طيوف الماضي

البارت(47) طيوف_الماضي الكاتب#احمد

تصويت ومتابعه لحتى توصلكم باقي البارتات والقصص❤#طيوف_الماضي
بقلم #احمد
البارت_47
.
.
جنى: جنا كاعدين بالصالة نتابع المسلسل واندك الباب بهمجية حتى فزينا كلنا عالصوت
.
.
وطلع بابا يشوف منو وماما تدعي انو يكون خير وما طلعنا لان توقعنا يكون اكو زلمة عند الباب بس سمعنا صوت مرة عالي وتحجي وتدعي عليه وهو يكوللها توكلي بالله شبيج
.
.
وهي مستمرة تحجي عليه وتدعي والي يسمعها يكول ماكلين حلال ابوها وما كفاها الحجي على عمي ما حسينا الا هي داخلة للبيت وصوتها ترس الدنيا
.
.
دخلت علينا ومن شافتني لو شايفة ابليس مو هيج وتكلي الله لا يوفقج لا انتي ولا اهلج الي فطسو مثل الجلاب لو الله راضي عليهم ما فطسو هيج
.
.
هجمتي بيتي وزوجي هسا بالسجن من وراج وابني بسببج صار يشرب علمود يكدر ينساج وهسا فرحانة وتريدين تتزوجين ونسيتي كل الي سويتيه بينا
.
.
واريد اعرف منو هذا الحيوان الي يريد يتزوج وحدة كضت حياتها ك**دة وعربدة والله يعلم كم واحد نايمة بحضنو ومسوية روحج شريفة بروسنا يا ساقطة يا ك**ة ..
.
.
ما تركت كلام ما حجتو واني من جهة ماكدر ارد عليها بوجود ماما وبابا وبنفس الوقت جان كلامها كلش نكس ومستحيل اكدر ارد على هيج كلام
.
.
جانو بابا وبنتها يحاولون يسكتوها وهي انفلتت علينا وثنينهم ماكدرو يسكتوها وماما رغم انها ما تخاف بس من الموقف ما تدري شتسوي واكفة مثلي وصافنة على ام محمد شلون تريد تفك نفسها من بابا
.
.
وما خلت احد بعشيرتنا ما حجت عليه وتجي تلومني لان مخطوفة ونست ان زوجها خطفني او بعبارة اوضح سوت نفسها ناسية .
.
لان تعرف كلش زين ليش انخطفت بس تحاول تخرب فرحتي بعد ما كدرت اخلص منها هي وابنها وزوجها النكس مثلها كوة سحبوها بابا وبنتها طلعوها
.
.
ورغم بنتها جانت مثلها باخر مرة شفتها بس هاي المرة شفت العكس جانت تحاول تحط ايدها على حلك امها علمود تسكتها وتسحبها تريد تطلعها شنو الي مغيرها وشلون ماعرف
.
.
من طلعها بابا رجع وهو يحجي عليها رجعت كعدت بس العصبية صارت عندي الف واحس جسمي كلو يرجف وكل المسبات بجهة وكلامها على اهلي بجهة
.
.
كعد بابا وهو ضايج كال عوفيها جنى الله يعلم شسامعة لو شكد مغثوثة لان ماكدرت تاخذ منج شي وتريد هسا تخرب فرحتج
.
.
بقيت ساكتة وما جاوبت وسويت نفسي رجعت اكمل المسلسل بس جان عايزني شوية وانفجر بس فكرت بيني وبين نفسي كلت هاي ايام فرح الي وتعويض من ربي عالي شفتو
.
.
ومثل ما كال بابا شافت نفسها ماكدرت تاخذ شي من املاك بابا لا هي ولا زوجها وراح ابنها هم وتريد تنقص علي فرحتي بس مستحيل اسمحلها خليني اعيش حياتي شعندي مهتمتلها
.
.
من خلص المسلسل رحت لغرفتي نمت علمود ثاني يوم اكعد من وقت لان راح نروح للسوك نشتري جهاز العرس
.
.
ثاني  يوم كعدت قبل اهلي جان الجو بيه برودة لان بداية شتاء والدنيا فجر اخذتلي دوش وطلعت مشطت ورتبت نفسي وكعدو اهلي وتريكنا ومشينا
.
.
جانو بابا وماما من كدام واني من ورا وهيثم بحضن ماما جنت اشوف الفرح بعيونهم وهم يشوفوني كبرت وصرت عاروس يا ترى يجي يوم واكدر اردلهم ولو جزء بسيط من اهتمامهم بي
.
.
رغم اتمنى انو اردلهم بس دائما ادعي لربي انو ما يحتاجوني لان اذا يحتاجوني راح يكونون بحالة ضعف واني ما اتمنالهم الضعف ابد
.
.
واكثر شي جان مريحني هو وجود هيثم إن شاء راح يكون سندهم وقوتهم من يكبرون كضينا الطريق كلو نحجي شنشتري ومنين نتسوك وماما اقترحت باب الطوب لان هو السوق الرئيسي بالموصل واني وبابا ما عندنا اي اعتراض
.
.
من طبينا الموصل رغم يوم سبت وعطلة بس ازدحامات مو طبيعية وناس رايحة وناس راجعة وبالاخص باب الطوب صايرة ملحمة مو سوق
.
.
بحيث السيارة تمشي متر وتوكف من كثر الناس والسيارات كوة لكينا ساحة وقوف للسيارات ووكف بابا السيارة بيها وكملنا طريقنا مشي
.
.
وجانت الساحة بوسط السوك يعني ما نحتاج السيارة بعد اول شي راح بابا لمكتب علمود يدزلو الفلوس مصطفى مثل ما اتفقو وانتظرناه اني وماما لحد ما رجع
.
.
حط شوية من الفلوس بجنطة ماما ووصاها تنتبه والباقيات حطهن بجيبو وجان لابس بنطلون وكأللها بالازدحام انتبهي لجنطتج
.
.
لان معروف بكل مدينة مهما كانو اهلها زينين الا ما يكون بيها ناس ضعيفة نفس وتبوك وتعيش من الحرام لهذا بابا يريدها تنتبه علمود ما يبوكون الفلوس منها
.
.
بدينا نمشي بالسوك اني وماما ونتسوك وهيثم بقى ويا بابا جان بابا ماسك ايد هيثم ويمشي كدامنا وماما من فرحتها من تشوف شي حلو تسحبني وتترك بابا وهيثم
.
.
ويروحون مسافة وينتبه بابا انو اني وماما مو وياه ويرجع علينا يلكينا واكفات عند محل وجانن كل ما يقربن الفلوس يخلصن ينطي بابا فلوس لماما وهي تحطهن بجنطتها
.
.
ومن صارن الغراض هواي ساعدنا بابا اني وماما ووديناهن للسيارة وجنت كل ما اشتري شي احذفو من القائمة علمود اعرف شنو اخذنا وشنو بقى
.
.
بس بالنسبة للملابس فما جنت محددة شنو اشتري تركت التحديد على ماما اهم شي ملابس مستورات لان شاهين وكاضم عايشين ويانا بنفس البيت
.
.
وماما ما قصرت اخذت ملابس بيت ما ينعدن ووياهن جبب وفساتين وشالات وحجابات من كل الالوان واخذت احذية للطلعات وللبيت بحيث حتى للحمام اخذت
.
.
وعطور اخذت يمكن 5 انواع وكل نوع ثنين وبين القوي والخفيف والدهني وبعدها اجت فقرة المكياج واخذنا بابا لمحل خاص بالمكياج وبيه بنت تبيع
.
.
وبلشت ماما تختار والبنت تساعدها لان تعرف اكثر مني ومن ماما بالمكياج ومن ماما كالتلها جهاز عاروس كالت لعد خلي اجهزلها والي ما يعجبج رجعيه
.
.
وبلشت تشوف ماما انواع المكياج وتحط بحيث ترست علاكتين ترس هاي بس مكياج كلت لماما ذني اجيب مرايات الغرف كلهن علمود اسفطهن عليهن والبنت شبعت ضحك
.
.
وكالت هو العرس مرة بالعمر واذا تاخذين شي ناقص راح تنقهرين وتتندمين كلش فلهذا نصيحة من اخت لاختها مو بس المكياج اي شي يخطر ببالج وتتوقعين نفسج تحتاجيه اخذيه بدون اي تردد
.
.
وكلامها جان مقنع واني بدون ما احد يقنعني مقتنعة مسبقا انو ما اخلي شي بنفسي من كملنا المكياج رحنا لمطعم تغدينا
.
.
والي استغربت منو ان بابا ما دفع حساب الغدا من فلوس المسواك بس لان بمطعم والمكان مو مناسب كلت من نرجع اسألو
.
.
جانت الدنيا عصر وتأخرنا بالغدا لان حبينا نخلص مسواك وبعدها نتغدا وبعد الغدا اخذ بابا ملابس الو هو وماما وهيثم كال ماطول اجينا ناخذ النا هم علمود ما نحتاج ملابس هالفترة
.
.
قبل المغرب بشوية طلعنا من الموصل وبقى بس الجنط الي نحط بيهن الغراض ما بقى الهن مكان وبابا كال نجيبهم من هناك لان هسا تأخر الوقت
.
.
وهم من يجيبهم نسفط الغراض بيهن على كيفنا من نكون بالبيت جان صندوق السيارة مليان علاليك هو ونص المقعد الخلفي ولان مو مسفطات اخذن مكان هواي
.
.
بنص الطريق تعبت وغفيت ما كعدت لحد ما وصلنا البيت ساعدت بابا وماما بالغراض ونمت فورا كعدت بالليل لكيتهم دا  يتعشون تعشيت وياهم وتابعنا المسلسل ومن خلص رجعت نمت
.
.
مصطفى: مرن الايام وبديت احظر للعرس اول شي سويتو طلعت غرفة النوم الي بالغرفة علمود ابدلها وصبغت الغرفة وجانو شاهين وكاضم وياي بكل خطوة
.
.
واجى واحد من ولد عمامي عندو خبرة بالصبغ وسوالي ديكورات بالصبغ وسواها بلاش يكول هدية العرس ومن كملنا طلعت من صدك تحفة
.
.
جان لونها السقف ونص الجدار ابيض والباقي جوزي والجوزي بيه نقشات باللون الابيض والابيض بيه نقشات باللون الجوزي وجنت اريد اسوي النقشات باللون الاسود بس ابن عمي كال يطلعن نشاز ولغيت الفكرة
.
.
وثاني يوم بعد ما نشفت الغرفة ونظفوها اهلي وجهزوها رحت شتريت غرفة نوم جان لونها جوزي وحليبي وموديلها جديد ومنظرها كلش حلو
.
.
وجنت اتمنى ان جنى وياي من اختارها بس ما الها قسمة وإن شاء الله تعجبها اخذتها ونصبتها بالغرفة ومسحوها من التراب وقفلوها علمود تبقى جديدة ليوم العرس
.
.
وكلت بما انو عرس خلي اخذلي ملابس جديدات وقررت ثاني يوم اروح اتسوك وهم باجر جنى تتسوك يعني نتسوك بنفس اليوم
.
.
وتركت تجهيز الفرش والبردة وغيرها على امي وجانو شاهين او كاضم ياخذوها وهم كلتلها تشتري ملابس لجنى وتجهزلها جهاز بسيط
.
.
علمود اذا تكون ناسية شي او اكو شي مو كامل نكون احنا مكملينو وبالنسبة للسيد جبنالو ثنين يحرسوه وجانو على تواصل مستمر ويانا
.
.
وابو اسراء ما شفتو ابد وانقطع من الجية للمضيف نهائيا وزوجتو واسراء ما وصلن بيتنا ابد وشي طبيعي ما يجن
.
.
ثاني يوم الصبح اتصلت على علي وكلي اني رايح للموصل كلتلو يا سوك سمعتو يحجي ويا اهلو وكال باب الطوب كلتلو تمام
.
.
وجهزت نفسي عالسريع واخذت المبلغ ووياه فلوس علمود اتسوك ملابس ولكيتلي مكتب يحول الفلوس واتفقت وياه ان العمولة ياخذهن مني (مبلغ تقريبا 10 دولار حساب التحويل)
.
.
واتصلت على علي انطيتو عنوان المكتب واسمو وانتظرت لحد ما استلمهن ورجعت للسوك اخذت دشاديش وشمغ وملابس كاملة واخذتلي زي عربي خاص للعرس
.
.
وجنت حاس ان زي الافندي (القاط) يطلع علي احلى بس بحكم انو شيخ وراح يحظرون شيوخ عشاير فلازم البس لبس تقليدي
.
.
لان اكو بعض ناس يعتبرون هاللبس مو لائق ان يلبسو شيخ ومن سويت هيج مو قصدي ارضيهم بس علمود ما اسويها وممكن يطلع مو حلو واتورط بيه
.
.
بقيت بالسوك للظهر كملت كلشي ورجعت للبيت كلت لاهلي يسفطوهن بالغرفة وكعدت اتغدا وجانو اهلي متغدين بس اني باقي وجانو شاهين وكاضم كاعدين يمي
.
.
كاضم: اي يابة هي هم حظوظ
مصطفى: حظوظ شنو
كاضم: من تزوجنا اني وهاليتيم (شاهين)محد اشترالنا ملابس
.
.
مصطفى: طلبتو وكلتلكم لا
كاضم: لو تهتملنا جان تذكرت بدون ما نحجيلك
مصطفى: اعذرني والله ماعندي كلب والدة
.
.
شاهين: اني راح اروح ابجي بغرفتي
كاضم: شهد تعالي طلكيني اريد اروح ابجي عند اهلي
شاهين: ههههههههه لعد اني هم اطلب الطلاك
.
.
مصطفى: اي بعد تخبلو ناقصنا احنا
لارا: هاي بدال ما تفرحون لاخوكم
مصطفى: اي والله عاش هاللسان اليعرف يحجي
.
.
لارا وانت عايش
كاضم: شاهين شو لارا واكفة ضدك
شاهين: باوعلها .. اني هيج علمتج
.
.
لارا: لعد شعلمتني
شاهين: باوع لكاضم .. هسا شكوللها
كاضم: كوللها علمتج توكفين وياي
.
.
شاهين: باوعلها .. علمتج توكفين وياي
كاضم: اي عفية هيج اريدك
شاهين: اعجبك
.
.
لارا: لا عيوني علمتني اوكف ويا الحك
كاضم: كللها لا توكفين وياي مهما كان
شاهين: توكفين وياي كان يا مكان
.
.
كاضم: بعد احجيلها قصة ليلى والذئب
شاهين: تمام
كاضم: قسم بالله تجلط حتى الزمال انت
.
.
شاهين: شو ما انجلطت انت
كاضم: لان اني مو زمال
شاهين: هم صحيح
.
.
مصطفى: لان مو زمال بغل
شاهين: ههههههه ردها ان استطعت
كاضم: لا يابة شردها زوجتي تريدني
.
.
مصطفى: عفتهم يحجون ويصنفون وكملت غداي بعدها رحنا سوا للمضيف واجو عمامي وتناقشنا بالعرس وواحد منهم الي اصغر من ابوي كال جيبوها يمي قبل العرس
.
.
كلتلو ايمتى انسب وقت كال قبل العرس بيومين تجيبوها علمود ثاني يوم نسوي ليلة الحنة مثلها مثل باقي البنات وبعدها العرس واتفقنا على هالشي
.
.
كلتلهم اتمنى يجي ابو هيثم علمود يقابل السيد الي حرمو من جنى كل هالسنين كالو هو يدري مسكتو كلتلهم لا كلتلو مسكت الي حاول يخرب العرس
.
.
كالو لعد ما يجي لان اذا يجي الناس يكولون جاي يحظر عرس بنتو وماكو احد يحب يسمع هالكلام بالاخص انو جان العرس معرض للخراب وهواي من الناس سمعو
.
.
(( بالنسبة للي من غير دول بالعرس من عاداتنا ابو العاروس ما يحظر عرس بنتو اكثر شي يسويه هو انو يودعها بيوم العرس وتروح وياها امها او اختها ))
.
.
كلتلهم ما اريد احجيلو اريد اشوف ردة فعلو من يعرف ان الي كدامو هو الي حرمو من بنتو كالو الله كريم حاول وياه وبلكي يقتنع ويجي وياك من تجيبها
.
.
جنى: ثاني يوم كعدت الصبح قفلت الباب ورا بابا وماما ورجعت اكلب بالملابس والغراض لحد ما كعد هيثم ورحت سويت ريوك وتريكت اني وياه
.
.
من اجو بابا وماما طلعو مارين للسوك وجايبين جنط وياهم حطيتهن بالغرفة وتغدينا وبعد الغدا بلشنا اني وماما نسفط بيهن
.
.
حطينا الملابس بجنطة والاحذية والمكياج والعطور بجنطة وبقن زيادة من الملابس حطينهن بجنطة يعني صارن 3 جنط بس كوة اخذن الملابس من كثرهن
.
.
ومرن كم يوم انقطع تواصلي بيهن ويا مصطفى بس جان يتواصل ويا بابا لحد ما بقى 3 ايام للعرس يعني اليوم الي راح يجي بيه مصطفى ياخذني
.
.
واتفقنا اني وامي نروح وياه كعدت من الصبح مادري ليش رغم انو نروح ثاني يوم لان طريق بعيد بس مدري ليش كعدت وماكدرت ارجع انام
.
.
مصطفى: قبل العرس ب 3 ايام وصيت شاهين ينطون خبر للناس بالعرس وما يخلون احد نعرفو ما يعزموه فهمتهم ورحت للموصل علمود اجيب جنى وامها
.
.
وجانت فرحتي ما تعادلها فرحة اول مرة بحياتي افرح هيج فرحة طول الطريق ابتسامتي مالية وجهي وكأنو اني اول او اخر واحد يتزوج من كد ما فرحان
.
.
بس جنت كل ما اتذكر السيد وانو راح يشوفوه اضوج واحس انو راح افتحلهم اكبر جرح بحياتهم بس لازم يعرفوه لان اذا بعدين عرفو انو مسكتو وما انطيتهم خبر ممكن يزعلون
.
.
من وصلتهم جانت الدنيا مغرب استقبلوني مثل كل مرة بالاهلا وسهلا وتعشينا اني وعلي وكلتلو يجي وياي ورفض وحاولت وياه هواي كال لعد اجي بس بشرط ثاني يوم ارجع
.
.
كلتلو مثل ما تريد وبال 9 جنت تعبان كلش وهو عافني انام وراح كعدت ثاني يوم الفجر صليت الفجر وتريكنا اني وياهم واتفقنا نروح بسيارتي
.
.
لان ابو هيثم يتعب بالسياقة وما نحتاج سيارة ثانية وبالرجعة يكدر يرجع بتكسي حطيت الجنط مالت جنى وجنت مفهمهم ان فستان العرس ياخذوه من العمارة احسن
.
.
ومن طلعنا جنى مارفعت عينها بعيني بس جنت حاس انها فرحانة بوجود اهلها وياها وطول الطريق هي منزلة راسها واذا ترفعو تباوع من الجام بحيث ما اجت عيونها بعيوني بالمراية
.
.
قبل ما نوصل اتصلت على شاهين كلتلو اني جاي بالطريق وهو فهم شنو الي اريدو منو ومن وصلنا اخذتهم فورا للمضيف جان فارغ مابيه احد دخلتهم وكلت لشاهين جيبو
.
.
وجابو واحد من الحرس وكعد على ركبو بمسافة قريبة منهم جنى من شافتو خافت وختلت ورا امها وكأنها شايفة جني وهو مثل الي انصدم من شافها
.
.
كلت لعلي ابو هيثم هذا الشخص الي حاول يخرب العرس وجان يتصل عليك بس الي ما تعرفو ان هذا الشخص هو نفسو الي خطف جنى وهو نفسو الي حرمك منها كل هالسنين وهو نفسو الي جان سبب  بضياعها
.
.
شفت علي منصدم وفاتح عيونو على وسعهن ومو مصدك ووجهو وعيونو حمر من العصبية واول مرة بحياتي اشوفو هيج عصبي
.
.
ما حسينا عليه الا سحب السلاح من الحارس وبلمح البصر ضربو طلقة وويا الطلقة اجى صوت صرخة جنى وجانت واكفة كدام علي
.
.
.........يتبع
حطولنا لايك وتعليق علمود يصعد التفاعل ❤