طيوف الماضي

البارت(16) طيوف_الماضي الكاتب#احمد

تصويت ومتابعه لحتى توصلكم باقي البارتات والقصص❤😁
#طيوف_الماضي
بقلم #احمد
البارت_16
.
.
مصطفى: مريت عالمستشفى تطمنت على بنت ابو سجاد وبعدها رجعت للبيت دخلت داخل سلمت على امي وطمنتها وتغدينا اني اخواني وطلعنا
.
.
بعد 5 دقايق
الحجية: ولج يمة هنادي شنو هالصراخ
هنادي: يمة الصراخ خارج البيت ماعرف منو
الحجية: يا ربي سترك شصاير
.
.
طلعت اني واخواني نريد نروح للمضيف وسمعنا صوت ضربات يجي من سيارتي بس صوت خفيف وصلنا عندها جان الصوت يجي من صندوق السيارة
.
.
فتحتو جانت اكو بنية بيه جانت خايفة بشكل مو طبيعي بس حاضنة نفسها وتبجي وتصرخ اني اباوع لشاهين وشاهين يباوع لكاضم وكاضم يباوعلي من الصدمة ما نعرف منين اجت
.
.
كطع صدمتنا سكوتها المفاجئ شفتها فاقدة الوعي وشفايفها بيض عرفتها نازل عدها السكر اخذتها بسرعة حطيتها عالكشن واخذتها للمستشفى
.
.
ولان تأخرت ساءت حالتها من وصلت شلتها بايدي وصحت عالدكتور جابو سدية واخذوها دخلوها لغرفة وشوية وطلعت الدكتورة
.
.
الدكتورة: انت ويا المريضة
مصطفى: اي
.
.
الدكتورة: صاير عدها هبوط حاد بالسكر ولان تأخرت لحد ما جبتها صار عدها هبوط مزمن يعني محتمل باي لحضة ينزل عدها السكر وتفقد الوعي
.
.
مصطفى: تمام دكتورة مشكورة
الدكتورة: العفو وحاول تخليها تاكل سكريات هواي
مصطفى: إن شاء الله
.
.
الساعة 12:45 الظهر
.
.
جنى: سمعنا صوت طلق بس شوية بعيد ولان هواي عرفنا اكو شي صاير الحجي وولدو انخطف لونهم من الخوف
.
.
بعدها بشوية انترست المنطقة سيارات وصار الطلق ما ينوصف والوضع مرعب بشكل مو طبيعي الحجي من الخوف مايكدر يتحرك الوحيد منهم علي طلع ركض يشوف شكو
.
.
اني ختلت بالمطبخ ويا البنات شوية واجت الام كالت جيبي عباتج وتعاي ركض بدون نقاش رحت جبتها ورجعت من طلعنا جانت الدنيا مكلوبة كدام البيت
.
.
اخذتني عند وحدة من السيارات وبدون ما احد بنتبه النا فتحت الصندوق وكالتلي غير هالفرصة ما الج واذا حاولو يرجعوج كليلهم اني ضحية مثل بنتكم
.
.
اريد اركب السيارة شفت واحد بعمر سيف تقريبا دا يحجي ويا الناس ويهدد واجت عيني على واحد سحب سلاحو وقتل الي اغتصب البنت كدامي
.
.
ومنظرو الثاني وهو يرافس وروحو تطلع خبلني واريد اتراجع علمود ما اروح والام دفعتني بسرعة داخل الصندوق وسكرت الصندوق واني تخبلت واصيحها وما ترد
.
.
من صار صوت الطلق مرة ثانية سكرت اذاني واني ابجي ومرعوبة مو بس خايفة من حسيت ان احد ركب بالسيارة سكرت حلكي بايدي علمود ما يطلع صوتي وابجي
.
.
ماعرف شكد مر علي وقت بس اتذكر اخر شي اختنكت وكمت اضرب بالسيارة وشوية وانفتحت وكل الي اجى ببالي انو راح يقتلوني مثل الي اغتصب البنت
.
.
وبدون ما اباوع كلتلو وربي مو اني وربي بريئة وما سويت شي فدوة لا تأذيني الله يخليك وربي بريئة ورب بر... وبعدها ماعرف شصار
.
.
فتحت عيوني لكيت نفسي بالمستشفى ومشكليلي مغذي شوية ودخل علي الشاب الي جان يحجي من شفتو كلبي انترس خوف وجان مبين عليه عصبي كال منو انتي بقيت ساكتة
.
.
كال اذا سألوج كليلهم اسمي هنادي وطلع شوية واجى كال يلا امشي وياي خلي افهم قصتج نزعت المغذي بس الكانونة بقت لان اخاف انزعها وكمت وياه
.
.
جنت امشي واحس رايحة لموتي برجلي ركبت وياه بالسيارة واخذني للبيت جان البيت عبارة عن تحفة فنية مو بيت شكد مو حلو ومرتب
.
.
وكدام البيت اكو غرفة جبيرة ويمها سيارات نزلني عند باب البيت وكال ادخلي عند امي شوية واجي بقيت واكفة وخايفة كال لا تخافين انتي هسا بحماية الله ثم حمايتي
.
.
دخلت داخل جانت اكو مرة جبيرة من شافتني كامت على حيلها استقبلتني وتكلي هلا ومرحبا حياج الله ببيت الشيخ مصطفى
.
.
جنت مثل الجاهل ماعرف شتصرف لو شحجي بس كلتلها شكرا كعدتني وصاحت لوحدة اسمها هنادي كالت جيبي عصير للضيفة اجت بنت بعمري سلمت وضيفتني عصير وراحت
.
.
الحجية: منو انتي يمة
جنى: عندج قران
الحجية: باستغراب .. اي يمة عندي بس ليش
.
.
جنى: ممكن تنطينياه
الحجية: هناديييي يمة جيبيلي القران
هنادي: جاية يمة
.
.
الحجية: انتي الي جنتي بسيارة مصطفى
جنى: اي اني
هنادي: هاج يمة
.
.
الحجية: انطيه للبنت
جنى: اخذتو وخليتو بحظني
الحجية: وهذا هم اجى مصطفى
.
.
مصطفى: السلام عليكم
الكل: عليكم السلام
مصطفى: اي يابة احجيلي منو انتي وشجابج على سيارتي وليش ضامة نفسج بيها
.
.
جنى: امسك القران
مصطفى: انطيني بس ليش
جنى: احلفلي عالقران ما تأذيني
.
.
مصطفى: باستغراب .. ليش اذيج
جنى: احلفلي واني احجيلك
مصطفى: اقسم بالله ما اذيج واذا الج حق اخذو بايدي
.
.
جنى: حجيتلو قصتي من الاول للاخر بس جنت مع كل حرف تطلع شهكة من نص روحي من الالم الي شفتو واريد اسيطر على دموعي ماكدر
.
.
هو جان ساكت بس شفت ملامح العصبية زادت بوجهو وعيونو صارت نظرتهن كلش حادة والحجية على بجيي كامت تبجي
.
.
مصطفى: زوجج اسمو سيف مو
جنى: اي وهو واخوانو وابوه انكس خلق الله
مصطفى: يصير خير
.
.
جنى: تكدر تبلغ الشرطة عليهم
مصطفى: اي اكيد
جنى: لعد بلغهم بس ترا الام والبنات بريئات
.
.
مصطفى: ليش لعد باقيات بهيج مكان
جنى: حجيتلو الضروف وكمية التشدد الي عليهن
مصطفى: منطقتج القديمة شنو اسمها
.
.
جنى: ماعرف
مصطفى: شلون ماتعرفيها
جنى: جان عمري 11 سنة اخر مرة جنت بيها وما جنت مهتمة للاسم كل همي العب وادرس
.
.
مصطفى: تمام يصير خير هسا اترخص اني
جنى: مرخوص
.
.
وهسا خلي اعرفكم على عائلة مصطفى نبدا بالحجية
اسمها ليلى عمرها 50 سنة مرة تخاف الله وايمانها قوي وكلش طيبة وما تسمع منها كلمة تغث
.
.
مصطفى: العمر 30 سنة اعزب لان ابوه جان عندو قرار ان الولد اذا ما يكون كد حمل الزواج ومسؤوليتو ما يتزوج ومن صار عمر مصطفى 29 جان يريد يزوجو وتوفى بازمة قلبية وماكدر يتزوج
.
.
مصطفى طولو بحدود ال 180 جسمو خشن بشرتو بيضة ومايلة شوية للسمار عيونو زرك خريج كلية طب بس ما يشتغل لان صار شيخ من بعد ابوه واهتم بامور العشيرة وعندو املاك خير من الله تغنيه عن الشغل
.
.
شاهين: عمرو 28 وهو الايد اليمين لمصطفى وصديقو اكثر من ما يكون اخوه خريج هندسة ومو متزوج وشبيه جدا بمصطفى بس فرق بالملامح والجسم
.
.
كاضم: او عصفور البيت حسب ما يسموه هو الوجه الضاحك والنكتة المتنقلة ملامحو على امو بس ماخذ الضخامة من ابوه عمرو 24 سنة ووين ما تشوفو ينكت ويضحك
.
.
ومن تكعد وياه مستحيل تبقى ساكت وما تضحك وعلى كد ما هو مو مهتم لمسؤوليات الحياة على كد ما تشوفو رزن وعاقل بالامور الجدية ومن تحتاجو مستحيل يخذلك
.
.
البنات: بعيون الناس بنات وبعيون مصطفى بزازين هههههه اسمائهم هنادي واماني عمرهم 18 بصف سادس اعدادي توم نسخة وحدة
.
.
بكلشي متشابهات بالطول والملامح والشعر والسوالف والنفسية الحلوة بحيث ماتكدر تفرق بينهن شكد ما يتشابهن
.
.
جانن يعشقن شي اسمو مصطفى ومتعلقات بيه مثل تعلقي بهيثم الله يرحمو وبنفس الوقت يخافن منو خوف مو طبيعي من يعصب
.
.
ومن يكون هادئ اول ما يدخل البيت يسأل عنهن ويكول وين بزازين البيت جانت مواصفات بشرتهن بيضة طولهن 160 عيونهن واسعات وخضر مثل عيون امهن
.
.
شعرهن اسود وطويل وماخذات جمال امهن ومن يحجن صوتهن هادئ مو عالي يعني حتى من يعصبن ما تبين عليهن عصبيتهن  شكد مو هادئ صوتهن
.
.
جنى: بعد ما عرفنا عيلتو جنت كاعدة ويا الحجية ومصطفى طلع صاحت الحجية لهنادي كالتلها اخذي جنى حطيلها غدا واذا تريد تسبح انطيها من ملابسج انتي او اماني
.
.
كالت تمام ماما رحت وياها كلتلها اريد اسبح اول شي وارجع لملابسي كالت لا مايصير تعاي لغرفتي والي يعجبج البسيه ضحكت وكالت ولا اكلج تعاي نخبص ملابس اماني
.
.
وسحبتني من ايدي واخذتني ركض دخلتني على غرفة بيها بنت نسخة منها من كمية التشابه صفنت عليهن جانت الغرفة بناتية لونها وردي وبيها سريرين والكنتور لونو ابيض
.
.
وغرفتهن تحسها بسيطة وفخمة بنفس الوقت مدري شلون صايرة بس تخبل على كد مو حلوة جانت البنت تدرس ومن طبينا عليها فزت افتشلت من الموقف كلتلها اسفة فززناج
.
.
كالت لا عادي بس مستغربة مني لان اول مرة تشوفني كالتلها هنادي راح اخذ من ملابسج لجنى كالت عادي براحتج طلعتلي منها دشداشة جوزية وشال حليبي
.
.
ودخلت سبحت بماي حار احس جنت مقيدة والماي فتحلي قيودي بقيت بالحمام لحد ما ارتخى جسمي لبست ملابسي ومشطت شعري بالحمام ولبست الشال وطلعت
.
.
جان الجو ربيع بس بيه شوية برودة رحت للمطبخ لكيت هنادي مشغلة الصوبة وكالتلي ابقي يمها لحد ما ينشف جسمج ترا هوا الربيع يجيبلج فلاونزا اذا بردتي
.
.
كعدت كدام الصوبة وحطتلي غدا برياني ولحم كالت اعذريني بس لازم اروح ادرس كلتلها براحتج راحت هي شوية واجت الحجية كعدت يمي اكلت شوية وما كملت
.
.
كالتلي الحجية علمود اكل بس ما اشتهيت بعدها اريد اغسل المواعين كالت عوفيهن وتعاي اكعدي يمي اريد احجي وياج كعدت يمها
.
.
كالت شلون جنتي عايشة يم اهل زوجج وليش مو لابسة حلقة كلتلها اولا زواجي جان اجباري لان يتيمة وما الي احد يمنعهم
.
.
ولان جانو بذاك المكان فما جانت الي اي وسيلة اكدر اخلص منهم وابو زوجي هددني اذا ما اوافق عالعقد يزوجوني الو بدون عقد فخفت من الذنب ووافقت بس زوجي ما تقرب مني
.
.
الحجية: ليش
جنى: حجيتلها السبب
الحجية: الله نقذج منهم يا يمة
.
.
جنى: خالة ايمتى تاخذوني لعمي
الحجية: راح اسأل مصطفى وانطيج خبر
جنى: تمام
.
.
حجينا اني وياها هواي جانت كلش حلوة سوالفها دا نحجي وصوت واحد بالبيت صاح لامو كالت روح لعشك كاعدة ويا البنت اني بالمطبخ
.
.
كلتلها باستغراب عشك كالت اي هذا ابني كاضم نسميه عصفور البيت والعش يعني غرفتو وحجتلي عن ولدها كلهم بس اكثر واحد مصطفى
.
.
حجتلي عن طفولتو وشلون جان رزن وذكي من صغرو وتسولفلي شكد حزن وتأذة بوفاة ابوه من صارت الدنيا مغرب جانت تريد تسوي عشى كلتلها اني اسوي
.
.
وكمت سويت مخلمة (بيض وطماطة) واجبان لان الحجية كالت ما نحب الاكل الثكيل بالليل كلتلها ترا اني طباخة درجة اولى
.
.
كالت عاشت ايدج احسن شي للبنت تتعلم لشغل البيت علمود ما تفتشل اذا صار عدها مناسبة لو اجوها ضيوف كملت العشى واجو مصطفى وشاهين
.
.
صاحت لشاهين كالتلو روح كول لخواتك عالعشى وكالت حطي عشاج انتي وياهن هنا علمود تاخذين راحتج وياهن كلتلها تمام من استوى الجاي قسمتو بالنص النا والهم
.
.
واخذت الصينية الام وراحت وبين من اجن البنات حطيت العشى كعدت اماني تعرفت علي وحجيتلهن قصتي باختار وكلش تأثرن بيها وتعاطفن وياي
.
.
من خلصنا عشى كامن هن يغسلن المواعين واني بقيت كاعدة شوية واجى كاضم جاب الصينية مالتهم سلم علي وانطاها لهنادي يريد يحجي
.
.
كالتلو اماني لا تحجي اطلع يلا كاللها دروح هو انتي هيبتج مياو على اساس بزونة ركضت وراه وانهزم وهو يضحك واني وهنادي ضحكنا على موقفهم
.
.
كالتلي هنادي هذا كاضم مصيبة الي يوكع بلسانو يتورط على عمرو من خلصن شغل رحنا لغرفتهن وكعدت احجيلهن عن حياتي ويا اهلي قبل ما انخطف
.
.
وجنت اكثر شي احجي عن مواقفي اني وهيثم وهن يكولن صار عندنا فضول نشوفو وكلش جانن يضوجن من ابجي عليه وينزلن دموعهن وياي
.
.
من صارت الساعة 11:30 نعست وهن لاحظن هالشي واخذتني هنادي بغرفة بيها سرير جبير جانو مخليها للضيوف وكالت اعتبريها غرفتج واخذي راحتج بيها محد يدخل عليها وعافتني وراحت
.
.
نزعت شالي ونزعت الكماشة مالت الشعر ولاول مرة انام نومة مريحة واني مأمنة على نفسي هيج تركت شعري مفتوح ونمت علمود اخذ راحتي
.
.
اتذكر حجى شخص وياي واني نايمة مدري شحجيت وكملت نومتي حسيت الشمس طالعة وجسمي خدران من النوم شفت ساعة بالحايط جانت 2 الظهر كمزت كمزة شوية اوكع من السرير
.
.
كمت لفيت شعري وطلعت من الغرفة رحت لغرفة البنات دخلت جانن يدرسن كالت هنادي صح النوم يابة ترا راح احسدج على نومتج
.
.
ضحكت كلتلها يعني من كل حياتي حاسدتني عالنوم كالت اماني ختولي عوفيها مادخلج بيها تغديتي لو بعد كلت لا بعد كالت لعد تعاي وياي كلتلها كملي دراستج كالت مكملة
.
.
ونزلنا اني وياها سلمت عالحجية ودخلنا للمطبخ حطتلي غدا تمن ولحم خطية مسوينو الي واني مكضيتها نوم ومادري بالدنيا
.
.
والحجية كايلتلهم يتركوني نايمة والصراحة ما قصرت لان نمت احلى نومة بحياتي رغم جنت استحي منهم بس طبيعتهم الحلوة واخلاقهم تخليني اندمج وياهم غصب عني وبالاخص البنات
.
.
كلتلي اماني تجين ويانا باجر للسوك كلتلها ليش كالت لعد مو اجى عيد الاضحى لعد وين عايشة انتي كلتلها هو اني متذكرة عيد متذكرة صخام
.
.
ضحكت وكالت باجر اخذج ويانا اني وهنادي وماما ومصطفى كلتلها تسلمين ما يحتاج اصلا حتى ماراح اعيد كالت اول شي انتي ماعندج ملابس وهم راح يجونا ضيوف بالعيد مايصير ما تلبسين شي جديد كدامهم
.
.
دا نحجي واسمع الحجية رحبت بضيوف وتحمد الله على سلامتهم وصاحتني كالت تعاي شوفي منو يمنا طلعت وتفاجأت بالشي شفتو
.
.
مصطفى: بعد ما حجتلي جنى عالي صار وياها حقدت عالمنطقة كلها وبالاخص بيت ابو سيف وكلت الا اخذ حقها منهم واعلمهم ان الله حق
.
.
اتصلت على صاحبي عميد بمكافحة الارهاب وحجيتلو عليهم كال باجر من الصبح امر عليك ونروح نقتحم المكان كلتلو تمام
.
.
وثاني يوم الصبح اجى علي بسيارة عسكرية واخذني ورحنا للمكان وجان جايب هواي جنود وياه لان حجيتلو الوضع وفهمتو
.
.
ومن وصلنا طوقو المنطقة كلها ورحنا لبيت المسؤول عليهم من شفتو انطيتو بوكس كل قوتي زتيتو بالكاع واخذوه الجنود باوعلي العميد كال على كيفك عليهم يمعود فلشت وجهو
.
.
كلتلو هذا مو شي خلي اشوف الي ببالي الا يطلع منا جنازة كال تندلو كلتلو اي ورحنا على بيت ابو سيف بالحجي البيوت اقتحمناهن واحد واحد والي نلكيهم بالبيوت ناخذهم
.
.
وجانو اكثرهم ينمسكون بوضع مخل للادب وينسحل هو والبنت الي وياه وصلنا بيت ابو سيف دكيت الباب طلعلي واحد كلتلو انت سيف كال لا اني اخوه علي تفضل كلتلو صيحلي سيف
.
.
شوية واجى سيف مبين هسا كاعد من النوم اول ما وصل الباب سحبتو بقوة وزتيتو بنص الشارع والجنود حجزو اخوانو عني كام على حيلو ويهدد
.
.
مسكتو من ياختو وضربتو بوكس وكعتو بالكاع وكعدت فوكو واستلمتو راشديات وبوكسيات الا زوركت وجهو انداريت شفت ابوه وكوة مسكوني الجنود عندو
.
.
وكلت للعميد كلهم تحبسوهم واحد انكس من الثاني واقتحمو البيوت كلها الي بالمنطقة واخذو كل الي بيها
.
.
........... يتبع
لايك وتعليق حلو مثلكم ❤
حطولنا ارائكم وتوقعاتكم ❤
بيج الفيسبوك @AS413