طيوف الماضي

البارت_59 طيوف الماضي الكاتب #احمد

#طيوف_الماضي
بقلم #احمد
البارت_59
.
.
مصطفى: ثاني يوم جنت كاعد بالمضيف واجاني اتصال رديت عليه وحجى وياي رجال كال زوجتك بالمستشفى
.
.

كلتلو شنو صاير كال تجي وتفهم ومبين من صوتو اكو شي صاير كمت بسرعة اريد اروح حجو وياي كاضم وشاهين ومارديت عليهم عفتهم وركبت سيارتي وانطلقت
.
.
جان كل الي ببالي السيد مسوي شي كلت ورب العزة اذا مسويلها شي فلا ارحمك وما يخلصك مني الا الي خلقك وصرت اضرب الستيرن بعصبية واسب نفسي لان تركتها تروح للمعهد وهو موجود واحس الطريق صار سنة لحد ما وصلتلها
.
.
دخلت فورا عالاستعلامات وسألت عنها وكالولي رقم غرفتها ورحتلها ركض لكيت واحد من المدرسين ووياه مدرسة جايبيها للمستشفى تشكرت منهم وكلتلهم شصاير
.
.
كالو ادخل وهي تحجيلك دخلت شفتها مبين بوجها التعب بس ساكتة ومبين حزينة تقدمت صرت كدامها نزلت جسمي وصار وجهي كدام وجها ابتسمتلها كلتلها شبيها بنيتي شنو الي متعبها ومضوجها
.
.
جنى: داومت بالمعهد وجنت كلش فرحانة لان اول مرة ارجع اعيش اجواء الدراسة ووياي طالبات مثل عمري واكو اصغر واكو اكبر هم خارجي وداخلت معاهد تقوية
.
.
بالفترة الاخيرة صرت احس نفسي اتعب بسرعة بس توقعت بسبب المعهد والدراسة وما خليت التعب يكسر ثقتي بنفسي لو يمنعني من الدراسة
.
.
ومصطفى فعلا كبر بعيني من وكف وياي بهالفترة وما ضغط علي رغم شوقو الي وشوقي الو بس ما ضغط علي ابد وجانت راحتي عندو فوك راحتو هو
.
.
الى ان اجى يوم من الايام رحت للمعهد وجنت كاعدة اتابع المحاظرة والوضع طبيعي فجأة حسيت بنغزات ببطني مثل المغص تجاهلتو وكملت وبدا يزيد الوجع وكل شوية اكول هسا يروح بس صار الالم ما ينطاق
.
.
رفعت ايدي واستأذنت من المدرس كلتلو بطني كلش توجعني واريد اطلع وكال براحتج كمت وشلت كتبي اريد اطلع بس من وكفت كأنو سجينة دخلت ببطني ومن قوة الالم صرخت ومدري شصار بعدها
.
.
من كعدت لكيت نفسي بالمستشفى ووحدة من المدرسات وياي كلتلها شصاير كالت الله يعوضج بنيتي جنتي حامل بس الجنين سقط
.
.
ومن كالتلي هيج من صدك دمرت نفسيتي ومو لان سقط الطفل لا حسيت ان اني قتلتو لان جنت اداوم وهو من التعب اكيد ما تحمل ومات
.
.
يعني اني قتلت ابني قبل ما يجي عالدنيا تركتني وطلعت واني نفسيتي صارت تحت الصفر لحد ما اجى مصطفى وحجى وياي
.
.
من شفت عيونو وانو حرمتهن من شوفة ابنو اريد امسك دموعي ماكدر انفجرت بالبجي وهو مستغرب من وضعي اخير شي مسك راسي ومسح دموعي
.
.
مصطفى: اروحلج فدوة بس فهميني شصاير وياج
جنى: قتلت ابني وابنك
مصطفى: باستغراب .. شنو من ابن
.
.
جنى: بعبرة والم .. جنت حامل والطفل سقط
مصطفى: وشنو السبب
جنى: ما سألتهم بس اكيد من التعب
.
.
مصطفى: خلص بنيتي الله انطاه والله اخذو وقسمتو هاي واحنا بعدنا باول عمرنا إن شاء الله ربنا يرزقنا بالاحسن منو ولا تشيلين هم ماطول الله موجود
.
.
جنى: إن شاء الله
مصطفى: الله يخليج الي ولا يحرمني منج
جنى: ولا يحرمني منك يا روحي انت
.
.
من حجى وياي رغم انو كلامو كلش حلو ومثل البلسم عالجرح بس اني مشكلتي انو ضميري يأنبني جان مصطفى يمي واجو كاضم وشاهين وتحمدولي بالسلامة وسألوني شكو
.
.
مصطفى كال هسا اطلع واحجيلكم وعافونا وطلعو وهو طلع وراهم وبقيت افكر بمصطفى وبدراستي وبالطفل الي راح تقريبا ربع ساعة واجت الدكتورة ودخل وياها مصطفى
.
.
كالت انت زوجها كاللها اي كالت هالكم يوم خلوها ترتاح ولا تتعب نفسها وانت ممنوع تتقرب منها وعندها العافية وتكدر تاخذها وخلي تهتم باكلها وبراحتها
.
.
تشكر منها مصطفى ودز شاهين يسجلي خروج وسندني واخذني للبيت البنات والحجية ماجانن يعرفن شكو اول ما دخلت انصدمن انو مصطفى ساندني ومبين علي التعب والوجع
.
.
كال مصطفى هسا ارجع واحجيلكم واخذني لغرفتي مددني بالسرير وغطاني وعافي وراح
.
.
مصطفى: شفتها كلش ضايجة كلت يومين ثلاثة وتنسى والحمدلله مو صاير لان لو صاير جان تعلقت بيه وفقدانو راح يدمرها بس ماطول مو متعلقة بيه راح تنساه
.
.
نزلت تحت وحجيت لامي وكالت هاي قسمتو والحمدلله هي بخير وما صارلها شي ووصيت البنات يديرن بالهن عليها لحد ما تتحسن وتكدر ترجع لدوامها
.
.
وخابرت اهلها انطيتهم خبر وعلي كال راج نجي كلتلو اذا تجي زيارة كل الهلا بيك واذا علمودها ما يحتاج بس تكعد اخليها تحجي وياكم وطمنتو انها بخير
.
.
بس بقى قلقان لان مهما كان ينشغل بالو على بنتو كضيت النهار طبيعي ومرن يومين بدون احداث وثالث يوم جنت كاعد بالمضيف وتفاجئت بدخول السيد علي ومن شافوه اخواني تخبلو لان ما يدرون بيه راجع
.
.
جنى: كعدت العصر لكيت اماني يمي كالتلي مصطفى يكول خلي تخابر اهلها تطمنهم عليها وانطتني تيلفوني خابرت ماما وطمنتها هي وبابا وتأكدو اني بخير وسكرو
.
.
وبعدها اخذتني اماني ونزلنا تحت كعدت يم الحجية وراحت اماني تحطلي غدا ولاحظت الحجية انو اني ضايجة كالتلي شبيج يمة ليش هيج ضايجة كلتلها ماكو شي
.
.
الحجية: احجيلي ليش وضعج مو طبيعي
جنى: اني قتلت الجنين
الحجية: شلون انتي قتلتيه
.
.
جنى: اكيد من التعب مات
الحجية: انتي مؤمنة بالله لو لا
جنى: اي اكيد
.
.
الحجية: وهذا كلام وحدة مؤمنة بالله
جنى: بس مو كادرة اتجاهل التفكير بالموضوع
.
.
الحجية: قريتي قصة الخضر من اجى على نبي الله موسى عليه السلام
جنى: لا
.
.
الحجية: بيوم من الايام بني اسرائيل سألو نبيهم موسى منو اكثر شخص علم فكاللهم انا فربنا خلاه يروح لمكان يلكي بيه رجل عندو علم اكثر من علم موسى
.
.
فراح موسى ووياه فتى اسمو يوشع بن نون فكال موسى ليوشع راح ابقى امشي بالطريق لحد ما اصل ملتقى البحرين او امشي لحد ما الكي العبد الصالح
.
.
فمن وصلو مجمع البحرين استراحو على صخرة وجان عند الصخرة نهر صغير والنهر هذا يحيي الكأئن الميت فوصل الماي للحوت الي ماخذينو موسى ويوشع علمود ياكلونو من يجوعون ورجع الحوت للحياة وراح بالبحر
.
.
ونسى يوشع انو يكول لموسى وكملو طريقهم فمن كملو طريقهم وابتعدو عن المكان طلب موسى من يوشع انو ينطيه الحوت علمود ياكلوه
.
.
فكالو نسيت اكلك انو رجع للحياة وما انساني انو اخبرك الا الشيطان فكالو موسى هاي علامة مكان العبد الصالح فمن رجعو لكو الخضر عليه السلام الي هو نبي من انبياء الله
.
.
وطلب منو موسى ان يتبعو فوافق الخضر ان يتبعو موسى بس ما يسأل عن اي شي يشوفو وموسى وافق وانطلقو بطريقهم
.
.
ومن وصلو لساحل البحر ركبو بسفينة فضربها الخضر وكسر الخشب ومن سألو موسى كال انت كلت ما اسأل وسكت موسى
.
.
وبعد ما عبرو البحر شافو طفل وقتلو الخضر وموسى تعجب انو ليش يقتل طفل بريئ فكالو الخضر انت كلت ما اسأل فسكت موسى
.
.
ووصلو لقرية وطلبو من اهل القرية اكل وما انطوهم وهم يمشون بالقرية شافو حايط يريد يوكع فعدلو الخضر فكالو موسى ليش عدلتو واهل القرية ما قبلو ينطونا اكل
.
.
فكال راح افارقك بس راح احجيلك الي سويتو السفينة كسرتها لان جانت لفقراء وجان بمدينتهم ملك ياخذ السفن الي تعجبو غصب عن اصحابها ولان كسرتها ماراح ياخذها
.
.
والطفل قتلتو لان ربي راد ان يرزق ابوه وامو بطفل احسن منو واكثر منو ايمان وبر والحايط ليتاما واكو تحت الحايط كنز الهم من ابوهم فعدلتو علمود من يكبرون يطلعون الكنز ويستعملوه
.
.
فمن هاي القصة ربنا يوضحلنا انو مهما ضنينا ان اكو سوء بالاحداث فلازم ما ننسى ان اكو رب يدبر الامور من عندو وهو يختارلنا الشي الي يفيدنا ويبعد عننا الشي الي يضرنا
.
.
فانتي لا تحملين نفسج المسؤولية يجوز ربنا اخذو منج علمود يختبرج او يعوضج بطفل احسن منو فكولي الحمدلله وتجاهلي الي صار
.
.
جنى: من حجتلي هيج صدك قنعتني وكلت الحمدلله الذي لا يحمد على مكروه سواه واكيد لله غاية بيها وهو اعلم بالي يفيدني والي يضرني واني راضية بقدرو
.
.
انداريت شفت اماني جايبة الاكل ومنزلتو ومندمجة بالقصة ضحكت كلتلها كواج الله يابة همزين خلصت القصة جان بقيت لباجر جوعانة وما ادري بيج
.
.
وضحكت هي والحجية وبلشت اكل واقتنعت ان الطفل هاي قسمتو وكلت لازم انساه واحاول ارجع لحياتي واهتم بنفسي ومصطفى ونسى الي صار كلو
.
.
كاضم: شعندك جاي هنا
مصطفى: اتركو كاضم
كاضم: شنو اتركو كل عقلك مصطفى
.
.
مصطفى: بعصبية .. كاضممممم اني شكلت
السيد: شلونك شيخنا
مصطفى: حياك الله تفضل
.
.
السيد: يزيد فضلك جايك بموضوع ومو مطول
مصطفى: تفضل بشنو اكدر افيدك
السيد: هالمرة اني الي راح افيدك
.
.
مصطفى: بشنو تفيدني
السيد: طلع اوراق من جيبو .. تفضل
مصطفى: شنو هذا
السيد: هاي معلومات عن الاشخاص الي اعترضو طريقك
.
.
مصطفى: فتحت الاوراق بيها صور الي اعترضو طريقي وتحت كل صورة مكتوب اسم الشخص وعمرو ومعلومات عندو وبالاخير محطوطة صورة ابو اسراء
.
.
السيد: قبل ما تسأل راح اكلك هو ماكو غيرو
مصطفى: شعرفك
السيد: شوف الورقة الثانية 
.
.
مصطفى: شفتها صورة موقع والاشارة على بيت ابو اسراء
السيد: هذا موقع الاتصال الي وصل الاشخاص
مصطفى: وليش تسوي هيج شي
.
.
السيد: حبيت افيدك قبل ما اسافر
مصطفى: ومنو يكول المعلومات هاي صحيحة
السيد: اكو مقولة تكول ما تصفى الا تنلاص سامعها
.
.
مصطفى: اي سامعها بس شلون تنلاص وشلون تصفى
السيد: جيب ابو اسراء هنا واسألو
مصطفى: ومتوقع راح يعترف
.
.
السيد: حطو كدام الامر الواقع وسوي نفسك انت جايب هاي المعلومات ومتأكد منهن ومن يشوف ماكو مهرب
يعترف
.
.
مصطفى: وشلون كدرت تجيب هالمعلومات
السيد: مو بس انت قوي يا مصطفى ومن طلعت خارج العراق لا عبالك خايف منك بس سويت هالشي لان شفت طلعتي احسن الي والك ولجنى
.
.
مصطفى: بنفاذ صبر .. لا تجيب طاري زوجتي على لسانك
السيد: ما اعتقد غلطت بحقها ودا اكلك هيج لن اعرف وجودي راح يسببلها خوف لهذا ابتعدت
.
.
مصطفى: تمام
السيد: اني استرخص وصدك باجر اني مسافر
مصطفى: مرخوص
.
.
من طلع من يمي باوعولي كاضم وشاهين باستغراب كلتلهم شنو رايكم
.
.
شاهين: والله يخوي دوخني بكلامو
كاضم: اني اشوف حجيو صحيح
مصطفى: شلون يعني
.
.
كاضم جيب ابو اسراء
مصطفى: واذا طلع جذاب
كاضم: اذا يريد يجذب ما يجي لهنا ووياه صور الاشخاص الي تعرضولك
.
.
مصطفى: بس لا تنسى هو جان شريك ويا ابو اسراء من قبل
كاضم: انت دا تكول جان مو هسا
مصطفى: لعد روح جيب عمامي وجيب ومر على ابو اسراء كلو مصطفى يريدك
.
.
كاضم: تمام .. عافنا وراح
شاهين: شتتوقع
مصطفى: والله كلشي يطلع من ابو اسراء
.
.
شاهين: بس صعبة يعيدها بعد ما صارت ذيج السالفة
مصطفى: العوج ما يتعدل
شاهين: الما يتعدل نذبو
مصطفى: وهو كذلك
.
.
ورا ما راح كاضم بنص ساعة اجو هو وعمامي ولحكهم ابو اسراء بس كال السلام عليكم وكعد رديت السلام وكلتلو تفضل ابو اسراء وذبيتو الاوراق الي جابهن السيد
.
.
ابو اسراء: شنو ذني
مصطفى: شوفهن
عمي: احجيلنا مصطفى شكو
.
.
مصطفى: عمي كدامكم اني كلت ذيج المرة اذا تعرضلي ابو اسراء او تعرض لاحد من اهلي راح انفيه من العشيرة وابو اسراء ما نفذ كلمتو ودز رجال تعرضولي اني وجنى
.
.
عمي: افه ليش يا ابو اسراء
ابو اسراء: اني ما دخلني
مصطفى: وهاي المعلومات شنو
.
.
ابو اسراء: اني شعرفني
مصطفى: شوف الاتصال طالع من بيتك
ابو اسراء: جذب لان ما اتصلت من بيتي
مصطفى: لعد من وين اتصلت
.
.
من كلتلو هيج حس انو اعترف بدون ما يدري يعني كشف نفسو بنفسو وبقى ساكت مو مستوعب انو اعترف كلتلو اي صححلي منين اتصلت وبقى ساكت
.
.
كلت عمامي كدامكم ابو اسراء خارج عشيرتي ولو اشوف الناس تسوي بيه العجايب اني ما دخلني بيه هو وجهو كلب احمر ومبين بعيونو الخوف والندم
.
.
عمامي كلش ضاجو لان ما يريدون الامور توصل لهالدرجة هاي ومن قررت استرخصو وطلع وياهم ابو اسراء واني عفت المضيف ورجعت للبيت
.
.
قبل ما ادخل البيت اجاني اتصال من رقم غريب جاوبت عليه كالي خلصت كعدتك ومن الصوت عرفتو السيد كلتلو اي تفضل ضحك ضحكة هستيرية
.
.
وكال بالله عليك مو اعترف بنفسو كلتلو شعرفك كال لو كايلك اني سويت هيج علمود يعترف جان ما اقتنعت بكلامي ولذلك خليتو هو يعترفلك بنفسو
.
.
وما يحتاج تشكرني وعود دير بالك منو وهسا في امان الله سكرت منو وكلت والله وطلعت ذكي يا سيد ما توقعتك بهالذكاء هذا بس رغم ذكائك ما كدرت تستمر بلعبتك ضدي وكشفتك بكل سهولة
.
.
.......... يتبع
لايك وتعليق حلو مثلكم
قناة اليوتيوب
https://www.youtube.com/@ahmed_19_98