طيوف الماضي

طيوف_الماضي بقلم #احمد البارت(50)

جنى: من طلعنا ركبنا بالسيارات مرة ثانية ورجعنا لبيت اهل مصطفى ومن اول ما مشينا مصطفى كال مو خد حلقوم شامي هي ينزل سكرها واني يصعد عندي السكر
.
.
جان يسوق ويغني وويا كل كلمة منو احس فرحتي تزيد ولاول مرة اشوفو يغني وجان صوتو حلو كلش صرت اسمع الموسيقى من الاغنية والكلمات منو والمغني نسيتو ههههههههه
.
.
من وصلنا البيت نزل قبلي وفتحلي الباب ومسك ايدي علمود انزل صرت احس نفسي شخصية مهمة وتجمعن النسوان وصارت هلاهل وهوسات واخذني دخلني للبيت
.
.
كعدت بالكوشة وبلش الركص بين البنات ووحدة تسحب الثانية وماما جانت كاعدة يمي واحس بطني توجعني من الجوع
.
.
قربت راسي على ماما وكلتلها ماما ترا بطني توجعني من الوجع وخاف ينزل السكر كالت هسا اجيبلج غدا وعافت هيثم يمي وراحت عالحجية علمود تكوللها
.
.
حطيت هيثم بحضني وهو يباوع للبنات اليركصن ويصفك شوية واجت ماما اخذتني لغرفة وحطتلي غدا اني والبنات الي راحن للصالون لان هم تأخرن بالرجعة مثلي اني واماني
.
.
تغدينا وكملنا ورجعت للكوشة وكضينا اليوم بالاحتفالات والاغاني مثل اي عرس عراقي بالليل سمعنا صوت الجوبي بس هالمرة لان اني العاروس ماكدرت اصعد ويا البنات وبقيت تحت
.
.
وتذكرت ذيج المرة من جانت اسراء تتغزل بمصطفى وكلمة الحق تقال لو مصطفى جان يريدها وبعدها شافني وعجبتو وعافها علمودي اكون اني سبب تفرقتها عن مصطفى
.
.
بس مصطفى من البداية مو مفكر بيها وهي لازكة نفسها عليه واكثر من موقف يثبتلها انو هو مو مهتملها بس هي تفشل نفسها وتلزك بيه لزكة
.
.
وهو مثل اي رجال ما يحب البنت الي تلزك نفسها بيه اني رغم جنت احبو بس ما جنت ابينلو هالشي لحد ما هو انكشف حبو بالاتصال الي بقى مفتوح
.
.
سمعت صوت طلق خارج وعرفت الزلم دا يضربون تعبيرا عن فرحهم بعرس مصطفى وهالشي غلط بس هاي عاداتنا من زمان بكل عرس يضربون طلق تعبيرا عن فرحهم
.
.
وبال 9 احس نفسي دخت من التعب واجت ماما كالت يلا خلي ناخذج للغرفة راح يجي مصطفى وهي كالت هيج لو روحي انسحبت اريد اوكف على رجليني ما اكدر من التوتر
.
.
كوة وكفت على رجليني واخذني النسوان للغرفة وطلعن بقت بس ماما والحجية يمي جانن يحجن وياي بس ما اسمع شي من التوتر حتى من باسني البارحة من توترت هيج
.
.
وزاد توتري من سمعت صوت الزلم دا يقترب يعني اجى وما يفصلني عنو سوا ثواني صرت بتفكيري اقنع نفسي واكول شبيج جنى هذا مصطفى مو اي احد علمود تخافين منو هيج بس مو بايدي الموضوع كأنو جايني وحش مو مصطفى
.
.
وخلال ثواني سمعت صوت خطواتو بالغرفة جنت كاعدة والاكليل على راسي ومنزلة وجهي وماعرف ليش فرحتي ما تكتمل
.
.
بوسط توتري من بين كلشي بحياتي ما اجى ببالي بس سيف وتصرفاتو والعيشة الي عشتها هناك حسيت بخوف مو طبيعي رفعت ايدي ترجف رجف مو طبيعي
.
.
شنو صار ماعرف بس الي اعرفو جانو كدامي مصطفى وماما والحجية وصرت ادور ماما بينهم مثل الطفل الضايع
.
.
من اجت عيني بعينها نزلت دمعتي وزتيت نفسي بحضنها وانفجرت بالبجي وهم استغربو من تصرفي كلتلها بصوت متقطع ماما اريد بابا فدوة وبعدها ماعرف شصار
.
.
مصطفى: من وصلنا البيت سوينا احتفال اني وولد عمي واصدقائي الي جانو موجودين وانا من الناس الي اصدقائي جدا قليلين لان ما احب اختلط باحد غريب من جنت صغير وسواء صح ولا غلط ما يهمني اهم شي انو اني مرتاح بالي دا اسويه
.
.
شغلو جوبي وبلشت الدبكة واني اكيد اولهم وجابلي الرشاش كاضم مسكتو بايدي اليمين واليسار ماسك ايد ابن عمي وصرت ارمي بايد وحدة والشباب يشجعون
.
.
وبقينا محتفلين لليل من صارت الساعة 9 كالو لازم نوديك لمرتك ومن اليوم اي شكوى ضدك هي تعاقبك كلت بكلبي انتو شوفو خوفها بعدين احجو
.
.
بس جانو يحجون بشقى واكيد ما تمشيني مرة واني رجال وشيخ عشيرة وصلوني للبيت وتشكرت منهم كلهم ودخلت واحس اريد اتسابق ويا الزمن علمود اوصلها بسرعة
.
.
النسوان جانن بالطابق الثاني اول ما صعدت من الدرج صارت هلاهل بفلس بحيث ما اعرف الصوت منين يجي تجاوزتهن ودخلت للغرفة واجت امها توصيني عليها
.
.
بس ما جنت مركز ويا امها لان من اول ما دخلت اشوفها ترجف وانتبهت من رفعت ايدها ومبينة الرجفة القوية ونفسها صار كلش سريع
.
.
تجاوزتهن ومسكتها من كتوفها ورفعت الاكليل جانت مبينة بيها ملامح الخوف بس ما جان خوف طبيعي جان رعب بكل معنى الكلمة بحيث تحسها محكومة بالاعدام
.
.
ومن حضنت امها بجت وطلبت ابوها وبعدها فقدت رفعت راسها من حضن امها وشفت وجها اصفر عرفت السكر نازل عدها من الخوف وصاير عدها شبه انهيار عصبي بس شغلتو خفيفة
.
.
دزيت على عصير وسكر وجابولياه ووياه خاشوكة وصرت احط بالخاشوكة شوية واحط بحلكها وجبت ماي بللت ايدي ومسحت وجها وكعدت بس خايفة
.
.
كلتلها اهدائي ماكو شي لا تخافين بقت ساكتة وكلت لامها وامي يطلعن وسكرت الباب وراهن رجعت كعدت يمها واخذت ايديها بايدي وباوعت بعيونها
.
.
كلتلها جناوي من اليوم بعد ما اريد اشوف هاي الدموع انتي حاليا صرتي مرة الشيخ يعني مثل ما اني مسؤول عن عشيرة انتي نفسي مسؤولة عنها
.
.
واي شي تحتاجو هاي العشيرة واني ماعرف تكليلي وتساعديني البي طلباتهم فالي اريدو منج هذا خوفج تنسيه اريدج دائما تكونين قوية بوجودي وياج بعد توفيق الله طبعا
.
.
ومن اليوم اني سندج واني امنج وامانج ومستحيل اسمح لبشر يضرج لو يبجيج فلهذا اهدي وكومي هسا توضي وخلي نصليلنا ركعتين ونبدي حياتنا القادمة برضى الله سبحانه وتعالى ومثل ما كلتلج دموعج ما اريد اشوفهن مرة ثانية
.
.
هزتلي براسها وكامت فتحت الكنتور تدور لملابسها كلتلها ملابسج بالجنط وما خليتهم يفتحوهن علمود انتي تسفطيهن على راحتج وراحت للجنط طلعت ملابس وراحت للحمام
.
.
ورجعت بعد شوية ورحت اني هم توضيت وطلعت صرت امام وهي وراي وصلينا ركعتين لوجه الله رفعت ايدي وكلت يارب اجعلها فاتحتة خير علينا اني وجنى
.
.
وارزقنا الذرية الصالحة ووفقنا لكل خير وابعد عننا كل شر واعنا على ذكرك وشكرك وحسن عبادتك اللهم لا تجعل الدنيا تلهينا عن ديننا يارب اللهم صلي وسلم وبارك على خير عبادك محمد وعلى اله وصحبه وسلم تسليما كثيرا
.
.
اندارت وشفت جنى لابسة حرام الصلاة ورافعة ايديها ومن انداريت ابتسمت وكالت امين ابتسمتلها وسحبت راسها وبستها بكصتها وكمت وهي نزعت حرام الصلاة واجت يمي عالسرير
.
.
كلتلها اخيرا الله وفقنا وانجمعنا ويا بعض تدرين احس اني بحلم مو بعلم جنت احجي وهي ساكتة واعرفها خجلانة لان اول يوم وجانت منزلة راسها
.
.
رفعت راسها باصبعي وغركت بنظرات عيونها جان خليط عيونها بين الازرك والاسود مثل البحر بوقت الفجر والبياض الي بعيونها بسبب قلة السهر واستخدام التيلفون صاير مثل الكطن
.
.
تقربت على شفتها واختلطت انفاسي بانفاسها واخذت بوسة منها مثل العطشان ولكى ماي يرويه اندمجت وياها بالبوسة وما عفتها لحد ما احسها اختنكت
.
.
خليتها تاخذ نفس ورجعت بستها مرة ثانية وهاي المرة تفاعلت وياي وخبلتني (خلص سكرو عيونكم كافي 😁🙈) وتم كلشي والحمدلله وتعرفون عشاق وتلاكو بعد طول انتظار بقينا سهرانين للفجر صلينا وبعدها نمنا
.
.
جنى: فقدت الوعي وبعدها كعدت لكيت مصطفى دا يمسح وجهي بماي ومبين بعيونو الخوف ومن طلعن ماما والحجية حجى وياي احس انطاني جرعة قوة كلش جبيرة
.
.
بكلامو حسسني انو فعلا اني لازم اكون قوية علمود اتحمل هالمسؤولية واني اتخذت كلامو بكل حذافيرو وطبقتو علمود اثبتلو انو اني كد هالحمل ويكدر يعتمد علي
.
.
ومن صلينا جان هو يقرا بصوت عالي وهو القران بكل الاصوات حلو بس بذيج اللحضة ماعرف جان صوت مصطفى حلو بالتلاوة ولا اني احسو حلو لان احب مصطفى
.
.
وبالاخص انو دا يقرا كتاب الله يعني افضل كلام موجود عالارض كملت ليلتنا على اكمل وجه وجنت تعبانة كلش بس كل ما اغفي يبوسني مصطفى ويكعدني
.
.
ومن اضوج يكوم يضحك وما نمنا لصلاة الفجر وكلتلو وربي اذا كعدتني هالمرة الا اجمع عليك الناس كلها وضحك واخذني لحظنو وما كعدت لل 10 الصبح على صوت الباب
.
.
كام مصطفى فتحلهم الباب وطبن النسوان يباركن النا وجايبات وياهن الريوك كيمر وكاهي وجاي حار يعني ريوك ملكي هههههه حطن الريوك النا وراحن علمود نتريك براحتنا
.
.
رحت للحمام غسلت وجهي علمود اصحصح ورجعت بلشنا بالريوك باوعلي صفح كال اليوم جوعان كلش البارحة اكو وحدة ما خلتني انام كل ما اغفى تبوسني وتدور انحراف بنص الليل
.
.
فتحت حلكي وباوعتلو كلتلو هذا انت الي جنت تنام كال اي كلتلو وربي انت حتى ابليس مايكدرلك تسوي نفسك بريئ والبزون ياكل عشاك وانت افكارك بس الله يعرفها
.
.
ضحك وكرصني من خدي وكمل اكلو وبعدها بدل ملابسو وسبح بالعطر كمت اخذت العطر من ايدو كلتلو كافي عطر هسا بابا يشم عطرك من الموصل وكفت كدامو وحطيت عطر لنفسي من عطرو وهو حط حنجو على كتفي
.
.
مصطفى: ليش انتي هيج حلوة
جنى: لان متزوجة واحد حلو
مصطفى: بس انتي حلوة من قبل الزواج
.
.
جنى: علمود اتزوج واحد حلو
مصطفى: وهذا الحلو ما يكسر بكلبج
جنى: ليش يكسر بكلبي
.
.
مصطفى: لان يشوفج ويصعد عندو السكر
جنى: هو المطلوب
مصطفى: ليش
.
.
جنى: لان اني عندي هبوط بالسكر فمن يصعد سكرو نتعادل
مصطفى: منو معلمج على هالسوالف الحلوة
جنى: الحلو الي تزوجتو
.
.
مصطفى: اروحلج فدوة انتي والحلو
جنى: فداك كلبي وروحي وعقلي
مصطفى: ترا اريد اطلع يا بنت الناس لا تعذبيني
.
.
جنى: لا اني مستحيل اعذبك
مصطفى: لعد هذا شنو يسموه
جنى: هاي الحرب الباردة علمود تشتاقلي
.
.
باسني من ركبتي بس احس توتري البارحة اختفى حتى من باسني جان الشعور حلو كلش يختلف هواي عن شعوري بليلة الحنة لا حسيت بتوتر ولا رجفة
.
.
عافني بالغرفة وراح اخذتلي دوش علمود يروح عطرو مني لان عطر رجالي ولبست ملابس حلوات وحجاب واخذت مواعين الريوك نزلتهن انطيتهن لاماني ورحت للصالة
.
.
سلمت عالنسوان الي موجودات وكعدت عند ماما وكل ما يجن نسوان بسلمن علي ويكعدن شوية بعدها يروحن واني بس كاعدة ومبتسمة
.
.
وبكلبي اكول الحمدلله ياربي هذا عرسي علمود ما اتبهدل بالشغل والتعب والله يعين البنات عالتعب اليتعبنو من صار وقت الغدا جابو غدا من الزلم
.
.
حطو للنسوان كلهن بالصالة وكعدنا ويا بعض تغدينا وبعد الغدا اخذت تيلفون ماما وخابرت بابا سلمت عليه وتطمنت على اخبارو وبعدها سكرت منو بس جنت كلش مشتاقتلو احس صار سنة مو شايفتو ولا كأنو 3 ايام
.
.
بعد الغدا البنات خلصن شغلهن بسرعة وسون حفلة صغيرة وهالمرة جبرني اكوم اركص وياهن وجانت الحفلة كلش حلوة لان صغيرة وماكو غريب كلهم عمام وكلهم فرحانين بعرسنا اني ومصطفى
.
.
وغياب اسراء جان اكثر شي مخلي الحفلة حلوة واليوم ما شفت مصطفى  لل 11 بالليل من راحو عمامو اجى هو واخواني
.
.
اول شي اجو اخوانو صافحوني وباركولي وكل واحد منهم قدملي هدية تخم ذهب عنهم هم وزوجاتهم والبنات هم جابلي هدية كلادة وبيها حرف G&M يعني حرفي وحرف مصطفى
.
.
مصطفى: شو اني محد ينطيني هدية
كاضم: بالله مو عيب عليك
مصطفى: ليش يابو عيب قابل شكايل اني
.
.
كاضم: شكبرك شكدك تغار من هالطفلة علمود هدية
جنى: هسا هو فتهمنا تلومو اني ليش ترزلت وياه
كاضم: لان انتي زوجتو لازم تترزلين
.
.
جنى: اني صغيرة عمر بس كبيرة قدر
كاضم: قدر فافون لو ستيل ههههههه
جنى: ههههههه مصطفى ترا زعليت
.
.
كاضم: انا اخوك تمشي حبيبتي امشي قبل ما تخسرين زوجج وتصيرين ارملة جادة
مصطفى: اكلك انت ايمتى تلزم لسانك
كاضم: طلع لسانو ومسكو باصبعو .. هاي لزمتو
.
.
جنى: كام مصطفى عليه وهو سحب هند وانهزمو ثنينهم بعدها اخذت تيلفوني من اماني لان جانت تصور بيه ورحنا اني ومصطفى لغرفتنا بدلت ملابسي
.
.
وهو راح اخذلو دوش ورجعلي تمدد يمي واخذني لحضنو وبدا يمسح بايدو على راسي وشعري وسحب شعري حطو على كتفي وعيونو تتجول على وجهي وعيوني
.
.
جنى: مصطفى اريد احجيلك شغلة
مصطفى: شنو هي
جنى: تتذكر فلوس الفصل
.
.
مصطفى: اي شبيهن
جنى: ماراح اخذهن من بابا
مصطفى: وليش تاخذيهن منو
.
.
جنى: هو كال بعد العرس تجون انتي ومصطفى تتغدون عدنا ومن ترجعون تاخذيهن وياج
مصطفى: زين اكو سبب انو ما تاخذيهن
.
.
جنى: اريد بابا يشيلهن لهيثم علمود من يكبر يفتح بيهن مشروع يستفاد منهن او يجوز بابا يحتاجهن
مصطفى: هاي هي مثل ما تريدين
جنى: انت ماعندك مانع مو
.
.
مصطفى: بالعكس ليش امنعج انتي هسا صرتي مسؤوليتي اكلج وشربج ولبسج وكلشي تحتاجيه اني غصب عني البي طلباتج والي تحتاجيه
.
.
والفلوس اذا اخذتيهن راح يبقن بدون لي فايدة لهذا سوي الي يعجبج وكولي لابوج مصطفى ما يقبل اخذهن وعوفهن لهيثم يفيدنو من يكبر وهو راح يعرف يتصرف بيهن
.
.
جنى: صدك التسجيل الخارجي تسجلني هنا لو هناك
مصطفى: لا هناك من نروح اني وياج على اهلج راح اروح اسجلج هناك واسويلج نقل علمود تمتحنين هنا
.
.
جنى: وذكرني اجيب كتبي لان تركتهن هناك
مصطفى: من عيوني بس هسا ما تنطيني اجرتي
جنى: اجرة شنو قابل صاير تشتغل تكسي واني ماعرف
مصطفى: لا اجرة التسجيل الي بيني وبينج
.
.
جنى: اخذ مني بوسة ورجع نفذ الي نفذو اول يوم وصدك مثل ما كال مصطفى صرت احسو امني واماني ومن اكون وياه انعزل عن الدنيا كلها ويبقى بس هو بعقلي
.
.
جان يعاملني بكل حب وحنان ويحسسني انو اني طفلتو المدللة والي ما يسمح لشي انو يأذيني سواء كان صغير او كبير وتصرفاتو هاي واهتمامو جان يخليني احبو اكثر واتعلق بيه اكثر
.
.
وماكو اي بنت تحصل هالحب والحنان وما تحب الشخص الي يقدملها هالشي حتى لو جانت تكرهو من يتصرف هيج راح تتغير نظرتها الو
.
.
وتبدا تميل الو بدون وعي منها لحد ما تلكي نفسها تحبو ومتعلقة بيه وما تتمنى خسارتو بس اني موقفي يختلف لان من البداية حبيتو
.
.
.......... يتبع
لايك وتعليق حلو مثلكم ❤
حساب الواتباد (ahmed_19_98)