طيوف الماضي

البارت(6) طيوف_الماضي الكاتب#احمد

تصويت ومتابعه لحتى توصلكم باقي البارتات والقصص
#طيوف_الماضي
بقلم #احمد
البارت_6
.
.
جنى: من خلص الدوام جان عمي عندو امتحان لصف السادس واحنا درس رياضة وطلعونا للبيت وكالي روحي ويا صديقاتج لان اتأخر عليج
.
.
ورجعت ويا وحدة من صديقاتي بيتها قريب من بيت عمي وهي حبابة واكثر وحدة اختلطت وياها بصفي
.
.
وجنت دا امشي واحجي وياها فجأءة صارت ايد على وجهي وصديقتي صرخت وبدت عيوني تغوش وجسمي يرتخي وبعدها ماعرف شصار
.
.
صحيت جانت الدنيا ظلمة بس من حركة المكان عرفت انو اني بسيارة حمل وجنت مربوطة بكرسي قبل ما التفت اجى واحد من وراي وحط ايدو مرة ثانية على وجهي وجانت بايدو وصلة (قطعة قماش) ورجعت فقدت
.
.
ماعرف شكد مر وقت بعدها صحيت ايديني ورجليني يوجعني من مكان الحبل التفت شفت نفسي ببيت فارغ بس مو مربوطة سحبت نفسي بخوف عالزاوية وكمت ابجي من الرعب الي تسلل لكلبي
.
.
جان البيت عبارة عن غرفتين وصالة وصحيات ومطبخ يعني صغير بس الابواب والشبابيك الخارجيات كلهن لاغينهن وبانينهن
.
.
باقي بس شباك واحد يطل عالحوش ووالباب الي يدخل عالبيت والباقي كلهن مسكرات بقيت انتظر ما اجى احد علي
.
.
جنت ميتة من الجوع بس من الخوف ما اشتهيت اكل اي شي كمت على حيلي وباوعت من الشباك جان البيت داخل حوش جبير نوعا ما وبطارف الحوش غرفة يجي منها صوت اغاني
.
.
ولاحظت ان اكو احد داخلها بس ماعرف منو وخارج الحوش عبارة عن ارض فارغة مابيها اي احد كتبي وجنطتي وياي وبعدني بملابس المدرسة
.
.
رجعت كعدت بالصالة عند كتبي واحس بخوف بس الله يعلم بيه ياربي اني شجابني هنا ومنو خاطفني هسا عمي وعمتي شصار بيهم والله يموتون
.
.
بالاخص عمي علي هسا يبقى يلوم بنفسو لان خلاني ارجع لحالي صارت الدنيا عصر سمعت صوت باب الحوش انفتح وسيارة دخلت ورجع تسكر
.
.
حصرت نفسي بالزاوية وحضنت ركبي من الخوف وبس دموعي تجري واسمع ثنين يحجون خارج بس مو واضح صوتهم مدري من الخوف اني مو كادرة اركز
.
.
وبعدها انفتح باب الصالة وكل ما تقرب خطوات الشخص يزيد الخوف بكلبي وصل للصالة وشافني كلي صح النوم يالغزالة هو كل الغزلان تنام هيج
.
.
اني بقيت ساكتة بس ابجي جان اكو كرسي قريب عليه سحبو وكعد عليه كلي شنو اسم اني بقيت ساكتة
.
.
الشخص: لاخر مرة اسألج شنو اسمج
جنى: بصوت متقطع .. جنى
الشخص: عاشت الاسامي .. شكد عمرج
.
.
جنى: 11
الشخص: اهلج كلهم ماتو مو
جنى: اي
.
.
الشخص: شوفي راح تبقين هنا لفترة البيت بيه اي شي تحتاجيه وانتي تعرفين تطبخين مو
جنى: فدوة رجعني لعمو ما اريد كلشي
.
.
الشخص: راح ترجعين بس مو هسا المهم البيت بيه كلشي تحتاجيه والي ينقصج تكولين للشباب الي خارج ويوصلج كلشي تحتاجيه
.
.
جنى: شتريد مني
الشخص: الي اريد مقابل بقائج لو مقابل تلبية طلباتج
جنى: بقائي اكيد
.
.
الشخص: اريد البيت والمحلات الي ورثتيهن من اخوج بعد ما انقتل
جنى: اخذهن ما اريدهن بس رجعني فدوة
.
.
الشخص: بعصبية .. كلتلج مو هسا لا تدوخيني
جنى: من صاح بي انخلست
.
.
الشخص: ومن اليوم كل ما اجي تستقبليني بالباب والا راح اضطر اسوي شي مو حلو وياج وهسا كومي اكلي ومن اليوم عندج 3 وجبات وكامرة مراقبة المطبخ اذا نقصت وحدة تشاهدي
.
.
جنى: عافني وطلع ومن الخوف ما بقى عقل براسي بقيت كاعدة بمكاني ما تحركت ورا يمكن 10 دقايق انضرب باب الصالة بقوة
.
.
كال كومي سوي سم وتسممي لا اجي اهجم بيتج ومن الخوف رحت ركض للمطبخ لكيت بيه كلشي مواعين كاملة بقوليات وتمن وطحين
.
.
والثلاجة بيها خضراوات ومعلبات والي يشوفو يكول كاعدين هنا عائلة كاملة مو نفر واحد جنت مو مشتهية بس من الخوف كطعتلي طماطاية وحدة واكلتها ويا خبزة ورجعت للصالة
.
.
هو بقى نص ساعة وراح وحتى اسمو ماعرفو بس سببلي رعب وراح بقيت لليل سمعت صوت الشباك يندك رحت عليه شفت واحد من الي كال عليهم
.
.
كلي السيد يكول اني كدام الكامرة 10 دقايق اذا ما اكلت راح اجيها وتركني وراح كلت بكلبي هسا هذا السيد ليش هيج مهتم لاكلي
.
.
رحت سويت عشى واكلت ورجعت للصالة سمعت صوت اغاني عالي بالحوش باوعت من الشباك لكيت الحرس جانو 2 مشغلين اغاني ويركصون
.
.
وجان مبين عليهم سكرانين مثل محمد ابن عمي بس ما تقربو للبيت بقو عند غرفتهم يركصون ويشربون واني اكلني الخوف كل شوية اكول هسا يجون علي
.
.
سكرت الشباك ورحت لوحدة من الغرف وقفلت الباب علي وكعدت عالسرير بقيت كاعدة لحد ما نمت على كعدتي شوية وفزيت شفت الوضع هادئ وصوت الاغاني ماكو شوية امنت
.
.
طلعت من الغرفة وباوعت من الشباب ماكو احد اكيد نايمين رجعت قفلت الغرفة وتمددت عالسرير جنت تعبانة كلش ونمت
.
.
كعدت ثاني يوم على صوت دك الباب وفزيت مثل المخبلة من الخوف وصوت الشخص الي اجاني البارحة يصيحني عدلت ملابسي ورحت فتحتلو الباب
.
.
الشخص: ليش قافلة الباب
جنى: جنت خايفة
الشخص: من منو خايفة
.
.
جنى: من الي خارج
الشخص: لا تخافين محد يكدر يوصلج بس اني
جنى: شلون يعني
.
.
الشخص: يعني الباب بس اني عندي مفتاح الو
جنى: ممكن سؤال
الشخص: قبل السؤال روحي سويلج شي اكليه وسويلي جاي
جنى: تمام
.
.
حسيتو شخص زين ما يخوف فكلت خلي اصير زينة وياه واسمع كلامو بلكي يرجعني لعمي وما يسويلي شي صح خايفة بس مابيدي حل غير انو اسمع كلامو
.
.
سويت جاي للريوك وطلعت جبن وصبيتلو ستكانة وصحتلو لان جان بالصالة كلتلو صبيتلك جاي واجى كعد يمي كال صبيلي بكلاص وطلعتلو كلاص وصبيتلو
.
.
الشخص: اي اسألي
جنى: ليش هيج مهتم باكلي
الشخص: لان ما اريدج تتأذين
.
.
جنى: اذا ما تريدني اتأذة رجعني لعمي
الشخص: ماكدر
جنى: ليش
.
.
الشخص: اذا عفتج هسا راح تتورطين وتورطين عمج وياج لهذا مضطر ابقيج هنا
جنى: ليش اورط عمي
.
.
الشخص: شوفي راح احجيلج الحقيقة اني ما اريد البيت والمحلات الي
جنى: لعد لمنو
.
.
الشخص: لشخص ثاني بس اني راح اخذج انتي
جنى: بخوف .. شلون يعني
الشخص: راح اخذج عندي من نخلص من البيت والمحلات علمود محد يأذيج
.
.
جنى: ليش تاخذني
الشخص: اني رغم دا اسوي شي غلط بس هم عندي احساس وادري بيج يتيمة وصعبة عليج تعيشين وحدج وبالاخص انو بنت لهذا اخذج يجي
.
.
جنى: ليش ما ترجعني لعمي
الشخص: لان اذا رجعتج راح تنخطفين مرة ثانية فاذا اني اعاملج معاملة زينة يجوز المرة الثانية يخلوج تشوفين الموت بعيونج وما تحصليه
.
.
جنى: من كال هيج بين على وجهي الخوف
الشخص: لا تخافين ما اخلي احد يأذيج بس لازم اصبر لحد ما ياخذون المحلات
.
.
جنى: تمام
الشخص: بس اكلي علمود ما ازعل منج
جنى: ماشي
.
.
عافني وطلع وخلاني محتارة بافكاري بس ماعرف ليش رغم هو خاطفني بس احس دا يحميني من شخص يريد يأذني بس بسببو ما يكدر
.
.
من خلصت غسلت المواعين ورجعت للصالة كعدت بيها واني محتارة شنو اسوي لا اكدر ابقى هيج ولا اكدر اطلع من هالمكان
.
.
ومن كال انخطف مرة ثانية خوفني حتى من فكرة الهزيمة منا شوية ورجع كالي اذا تريدين ملابس ترا اكو بالغرفة على قياسج وكلهن جدد مو ملبوسات
.
.
هزيتلو براسي ومن راح دخلت للغرفة دورت بيها لكيت هواي ملابس وكلهن جديدات مثل ما كال بس خفت لا يكون محطوط كامرات لهذا ما بدلت
.
.
من صارت الدنيا ظهر رحت تغديت كلت ما يحتاج اضوجو مني والمغرب هم نفس الشي تعشيت ورجعت للصالة شوية وسمعت صوت اغاني الحراس
.
.
رحت للشباك وشفتهم يركصون بس مو خايفة مثل البارحة لان كالي ما يدخلون عليج واحد منهم شافني واشرتلو علمود يجي وترك صديقو واجى كال محتاجة شي
.
.
كلتلو وين السيد كال هسا نايم باجر يجي كلتلو شنو اسمو كال ما يحتاج تعرفين وراح بس لاحظت من لهجتو انو مو من منطقتنا لان لهجتو تختلف
.
.
وبسبب كلام السيد امنت على نفسي ورجعت قفلت باب الغرفة ونمت ولان نمت من وقت كعدت الدنيا صبح الشمس هسا طالعة والجو بارد ثلج
.
.
دخلت للغرفة الثانية لكيت صوبة ومليانة نفط شغلتها وحطيتها يمي بالغرفة وكعدت يمها وافكر بمصيري شنو راح يصير وياي بعد هالشي وشكد راح ابقى وشصاير بعمي وعمتي
.
.
من شوية ارتفعت الشمس الصوبة جانت ثكيلة وسحبتها سحب اخذتها للمطبخ سويت ريوك ومن البرد كل شوية ارجع ادفي نفسي عند الصوبة وارجع اكمل
.
.
تريكت عالسريع ورجعت كعدت بالصالة والصوبة كدامي شوية واجى السيد دخل سلم علي واخذ الكرسي وكعد
.
.
السيد: شلونج اليوم
جنى: زينة
السيد: ليش مو مبدلة ملابسج
.
.
جنى: ما اريد
السيد: الملابس مو على حجمج
جنى: ماعرف
.
.
السيد: جاوبي عاد بدون لف ودوران
جنى: انت حاط كامرة بالغرفة مو
السيد: لا مو حاط
.
.
جنى: لعد ليش حاط بالمطبخ
السيد: شوفي البيت كلو تكدرين حتى تتفتلين بيه بدون ملابسج ماكو بشر يشوفج بس المطبخ الوحيد بيه كامرة والباقي لا مابيه شي
.
.
جنى: من كال هيج وجهي صار احمر من الخجل
السيد: وحتى ذول الحراس وصيتهم من يجون عليج ما يرفعون البردة الا ترفعيها انتي
.
.
جنى: ليش
السيد: علمود اذا كانت ملابسج مو مناسبة تغيريهن
جنى: ليش تتعامل وياي هاي
.
.
السيد: شبيها معاملتي
جنى: لا تعاملني على اني مخطوفة ولا ترجعني
السيد: المهم انج عايشة ومحد مأذيج
.
.
جنى: تمام
السيد: ولخاطرج راح اوصل خبر لعمج اخليه يعرف انو انت عايشة وبخير علمود يتطمن
.
.
جنى: بفرحة .. صدك والله
السيد: بابتسامة .. اي صدك وهسا ما استاهل كلاص جاي
.
.
جنى: كمت بسرعة صبيتلو جاي اخذ واخذو وطلع خارج يحجي ويا الحرس ويشرب اني رجعت عالصالة كعدت عند الصوبة وصاحني كال تعاي اكعدي عالشمس شوية قبل ما اروح
.
.
طلعت بالطارمة ولاول مرة بعد كم يوم اطلع تحت الشمس كلتلو ممكن اشوف البيت من ورا كال عادي ورحت افتريت ورا البيت
.
.
جان المكان الي البيت موجود بيه عبارة عن منطقة فارغة مابيها اي شي غير هالبيت هذا يعني حتى لو فكرت انهزم ممكن يجيني الليل وتلدغني حية او تهجم على حيوانات مفترسة قبل ما اوصل للناس
.
.
حتى شارع ماكو بس طريق ترابي كلش بعيد يجي منو السيد جانت الكاع بيها عشب قصير لان الدنيا شتاء بس ماجان محاصيل زراعية مثل الحنطة والشعير جان نبات طبيعي
.
.
صفنت عالمكان الموجود ونزلت دموعي بقهر ليش هيج يصير وياي مدا ارتاح بحياتي من مكان لمكان ومن مصيبة لمصيبة ياربي اذا اخطئت فسامحني واذا اختبار منك فساعدني لان مو كادرة اتحمل لحالي
.
.
حسيت اجى السيد مسحت دموعي وسويت نفسي رايحة للاتجاه الاخر علمود ما يشوفني ابجي استكشفت البيت والي حواليه ورجعت داخل وهو قفل الباب وراح
.
.
دخلت للغرفة اخذت ملابس ورحت للحمام رغم هو غريب وخاطفني بس ماعرف ليش صدكت كلامو بسرعة من كال ماكو كامرات بالبيت
.
.
سبحت وطلعت من الحمام ارجف من البرد شغلت الصوبة وكعدت كدامها مشطت شعري عالسريع ولفيتو بشال ولبست قمصلة ام الكبع ولبست الكبع فوك الشال
.
.
وبقيت عند الصوبة ولو ما موجودة الصوبة جان متت من البرد والبيت لان مقفول وماتدخل عليه الشمس صاير بارد كلش
.
.
السيد جان عمرو بال 30 سنة تقريبا بس جان ضخم البنية شعرو اشكر وعيونو زرك يعني اية بالجمال بس لان خاطفني ما جنت احب حتى اباوعلو
.
.
بس جنت احجي وياه طبيعي علمود ما يأذيني التزمت بقوانينو الي هي دائما لبسي محتشم واكلي بوقتو ونوم من وقت وكعدتي من وقت
.
.
ولازم اي شي احتاجو اطلبو واذا عرف ان ناقصني شي ومو كايلتلو يعاقبني بس لان ما صار هالشي ما عرفت شنو عقابو جان كل يوم يجي الصبح يبقى نص ساعة ويروح
.
.
الحرس الي عندو مكضين النهار نوم بس من يجي السيد يكعدون ويكضون الليل شرب وركص وعلى شنو فرحانين ويركصون ماعرف
.
.
وفوكها السيد يدري بيهم يشربون وما يحجي وياهم واكيد هو يجيبلهم المشروب لان هم مدا يروحون بس هو يروح ويجي
.
.
مرة من المرات بقيت كاعدة لل 2 شفت واحد من الحرس جان سكران ومسطور عالاخير اشرتلو واجى كلتلو شنو اسمك جاوبي بس مافهمت عليه
.
.
كلتلو احنا وين هسا كال بالعمارة كلتلو شلون اروح للبيت اشرلي عالاتجاه الي تجي منو سيارة السيد كال منا كلتلو منو الي خطفي ويا السيد رفع كتوفو بمعنى ماعرف
.
.
سألتو عالمفتاح كال ماعندي وتركني وراح واني جنت نعسانة كلش ورحت نمت وادعي ما يتذكر اني حجيت وياه
.
.
بالنسبة للصلاة جنت قاطعتها لان ماعرف ايمتى يأذن ومدري ليش كطعتها ثاني يوم اجاني السيد  كال جيبي البشارة كلتلو شنو من بشارة
.
.
السيد: وصل خبر لعمج انو انتي يمي
جنى: صدك والله
السيد: وهاج هاي رسالة منو
.
.
جنى: اخذتها اريد افتحها
السيد: مو هسا تفتحيها
جنى: ليش
.
.
السيد: من اروح شوفيها
جنى: طيب ليش ما تخليهم يجون هنا
السيد: جنى اني الي علي سويتو اكثر من هالشي ما اسوي
.
.
جنى: شنو يعني
السيد: من اليوم عمامج تنسينهم وحياتج القديمة تنسيها
جنى: ليش
.
.
السيد: لان بس تكبرين راح اتزوجج
جنى: بس اني ما اريد
السيد: اشر عالرسالة .. هاي اخر وسيلة وصل بينكم
.
.
جنى: طلع وتركني فتحت الرسالة مكتوب بيها
.
.
__جناوي يا روحي اني اسف لان وكعتج بهيج مصيبة اتمنى تسامحيني بس الشخص الي خطفج كال انو انتي بامان ومو ناقصج شي وبس تكبرين راح يتزوجج
.
.
يشهد علي الله ان مو راضي عل  هالشي وراح ابقى ادور عليج طول العمر والا ما يجي يوم والكاج بس المهم هسا انو انتي عايشة وبخير
.
.
اريدج تهتمين بنفسج علمود من الكيج تجين وياي مثل ما اخذوج مني يا شمعة بيتنا ومستحيل اتخلى عنج لا اني ولا عمتج واهتمي بصلاتج علمود الله يوفقج ويخلصج منهم
.
.
خلصت الرسالة ودموعي تجري حضنتها وانفجرت بالبجي واحس الرسالة بيها كمية حزن مو طبيعية رفعت رسالة وصحت كل صوتي ياربييييييي
.
.
شوية واندك الشباك وواحد من الحرس يصيح بيج شي كلتلو ماكو شي اتركني لحالي وتركني وراح رجعت حطيت راسي بين رجليني وابجي لحد ما احس راسي انتفخ من صار وقت الغدا ما اكلت والسيد هم ما وصى الحرس على اكلي كلت بعد احسن
.
.
............ يتبع
لايك وتعليق حلو مثلكم ❤
حطولنا ارائكم وتوقعاتكم ❤