طيوف الماضي

البارت(40)طيوف_الماضي الكاتب#احمد

تصويت ومتابعه لحتى توصلكم باقي البارتات والقصص❤وصلولنا البارت 200 لايك ❤😁
#طيوف_الماضي
بقلم #احمد
البارت_40
.
.
جنى: وهو عيونو اجت على كل تفصيل بجسمي كالتلو برجفة واحس كوة الفظ الحرف وبصوت متقطع طلعت مني كلمتين شتريد مني وهو بقى ساكت
.
.
مصطفى: كعدت قبل العرس بيوم تريكنا وجنت اريد اروح اجيب الجادر وسألت علي كال ابقى بالمضيف ورحت بسيارتي ولحكوني ولد عمي بسيارة حمل
.
.
قبل ما اطلع من البيت اجى كاضم كال اريد احجي وياك بموضوع بالطريق ومن وصلنا الطريق الرئيسي كلتلو احجي
.
.
كاضم: بما انو جنى واهلها هنا ليش ما تخطبها كدام عمامي
مصطفى: ماكدر اسوي هالشي
كاضم: ليش ما تكدر وشنو اليمنعك
.
.
مصطفى: اذا خطبتها راح يفكر علي انو اني جبتو هنا علمود ما اروح للموصل واخطبها واذا هو ما فكر هيج فغيرو يفكر هيج واني ما اريدو يسمع حجاية تغثو
.
.
كاضم: وانت تتوقع علي يفكر هيج
مصطفى: اذا اكون اعرفو زين فما يفكر هيج بس لا تنسى اكو بعض ناس يحبون يسوون فتنة ويخربون
.
.
كاضم: وايمتى مفكر تخطبها
مصطفى: هسا ملتهي بعرسكم ومو وقتها
كاضم: والله تمنيتك متزوج ويانا
.
.
مصطفى: إن شاء الله يكون بيها خير
كاضم: آمين
.
.
مصطفى: رحنا جبنا الجادر ومريت على كصاب علمود الذبايح وكلتلو 20 راس غنم كال عادي اني اجيب وياي ثنين وبالساعة 3 الفجر احنا يمك علمود نلحك نخلصهن وتطبخوهن
.
.
ورجعت من عندو للبيت الجادر تركناه للمغرب لان جان الجو حار ومو محتاجينو اليوم ومن صارت الدنيا ليل كملنا الجادر واخذت علي ورحنا لبيت واحد من عمامي النسوان كلهن طالعات وباقين بس الشباب
.
.
سبحنا وكشخنا ورجعنا اخذنا النسوان عالحنة جانت شوفة جنى بنفسي بس للاسف من كثر الموجودين والخبصة ما لحكت اشوفها
.
.
بس شفتها موجودة بالسيارة مالت ابوها من رجعنا ولان الدنيا ليل ما كدرت اشوف شكلها شلون طالعة ثاني يوم الفجر اتصل علي الكصاب كال اني جايكم كلتلو حياك الله
.
.
كعدت كاضم وشاهين وتركت علي نايم اجى الكصاب ومثل ما كال وياه ثنين وبلشو بالذبايح هم يكسرون العظام واني وشاهين وكاضم نكطعهن قطع صفار
.
.
شلون كملنا الثانية ووصلو ولد عمي وخلال نص ساعة الذبايح كملن كلهن ومن كمل الكصاب كلتلو علمود يبقى وكال لازم يروح يفتح المحل وانطيتو فلوسو وتوكل
.
.
وبلشنا نحظر للعرس تريكنا عالسريع وهم رحنا اني وعلي كشخنا ببيت عمي ورجعنا وبدو الناس يجون واني وولد عمي ما قصرنا وياهم علمود ما تنحسب علينا ان قصرنا ويا ضيوفنا
.
.
ولحد ما خلصو غدا بلشو يمشون وبقو بس الكرايب واتصلت علي اماني ورحنا اخذهن من الصالون من وصلنا نزلت من سيارتي وارتجيت عليها وانتظر اماني وهنادي يجن يركبن وياي
.
.
وفجأة طلعت جنى من الصالون لابسة الفستان الي شل حالي جانت لابسة وياه بدي هاي المرة وحاطة على كتوفها شال اسود جانت طالعة قطعة من الجمال
.
.
نزلت من الدرج تمشي بخطوات بطيئة وابتسامتها سلبت عقلي وروحي جنت مندمج ويا كل حركة وكل خطوة منها نسيت اخواني وعرسهم ومركز عليها
.
.
قبل ما تركب هي بالسيارة انتبهتلي وغمزتلي احس حرارتي ارتفعت وبكلبي كلت اني اعلمج عبالج تحركين اعصابي بدون عقاب رجعنا وكمل كلشي حسب الاصول
.
.
بالليل اتفقت ويا اماني انو تخليها تجي للمطبخ وصرت قريب من الباب الداخلي ومن دخلت للمطبخ سكرت الباب وهي وجها صار اصفر من الخوف
.
.
جانت تحجي واني ما اسمع صوتها وعيوني اجت عالكلادة السودة الي بارزة من ركبتها البيضة وهي تحاول تغطي الجزء الطالعة من كتوفها
.
.
رفعت راسي لوجهها احس ضعت بعيونها عيونها كأنهن بحر بوقت الفجر ما تميز لونو اذا ازرك لو اسود شفايفها جانت حمرتهن داكنة وقريبة من لون الفستان
.
.
وجنت بس اتابع حركة شفايفها وما اسمع صوتها كأنها تلفزيون محطوطلو كتم سحبتها بحركة سريعة لزكتها عالثلاجة وصرت كدامها وهي لان قصيرة واصلة لكتوفي
.
.
دنكت عليها وركزت بعيونها وكلتلها عبالج تحركين اعصابي بغمزتج وتخلصين منها بسلام اني بدون الغمزة محترك حرك عليج بسبب فستانج وتجين انتي تكمليها
.
.
بقت ساكتة وضايعة مثل الطفل الي مضيع اهلو حطت ايديها على كتوفي تريد تدفعني سحبتهن حطيتهن ورا ضهرها ومسكتهن بايدي اليسار
.
.
واخذ بوسة من شفايفها لحد ما اختنكت بعدت عنها كلتلها هاي علمود الفستان ورجعت بستها مرة ثانية ومن اختنكت بعدت عنها كلتلها هاي علمود الغمزة ورجعت بستها مرة ثالثة وكلتلها هاي علمود كلبي المحترك
.
.
شفتها مو كادرة توازن نفسها كعدتها على كرسي وطلعت كلينكس مسحت شفايفي عن الحمرة مالتها وقبل ما اطلع كلتلها جناوي باوعت علي غمزتلها وطلعت من الباب الخارج وتركتها كاعدة عالكرسي
.
.
جنى: من سكر الباب ماعرف شسوي لا اكدر اطلع من الباب الخارجي ولا عندي قوة ابعدو بيها واطلع ومن حاولت ابعدو عني وسحب ايديني لورا ضهري حسيت بوجع بيهن وخفت اسحبهن منو بالقوة واتأذة وما جنت متوقعة يبوسني
.
.
ورغم انو ما جنت متقبلة الموضوع بس من باسني اجاني شعور حلو احس صار العالم بصفحة واني ومصطفى لحالنا بصفحة وبنفس الوقت اريد ابقى واكفة ماكدر ليش وشنو صار وياي ماعرف
.
.
بس الي اعرفو انو ماجان لازم يصير هالشي بس رغم هذا جان الشعور كلش حلو بقيت كاعدة عالكرسي وحطيت راسي عالطاولة وباوعت لايدي ترجف وكلبي دكاتو سريعة بشكل مو طبيعي
.
.
اخذ كلينكس من المطبخ ومسحت حمرتي لان تخربطت ورجعت للصالة لكيت هيثم عند ماما وتذكرت اني رحت ادورلو بالمطبخ كعدت عند ماما وتفكيري بمصطفى ومتندمة لان ما كدرت اقاومو
.
.
رؤى: شبيج جنى مو احجي وياج
جنى: ها ماما ما انتبهتلج
رؤى: شبيج صاير وياج شي
.
.
جنى: لا ماما بس نعسانة لان كعدت من وقت
رؤى: روحي نامي
جنى: هو هسا اروح
.
.
رؤى: راح اشوف ابوج احتمال نروح باجر
جنى: تمام ماما تصبحين على خير 
رؤى: وانتي بالف خير
.
.
جنى: رحت للغرفة طلعت ملابس واخذتلي دوش وطلعت جففت شعري ومشطتو عالسريع وتمددت اريد انام وماكدر لان سيطر الموقف على تفكيري
.
.
بقيت كاعدة لحد ما اجت ماما وكالت شو كاعدة كلتلها هسا انام وغمضت عيوني وبقيت مدة وبالاخير سيطر علي النعاس والتعب ونمت ماكعدت لثاني يوم
.
.
من كعدت الصبح ما لكيت امي وهيثم يمي كمت بدلت ملابسي وعدلت حجابي ونزلت لكيتهم كلهم كاعدين رحت فورا للمطبخ لكيت البنات ومن ضمنهن اسراء صبحت عليهن وكعدت
.
.
اسراء: جان باقية نايمة بعد وقت
جنى: والله خوش فكرة لازم احسب حسابي ثاني مرة
اسراء: لعد شكد كسولة انتي
.
.
جنى: بكد تدخلج بامور غيرج
اسراء: ومنو انتي علمود محد يتدخل بيج
جنى: باوعتلها صفح .. اني جنى ما تعرفيني
.
.
اماني: وهي تحاول تكتم ضحكتها .. كافي هاد شبيكن
اسراء: عابت لهالوجه وجه المكدي
جنى: هههههههه اخ بطني ههههههههه
.
.
اماني: اسراء مو عيب عليج
جنى: لا عوفيها وربي ضحكتني
هنادي: لو وجه مكدي ما انخطبت البارحة
.
.
جنى: باستغراب .. منو خطبني
هنادي: وحدة من عماتي خطبتج بس امج ما وافقت
جنى: شو مادري
.
.
اماني: من جنتي تدورين لهيثم
جنى: ايا حيوانة يعني متعمدة سويتي هيج
اماني: لا هاي اوامر من القيادة العلية
.
.
جنى: اني اعلمج اذا ما رديتها الج اني مو جنى
هنادي: شترديلها
جنى: نصبت علي البارحة عبالي اخوي ضايع اخير شي طلع بحضن ماما وفوكها مكيفة الحيوانة
.
.
اماني: عيب ولج احترمي اخت الشيخ
جنى: دطيري انتي والشيخ مالج
اسراء: شبيج انتي ماتعرفين تحجين
.
.
جنى: شبيج انتي ماتعرفين تسكتين
اسراء: طاح حظ هيج تربية
جنى: اي والله حجيج صحيح لان ما تعلمتي تتركين الناس بحالهم وتكرمينهم بسكوتج
.
.
اسراء: شقصدج اني مو متربية 
جنى: اماني اني كلت اسراء مو متربية
اماني: اي
.
.
جنى: وجعي عابتلج وجه فرعون
اماني: شعرفج فرعون مو حلو
جنى: شمدريني المهم انو عيبت عليج
.
.
اماني: هههههههه تمام
جنى: صدك شو ما مسوية غدا
اماني: عند الزلم الغدا
.
.
جنى: شنو يوميا
اسراء: هو انتي بنت فكر وين شايفة شيوخ
جنى: ما جاوبتي اماني
.
.
اماني: بنفاذ صبر .. اجو ضيوف وسوالهم غدا مصطفى ولان هواي خلى الطبخ عالزلم
جنى: ايوا بس احسن هيج
اماي: اي اكيد جان هسا مخبوصة الدنيا
.
.
جنى: بقينا نحجي واسراء كل شوية تذبلها حجاية واتجاهلها وهي على شوية وتنفجر من القهر لان تريدني ارد عليها وتصير مشكلة واني مطنشتها
.
.
والصراحة جنت خايفة انو ارد عليها وتصير مشكلة وتفتشل ماما لهذا بقيت ساكتة ولان اشوفها ضايجة من سكوتي قررت اتجاهلها وازود ضوجتها
.
.
وجانت مرات تلمح انو مصطفى راح يتزوجها واماني تباوعلي وتكتم ضحكتها واني علمود ما انكشف ابقى ساكتة وهي لو تدري مصطفى شجان يسوي البارحة جان انجلطت وويا اكثر وحدة تكرهها 
.
.
وطبعا خلال وجودنا بالمطبخ جانن النسوان يجن يباركن للعواريس وجانن بعض من بنات عم اماني ويانا بالمطبخ وعرفت من خلال الكلام ان اسراء نايمة هنا
.
.
ومصطفى مو مخلي ابوي يرجع اليوم كملنا اليوم طبيعي بعد العشى سوو حفلة اني ما شاركت وياهم بس لبست فستاني الاسود علمود شكلي يطلع حلو كدام الموجودين
.
.
بس اسراء كتلت نفسها بالركص لو عرس اخوها مو هيج بال 10:30 عفتهم وانسحبت لغرفتي ونمت وكعدتني ماما الفجر كالت ابوج يكول يلا خلي نروح
.
.
كمت بدلت ملابسي ولبست حجابي ولكيت ماما مجهزة كلشي من الليل بس نزلنا الجنطة وتوكلنا حتى ما تريكنا لان الكل نايمين لكينا بس مصطفى كاعد
.
.
اني ماكدرت ارفع عيني بعينو بعد ذيج سوايتو وركبت فورا بالسيارة بس حسيتو ضايج لان راح نروح بس شكد ما نبقى بالنهاية راح نرجع قابل نبقى عدهم عايشين
.
.
من رجعنا مثل الروحة وكفنا ببغداد تغدينا وكملنا طريقنا للموصل من وصلنا الموصل اخذنا عمي لمكتبة واخذلي منها كتب ثالث متوسط علمود ابلش ادرس للثالث
.
.
من وصلنا البيت جانت الدنيا مغرب وتعبانين كلش اخذت الكتب وحتى الجنطة عفتها وصعدت لغرفتي نمت كعدت ورا ساعتين صليت العشاء ورجعت كملت نومتي
.
.
كعدت ثاني يوم تريكت وغسلت الملابس الي اخذناهن ونظفت البيت ما خلصت للضهر تغديت ورحت لغرفتي طلعت التيلفون وبلشت اكلب بالصور الي صورتهن بالعرس
.
.
وتذكرت الخواتم ما شفت ماما لبستهن للعواريس رجعت عليها كلتلها ماما شو ما انطيتي هند ولارا الخواتم
.
.
رؤى: شلون ما انطيتهن
جنى: اي ما شفتج انطيتيهن
رؤى: من جنتي فوك انتي والبنات انطيتهن
.
.
علي: فوك شنو
رؤى: بالطابق الثاني يشوفن احتفالكم
جنى: وانت بابا انطيتهم الساعات
.
.
علي: اي بابا انطيتهم
جنى: همزين لو علي الشغلة جان نسيتهم ثنينهم
علي: بس حسيت نظرات عمام مصطفى الي مو مريحة
.
.
رؤى: ليش
علي: كأنهم يعرفون ان مصطفى خاطب جنى
رؤى: لا اكيد مصطفى ما يكولك ما حجيت وهو حاجيلهم
.
.
علي: ماعرف والله
رؤى: المهم احنا قمنا بالواجب وهاي هي
علي: اي هو هذا اهم شي ويكفي ان مصطفى بقى خارج البيت وما شاف جنى طول العرس
.
.
جنى: من كال بابا هيج وجهي صار احمر واحس كرهت نفسي لابعد الحدود لان بابا واثق بي واني ماكدرت امنع مصطفى من باسني كلو من مصطفى
.
.
رؤى: بس عرسهم جان كلش حلو
علي: اي والله اجوائهم تخبل
رؤى: رغم هنا الاعراس نفس الشي بس هناك حسيت الها نكهة خاصة تختلف عن اعراسنا
.
.
علي: اي صحيح وفعلا عرسهم ما عليه حجي
رؤى: شيوخ بعد مو اي شي
علي: اي والله تدرين ما جابو احد يطبخ
.
.
رؤى: ليش
علي: ولد عمهم تكفلو بالطبخ
رؤى: والله عفية علبهم
.
.
علي: وشفتي انتي طبخهم شكد طيب
رؤى: اي والله طبخهم درجة اولى
علي: وتخيلي يوم العرس كعدت الصبح لكيت 20 ذبيحة مذبوحات ومكطعات وباقيلهن بس ينطبخن
.
.
رؤى: ليش ما ذبحوهن قبل بيوم
علي: مصطفى يكول اذا نذبحهن بيوم العرس احسن
رؤى: جناوي ماما روحي لغرفتج
جنى: تمام
.
.
رؤى: كلي احد جابلك سالفة خطبة لو شي
علي: لا ليش
رؤى: وحدة من عمات مصطفى خطبت جنى وكالت راح اخلي زوجي ومصطفى يطلبوها من ابوها
.
.
علي: وليش ما رفضتي
رؤى: رفضت بس هي اصرت ولزكت علي لزكة
علي: وهي وين تعرف جنى واجت هيج خطبتها من بين البنات
.
.
رؤى: تكول مدليتهم عليها وحدة اسمها اسراء
علي: منو هاي اسراء
رؤى: حسب ما سمعت من كرايبهم
.
.
علي: محد حجى وياي بالموضوع
رؤى: واذا انفتح الموضوع ويا مصطفى شلون
علي: واذا انفتح شبيها
.
.
رؤى: اذا يكللهم خاطبها ورطة واذا يرفض ويرجع يخطبها الو بعد فترة ورطتين
علي: هو يعرف يتصرف
.
.
رؤى: والله ماعرف بس احس روحتنا جانت غلط
علي: كلتلج اني ما حبيت اروح بس افتشلت من مصطفى وانجبرت اوافق عالعزيمة
.
.
رؤى: المهم اذا حجى وياك خلي يكللهم ناوي اخطبها الي
علي: إن شاء الله بس انتي لا تحجين كدام جنى علمود لا تحط الموضوع ببالها
.
.
رؤى: هو اني دزيتها لغرفتها علمود ما احجي كدامها
علي: واريدج تهتمين بدراستها
.
.
رؤى: بعيوني
علي: تسلم عيونج
رؤى: الله يسلمك
.
.
جنى: رحت لغرفتي واني ضايجة من نفسى وكل ما اتذكر كلام بابا وشلون يحجيه وهو كلو ثقة انو مصطفى ما شافني وهو مو بس شافني هو باسني واني ماكدرت امنعو
.
.
مجرد التفكير بالموضوع اكره نفسي واتمنى الموت ولا صاير وياي هالشي وبقيت بحرب نفسية وتأنيب ضمير قاتل اخذت الكتب علمود اشوفهن بلكي التهي بس بدون فايدة
.
.
اكلب الورقة وبدال ما اقرا افكر بالموضوع وانسى اني دا ادرس اخير شي شلت الكتب وماعرف شسوي بقيت النهار كلو بهالحرب النفسية واريد بس يرتاح ضميري ماكو
.
.
بالليل احس تعبت كلش ومو متحملة الي دا يصير وياي رحت للغرفة ودفنت نفسي بالفراش وبجيت لحد ما راسي وجعني طلعت كل القهر والحسرة الي بكلبي بالبجي
.
.
انتبهت للتيلفون دا يدك شفتو مصطفى وسكرتو ورجع اتصل وسكرتو واتصل مرة ثالثة وخفت ماما تسمعو وقفلت التيلفون نهائيا وشلتو
.
.
فوك ما سوا هيج وخان ثقة بابا وجبرني على شي ما اريدو يتصل ومكيف بالي سواه دشوف منو الحمارة الي تحجي وياك مرة ثانية وخلي سوالفك وقلة الادب وخيانة الثقة تفيدك يا شيخ مصطفى بسيطة
.
.
.......... يتبع
لا تقراء وترحل كافئ جهودي ولو بكلمة او لايك ❤
بيج الفيسبوك @AS413