طيوف الماضي

البارت (28) طيوف الماضي الكاتب#احمد

تصويت ومتابعه لحتى توصلكم باقي البارتات والقصص❤😁❤
#طيوف_الماضي
بقلم #احمد
البارت_28
.
.
جنى: رحت لغرفتي علمود ادرس وجنت كلش متشوقة علمود اشوف الصور لاماني وهنادي بس صار الي ما جنت متوقعتو اجت عمتي كالت اكو بنت ومرة يصيحوج
.
.
كلتلها منو هي كالت ماعرفها بس تكول هي تعرفج وانتي تعرفيها شلت كتبي وعدلت نفسي ورحت ورا عمتي اول ما شفتها كلت لج هلا
.
.
وركضت وحضنتها وهي اجت ركض حضنتني وبعدها سلمت على امها وتطمنت عليهن وسط استغرب من عمي وعمتي عنهن
.
.
جنى: ماما ذولي ام سيف وميلاد
رؤى: قصدج سيف طليقج
جنى: اي ماما هي نفسها
.
.
رؤى: شرايدة من بنتي
جنى: بحرج .. ماما شبيج
رؤى: اسكتي جنى
.
.
جنى: ماما ترا لوما هي جان اني مو واكفة كدامج
الام: بدموع .. كافي جناوي امج حقها تخاف عليج وفعلا منو اني بالاول والاخير نفر من العائلة الي اذتج
.
.
جنى: ماما فدوة افهميني شبيج
رؤى: ما اريد افهم شي الي شفتو بغيابج ما اتمناه للكافر ما انام اذا ما اشبع بجي عليج شلون اتحمل
.
.
جنى: وما رجعتلج لوما ساعدتني ام سيف بس خليها تحجيلج واذا ما اقتنعتي بحجيها سوي الي تريديه
رؤى: شتحجيلي
.
.
جنى: خالة احجيلها ليش تورطتي ويا ابو سيف
الام: حجتلها كل شي وويا كل كلمة تنزل 10 دموع
.
.
جنى: عمتي من سمعتها جانت حاطة ايدها على حلكها ودموعها تجري وجانت ام سيف تحجي بحركة اخير شي غطت وجها وانفجرت بالبجي
.
.
ومن سوت هيج عمتي زاد بجيها وحضنتها وهدتها واعتذرت منها اخذت ميلاد ورحت اسوي الجاي وتركت عمتي تحجي ويا تم سيف كلت لميلاد احجيلي شلون وضعكم
.
.
ميلاد: الحمدلله احسن بملايين المرات من قبل
جنى: خواتج شلونهن ليش ما اجن
ميلاد: ماما ما قبلت تجيبهن بس اني
.
.
جنى: خطية
ميلاد: لج وربي مشتاقتلج
جنى: تشتاقلج الجنة حبيبتي
.
.
ميلاد: ايمتى رجعتي لعمج
جنى: قبل كم شهر
ميلاد: يعني اول ما مصطفى جابج دز العنوان لماما
.
.
جنى: اي يمكن
ميلاد: وما رحتيلهم بعدها
جنى: لا ما رحتلهم
ميلاد: ايوا
.
.
جنى: ما تزوجن خواتج
ميلاد: ميلان وميار انخطبن لولد خالي ثنين وعلياء ونهال لولد خالتي وبقيت بس اني وجه جحى
.
.
جنى: ههههههه يخرب بيتج لعد الان بخبالاتج
ميلاد: ههههه احسن
جنى: اخوانج وابوج شصار عنهم
.
.
ميلاد: ابوي وسيف انحكمو مؤبد لان جبروج عالزواج من سيف وسعد ورعد انحكمو 25 سنة وعلي طلع
جنى: علي طلع من السجن
.
.
ميلاد: اي لان حسب التقارير طلع لا متعاطي مخدرات مثلهم وجسمو نظيف من الكحول ومابيه ادلة على ممارسة الحرام بالوقت الي عاش هناك
.
.
جنى: معقولة
ميلاد: بالنسبة الي اشوفو بريئ لان جان مختلف عن بقية اخواني وابوي
جنى: ايوا الله يثبتو عالطريق الصحيح
.
.
ميلاد: ومن طلع من السجن اجى عاش قريب من بيت جدي واخذني اني وامي وخواتي عندو ودا يشتغل ويصرف علينا وعايشين ومرتاحين
.
.
جنى: وشلون جدج امن بيه
ميلاد: يووووو صارت سوالف ومعارك علمودو
جنى: احجيلي
.
.
ميلاد: من رحنا من بيت مصطفى تعرفين انتي لقاء امي وخوالي وجدتي وعشنا عند جدي ببيتو وبعدها بفترة اجى علي على جدي وجان جدي ما يعرفو
.
.
ومن حجالو علي منو هو كبت العيطة بينهم وكوة كدرنا نبعد علي عن جدي وجان جدي عصبي وما خلى حجي ما حجاه عن ابوي واخواني ونزل بيهم فشار وطرد علي من البيت
.
.
بس علي ما يأس ورجع مرة ثانية وكل مرة يجي يحاول يفهمهم انو مالو علاقة اخير شي اجى مرة وامي فتحتو الباب وجلب بيها وتوسلها علمود تقنع جدي يسمع منو وامي قنعتو
.
.
واجى على جدي وفهمو ان هو مالو علاقة وكالو لو اني متورط وياهم مستحيل تشوفني وياك وجنت من زمان اريد اجيب خواتي وامي واطلع من ذاك المكان
.
.
بس هالشي جان صعب وممكن اعرض نفسي واعرضهن للقتل واحتمال يصير بيهن اسوء لهذا جنت مخليهن بالبيت بدون ما احد يلمسهن وبقى يحجي لحد ما جدي اقتنع
.
.
ومن كعدنا وياه جدي كالو اذا فكرت بس مجرد تفكير تاخذهن مني مرة ثانية اعتبر نفسك ميت ووين ما تروح راح اكدر اجيبك لان سواة ابوك علمتني شلون ادير بالي من امثالو
.
.
جنى: والله كلبي جان حاسسني انو احسن منهم بس ما شفت هالشي لهذا ما جان احساس تجاهو ثابت
ميلاد: لا حبيبتي احساسج بمحلو
.
.
جنى: منو جابكم
ميلاد: اجينا بتكسي
جنى: بس انتي وامج
.
.
ميلاد: اي لان امي كالت لعلي خاف تصير مشكلة بينك وبين اهل جنى من يشوفوك
جنى:خير ما سوت لان شفتي شصار
.
.
ميلاد: هاي امج لو عمتج
جنى: هاي شبيج مو تعرفيني يتيمة
ميلاد: ولان اعرف احتاريت
.
.
جنى: زوجة عمي واسميها ماما من توفت امي
ميلاد: والله حقها تخاف عليج
جنى: اني وابنها الصغير روحها من الدنيا
ميلاد: ما شفتو
.
.
جنى: رحت ركض جبتلها هيثم وهي تخبلت عليه مثلي  واجى عمي جايب لحم اخذتو منو وكطعتو وطبختو وطول الوقت احجي ويا ميلاد واحس مو حاجية شي
.
.
بعدها جبت التيلفون وشوفتها المكان الي رحنا عليه سفرة وهي فاكة حلكها ومتعجبة منو كلتلها ليش ما تطعلون انتو هم سفرات بمنطقتكم
.
.
ميلاد: ما نكدر لان شغل علي كوة مكفينا
جنى: الله يرزقو لكمة الحلال صعبة
ميلاد: آمين .. اي والله صعبة
.
.
جنى: ماعندج تيلفون
ميلاد: لا تيلفون ولا غيرو
جنى: الي خطبو خواتج زينين
.
.
ميلاد: اي جدي يكول اخلاقهم زينة وموظفين
جنى: شعجب ما تزوجو من قبل
ميلاد: الي خطبو ميلان وميار عمرهم 27 والي خطبو نهال وعلياء عمرهم 25 و26 يعني بداية اعمارهم
.
.
جنى: يعني الي خطبو ميلان وميار توم
ميلاد: اي توم
جنى: الله يرزقج ابن حلال انتي هم
.
.
ميلاد: وانتي ما انخطبتي
جنى: لا وين بعدني
ميلاد: الله كريم
.
.
جنى: سؤال بس لا تزعلين مني
ميلاد: اسألي
جنى: شعجب ولد خالج وخالتج خطبو خواتج
.
.
ميلاد: ماعرف بصراحة
جنى: بس لا تزعلين مني
ميلاد: لا حبيبتي مو زعلانة واعتقد يسوون هيج علمود يواسون امي ولان يعرفون خواتي شريفات ومالهن ذنب
.
.
جنى: الله ينتقم من الي جان السبب
ميلاد: آمين
جنى: ما يخافن يذكروهن بماضي ابوج واخوانج
.
.
ميلاد: جدي كال الي يجيب طاريهم لو يبجي وحدة منهن بسببهم الا اخلي امو تبجي عليه
جنى: والله وعفية من جدج
ميلاد: الله يعافيج
.
.
جنى: تونست كلش وياها بس رغم فرحتها بشوفتي احس اكو نظرة انكسار بعيونها ويمكن لان تشوف عمي مهتم بي عكس ابوها الي دمرها هي وخواتها
.
.
من استوى الغدا جنت اني مكملة الزلاطة والمقبلات الي نحتاجهن بالغدا بقى هيثم عند ميلاد واخذتو تشوفو لامها وعمتي اجت تساعدني علمود نكمل الغدا بسرعة
.
.
عزلنا لعمي لحالو ومن بدت عمتي تقدم الغدا لميلاد وامها اني اخذت حصة عمي وحطيتها الو ورجعت حطينا الغدا النا كلنا ويا بعض وتغدينا وورا الغدا شربنا جاي
.
.
الام: احنا هسا لازم نترخص ورانا طريق طويل
جنى: وين تروحون بعدني ما شفتكم
الام: ماكدر يا روحي كوة قنعت ابوية نجي عليج
.
.
جنى: ابقو اليوم وباجر روحو
الام: ماكدر والله اذا بقينا اليوم هنا باجر من الصبح نلكي ابوية يدور علينا وتعرفين انتي الاسباب
.
.
جنى: تمام لعد ما اكدر اجبرج
رؤى: خابريه وكليلو وابقي 
.
.
الام: إن شاء الله ازوركم غير مرة المهم شفت جنى وتطمنت عليها وعرفت اخبارها
جنى: ربي يطمن بالج دائما
.
.
كملت هي وامها قبل ما يروحن رحت على عمو وسألتو اذا يصير انطيهن فلوس هم يعتبر هدية وهم مساعدة الهن لان وضعهم المادي صعب وكال عادي
.
.
ورحت اخذت من فلوس الفصل مليون وانطيتهن للام ورفضت وشكد حاولت وياها وما وافقت وانا احاول اقنعها وهي قافلة ما توافق تاخذهن
.
.
اخير شي جريت الجنطة الي بايد ميلاد وحطيتهن بيها وقفلت ما اخذهن لو تخرب الدنيا وتشكرتني هي وميلاد واجى ابو التكسي اخذهن وراحن
.
.
وعمتي كالتلي زين ما سويتي لان هن اجن وجايبات هدايا وياهن كلتلها ما شفتهن كالت حطيتهن بغرفتنا دخلنا ودخل ويانا عمي وجابت الهدايا
.
.
جانن علاكتين وحدة بيها دشداشة وشال وحذاء وتخم اكسسوارات بس مو ذهب والثانية بيها حلويات يعني على كد حالتهم
.
.
بس لان من شخص غالي على كلبي جانن عندي يعادلن هدايا الدنيا كلهن وجانن الدشداشة والشال لون رماني غامق كلش والتخم مثل لونهن بالضبط
.
.
لبستهن علمود اجربهن وطلع لونهن ما بياض وجهي كلش حلوات وبالاخص الكلادة والتراجي واكيد ما انسى اطكلي كم صورة بيهن ههههههه ورجعت ضميتهن
.
.
ورحت ساعدت عمتي بالتنظيف وبصراحة كلش فرحت للبنات خطية اخيرا راح يرتاحن بعد الحياة القاسية الي عاشنها ويا ابوهن واخوانهن وطلعت فعلا يا علي بريئ منهم
.
.
الله يثبتك عالطريق الصحيح وتكون سند لخواتك وامك من خلصنا تنظيف رحت اخذتلي دوش ورجعت سويت عشى ويا عمتي وبقيت وياهها هي وعمي وهيثم لوقت النوم ورحت نمت
.
.
مصطفى: من حجت وياي امي علمود اخواني ما حبيت اعارض زواجهم لان اكيد اتمنى اشوفهم متزوجين ومستقرين وكلت الها تخطبلهم من كرايبا
.
.
وكلت اذا صار وخطبتلهم تصير فرصة اني اعزم عم جنى والح عليه انو يجي وبهالحالة هاي تصير عندي فرصة اشوف جنى وهم اخلص من كاضم ومراقبتو الي
.
.
جنت بكل يوم يمر اكول هسا تتصل وشوية وتتصل وانام بخيبة املي وماكدر اتصل اني عليها مرت الايام وامي خطبت لاخواني من عمامي
.
.
وجانو العشيرة كلها تعاتبني انو شلون ازوج اخواني واني ابقى عزابي كلتلهم اني ما اريد اتزوج بالوقت الحالي واكثر واحد جان يحجيلي عالزواج هو ابو اسراء بحيث ما نكعد اذا ما يلومني ويكول كبرت ولازم تتزوج
.
.
ومرة من المرات هم جان كاعد ويانا بالليل وفتح الموضوع وواحد من عمامي عصب عليه وكال يا اخي عوفو براحتو يجوز الرجال ما يريد يتزوج انت لزكتلو عالموضوع ليش
.
.
ابوها: اني شريد منو غير احجي لمصلحتو
عمي: اتركو براحتو مو حجينا وياه وهو قافل
مصطفى: ماصار شي عمي ابو اسراء يحبني لهذا يحجي هيج
.
.
ابوها: اي يشهد الله احبك واريد راحتك
مصطفى: يحبك الله .. إن شاء الله زواجي مو مطول
ابوها: الله كريم .. يلا اني اترخص
.
.
مصطفى: ترانا كاعدين
ابوها: لازم اروح يلا في امان الله .. وراح
مصطفى: في امان الله
.
.
عمي: يا اخي شلزكة هالزلمة
مصطفى: اني لاحظت ملحتو بس ما حبيت اخجلو
عمي: غير يحجي لمصلحتو هو وبنتو مو لمصلحتك
.
.
مصطفى: شلون يعني لمصلحتو
عمي: شنو ما تعرف بالسالفة الي صارت بينو هو وابوك
مصطفى: باستغراب .. سالفة شنو عمي
.
.
عمي: ابوك جان يريد يخطبلك اسراء
مصطفى: منيلك هالحجي عمي مستحيل اخطبها
عمي: واني حجيت هالشي لابوك بس جان مجبور
مصطفى: ليش مجبور
.
.
عمي: لان واصل لابو اسراء حجي ان ابوك يريد يخطبلك اسراء وهو مكيف واجى حجى لابوك وابوك مستحي منو ومو كادر يفشلو وينكر الموضوع
.
.
مصطفى:  وليش اني ماعندي علم
عمي: ابوك جان يريد يعرف اذا ابو اسراء من عندو مطلع الحجي علمود يتصرف وياه
مصطفى: يصير خير
.
.
كل عقلو يحجي هذا اني اعوف جنى علمود اسراء رغم بنت الحلال مو شايفها بس دائما اسمع من امي وخواتي انها صاحبة مشاكل وما تنجرع
.
.
واني مشاكل العشيرة مطلعة روحي انوب اروح الكي مشاكل نسوان كدامي الا انفجر وما ببقى براسي عقل لهذا اشتري راحتي وما اتزوجها
.
.
ثاني يوم كعدت الصبح ونزلت عند امي وسألتها وانطتني نفس جواب عمي ومن تريكت تركتها وطلعت رحت للمزرعة كضيتلي يومين وريحت بالي ورجعت
.
.
جنى: رجعت ادرس واهتم بدراستي عمي وعمتي جانت عاجبتهم فكرة السفرة ويريدون يكرروها بس يخافون لا تخرب وما نتونس مثل اول مرة
.
.
جنت كاعدة مرة من المرات بغرفتي واشتاقيت لمصطفى كلت خلي اشوفلي حجة واتصل عليه وطلعت تيلفوني واريد اتصل واتراجع اخير شي قويت كلبي واتصلت
.
.
مصطفى: هلا جنى
جنى: شلونك مصطفى
مصطفى: الحمدلله وانتي
.
.
جنى: الحمدلله انت بالبيت
مصطفى: لا والله طالع امري
جنى: ما يأمر عليك ظالم بس اتصلت عالبنات وتيلفونهن مغلق
.
.
مصطفى: كولي رايدة منهن شي
جنى: لا بس حبيت احجي وياهن
مصطفى: ايوا عمج وين
.
.
جنى: طالع
مصطفى: ما رجع لوضيفتو
جنى: صدك شو هو ما يداوم
.
.
مصطفى: ههههههه همزين تذكرتي
جنى: شمعرفني نسيت بس ليش ما يداوم
.
.
مصطفى: يكول من سافر ما اخذت اجازة عبالو يرجع بسرعة ولان تأخر وما داوم مدة طولة عاقبوه وفصلوه مدة سنتين ويرجع بعدها لدوامو
جنى: وعمتي هم انفصلت
مصطفى: اي لان غابو سوا
جنى: ايوا لسه ما رجعو وما اعرف ايمتى يرجعون
.
.
مصطفى: الله كريم المهم بس ارجع للبيت انطيج خبر
جنى: تمام مع السلامة
مصطفى: مع السلامة
.
.
جنى: اووووف يهالصوت شكد حلو ادري الله من خلقك ما خلى بيك عيب ابد مكمل من كلشي هيبة وصوت وشكل واخلاق وعصبية وجمال وفوكهن شيخ
.
.
بس اصحي لنفسج جنى شبيج كاتلة نفسج عليه وهو مو معبرج ويجوز حتى يتضايق من اتصالاتج وانتي لازكتلو كل كم يوم متصلة بحجة شكل
.
.
هو شيخ يعني اذا فكر يتزوج اكيد ياخذ بنت شيوخ مو ياخذج انتي صحيح انتي بنت ناس وعالم واهلج ينحلف براسهم بس انتي عشتي حياة مختلفة عن حياة اهلج
.
.
تدنستي بسبب الاماكن الي دخلتيهن فاحلمي على كدج واتركي ذني الافكر انتي زين اذا تزوجتي اصلا وتفكريلي بشيخ عشيرة شكبرها شكدها
.
.
تاليتج يتزوجج فد واحد فكري ويخزي وتوافقين وانتي الممنونة لا والله ما اوافق لو اموت شنو ناقصني علمود اتزوج هيج زواج شنو ذنبي
.
.
كل ذنبي انو عشت حياة ما اختاريتها ولا تمنيتها ذنبي انو انهزمت من حبس لحبس انكس منو اكيد ربي راح يعوضني عن هالحياة لان جنت دائما اعبدو وما خاب ضني بيه
.
.
واكيد كل ذنبي اختبارات وإن شاء الله اكون نجحت بيهن دفنت راسي بالمخدة وانفجرت بالبجي وبقيت ابجي لحد ما مليت
.
.
واخير شي انتبهت لصوت التيلفون يدك شفتو مصطفى مسحت دموعي ورديت عليه وصوتي مبحوح من البجي كلتلو الو
.
.
مصطفى: هلا جنى هسا اني قريب من البيت
جنى: تمام مشكور
مصطفى: شبيه صوتج
.
.
جنى: شربت جاي حار واحترك حلكي
مصطفى: غير تنتبهين يا عيني
جنى: ما ادري بيه هيج حار
.
.
مصطفى: وهسا شلون صار
جنى: احسن
مصطفى الحمدلله .. بعد 5دقايق .. اتصلي عليهن
.
.
جنى: كلتلهن
مصطفى: اي كلتلهن
جنى: يسلمو
.
.
اريد اسكر منو عبالي راح يسكرو وطلع هو ينتظرني اسكرو وسمعتو كام يحجي من سمعتو اديني كامن يرجفن ووكع التيلفون من ايدي  وحطيت ايدي على حلكي من الصدمة
.
.
......... يتبع
لايك وتعليق حلو مثلكم ❤
حطولنا ارائكم وتوقعاتكم ❤
بيج الفيسبوك @AS413