طيوف الماضي

البارت(54) طيوف الماضي الكاتب#احمد

تصويت ومتابعه لحنى توصلكم باقي البارتات والقصص❤

#طيوف_الماضي
بقلم #احمد
البارت_54
.
.
جنى: من خلصت اكل سألتها على كاضم كالت بالصالة تحت كلتلها اخذيني عليه ونزلنا اني وياها وهيثم وكلت لكاضم اخذني عالمستشفى
.
.
كال هسا اجيتي عالقليلة ارتاحي كلتلو لا اخذني وماما كالت ما يفيد راح تبقى تعاند اخذها خلي تبقى ويا زوجها وفعلا اخذني وصلني عندو وطلع من الغرفة ماعرف رجع للبيت لو بقى كدام الغرفة
.
.
جنت كاعدة عند مصطفى مرت يمكن ساعة وبلشت انعس شوية شوية وكاضم من طلع مارجع لحد الان يعني اكيد رجع للبيت لان ماكو فايدة اذا يبقى هنا
.
.
حطيت راسي عالسرير وجسمي عالكرسي واخذت ايد مصطفى حطيتها على وجهي وماسكتها بايدي اليمين علمود لا تنزل فجأة حسيت اصبع مصطفى الابهام تحرك
.
.
فزيت ورفعت راسي كلتلو مصطفى حبيبي تسمعني مصطفى رجع حرك ايدو مرة ثانية حطيت ايدي على حلكي ودموعي نزلت من الفرح
.
.
عفتو وطلعت فورا شفت كاضم كاعد خارج وماسك تيلفونو ومن شافني فورا وكف على رجليه كلتلو مصطفى كعد من كلتلو هيج دخل ركض ولحكتو اني
.
.
اجى وكف عندو ويحجي وياه بس مصطفى مجرد يحرك ايدو ومبين على ملامحو متوجع كلتلو جيب الدكتور بسرعة وراح يركض عالدكتور
.
.
رجعت مسكت ايدو واضحك مثل المخبلة من الفرح واحجي بس ماعرف شحجي من الفرح كمت اجفص بالحجي واحط حرف مكان حرف حتى كلام هيثم مفهوم اكثر مني
.
.
فتح عيونو شوية وباوعلي وابتسم من شفت ابتسامتو تخبلت من الفرح واجى الدكتور هو وكاضم جيك وضعو وكال هسا لازم انطيه مهدئ علمود ينام لان مكان الاصابات توجعو وباجر الصبح إن شاء الله يكعد
.
.
بعد ما انطاه مهدئ ب 5 دقايق صار نفسو منتظم وعرفت انو نام بس فرحتي ما تعادلها فرحة وكاضم مثلي واحد يباوع للثاني ويضحك ولو شايفنا احد جان فورا اخذنا لمستشفى المجانين
.
.
نسيت النعاس ونسيت كلشي وبقيت كاعدة يمو وانتظرو يكعد علمود اتطمن عليه وكاضم كاعد مقابيلي من الجهة الثانية واحس الثواني صارن سنين من صعوبة الانتظار
.
.
ومو اي انتظار انتظار ردت روحي الي انتظار احيائي مرة ثانية لان حاليا اني ميتة بدونو طلع الصبح علينا اني وكاضم بدون ما تغمض عيونا
.
.
الساعة 7:30 بدا يفتح عيونو بس يون من الوجع مسكت ايدو كلتلو مصطفى اني جنى يمك باوعلي اني هنا حبيبي كون بي الالم ولا بيك يا روحي
.
.
صرت احجي ونسيت كاضم كاعد كدامي فتح عيونو وباوعلي وابتسم للمرة الثانية وصرت اضحك وعيوني مثل الشلال تجري دموع من الفرح
.
.
مصطفى: بصعوبة والم .. شلونج كليبي خوما تأذيتي
جنى: لا يا روحي مابي شي مو ناقصني بس كومتك بالسلامة
مصطفى: اكيد اني بالجنة
.
.
جنى: هههههه لا للاسف انت بالمستشفى
مصطفى: لعد شلون صارت حور العين كدامي
كاضم: بربك ما تبطل سوالفك
.
.
مصطفى: اكلج مو كأنو صوت ابليس هنا
جنى: هههههههه اي صحيح
كاضم: شلونك يبعد اخوك خوما موجوع
.
.
مصطفى: عمرك طويل اي والله موجوع
كاضم: لعد خلي اجيب الدكتور
مصطفى: لا اكدر اتحمل خليني اباوع بهالوجه الحلو .. ورفع ايدو مسح على خد جنى
.
.
كاضم: مثل ما تريد
مصطفى: شصار ماصار
كاضم: الي دعمكم توفى والي وراكم كلبت سيارتهم ومابيهم شي رضوض خفيفة
.
.
مصطفى: ماعرفتو ليش جان يسوق هيج
كاضم: لا والله بس انت هسا اهم شي ترجع توكف على حيلك
مصطفى: شبيها ايدج اليسار
.
.
جنى: مابيها شي انكسرت وجبصوها
مصطفى: وجهي ليش مضمد وليش يحركني
جنى: الجام تفلش وطار على وجهك وضمدوه علمود يطيب
مصطفى: تمام
.
.
كاضم: اني رايح اجيب امي راح تطير من الفرح
مصطفى: لا تجيب احد سجلي خروج وتعال
كاضم: وين خروج تطلع بهاي الحالة
.
.
مصطفى: مابي شي بس سجلي خروج وتعال
كاضم: بعد وقت الساعة ماصارت 8
مصطفى: روح جيب الدكتور لعد
كاضم: تمام
.
.
جنى: راح كاضم واني ماعرف شسوي بس اضحك وماسكة ايدو وادلكها وفرحتي ما تنوصف بشفائو وهو يباوعلي ويبتسم وفرحان لان ما تأذيت
.
.
اجى الدكتور جيك وضعو كال لو تبقى احسن علمود الضربة الي براسك كالو مصطفى اني دكتور واكدر اهتم بنفسي والدكتور كلو لعد براحتك
.
.
بس انتبه ترا جنت محظوظ ان ماصار عندك نزيف داخلي جان فقدت الذاكرة لو صار وياك اسوء من هالشي كالو مصطفى الحمدلله
.
.
وهسا كاضم سجلي خروج وتعال ساعدني علمود اطلع منا ومن راح كاضم كال كوميني خلي اوكف شوية وساعدتو وكف شوية ورجع كعد
.
.
انتظر كاضم لحد ما اجى ومسك ايدو كاضم ومشو سوا واني وراهم واباوع لطولو ومو مصدكة الحمدلله ياربي مابيه شي وإن شاء الله عن قريب يطيب ويصير بخير
.
.
جان كلش تعبان كوة وصل السيارة وركبنا سوا ومشينا جان طريقنا من السوك شو فجأة وكف وكال لكاضم روح جيبلي ذيج ونزل كاضم
.
.
جنت مستغربة لان ماعرفت على شنو اشرلو ومن اجى كاضم شفت بايدو عكازة جان لونها اسود وبيها نقش ذهبي جان منظرها حلو اكثر من كونها وسيلة مساعدة
.
.
بس اكيد هو جابها علمود هالفترة يستخدمها مو دائما انطاه كاضم وصعد بالسيارة ومشينا وكاضم حجالو كلشي علمود يكون عندو علم بكلشي
.
.
صارت الساعة بال 9 الا ربع وصلنا البيت وجانو ولد عمام مصطفى متجمعين طلع كاضم موصيهم وحتى شاهين وبابا ما يدرون بيهم كاضم كال لا تنزلين هسا
.
.
فتح الباب مصطفى واتكئ عالعكازة ووكف وبلش الرصاص حركو الدنيا حرك وهو واكف كدامهم ويضحك شاهين وبابا طلعو من المضيف مخترعين والظاهر جانو نايمين
.
.
وشاهين من شاف مصطفى ركض عليه واجو الشباب كلهم سلمو عليه وتحمدولو بالسلامة وراحو علمود يعوفوه يرتاح ونزلت اني
.
.
ومن دخل ركضن عليه اماني وهنادي ودموعهن تسبقهن والحجية خطية واكفة بمكانها ودموعها تجري سلم عالبنات وراح على امو سلم عليها وعلى ماما ولارا وهند
.
.
وكال لشاهين ابقى ويا علي بين ما ابدل واجي وصاح كاضم واجى كاضم ساعدو ورحت وياهم اخذو عالغرفة علمود يساعدو يغسل وطلعتلو ملابس اني وانطيتهن لكاضم
.
.
واخذو للحمام غسلو ولبسو ملابسو بس بقت الدشداشة كلش تعقدت شغلتها لان كتفو مكسور ومايعرف شلون يلبسها فاخذتها من كاضم
.
.
لبستوياها ونزلتها من فوك لحد ما كدر يدخل ايدو بالردن ورجعت رفعتها باوع لكاضم كالو تعلم صارلك عمر تلبس دشداشة وماكدرت تدبرها
.
.
كالو غير مرتك مصيبة مثلك وضحك وجبتلو عكال وشماغ لبسهن لمصطفى وكال مصطفى اليوم اكيد راح يجون ضيوف تروح هسا للكهوجي كلو الكهوة اليوم ما تبرد وما تخلص
.
.
وانتو خليكم موجودين علمود اذا نحتاج شي نوصيكم وطلع كاضم رجع اندار علي كال الحمدلله شفتج بخير كلتلو وربي مو مصدكة نفسي من الفرح
.
.
حضني بايدو اليمين وباسني على راسي جان راسو ووجهو كلو مضمد بس لان شيخ لبس العكال والشماغ ونزلنا اني وياه جان مستند عالعكازة واني هم ساندتو بايدي اليمين علمود يكدر يمشي زين لان صارلو فترة طويلة نايم
.
.
وصلتو لباب الحوش واجى كاضم ساعدو وراحو للمضيف ورجعت اني داخل البيت ومجرد تريكنا بلشو الناس يجون من عمامو تجمعو كلهم لان هم اول ناس عرفو
.
.
وبعد الغدا صارت لمة لا توصف السيارات ما تنعد والزلم ناس جاية وناس رايحة ولان ناس هواي سوو عشى الزلم ويمكن الزلم اكثر من الي اجو بالعرس بحيث ولد عم مصطفى طالعين من المضيف لان مالهم مكان بالداخل رغم المضيف كلش جبير
.
.
مصطفى: رغم تعبان وماعندي طاقة انو استقبل ضيوف وابقى كاعد وياهم بس جنت مجبور لهذا بدلت قبل ما يجون ورحت للمضيف علمود استقبلهم اول ما يجون
.
.
بعد الغدا اجاني واحد من الشيوخ اسمو شيخ فيصل علمود يكون طرف ثالث بموضوع الولد الي توفى ويحاول يصلح بيني اني واهلو
.
.
فيصل: شيخ مصطفى اول شي الحمدلله على سلامتك
مصطفى: الله يسلمك ويعافيك
فيصل: انت تعرف ليش اجيت
.
.
مصطفى: اي اعرف شيخ
فيصل: لعد اتمنى تشرفني باي يوم يعجبك واجمعك ويا اهل الولد علمود نوصل لحل سلمي بينكم
.
.
مصطفى: اولا شيخنا اني مو غلطان بحق احد وانت ومضيفك على راسي وشرف الي اجي يمك بس لان مو غلطان ماراح اروح لاحد والي الو حق علي يجي علي هنا
.
.
اذا كانو يريدون حل سلمي وننهي المشكلة حياهم الله واذا يريدون يسوون مشاكل ويكبروها فهم يعرفون منو شيخ مصطفى ومنو عشيرتو والي يسووه يتحملون نتيجتو
.
.
فيصل: هذا اخر كلام عندك
مصطفى: اذا ما تزعل مني اخر كلام واذا زعلان يتغير الحجي لان مايهون علي زعلك اكيد
.
.
فيصل: الله يعزك لا يخوي حقك ومحد يكدر يلومك
مصطفى: واذا تكون موجود من يجون اتشرف بيك
فيصل: الي الشرف إن شاء الله اكون موجود
.
.
بقيت كاعد ويا الناس بس بدا وجهي يحركني وكتفي يوجعني وراسي احسو صار طبل والمشكلة اكو ناس ما الي ميانة عليهم علمود اتعذر منهم واروح كوة تحملت لصلاة العشاء
.
.
وبعدها كلتلهم يا اخوان اني اعتذر منكم مثل ما تعرفون راسي متأذي والكعدة وياكم ما تنمل بس راسي كلش يوجعني فاسمحولي اعوفكم واروح انام
.
.
وكلهم كالو نوم العوافي واهم شي راحتك وترخصت منهم ورجعت للبيت من وصلت جانن اكو نسوان من عمامي وبناتهم سلمت عليهن عالسريع ورحت لغرفتي
.
.
واجت جنى وخليتها تساعدني انزع الدشداشة مثل ما لبستها وتمددت عالسرير واجت هي تمددت بحضني سحبت راسها لصدري وبستها بكصتها ونمت
.
.
كعدت الصبح جنى مو بحضني مبين نازلة انتظرتها شوية لحد ما اجت ساعدتني البس ملابسي وجابتلنا اماني الريوك واول مرة اكل اكل طبيعي
.
.
لان البارحة رغم سوينا عشى للناس بس اني اكلت شوربة لان ماكدر اكل شي ثكيل فورا تريكت وبعدها طلعت هم ناس تجي وناس تروح من الكرايب والمعارف والشيوخ بس ابو اسراء ما اجى
.
.
واجى الشيخ فيصل وكال باجر يجونك اهل المتوفي كلتلو تمام ومن كال يجون عرفت شغلتهم ما منها شي لان لو مقتنعين بكلامهم جان ما وافقو يجون يا اما نلتقي عند الشيخ فيصل او اني اروحلهم مو هم يجوني
.
.
وكضيت اليوم طبيعي وثاني يوم بال 10 الصبح اجو هم ووياهم الشيخ فيصل وشيخ ثاني
.
.
استقبلتهم وكعدو يحجون انو اجينا نحلها بدون ما تكبر والحمدلله على سلامتك والله يرحم الولد هذا يومو ومن هالحجي كلت للشيخ الي وياهم امرني
.
.
الشيخ: اهل الولد يكولون انت غلطان والحادث بسببك
مصطفى: باوعتلهم .. منو منكم جان ويا الولد
كلهم: لا رد
.
.
مصطفى: الولد ايمتى توفى
الشيخ: قبل ما يوصل المستشفى
مصطفى: لعد شعرفهم اني الغلطان
.
.
ابوه: ابنا يعرف يسوق ومو اول مرة يطلع بالسيارة
مصطفى: مع احترامي الك بس هذا الكلام ما يقنع احد
ابوه: لعد شنو اليقنع
.
.
مصطفى: اليقنع هو انو اني موجود بالحادث واني شفت سياقة ابنكم الي ماخذ الشارع يمين ويسار واذا ابنكم سايق فاني من جنت جاهل اسوق السيارة فاذا اكو خطأ مستحيل يكون مني
.
.
واذا تريدون تحلوها فاكيد راح اساعدكم بس مو بانو ينحط الحق علي ولو الكم حق جان حجيت كدام الموجودين وانطيتكم حقكم وفوكو حبة مسك
.
.
ابوه: وشنو الحل الي تشوفو انت
مصطفى: الي صار قضاء وقدر
ابوه: يعني ما النا حق
.
.
مصطفى: اذا الكم حق فتاخذوه من ابنكم لان هو غلطان واذا كلنا ما يعجبكم شلون تحلوها
ابوه: تنطينا فصلية او فصل
.
.
مصطفى: ههههههههه
ابوه: ما اعتقد حجيتلك نكتة
.
.
مصطفى: انت تشوف كدامك وجهي وايدي وغير السيارة الي انتهت واصابة زوجتي وفوك هاي كلها تريد تاخذ فصلية والي لو اكون قاتلو بايدي ما اسويها
.
.
فيصل: اني ويا الشيخ مصطفى السالفة تنتهي هنا
ابوه: ونعوف دم ابننا
.
.
فيصل: ابنكم غلطان يا حجي فشلون تاخذون حق على شي ابنكم غلطان بيه لهذا السالفة تنتهي هنا ولا تخلون هالشي يسبب مشاكل بينكم لان اذا كبرت ثنينكم خسرانين
.
.
مصطفى: بقينا نحجي وواحد ينطي راي والثاني يأيد او يرفض بالاخير كلتلهم اذا اريد اسويها حق ترا الي حق عليكم تجيبولي مثل سيارتي وتعويض اصابتي اني وزوجتي
.
.
من كلتلهم هيج سكتو واتفقنا انو السالفة تنتهي بدون لا فصل ولا شي وتغدو يمي وراحو كلهم وجان موجود علي كال ذولا يحجون كل عقلهم
.
.
كلتلو اكو هواي مثلكم يتمنونها من الله تجيهم هيج سالفة علمود يحصلون منها فلوس ولعلمك بعض شيوخ من يصير فصل ياخذ منو
.
.
بس يعرفوني ما انطيهم شي لهذا شيخهم بقى ساكت ولو اكو دليل بكد شعرة علي جان حجو بيها للصبح علمود ياخذون فصل
.
.
واجوني ناس بالليل وهم من تعبت ترخصت منهم ورجعت للبيت ثاني يوم الصبح رحنا اني وكاضم لدكتور خليتو يشوف وجهي
.
.
كال وضعو زين وما يحتاج لا عملية ولا شي بس ضماد علمود لا يلتهب من الغبار الي بالجو لمدة اسبوع وكل يومين تبدل الضماد وتعقمو
.
.
وراسك مبين زين بس صدك الله سترك الضربة كلش قوية كلتلو والله كلش زين طلعنا من الحادث لو شايفو اجانا ما يشوف الدرب من السرعة كال العراق مليان من هالنماذج رجع ضمدني ورجعنا للبيت
.
.
......... يتبع
لايك وتعليق حلو مثلكم ❤