وجا الاكل والشاي بلشو ثلاثتهم ياكلو بعدها رجع حرك ابو تنوف السياره وبدا يسوق تنوف كانت تحس بملل وقررت ترجع تنام قفلت الايباد وانسدحت على المرتبه وغمضت عيونها
نرجع للديره
كان الجد عبدالله وابو سعود جالسين بالحوش
وسعود ورائد وخالد جالسين سياف كان يصب لقهوة
صبها لا جده اول بعدها ابوه ومن بعده خالد وسعود ورائد بعدها صب لا نفسه وجلس جنب سعود
الجد عبدالله تكلم وقاطع السكوت : سياف ياولدي اليوم تدريبك ؟
سياف: ايوه ابوي اليوم
الجد عبدالله بحنيه: زين لا تبطي علينا
سياف ابتسم وقال أن شاءالله
دخلت وديان الحوش وبيدها السفرة
قام سعود وساعد وديان في حط السفرة
ورجعت وديان للمطبخ وشوي وتجي وبيدها صحن
ووراها ام سعود وام هتان والهنوف وهتان وهم كل وحده شايله شي حطو الاكل على السفرة وترف جابت الشاهي وحطته جلسو من بعدها الكل على الفطور ابتدو يفطرون
قام سياف واستاذن وطلع من المكان بعدها قام الجد عبدالله وهو يتحمد الله وقام من بعده ابو سعود وخالد ورائد وسعود راحو كلهم للعزبه وابتدو البنات يلمون السفرة سياف ركب سيارته وحرك المشوار ماكان طويل لانه الاسطبل اخر الديره وتقدر تمشى له اساسا يفصل بين الديره والخط السريع بس سياف حرك لفرع ستاربكس القريب يطلب كراميل ميكاتو طلبه المعتاد قبل يدرب الناس حرك سيارته بعد ما استلم طلبه وراح للاسطبل ماهي دقايق الا وصل وقف سيارته ونزل منها فتح باب الإسطبل ودخل لغرفته الموجوده في الاسطبل بدل ملابسه ولبس ملابس الفروسيه وماهي الا نص ساعه ابتدو طلابه يجون وكان سياف يدربهم من بنات وعيال بس البنات ماكان يلمسهم او يقرب لهم حتى كان مكتفى بالشرح لهم وكان معاه مدرب خيل اسمه حمدان صديق سياف ( سياف كان يحب الخيل من صغره وكان دايم يركب خيل وتطور هالحب فيه لين صار مدرب خيل والجد عبدالله الله معطيه خير قرر يبني له اسطبل في اخر الديره ويكون قريب شوي علي المدينه القريبه منهم عشان يدرب فيه ومايبعد عن نظره ) ابتدا سياف وحمدان يشوفون شغلهم ويدربون نرجع للديره
كان سعود يقطف الخضروات ورائد يحلب الأبقار وابو سعود كان يجمع البيض خالد يعطي اكل للغنم وراح يساعد سعود بالقطف والزراعه
سعود : خلوود
خالد : نعم من قلت خلوود الله يستر شعندك؟
سعود ضحك وقال : جالس افكر لو جالي ولد وشلون بصارحة انك تكون اخو جده وصغير عقل؟
خالد : بالله خف علينا يالعاقل بعدين تعال انت فكر تتزوج اول بعدين فكر تجيب عيال
سعود ضحك وقال : لا تخاف مابتزوج قبل تفكر تتزوج انت ورائد
خالد: عز الله اننا بنضل عزابين اجل رائد شايل الفكره من راسه بالمره
سعود : صراحه اتفق معه احس مالي خلق لدلع الحريم  وكذا
خالد : انشهد يادلعهم يجيب المرض بس بعد يعني يتعبون ماننكر ولهم مواقف عن ميه رجال
سعود : بذي اشهد لهم بالعشرة
رائد جا وراهم وهو يقول من هم وبعدين ماخلصتم؟
لف سعود راسه لرائد وقال : خلصنا يلا نحطهم في الحوض
خالد قام من مكانه وبدا يشيل السلات ويساعده رائد وسعود ركبو السياره بعد ما حطو الاغراض في الحوض وكان اللي يسوق خالد حرك لسياره متجهين للسوق