طيوف الماضي

البارت(32)طيوف_الماضي الكاتب#احمد

تصويت ومتابعه لحتى توصلكم باقي البارتات والقصص❤
#طيوف_الماضي
بقلم #احمد
البارت_32
.
.
علي: بنفاذ صبر .. البيت ممنوع احد يدخلو بعد اليوم
جنى: ليش بابا
علي: الي عندي كلتو
.
.
جنى: استغربت كلش من تصرف عمي وليش ما يريدني اشوف البيت شنو ممكن يكون صاير بيه وما يريدني اشوفو معقولة احد حاركو لو مسوي بيه شي
.
.
وافقت انو ازور اهلي ومن المقبرة نرجع لبيت عمي وعمتي جانت مثلي محتارة من تصرف عمي بس ما تعرف شنو صاير من اجى وقت النوم رحت نمت وبالي مشغول
.
.
ثاني يوم كعدنا الصبح تريكنا وبدلت ملابسي ورحنا عالمقبرة ومثل كل مرة من اول ما دخلت عالمقبرة اجاني احساس غريب اشتياق على حسرة على حزن على الم ومشاعري متلخبطة
.
.
من وصلت قبورهم كعدت عند قبر هيثم مديت ايدي على حروف اسمو المكتوبة وابتسمت ابتسامة خفيفة ومن تركوني عمي وعمتي لحالي
.
.
كلتلو اختك صارت جبيرة وصارت تحب وتنحب تدري لو موجود مستحيل اكلك هالكلام هذا بس بما انو دائما احجيلك الي يصير وياي حبيت احجيلك هالموضوع ادعيلي انو الله يوفقني وتتحقق امنياتي
.
.
انداريت لبابا وماما كلتلهم انتو الي سويتوه الي بوجودكم كلش كافي وماكدر اعبرلكم عن حبي الكم ووجعي بفقدانكم بس دائما ادعيلكم انو تكون منزلتكم احسن من الدنيا والهم الي بيها تركتهم ورجعت لعمي وعمتي
.
.
علي: يلا خلي نرجع بسرعة لان عندي شغل .. حجاها بتوتر
جنى: بابا اريد اروح لبيت اهلي
علي: احنا شنو اتفقنا
.
.
جنى: مدخلني اريد اروح لبيت اهلي
علي: شنو هاي مدخلني
جنى: يعني مدخلني بالاتفاق اريد اروح
.
.
رؤى: علي احجيلنا البيت شبيه من البارحة وضعك مو طبيعي
علي: البيت مابيه كلشي
رؤى: لعد ليش مصعبها
.
.
علي: شفتي شصار بيها ذيج المرة
رؤى: هالمرة اذا هم تخربطت بعد ما تروحلو لو تنكلب الدنيا
علي: بتوتر تمام
.
.
جنى: رحنا وياه اني وعمتي وجان هيثم بحضني شايلتو وبيتنا مو بعيد عن المقبرة رحنا عليه من وصلنا عمي كال ابقن هنا لا تدخلن بين ما ارجع ودخل لحالو
.
.
باوعت لعمتي باستغراب وهي مثلي مستغربة منو كلتلها شبيه كالت علمي علمج جنا نتتظرو ولفت انتباهي نظرات الناس الي تباوعلنا وكأنو مستغربة من وجودنا
.
.
رغم ان اكثرهم يعرفون اني رجعت لعمي ويعرفون ان الواكفات اني وعمتي رؤى بس ماعرف ليش مستغربين من وجودنا قطع صفنتي صوت عمي من كال ادخلو
.
.
دخلت البيت مثل ذيج المرة من اجينا عليه ماكو شي متغير حتى القفل هو نفسو الي جان مقفول بيه البيت بس فتحو عمي لان دخل قبلنا كاللنا عمي استعجلن
.
.
دخلت جانت اكو مراية بالحمام من جنت صغيرة شفتها مطلعها ماعرف منو وحاطها بالصالة وساندها بالحايط تقربت عليها وحسيت اكو شي وراي التفتت بسرعة ماكو احد وانتبهلي عمي
.
.
كال شكو كلتلو ولا شي صعدت لغرفتي حسيت كلبي مقبوض وكأنو اكو شي كاتم على نفسي وما تحملت ورجعت نزلت كلتلو يلا بابا خلي نروح طلعو كدامي
.
.
واني اريد اطلع من الصالة سمعت صوت خربشة انداريت وشفت اكو شي مثل الخيط مبين بالمراية دا يتحرك تقربت فجأءة انرسمت كدامي بالمراية صورتي واني صغيرة
.
.
من شفتها تجمدت بمكاني من الخوف جانت نسخة مني بس عيونها حمر وتباوعلي بنظرات حادة كلش جنت اريد اتحرك وانهزم بس احس جسمي مربط وكأنو مقيدتني بنظراتها عن الحركة
.
.
ما حسيت الا عيوني تسكرن واول ما عمي كال بسم الله صار صوت صراخ طفلة بالبيت سكرت اذاني من صوتها وصرخت من الخوف
.
.
طلعني عمي خارج البيت وهو يسمي بالله واني ارجف من الخوف قرا اية الكرسي ومع القران شوية هديت
.
.
رؤى: شنو صاير علي شنو هالصراخ
علي: البيت مسكون
رؤى: بسم الله ومن ايمتى
.
.
علي: ماعرف ولهذا ما اريدكم تجون
رؤى: وليش ما حجيت من الاول
علي: ماردت اشغل بالكم
.
.
جنى: جنت شبه معزولة عنهم ومتملكني الرعب بسبب الموقف وماكدر الوم عمي لان اني اصريت اجي بس ما جنت اعرف ان راح يصير هيج وياي واشوف هالشي
.
.
رجعنا عالبيت بس اني انخلست كلمة وحدة ما حجيت طول الطريق ساكتة ومرعوبة واحس نفسي بغير عالم وحتى عمي وعمتي انتبهو علي بس لان بالطريق ما حجو شي
.
.
من وصلنا رحت لغرفتي بدلت ملابسي وكل شوية اندار احس احد وراي ومن خلصت تبديل طلعت ركضت ورحت لعمتي جانت بالصالة كعدت يمها واني خايفة
.
.
رؤى: شبيج جنى
جنى: خايفة
رؤى: شنو شفتي
.
.
جنى: حجبتلها بالتفصيل
رؤى: حجت وياج البنية
جنى: لا
.
.
رؤى: خلص بنيتي انسيه واعتبري شي مصار
جنى: ماما احس احد وراي
رؤى: اقري قران وبالاخص المعوذات واية الكرسي
جنى: تمام
.
.
قريت المعوذات والكرسي سحبت راسي عمتي لحضنها وصارت تمسح عليه وتقرا قران بس ماعرف ليش مدا يروح الخوف وصورة البنت انطبعت براسي
.
.
الخوف الي حسيتو من شفتها ما حسيت بيه بحياتي كلها حتى من انخطفت ومن جنت اشوف الحية ومن انهزمت بسيارة مصطفى ما تشبه هاي الخوفة ابد
.
.
راحت عمتي تسوي الغدا وهيثم كاعد يمي يلعب دا العب وياه واحس كأنو احد نفخ باذني وفزيت فزة كلش قوية حتى هيثم فز بسبب حركتي
.
.
تركتو ورحت لعمتي بس ما حجيتلها وبقيت كل شوية التفت وهي انتبهتلي بس بقت ساكتة اجى عمي وتغدينا وبقيت وياهم لان خايفة اروح للغرفة
.
.
بس بعد ساعة شو هيج لحالي وبدون سبب رحت للغرفة اخذت التيلفون وطلعت رقم مصطفى واتصلت عليه ومدري ليش معصبة عليه
.
.
مصطفى: ثاني يوم كعدت رغم رجعت من جنى بس مرتاح شوية لان رجعت للبيت وارتاحيت بنومي لاول مرة بعد ثلاث ايام متواصلة من النوم المخربط
.
.
تريكت وطلعت للمضيف كضيت وقتي ويا عمامي للظهر ورجعت وشاهين لحد الان زعلان مني تركتو على راحتو وتغديت
.
.
وبعدها طلعت عند النهر اتونس شوية جنت واكف واجاني اتصال من رقم غريب من شفتو زين توقعتو جنى ورديت كلتلها الو
.
.
جنى: وجع يكسر سنونك
مصطفى: باستغراب .. ليش
جنى: مزاجي
.
.
مصطفى: شبيج جنى صاير وياج شي
جنى: مدخلك بي انجب وما اريد اسمع صوتك
مصطفى: لج بابا احترمي الاكبر منج
.
.
جنى: لا احترمك ولا شي هو انت تعالي حيوان
مصطفى: جنننننننننننى
جنى: هههههههه خوفتني دولي
مصطفى: يصير خير
.
.
سكرت منها ورجعت اتصلت على عمها واني دمي يفور
علي: هلا مصطفى
مصطفى: وين انت
.
.
علي: بالبيت
مصطفى: جنى وينها
علي: باستغرب .. موجودة بس ليش
.
.
مصطفى: شبيها اتصلت علي وتتجاوز بكلام اكبر منها
علي: انا اخوك تتجاوز عليك انت
مصطفى: اي تتجاوز علي
.
.
علي: يمعود كل عقلك جنى تسويها
مصطفى: مو هذا رقمها .. ورديتلو الرقم
علي: اي هذا رقمها
.
.
مصطفى: لعد شوف شبيها
علي: تمام خليك وياي عالخط
مصطفى: تمام
.
.
شوية وسمعت صوت الباب من فتحو وحجى ويا جنى بس استغربت من تصرخ عليه وتكلو اطلع برا الغرفة ويحجي وياها وهي تطرد بيه وما مهتمة لكلامو
.
.
واخير شي سمعت صوت راشدي احس دمي فار رغم تجاوزت وتستاهل الراشدي بس طلعت روحي لان ضربها صحتلو اريدو يحجي وياي وهو ملتهي وياها
.
.
واسمعها تصرخ عليه وصوتو هو وزوجتو واني احتركت بنار وراح صوتي واني اصيحو وهو مايرد واريد افهم شصاير وليش جنى صايرة قليلة احترام هيج وتتجاوز على الاكبر منها شوية واجى اخذ التيلفون
.
.
علي: ماعرف شبيها متخبلة
مصطفى: ضربتها مو
علي: اي تستاهل الضربة
.
.
مصطفى: خرب ياخي غير تفهمها بالاول
علي: ليش هي تنطي مجال للواحد
مصطفى: شصار وياها البوم
.
.
علي: اني الغبي اخذتها لبيت اهلها واعرف بيه مسكون
مصطفى: لحضة لحضة شبيه بيت اهلها
علي: مسكون صار فترة
.
.
مصطفى: منو كلك مسكون
علي: الجيران يكولون يسمعون بيه اصوات بالليل
مصطفى: وليش رحتولو
.
.
علي: اصرت تروح وجان الوضع هادئ بس من طلعنا انتبهت انها ما طلعت ورجعت عليها شفتها واكفة كدام المراية بس جانت المراية مابيها انعكاس لجنى
.
.
يعني كأنو جنى مو موجودة وعرفت الوضع مو طبيعي سكرت عيونها وطلعتها وصار صوت صراخ بالبيت ومن رجعت هي مو طبيعية
.
.
مصطفى: خاف صاير بيها تلبس لو شي
علي: ماعرف هسا رايح على شيخ واحجيلو
مصطفى: تمام
.
.
سكرت منو واني محتار ومشغول بالي عليها وانتظر على نار شوية واتصل كال شوية وارجعلك خبر هسا رايحين عالبيت علمود يشوفها وهو يعرف اذا بيها شي لو لا
.
.
رجعت سكرت منو لك دخيل الله شبيها هالبنت من مشكلة لمشكلة بس اريد اعرف شنو مسوية بحياتها وتحلكها كل هالمشاكل وين ما تروح تصيرلها مشكلة
.
.
بقيت يمكن ساعة انتظر بس جانت اسوء ساعة بعمري حسيتها سنة واني انتظر خبر عن محبوبة كلبي واني بعيد عليها وماعرف شبيها ولا اكدر اوصلها اول ما دك تيلفوني جاوبت
.
.
علي: الو
مصطفى: بلهفة .. هلا ابو هيثم طمني
علي: صاير وياها مس
.
.
مصطفى: شلون يعني
علي: يعني مو تلبس بس من شدة الخوف صاير وياها مس
مصطفى: يعني شغلتو بسيطة
.
.
علي: اي الحمدلله شغلتو بسيطة
مصطفى: الحمدلله وهسا شلونها
.
.
علي: هسا بقيتها ويا امها واخذت الشيخ علمود ارجعو لبيتو
مصطفى: من ترجع للبيت خابرني وطمني عنها
علي: إن شاء الله
.
.
جنى: حسيت على نفسي اني بالغرفة ووياي عمي وشيخ جبير بالعمر واستغربت من الوضع شفت الشيخ كال الحمدلله هاي هي ما بيها شي بعد وطلعو هو وعمي
.
.
اجت عمتي باستني وكالت وكفتي كلبي عليج ليش هيج سويتي باوعتلها باستغراب واني مو فاهمة شي من كلامها كلتلها شنو سويت اني
.
.
رؤى: اتصلتي على مصطفى وتجاوزتي عليه بالكلام وصرختي بوجه ابوج ورفعتي صوتج عليه
جنى: باستغراب .. هاي ايمتى
.
.
رؤى: قبل ساعة
جنى: اني سويت هيج
رؤى: اي
.
.
جنى: عزاااااا هسا شيكول علي مصطفى
رؤى: ابوج راح يتصل عليه ويفهمو
جنى: عزاااا شلون فشلة منو ومن بابا
.
.
رؤى: خلص بنيتي الي صار مو ذنبج
جنى: شلون مو ذنبي
.
.
بقيت خجلانة من عمي ومصطفى معقولة اني اتجاوز عليهم ياربي ليش هيج صار وليش هم من دون الكل تجاوزت عليهم وهسا باي عين اباوع بعين بابا
.
.
عافتني عمتي وراحت اني نسيت الي شفتو ببيت اهلي وانشغل بالي بعمي ومصطفى اخذت تيلفوني اخر اتصال مصطفى يبوووو عزا بعينج يا جنى على هالسالفة العوجة السويتيها
.
.
اجى عمي وبقيت بالغرفة بس من سمعت صوت خطواتو قرب على غرفتي احس روحي انسحبت مني اول ما فتح الباب وباوعلي نزلت دموعي من الفشلة
.
.
فتحلي حضنو زتيت التيلفون وركضتلو زتيت نفسي بحضنو وانفجرت بالبجي لفني بحضنو بعدها رفع راسي من حضنو ومسح دموعي وباسني براسي
.
.
وكال الي صار اليوم انسيه واعتبريه ماصار واني اتصلت على مصطفى وفهمتو الموضوع علمود لا يكول جنى تتجاوز علي كلتلو بس اني صحت بوجهك
.
.
كال الي سويتيه ما جنتي تدرين بنفسج لهذا اني مو زعلان منج انتي قطعة من روحي مستحيل ازعل منج مستعد ازعل من نفسي وما ازعل منج
.
.
رجعت حضنتو بكل قوتي وكلتلو الله يخليلياك يا دنيتي انت ما حسيت الا شالني بحضنو واخذني للمطبخ وكمت اضحك من حركتو باوعتلي عمتي كالت عوفي زوجي ترا اغار عليه
.
.
طلعتلها لساني امزح وياها وشبعت ضحك علي هيثم من شافني اضحك ضحك ومد ايدو علمود اشيلو نزلني عمي ورحت شلتو على كتفي
.
.
وكمت اركض بيه بالبيت واني وياها نضحك سوا من كمل العشى كعدت تعشيت وعشيت هيثم وياي من خلصت كلت لعمي بابا ممكن طلب
.
.
علي: شنو بنيتي
جنى: تسمحلي اتصل على مصطفى
علي: ليش
.
.
جنى: اريد اعتذر منو لان حجيت عليه
علي: اني فهمتو الموضوع
جنى: راح ياكلني التفكير
.
.
علي: هو مو زعلان منج
جنى: بس اعتذر منو وهاي هي
علي: تمام
.
.
جنى: ماما انتي تسمحيلي
رؤى: اتصلي اعتذري منو ولا تطولين وياه
جنى: لا ماما بس اعتذر منو واسكر
.
.
رؤى: تمام روحي اتصلي عليه واعتذري منو
جنى: تمام ماما
.
.
رحت طلعت رقمو بس من الفشلة ايدي ترجف رجعت نزلت التيلفون كلت ركزي جنى واحفظي الكلام علمود ما تتخربطين بالكلام وتجفصين الدنيا رجعت اتصلت عليه
.
.
مصطفى: الو
جنى: لا رد
مصطفى: الووو .. جنى تسمعيني
.
.
جنى: اريد احجي بس ماعرف شكول ضاع الكلام كلو من لساني وبقيت ساكتة
مصطفى: بضحكة .. يلا يابة من تريدين تحجين احجي
.
.
جنى: بقيت ساكتة باوعت عبالي يريد يفصلو بس بقى متصل يعني قصدو انو راح ينتظرني لحد ما احجي بعدت التيلفون عني وكلت دحجي شبيج انلصمتي
.
.
مصطفى: والله ما اعرف شبيج انلصمتي دحجي
جنى: ياااااا
مصطفى: ههههههه
.
.
جنى: اسفة اسفة وربي مو قصدي
مصطفى: شنو هي الي مو قصدج
جنى: الي صار العصر
.
.
مصطفى: بربج اني شيخ عشيرة والكل يحسبولي الف حساب وتجين انتي بكد بنتي لو متزوج تحجين علي هيج وتهينيني بهالطريقة ولا خليتيلي تقدير
.
.
جنى: ببجية .. مو قصدي وربي
مصطفى: مع الاسف عليج جنى اني تحجين وياي هيج ولا فكرتي انو اكبر منج وما يصير تحجين هيج وياي
.
.
جنى: توقعت كلشي منو بس ما توقعتو بعدو زعلان لان عمي كال فهمتو الموضوع بقيت ساكتة مصدومة من كلامو وما كدرت اسيطر على دموعي ونزلن
.
.
وكع التيلفون من ايدي وضربت نفسي راشدي كل قوتي واكول كلو مني كلو من تفكيري اني الحيوانة زعلتو وتخبلت كمت اضرب نفسي واحجي على نفسي
.
.
اجت عمتي تركض طبت علي وكوة مسكت ايدي باوعتلها كلتلها ماما زعلان ماما اني هنتو وقللت من احترامو ماما والله مو قصدي ازعلو وربي ما اريدو يزعل فدوة ماما ما اريدو يزعل مني ماما فدوة والله مو قصدي
.
.
كلتلي اهدي كلتلها شلون اهدا ماما زعلان مني ماما الله يخليج كليلو وربي مو قصدي ازعلو حضنتني كالتلي مو زعلان منج دا يتشاقى وياج بنيتي خلص اهدي
.
.
كلتلها ماما هو كالي ضايج مني وزعلان فدوة ماما شسوي ما اريدو يزعل مني كالت اسكتي هسا لا يجي ابوج ويسمعج كلتلها خلي يسمعني اني حيوانة زعلتهم ثنينهم
.
.
.......... يتبع
لا تقراء وترحل كافئ جهودي ولو بكلمة او لايك ❤
حطولنا توقعاتكم للبارت الجاي
بيج الفيسبوك @AS413