طيوف الماضي

البارت(2)طيوف_الماضي الكاتب#احمد

معقولة البارت الاول ما يوصل 250 لايك تفاعلو علمود تشجعوني
#طيوف_الماضي
بقلم #احمد
البارت_2
.
.
ابوي يحب ياخذ الامور ببرود ويقرر على مهلو لهذا ما رفض من البداية وثاني احتمال انو يريد ينطي امل لمحمد علمود يتعدل بس بنفس الوقت ما انطى قرار نهائي
.
.
علمود ما يكولون بعدين انت اخلفت بكلامك بقو عل  هالحال لحد ما خلصت التعليلة وراحو وجان عمي مقرر اذا ما وافقنا بالزين ياخذني بالقوة وابوي وهيثم مستحيل يقبلون بهالشي
.
.
جنى: بقيت ويا عمة رؤى حتى امي ما ساعدتها وهي لان شافتني متونسة ويا عمة رؤى ما كالتلي علمود اساعدها عمة لمياء جانت تحجي ويا عمة رؤى
.
.
وعمة رؤى ترد عليها بكلام مختصر ومبين ما تريد تطول بالحديث وياها وترجع تحجي وياي بقيت وياها لحد ما دخلو ابوي وهيثم وعمي علي
.
.
هيثم: قسم بالله يابة حركت اعصابي ببرودك
ابوي: ههههههه ليش
هيثم: ارفض واذا بيهم خير يحجون هو وابوه
.
.
علي: ما يصير هيثم مهما صار هو ابن عمك
هيثم: هذا هم تحسبوه ابن عم
.
.
رؤى: فهمونا شكو
ابوي: (اشر لهيثم)
هيثم: تعاي وياي جنى
.
.
جنى: رحنا للمطبخ وخلاني اسوي عشى وياه وتركنا الكبار يحجون لحالهم جنت مامهتمة لاي شي حتى ماصار عندي فضول اعرف عن شنو يحجون
.
.
سوينا عشى وكعدنا اني وياه ناكل ويكول ضحكنا عليهم وما وديناه واني اضحك على سوالفو من خلصت بديت انظف المطبخ وهو كاعد يحجي وياي لحد ما راحو عمي علي وعمة رؤى
.
.
خلصنا شغل البيت بسرعة اني وامي ورحت نمت ثاني يوم كعدت مطنكرة لان هيثم يروح رحت للمطبخ لكيت امي كاعدة شافتني مطنكرة وضحكت كلتلها لا تضحكين ماما ترا ازاعلج
.
.
امي: ليش تزاعليني
جنى: لان تضحكين علي
امي: ماراح تبطلين هالطنكورة هاي
.
.
جنى: لا
امي: ما بقى هواي لاخوج ويتخرج ويرجع يبقى بالبيت
جنى: ماشي
.
.
جاوبتها واني كوة ماسكة دموعي لا تنزل وقبل ماكو تيلفون وانترنت علمود احجي وياه مثل هسا جان بس الزنكيل عندو تيلفون ارضي
.
.
وحتى التلفزيون جان ممنوع لان صدام منعهن والي يجيب تلفزيون ويوصل الخبر للدولة يجون فورا ياخذوه لهذا جنت اضوج كلش من يروح للجامعة
.
.
هيثم كالعادة كضى يوم السبت وياي بين لعب وسوالف لحد الليل جهز جنطتو والاشياء الي يحتاجهن علمود ثاني يوم يمشي من الصبح
.
.
جان مرات يروح السبت العصر ومرات الاحد من الفجر ثاني يوم كعدت لكيتو رايح للجامعة تريكت ورحت للمدرسة جان الجو بارد كلش بحيث الكاع جامدة من البرد
.
.
جنت من اتنفس يطلع بخار من حلكي او خشمي واني اكيف اسوي نفسي اشرب جكاير والبخار عود دخان ولو ابوي او هيثم يشوفوني اسوي هيج الا يكسرون اصابعي
.
.
رحت لبيت صديقتي وياي بالصف اسمها لينا ودائما اكللها وين عدنان ونضحك سوا جانت حياتي بهاي الفترة هادئة جان همي الوحيد هو تخرج هيثم علمود يرجع يعيش ويانا
.
.
جنت بصف رابع ابتدائي بس جنت شاطرة كلش بسبب توصيات اهلي ودراستنا هم جانت احسن من الوقت الحالي بالف مرة
.
.
مشت الايام ببطئ بايام الاسبوع وبسرعة بعطل نهاية الاسبوع بقينا على هالحالة لحد ما خلص العام الدراسي هيثم تخرج وكال لابوي علمود نحظر حفل التخرج بس ابوي رفض
.
.
وكالو احتفل ويا اصدقائك واحنا يكفينا تخرجك ورفعة راسنا كدام الناس وسوا مثل ما كال ابوي احتفل ويا اصدقائو ومن خلصت الحفلة رجع
.
.
جنت طايرة من الفرح برجعتو ومن وصل ابوي سوالو حفلة صغيرة بمناسبة التخرج جان متخرج من قسم تربية رياضيات يعني مدرس رياضيات
.
.
اني بصغري جنت اكره الرياضيات بس جان يكولي الرياضيات حلو تخليج تفكرين بالسؤال وتبتعدين عن الحل بتوقعاتج وبالاخير يطلع ناتج كلش سهل
.
.
وهي مادة محبوبة من الي يفهموها وبقى يحجيلي هيج لحد ما صدك حبيتها وصارت كلش سهلة مثل ما هو كال بالضبط
.
.
بعد ما تخرج هيثم قرر يشتغل ويا ابوي بالمحلات هم يكضي وقت وهم يطلعلو مصرف واكيد هالمصرف نصو حلويات الي ههههههههه
.
.
جانت اكبر فرحة من يدخل علي بعلاكة الحلويات واكلو اول مرة اشوف حلويات شايلة حلويات وهو يشبع ضحك
.
.
جنا فرحانين بالهدوء الي عايشين بيه بس ما جنا ندري ان القدر راح يزعزع هالهدوء هذا وينقلب كلشي راساً على عقب
.
.
بعد ما بلشت العطلة بفترة ابوي صار عندو شغل بالموصل وامي راحت وياه تجيب ملابس للصيف وابوي كال احتمال نبات هناك عند كرايبنا اذا ما كمل شغلو بنفس اليوم
.
.
ومن راحو بقينا اني وهيثم واستغلينا الفرصة وكضيناها لعب وعلمودي هيثم ماراح للمحل كضيت احلى يومين بحياتي ثاني يوم بالليل جنا ننتظر اهلي يرجعون
.
.
سمعنا صوت اسعاف بالمنطقة وشوية شوية الصوت بصير قريب لحد ما وصلت كدام بيتنا واندك الباب طلع هيثم يشوف واني بقيت انتظر
.
.
شوية ودخلت عمة رؤى تبجي من شفتها كلبي انقبض بس مو فاهمة شي صار صوت كدام بيتنا اسمع واحد كال دخلوهم للبيت وخلي الاسعاف يتوكل
.
.
وسحبتني عمة رؤى لوحدة من الغرف رن باذني صوت هيثم دا يبجي من سمعت صوتو فلتت نفسي من عمة رؤى وطلعت ركض شفتهم نزلو ابوي وامي بالصالة وجانو ميتين
.
.
هيثم كاعد بالزاوية ويبجي عمي علي كاعد على قنفة وحاط راسو على رجليه ويبجي عمتي رؤى بسبب الزلم ماكدرت تطلع جانو مو منتبهيلي
.
.
تقربت من ابوي وانتبهولي الزلم وحاول عمي يسحبني وجنت بس ابعد ايدو بدون كلام كعدت عند بابا مديت ايدي لوجهو تلمست لحيتو ووجهو عبالي كل هذا مقلب
.
.
فتحت عيونو وحاولت اكعدو ما كعد اجى هيثم سبحني كلتلو عوفني هيثم اريد اروح على ماما عوفنيييييي الله يخليك عوفني مشتاقتلها صار يومين مو شايفتها عوفني الله يخليك مامااااااا باباااااا كولو يعوفني بابااااااا
.
.
هيثم: جناوي كافي يا روحي
جنى: عوفني هيثم عوفنيييي ماماااااا عوفني اريد ابوسها الله يخليك هيثم عوفني بابااااا
.
.
جنت احجي بهستيرية صحيح جنت صغيرة بس اعرف شنو موت الزلم الموجودين كلهم جانو يبجون على موقفي بالاخص انهم ماتو ثنينهم
.
.
بقيت ابجي واريد هيثم يعوفني لحد ما فقدت الوعي ورا تقريبا ساعة كعدت لكيت نفسي بغرفة
.
.
طلعت لكيت هيثم وعمي علي وعمة رؤى كاعدين وساكتين الساعة جانت 12 بالليل ولان ليل اجلو الدفنة لثاني يوم كلتلهم وين بابا وماما
.
.
هيثم: تعالي عندي يا روحي
جنى: بصراخ .. ما اجييييي
هيثم: شبيج جنى
جنى: ما دخلك وين ابوي وامي
.
.
عافني وصاحوني عمي علي وعمة رؤى ما اهتميت الهم ورحت ادور اهلي اخير شي عرفتهم بالاستقبال جانو يريدون يمنعوني وانهزمت منهم ودخلت للاستقبال وسكرت الباب
.
.
جانو مغطين وجه امي رفعت الغطى عنها وجها ازرك من شفتها هيج ماعرف شبي صرت اضحك بهستيرية تركت البجي وكمت اضحك بصوت عالي
.
.
هيثم من سمع ضحكي بقى يدفر الباب لحد ما انكسر ودخلو سحبني واني مستمرة بالضحك من طلعني من الاستقبال صار صوتي مختلط بين بجي وضحك
.
.
ومن حركة كلبي اريد بس اسوي شي يبرد كلبي كمت اضرب وجهي وكوة مسك اديني هيثم علمود ما اذي نفسي واني احس كلبي مشتعل نار
.
.
يريدني اسكت ماكو بس اصرخ واريد كلبي يبرد ماكو اريد بس يترك اديني علمود ابرد كلبي بنفسي وما تركني وصوتي ترس الدنيا
.
.
فجاءة سكتت واحس جسمي تشنج واجتني رجفة كلش قوية بحيث حتى هيثم صار يهتز ويا جسمي بعدها فقدت الوعي عزيز وامو على صراخي اجو
.
.
واخذوني هيثم وام عزيز للموصل وبقى عزيز ويا عمي وزوجتو وبسبب المسافة الي بينا وبين الموصل حالتي سأت من وصلنا دخلوني للطوارئ واجى الدكتور فحصني
.
.
وانكلبت الطوارئ بحيث كل الدكاترة الموجودين تجمعو علي اخير شي كالو صاير عدها صدمة كلش قوية وانهيار عصبي حاد وبسبب التأخير راح تدخل بغيبوبة من اسبوع ل 10 ايام
.
.
ولازم من اكعد ما يحاولون يضغطون علي لو يزعلوني لان ممكن تسوء حالتي وانجمعت المصايب فوك هيثم دخلوني لغرفة خاصة وبقو هيثم وام عزيز وياي للصبح
.
.
والصبح رجعو علمود عزاء اهلي وهم وجودهم وياي مثل عدمو صارت الفاتحة عدنا بالبيت وعمي علي وكف ويا هيثم وعمي ناصر وعيلتو مسوين نفوسهم ضيوف كاعدين ولا يشتغلون ولا شي وعمتي رؤى بقت عند النسوان
.
.
هيثم جان يوميا بالساعة 12 يجيني للمستشفى وويا الفجر يرجع للبيت ينام كم ساعة للصبح ويكعد وبقى لحد ما خلصو الناس باليوم الخامس وبقى عمي علي بمكانو وهو اجى يمي
.
.
وجان اذا يريد يسبح لو شي يرجع للبيت يكمل شغلو بسرعة ويرجع عندي باليوم الثامن جان موجود عندي واجى عزيز يتطمن علي وهم يشوف هيثم اذا محتاج شي
.
.
كعد ويا هيثم حجو شوية وكام يريد يطلع من الغرفة وانتبهلي فتحت عيوني جان الضو كلش قوي واحس عيوني تحركني بسببو بقيت افتحهن واسكرهن لحد ما شوية راح الوجع وبديت اشوف شوية شوية
.
.
هيثم: جنى حبيبتي تسمعيني
جنى: وين اني
عزيز: الحمدلله عالسلامة جناوي
.
.
جنى: منو انت
هيثم: باستغراب .. شبيج جنى
جنى: منو هذا
.
.
هيثم: عزيز رحمة لاهلك شوفلنا الدكتور
عزيز: تمام
هيثم: كليلي يوجعج شي لو لا
.
.
جنى: لا ما بي شي ليش جبتوني هنا
هيثم: هسا نرجع للبيت
جنى: وين بابا وماما ليش مو هنا
هيثم: هسا نروح عليهم
.
.
جنى: اجى الدكتور فحصني وكال صاير عدها فقدان بالذاكرة مؤقت كم يوم إن شاء الله وترجع وبعدها راح وسجلي خروج هيثم ورجعنا س جنت مستغربة من عزيز لان ناسيتو
.
.
من وصلنا للبيت راح هو لبيتو ودخلنا لكيت عمي علي وعمة رؤى عدنا وطرت من الفرح سلمت عليهم وبقيت ويا عمى رؤى سألتهم عن ابوي وامي
.
.
كالو صار عدهم شغل بالموصل وراحو كم يوم ويجون واخذتني عمة رؤى ساعدتني علمود اسبح ومشطتلي شعري ونمت
.
.
عمي علي وزوجتو حاولو يقنعون هيثم انو نسكن عندهم علمودي وما وافق كال ما اطلع من بيت ابوي وامي واني مستعد اخدم جنى لحد ما تكبر وتصير مرة وما وافق على اي قرار ثاني وماكدرو يجبروه
.
.
ثاني يوم كعدت احس راسي يوجعني بس ما كلت لهيثم جنت احس هيثم حزين بس ماعرف ليش عمي علي وعمة رؤى جانو يوميا يجون الصبح ويروحون بالليل
.
.
اجت ام عزيز وزارتنا جنت احس اني اعرفها بس ما اتذكرها زين بقت عدنا ساعة تقريبا وراحت مرن يومين ووجع راسي يزيد وهيثم مايكدر يفتح المحل
.
.
من جهة اهلي ماصارلهم ١٠ ايام من توفو ومن جهة اني بس بنفس الوقت لازم يفتحهن علمود يكدر يصرف علي وعلى نفسو باليوم ال 11 بعد وفاة اهلي
.
.
كعدت الصبح مسطورة سطر من وجع راسي وهم اجو علينا عمي علي وزوجتو جنت بالمطبخ حطيتلهم ماي وجبتو
.
.
بالطريق حسيت شي كلش قوي ضربني براسي وماعرف شصار بعدها كعدت لكيت نفسي بالصالة ورجعتلي ذكرياتي كلهن اريد اسيطر على دموعي ماكدر كلت لهيثم مشتاقة لماما
.
.
هيثم: تريدين نزورها يا روحي
جنى: اي فدوة خلي نزورهم
هيثم: يلا كومي لعد لبسي ملابسج خلي نزورهم
.
.
جنى: كمت فورا بدلت ملابسي وطلعنا كلنا وهيثم وصاني انو اكون عاقلة علمود دائما يجيبني واني وافقت علمود يبقى ياخذني واجو ويانا عمي وزوجتو
.
.
من وصلنا المقبرة قرينالهم الفاتحة وكعدت بين قبورهم ودموعي مثل النهر تجري بدون توقف شلون اكمل حياتي بدونهم بعدني صغيرة محتاجة حنان ومحتاجة امي
.
.
انداريت على بابا كلتلو بابا ليش عفتوني يتيمة مو تعرفني احبكم معقولة اهون عليك وتتركني اني وهيثم لحالنا فدوة ارجعلي انت وماما بعدني ما شبعت منكم
.
.
ماما انتي مو تكولين جناوي حبيبة كلبج ليش عفتيني ورحتي وتعرفين بي محتاجتج هواي بقيت احجي بحركة وطلعت كل الي بكلبي واجى هيثم اخذني
.
.
بقيت امشي وكل شوية اندار لقبورهم واتمنى ابقى يمهم بس ما اريد اتعب هيثم وياي صحيح جان عمري 10 سنوات بس عقلي جان اكبر من عمري
.
.
جنت اعرف شنو موت وشنو يتيم واعرف انو ما بقالي بالدنيا بس هيثم وهو ما بقالو غيري لهذا ما اريد اتعبو رجعنا للبيت رحت ركض لغرفة ابوي وامي
.
.
دفنت وجهي بفراشهم وانفجرت بالبجي بقيت ابجي لحد ما نمت ثاني يوم كعدني هيثم الصبح لكيتو مجهز الريوك غسلت وكعدت اتريك وياه
.
.
هيثم: جناوي انتبهيلي
جنى: شنو
هيثم: اني لازم ارجع افتح محلات ابوي واشتغل بيهن
.
.

جنى: تمام بس ليش تكولي
هيثم: اريدج تبقين بعيدة عن الطباخ بغيابي ولا تسوين شي يضوجني منج علمود اكدر اشتغل براحتي
.
.
جنى: تمام مثل ما تريد
هيثم: هسا اني وياج بقينا لبعض لازم نتساعد علمود نكدر نكون عون لبعض ونواجه الحياة سوا ماشي
.
.
جنى: ماشي
هيثم: من اطلع ممنوع تفتحين الباب لاحد عدا عمي علي وعزيز وامو وبالاخص محمد لا تفتحيلو
.
.
جنى: ليش شبيه محمد
هيثم: سوي مثل ما اكولج
جنى: تمام بس منو يسوي غدا
.
.
هيثم: لا تشغلين بالج اني عندي حل
جنى: وشنو هو الحل
هيثم: بعدين تعرفين
جنى: تمام
.
.
خلص ريوك وغسل المواعين وياي وقفل الباب وراح واني بقيت لحالي واحس بملل شوية واجى عمي علي رحت فتحتلو الباب وطبت عمة رؤى وعمي راح
.
.
دخلت داخل وبقيت وياها وكلش فرحت لان اجت علي وكضيت وقت كلش حلو وياها وقبل الغدا بشوية اجى هيثم وما جان يدري بعمة رؤى عندنا
.
.
سوينا الغدا اني وياها واتصل هيثم على عمي واجى تغدينا سوا وهيثم اقترح عليهم يجون يسكنون ويانا بس رفضو شكد حاولنا اني وهيثم بس ما وافقو
.
.
واعتقد بوقتها خافو من كلام الناس انو اجو عندنا علمود غلوس ابوي رغم هم ابد ما يهتمون للفلوس وثنينهم موظفين وحالتهم المادية ممتازة بس الناس ما ترحم
.
.
جان هذا اخر لقاء النا بشكل متواصل بعدها كامو كل كم يوم يجون بالليل يتعللون ويروحون واكثر شي يجون علمودي لان هيثم صار رجال وعمي كال بس تطلع سنوية اهلك تزوج علمود من تطلع يبقى احد عند اختك وكال الله كريم
.
.
مرة من المرات الدنيا جانت نص ليل كعدت على صوت الباب يندك بهمجية طلعت من الغرفة وهيثم كال ابقي لا تطلعين وطلع هو
.
.
باوعت من الشباك فتح الباب وسحب واحد جان عند الباب وزتو بالكاع واجى عزيز عالصوت بس بسبب الظلام ما كدرت اعرف منو الي سحبو
.
.
وصار عندي فضول وماكدرت ابقى نزلت تحت وطلعت من باب المطبخ وانصدمت بالمنظر الي شفتو كدامي وابد ما جنت متوقعتو
.
.
.......... يتبع
لايك وتعليق حلو مثلكم ❤
حطولنا ارائكم وتوقعاتكم ❤