طيوف الماضي

البارت(8) طيوف_الماضي الكاتب#احمد

تصويت ومتابعه لحنى توصلكم باقي البارتات والقصص ❤
#طيوف_الماضي
البارت #احمد
البارت_8
.
.
يوم من الايام كعدت الصبح بطني توجعني وجع مو طبيعي بقيت اتكلب بفراشي من الوجع كمت اريد اوصل الشباك وكوة امشي
.
.
وصلت للشباك ماكو احد من الحرس صيحت الا مليت وماكو احد رجعت دورت بالبيت لكيت درنفيس اخذتو وزتيتو كل قوتي باتجاه غرفتهم واجى بالكزاز وتكسر
.
.
وطلع واحد منهم خايف اشرتلو واجى علي شافتي اتوجع وزاد خوفو كلتلو خلي السيد يجي بسرعة راح اموت من الوجع كال بس كليلي شبيج اريد اجاوبو ماكدر تمسكت بالشباك وما كدرت اسيطر على نفسي وماعرف شصار بعدها
.
.
كعدت بعد مدة ماعرف شكد لكيت نفسي بالغرفة واحس تطلع من جسمي نار من الحرارة كوة فتحت عيوني شفت دكتورة كاعدة يمي
.
.
الدكتورة: الحمدلله على سلامتج بنيتي
جنى: الله يسلمج شنور صار وياي
الدكتورة: ايمتى حسيتي بالوجع
.
.
جنى: الصبح
الدكتورة: كالت للسيد عوفنا لحالنا .. ركزي وياي بنتي
جنى: تمام
.

الدكتورة: انتي هسا صرتي مرة .. فهمتني انو بلغت مثل ما حجتلي عمتي رؤى
جنى: تمام
.

الدكتورة: وهسا اخذي هاي العلاجات وابقي مرتاحة هالفترة هاي لا تتعبين ولا تبردين
جنى: تمام مشكورة
.
.
ماكدرت احجيلها انو مخطوفة واصلا ما اجى ببالي احجيلها بس كلت خلي اتدلع عالسيد ماطول مريضة لان جنت اسويها ويا اهلي
.
.
طلعت الدكتورة حجت وياه وراحت اخذها واحد من الحراس ودخل السيد كعد يمي عالسرير كلي شلون صرتي سكرت عيوني وكلتلو تعبانة
.
.
بقى يمسح على راسي كلتلو جوعانة كلي شنو تريدين كلتلو معلاك اتصل عالحارس كالو توصل الدكتورة وتجيب معلاك وتجي كلتلو لا يجيب من مطعم
.
.
السيد: لعد منين
جنى: المطعم مو طيب هنا نسويه
السيد: تعرفين تطبخيه
.
.
جنى: رفعت حواجبي بمعنى لا
السيد: لعد منو يطبخو
جنى: ماعرف
.
.
السيد: رجع كال للحارس اخذو لام صالح تطبخو
جنى: منو هاي ام صالح
السيد: وحدة فقيرة ومن اشتهي اكلة اوديلها احتياجات الاكل تسويلي وانطيها فلوس بدال تعبها
.
.
جنى: وطبخها طيب لو لا
السيد: هسا يجي وتعرفين اذا طيب لو لا
جنى: تدري من اجيت هنا ما اكلت تمن
.
.
السيد: ليش
جنى: ماعرف اطبخو
السيد: تريدين اجيبلج كتاب وصفات
.
.
جنى: اي اريد واحد
السيد: تمام وجربي اي اكلة تريديها والي ما تضبط ذبي الاكل الي يخرب
.
.
جنى: بس هاي نعمة شلون اذبها
السيد: احسن ما تبقين ماتعرفين
جنى: تمام
.
.
خلصت كلام وياه وغمضت عيوني على اساس اتدلع عليه واني سلمتها تراب ونمت كعدني السيد الظهر كالي كومي تغدي وارجعي نامي
.
.
كمت كوة واحس جسمي مابيه طاقة ومن امشي اتمايل مثل الحراس من يسكرون واني افكر بهالاشياء ضحكت بس السيد ما انتبهلي
.
.
غسلت اديني ورجعت لكيتو مجهز الاكل بصحون وويا المعلاك تمن واني صارلي هواي ما اكلتو اكلت اول لكمة جان الطبخ من صدك ممتاز حقو يطلب منها اذا اكلها كلو هيج طيب اكلت الا انتفخت بطني بعدها كمت حطيت جاي عالنار
.
.
السيد: ليش ما كلتيلي مشتهية جاي جان خليت الحرس يسوون وانتي باقية مرتاحة
جنى: وتريدني اشرب من جايهم
.
.
السيد: ليش
جنى: ما بقى بس اشرب من شي يسووه اليسكرون
السيد: هههههههه ترا بشر مثلي مثلج
.
.
جنى: لا مو مثلي اني ما اشرب شي مثلهم
السيد: تمام يابة على راحتج
.
.
جنى: من خلص الجاي صبيتلي بكلاص لان جنت كلش مشتهيتو واخذتو وطلعت صاحني السيد كال شو ما صبيتيلي كلتلو اني مريضة صب لنفسك واسمعو يضحك
.
.
شفت باب الصالة مفتوح طلعت خارج شفت واحد من الحراس يرش الحديقة بس العشب متيبس كلتلو شو ميت العشب كال لان هسا زارعينو فترة ويرجع يطلع
.
.
وعفتو يرش ورحت اخذت كرسي وكعدت عليه لان احس نفسي تعبانة وبقيت اشرب جاي شوية واجى السيد بايدو كرسي وكعد بمسافة عني وطلع دفترة ومدري شيسوي بيه
.
.
واني عفتو على راحتو من خلصت الجاي رجعت الكلاص للمطبخ ورحت لغرفتي نمت كعدت العصر السيد موجود اخذت ملابس وسبحت ومشطت شعري وطلعت مرة ثانية
.
.
لكيت كرسيي بمكانو وكعدت عليه مرة ثانية السيد جاب كرسيو وكعد يمي كلي جنى من اليوم اي شي او شخص تحتاجينو دكتورة كوافيرة غيرها اجيبها لعندج وشرط ما ينقصج شي ابد
.
.
بس ترا اذا كلتي لاحد منهم انو انتي مخطوفة ترا راح تتغير معاملتي وياج وحتى الي تحجيلو تورطيه وياج مفهوم هزيتلو راسي بعدم رضى
.
.
وكلتلو لو اكدر جان حجيت للدكتورة اليوم الصبح بس ادري راح اتورط وبقى هو ساكت ما حجى شي واحسو مو عاجبو الوضع هو هم بس مجبور عليه
.
.
كلتلو منو الي كالك تخطفني كال بعدين اصريت عليه كال هسا ماكدر احجيلج بعدين احجيلج كلشي هسا لا تفكرين بشي بس المهم تتحسن صحتج وترجعلج عافيتج
.
.
كلتلو ليش ما تاخذني لبيتك اذا تريد تتزوجني من اكبر كال بيتي اغلب الاوقات فارغ وهم ما اريد احد يعرف بوجودج لحدما نقرر نعقد وقتها اسويلج عرس اخلي الناس كلها تحجي بيه
.
.
بقيت ساكتة عبالو هالشي يعوضني عن فقدان اهلي وخطفي من عمي من صارت الدنيا مغرب برد الجو ودخلت عالبيت لكيت المطبخ نظيف والمواعين مغسولات
.
.
طلعت الي باقي من المعلاك حميتو واجى السيد وهالمرة اكلتو ويا خبز لان التمن من يبرد ما اشتهيه تعشيت وكملت ورحت على جنطتي
.
.
فتحتها واباوع للكتب واتذكر من رحت ويا هيثم استلمتهن ومن جانت عمة رؤى تدرسني جنت غركانة بذكرياتي وما حسيت على نفسي الا اني اشهك من البجي
.
.
جانت الشهكة تعبر عن كل ذرة الم وظلم تعرضتلها بحياتي دفنت وجهي بالمخدة علمود اكتم صوتي وبقيت ابجي لحد ما نمت
.
.
كعدت ثاني الطنكورة واصلة للسكف ههههههههه بحيث مالي خلك احجي ويا احد سويت جاي وصبيتلي بكلاص ورحت للغرفة الثانية لكيت السيد نايم كعدتو كلتلو اريد اطلع خارج
.
.
السيد: الساعة شكد
جنى: ماعرف ماعندي ساعة
السيد: يمعودة الدنيا فجر صدك تحجين
.
.
جنى: اي صدك يلا كوم افتحلي الباب
السيد: شو صايرة تتأمرين اليوم
جنى: لان ضايجة ومالي خلك اتعارك من الصبح
.
.
السيد: ههههههه صايرة شرسة يابة
جنى: ماكو شي يضحك ترا
السيد: لا اليوم من صدك الهرمونات صاعدة عندج
جنى: يلا يلا رايحة كدامك
.
.
اريد اطلع اسمعو كال تخبلت البنت كلتلو ترا اسمعك وضحك طلعت اخذت الجاي واجى فتحلي الباب ورجع نام جان الجو بيه برودة كلش حلوة واني اشرب جاي
.
.
احس حتى تفسيتي ارتاحيت باوعلي كال هو انتي بكد الفارة كلاص الجاي هذا شلون تخلصيه كلتلو عادي بقيت كاعدة لحد ما طلعت الشمس
.
.
واحد من الحرس من شافني خارج البيت والسيد مو وياي تفاجئ واجى سألني عالسيد كلتلو نايم وراح تأكد من السيد ورجع اني ما حجيت شي بقيت ساكتة وكاعدة بمكاني
.
.
من حسيت بالجوع دخلت سويت ريوك وكملتو واخذتو بالحوش وكعدت اتريك واحس نفسيتي ارتاحت لان طلعت من الصبح للحوش شوية واجى السيد كعد يمي
.
.
كال ها شلون صرتي كلتلو احسن ورجعت كلتلو شلون عرفت انو اني مريضة كال من تخربطتي الحارس اجاني كلتلو وشلون وصلك وهو ماعندو سيارة
.
.
كال كدر يوصلني وانطاني خبر واني جبت الدكتورة واجيتج كلتلو ليش ما تشتريلهم سيارة كال مفكر اخذلهم ماطور للحاجة اسرع من السيارة بالطريق الترابي وهم يفيدهم
.
.
صاح لواحد من الحرس كلو اخذ السيارة وروح جيبلنا لحم مثروم علمود نسوي كباب بس جيب لحم زين مو يغشوك كلتلو منيلك كل هالفلوس
.
.
السيد: عندي هواي
جنى: شكد
السيد: اكدر اغركج بالفلوس
.
.
جنى: لعد ليش خطفتني
السيد: مو كلتلج بعدين تعرفين
جنى: صار عندي فضول اذا مو محتاج ليش خطفتني
.
.
السيد: تدرين بيتي بكد بيتكم اربع مرات
جنى: وعايش بيه لحالك
السيد: لا تاركو حاليا وكاعد ببيتي الثاني وذاك مقرر من اتزوج انتقل عليه اني وانتي
.
.
جنى: شنو يأكدلك انو نبقى عايشين لذاك الوقت
السيد: هيج مخطط واذا ربنا قررلنا غير قرار فهالشي يختلف
جنى: زين منين جمعت كل هالفلوس
.
.
السيد: عندي طرق خاصة
جنى: وهاي الطرق تكون خطف مثلي مو
السيد: تصدكين اذا كلتلج اول مرة اخطف احد
جنى: وشنو الي خلاك تخطفني
.
.
السيد: الي جان يريد يخطفج جان يسأل عن واحد ولحسن حظج اسمو مثل اسمي وتوهم واجى علي واني سويت نفسي ذاك الشخص علمود اساعدج
.
.
جنى: والحرس الي تدري بيهم يشربون
السيد: اني مستأجرهم وانطيهم حقهم واكثر من هالشي مدخلني بيهم ومدخلني يشربون لو لا
.
.
جنى: يعني ما شربت من قبل
السيد: لا الحمدلله ما سويت هالشي
جنى: وهذا البيت ليش اشتريتو
.
.
السيد: اشتريتو علمود موضوع وفادني من جبتج
جنى: مع اني مو مصدكة بس تمام
السيد: قصدج اني جذاب
.
.
جنى: برايك سهل اصدك شخص خاطفني
السيد: راح يجي يوم واثبتلج
.
.
جنى: بقيت ساكتة بس مو مصدكة حجيو احس عندو هواي اشياء غامضة وما يكدر يحجيها بس الا ما يجي يوم وينكشف على حقيقتو
.
.
اجى الحارس جايب وياه اللحم والشياش نزلهن وراح جمع حطب وحركو السيد كال اليوم تبقين مدللة انتي لان هو يعرف يسوي الكباب
.
.
اخذ اللحم وحطو بطاسة جبيرة واخذ الشياش غسلهن ونظفهن وراح عند النار من صارت جمر بدا يسوي بالكباب والحراس تركوه لحالو
.
.
وعرفت انو هو كاللهم لان كلتلو ما اشرب شي يسووه من سويت جاي وخاف انو ما اكل من الكباب لهذا خلاهم يروحون وبقى هو لحالو يشوي
.
.
من كمل صاح لواحد من الحرس اخذلهم للغرفة وجاب الباقي وكعد يمي واكلنا اني وياه لحد ما شبعنا وراح سبح لان صارت ملابسو كلها ريحة دخان
.
.
بس جان الكباب كلش طيب اني جنت بدوامة تفكير بسبب كلامو من جهة اكول صحيح كلامو ومن جهة اكول جذاب لان خطتو متقنة من جمع الجهات
.
.
والبيت جاهز والوضع عندو طبيعي مستحيل شخص عادي يدبر هالاشياء كلهن باول عملية خطف وفوكها عملية خطف مو متحظرلها
.
.
واذا يريد يساعدني ليش ما سلم الي حجالو عني للشرطة جان انسجن ذاك واني بقيت عند عمي عايشة بسلام قبل المغرب دخلت نمت لان جنت نعسانة كلش
.
.
كعدت بالليل هو مو موجود والباب مقفول والحراس مالهم صوت ساكتين كلت احسن ما يخبصوني بصوت اغانيهم
.
.
بقيت كاعدة ومادري شسوي ماعندي شي التهي بيه ولا وياي احد احجي وياه والحمدلله من جنت صغيرة ما جنت افكر بسوالف الجن وغيرها
.
.
لو احد حاجيلي عليهن الا اتخبل من ابقى لحالي من نعست رجعت نمت وحتى عشى ما تعشيت كعدت ثاني يوم صحتي كلش زينة وكمت تريكت
.
.
وراها بشوية اجى السيد جايبلي كتاب بيه وصفات عراقية مثل الدولمة والكبة والمقلوبة والبرياني وهواي اكلت وكل وحدة ومقاديرها اخذتو منو وبديت اكلب بيها
.
.
جانت الصور كلش حلوة بس ماعرف راح اكدر اضبطهن ولا لا شوية واجى بايدو كتاب ثاني كال هاي هدية ثانية اخذتو طلع كتاب مال وصفات كيك بانواع مختلفة
.
.
ومن ضمن الوصفات وصفة الكليجة بس لان صعبة ومو ذاكرين بس المقادير كلت اكيد ما تضبط اخذت كتاب الوصفات مالت الاكل وبديت بالمقلوبة
.
.
سويتها اول مرة ونسيت البطاطة بالدهن ورحت اجيب  بصل لان مو محطوط بالمطبخ وبين ما رجعت لكيت المطبخ عبارة عن غيمة سودة من الدخان
.
.
وصارلي صراخ واجو الحرس والسيد على صراخي وعبالهم احتركت كلتلهم لا المطبخ احترك ودخلو طفو الطباخ ووشغلو المروحة علمود يطلع الدخان
.
.
السيد ضحك ضحكة مو طبيعية على الي صار ويكول لا يابة لعد كلش زين وضعج بعد يومين إن شاء الله توكلينا مواعين فارغة والحرس يضحكون
.
.
من كال هيج احس صار الي مثل التحدي وبيني وبين نفسي كلت اني الك اذا ما خليتك تتعجب من طبخي بذاك اليوم ما سويت كلشي الظهر
.
.
هو سوا بيض وطماطة واكلنا والعصر راح اني من شفتو ابتعد جبت كلشي احتاجو يمي كطعت البطاطة والباذنجان وبلشت بالطبخة وانتبهت كلش زين للشي الي احطو عالنار
.
.
وسويت مثل ما مكتوب بالكتاب والمقادير نفسهن جانت هواي علي لان لحالي بس كلت من اكملها انطي للحراس واخليهم ينطوني رايهم
.
.
ومن گليت الخظراوات سفطتهن بالجدر وحطيت التمن ما جان عندي لا دجاج ولا لحم لهذا سويت بس ويا خظرة لان اعرف انها تصير بدونهن
.
.
حطيت التمن والماي فوكو وحطيتو عالنار وانتبهتلو وانتظرت لحد ما نشف التمن من الماي والي ساعدني بالموضوع انو عندي خبرة من مساعدة اني وعمتي من جنت اساعدهن
.
.
من استوت طفيت الطباخ واني محتارة شلون اكلبها لان الجدر ثكيل وحار وخفت تحترك ايدي منو انتظرت لحد ما شوية برد الجدر بس جنت متحمسة حماس مو طبيعي علمودها
.
.
جبت صيني حطيتها بالكاع وشلت الجدر نزلتو وكعدت بالكاع كلت ماكو غير انو اكلبو عالصينية وهي بالكاع وشلتو بوصلة علمود ما تحترك ايدي وكلبتو بسرعة داخل الصينية والتمن ما صار عدل بس الحمدلله ضبطت
.
.
اخذت الي بصحن وحطيت الباقي بصحن اصغر من الصينية لان ما تعبر من الشباك واخذت الصينية صحت للحراس واجى واحد منهم من شاف المقلوبة انصدم انو كدرت اطبخها
.
.
كلتلو عود من تخلصون رجعلي المواعين واسأل صديقك اذا طلعت طيبة ولا لا تشكر مني واخذها وراح رجعت للمطبخ سميت بالله واكلت منها
.
.
جانت شوية زايدة ملوحتها بس طالعة كلش طيبة ولان اني سويتها اكلت الا انتفخت والزايد حطيتو بصحن وشلتو بالثلاجة
.
.
ودا اغسل المواعين واجى الحارس رجع الي بقى منهم وكال عاشت ايدج كلش طيبة من الفرحة لو ما الشباك بيناتنا الا ابوسو ههههههههه
.
.
اخذت الصينية واني فرحانة بحجيو ورحت اريد اشيل الي بقى منهم لان نعمة بس مو بايدي من تذكرت انهم يشربون ما بقى الي نفس
.
.
رغم انو ما يحتاج انقزز منهم لهاي الدرجة بس الموضوع مو بايدي وذبيت الي بقى وكلت يارب سامحني وغسلت المواعين ورحت للغرفة والابتسامة ما تقارك وجهي
.
.
واني انتظر يجي السيد باجر واشوفو شلون كدرت اضبط الاكلة بعد ما جان يعيب علي نمت وثاني يوم كعدت من وقت تريكت واني انتظر على نار علمود يجي
.
.
صارت الساعة  10 وهو ماكو شفت واحد من الحرس يرش الحديقة سألتو كال ماعرف ورجعت انتظر للظهر وهو ماكو واني كتلني القهر انو ما اجى
.
.
وشكد ما ضجت الا بجيت من القهر وعرفت انو ماراح يجي كلت وربي ما اكل وشيريد يسوي خلي يسوي والي بقى من المقلوبة ذبيتو
.
.
وصحيح ما يحتاج اضخم الموضوع لهاي الدرجة بس حسيت بخيبة امل من انتظرتو وما اجى وكلت خلي يجي واني اعلمو
.
.
......... يتبع
لايك وتعليق حلو مثلكم ❤
حطولنا ارائكم وتوقعاتكم ❤
بيج الفيسبوك @AS413