طيوف الماضي

البارت(70) طيوف_الماضي الكاتب احمد

#طيوف_الماضي
بقلم #احمد
البارت_70
.
.
مصطفى: راح تكضي حياتك لا تحضنها ولا تبوسها ولا تنومها بحضنك جنى واعرف غيرتها مستحيل تتحمل الموقف وتبقى ساكتة بقيت افكر لحد ما قفلت كلش وغمضت عيوني ونمت بس نومتي مو مريحة لان جنى مو بحضني
.
.
جنى: جنت نايمة وكعدني صوت رانية جانت تبجي وعلى صوتها كعدت الحجية كالت جوعانة رضعيها علمود ترجع تنام ومن رضعتها نومتها بفراشها
.
.
وكامت الحجية شالتها من فراشها كالت مايصير تنومينها فورا لازم تشيليها وترفعين راسها لحد ما تطلع الغازات الي ببطنها علمود ما تستفرغ الحليب الي رضعتو
.
.
كالتلها ماعرف نسيت كالت عادي تتعلمين هيج امور شوية شوية وبقت شايلتها 5 دقايق تقريبا وبعدها رجعتها لفراشها ونمنا ثنينا
.
.
وكعدت الصبح لكيتها نايمة ورغم هسا كاعدة من النوم بس احس نفسي تعبانة وجسمي بيه خمول سندت نفسي عالحايط لحد ما وكفت وطلعت امشي على كيفي
.
.
جانن البنات موجودات اماني وهنادي من شافتني هنادي اجت ركض وسندتني واخذتني عالصالة وكعدت عند الحجية انتظر الريوك واجى مصطفى كعد يمي
.
.
مصطفى: ها ام رانية شلونج اليوم
جنى: الحمدلله بس الاسم غريب علي
مصطفى: هههههههه تتعودين
.
.
جنى: ما اريد هالاسم
مصطفى: ليش
جنى: اريد ابقى جناوي الصغنونة
.
.
مصطفى: ههههههه تدللين يابة
جنى: ما يتدلل عليك ظالم
.
.
مصطفى: يمة ايمتى اتمم لرانية (التميمة - العقيقة: هي انو يذبح الاب راس من الغنم او الماعز وحدة للبنت او ثنين للولد وهي سنة مو واجب)
.
.
الحجية: بعد اسبوع
مصطفى: وليش بعد اسبوع
الحجية: الافضل انو تنذبح اليوم السابع او الرابع عشر او الحادي والعشرون يعني بنهاية كل اسبوع
.
.
مصطفى: تمام يمة لعد مثل ما كلتي
كاضم: كفشتو طايرة لان هسا كاعد من النوم .. شكالت
مصطفى: اكلك ليش ما تحلق عالصوف الي على راسك
.
.
كاضم: لا شيخنا هذا شعر مو صوف
مصطفى: هسا ليش ما تحلقو
كاضم: ماكدر يابة اخاف
.
.
مصطفى: وليش تخاف
كاضم: هنودة تكتلني
مصطفى: عفية يا الذيب
.
.
هند: شيخنا ترا مدخلني بيه وبشعرو
كاضم: افه عليج بعتيني يولي وتطلعيني جذاب
مصطفى: جذاب ونص
.
.
كاضم: بصوت ناصي .. خوية خليلي شوية هيبة
مصطفى: بصوت ناصي .. تستاهل خوية
شاهين: بصوت ناصي .. شدا تحجون
.
.
كاضم: احم لا ماكو شي بس دا اعلم مصطفى شلون يتصرف تعرف لازم اهتم بيه
مصطفى: امسكو شاهين
.
.
جنى: كام كاضم يريد يريد ينهزم ومسكو شاهين وراحلو مصطفى ويضرب بيه ويسحب بشعرو واذانو وهو وجهو انكلب ازرك من الضحك واخوانو يضحكون وياه
.
.
بعدها كعدنا تريكنا كلنا ومن خلصت الريوك حسيت نفسي كلش تعبانة وجنت اريد اروح للغرفة والحجية كالت هسا يجن نسوان يسلمن عليج تمددي هنا بالصالة كلتلها تمام
.
.
وسمعت صوت رانية دا تبجي رحت عليها جانت هسا كاعدة بدلتلها ملابسها عالسريع ومسحت وجهها بكلينس مرطب ورضعتها وطلعت اني وياها
.
.
لكيت امي جاية ومصطفى واخوانو رايحين وماما جابتلي فراش للصالة وتمددت بيه وكمطت رانية ونومتها بحضني
.
.
جانت هادئة كلش بس من تجوع ما تسكت الا ارضعها ومن ترضع تنام فورا بس ماعرف ليش لحد الان ما فتحت عيونها والحجية تكول لان صغيرة
.
.
بلشن النسوان يجن ويباركلي وكل وحدة وياها هدية شكل بس وحدة من عمات مصطفى جايبة وياها تخم ملابس للمولود الجديد جانت صدرية للاكل وكفوف ولوزة وسروال وجواريب
.
.
بس منظر الكفوف والجواريب يموت ضحك كد مو صغار لدرجة ماكدر احط بيهن اصبعين من اصابعي تشكرت منهن كلهن وكل وحدة بقت نص ساعة او ساعة وراحن
.
.
ومن صار وقت الغدا اجى مصطفى كعد يمي ويمسح باصبعو على خد رانية ومسك خشمها وزعجها علمود تكعد كلتلو لا خطية شتريد منها
.
.
كال بنت الاوادم مكضيتها نوم ومن انزعجت كعدت وصارت تبجي كلتلو هسا ارتاحيت اخذها من حضني وفتح كماطها ورفعت ايديها
.
.
ولاول مرة تفتح عيونها وهو يباوعلها والابتسامة مالية وجهو واني على ابتسامتو ابتسمت مسك ايديها وكل ايد عدال اصبع واحد من اصابعو ومسك رجليها نفس الشي
.
.
وتخيلو انتو طفلة عمرها يوم وجسمها ناعم وبايد واحد جسمو خشن مثل مصطفى يعني كف ايدو اكبر منها ههههههههه
.
.
بقى شايلها ويحجي وياها بس لان صغيرة ما تضحك بس تمد ايدها وتمسكو من لحيتو ومن خدو وشوية وصارت تبجي كلتلو اكيد جوعانة جيبها ارضعها
.
.
وساعدتني ماما واخذتها للغرفة رضعتها ورجعت خارج بقيتها بدون كماط لحد ما تغديت وخلصت شفتها تعبت كمطتها ونومتها وهم اجن كم وحدة من عمام مصطفى
.
.
بس جنت كلش خايفة على رانية لان جانن كل ما يشوفنها يتخبلن عليها ومثل ما يعرف الكل العين حق وحتى الحجية كالت دائما من احد يشوفها ويرجعها الج اقري قران عليها
.
.
علمود اذا هالشخص لا قدر الله وصابها بعين القران يحميها من العين واني نفذت كلامها وصرت دائما اقرا عليها قران وبالاخص اية الكرسي دائما ارددها
.
.
ماما جانت دائما وياي لمدة 3 ايام لحد ما تحسنت كلش هيثم من اول يوم ما شفتو لان يجن نسوان ويكول اني جبير عيب اروح كدامهن ههههههههه
.
.
باليوم الرابع جنت كاعدة بالصالة وبحضني رانية ومكمطة واجى هيثم وبيه عادة من يدخل يدفع الباب ويصيح بصوت عالي السلام عليكم ويدخل
.
.
اجى كعد عندي وكال جيبي هالفصعونة عند خالها مصطفى رافع تك حاجب ويباوعلو حطيتها بحضنو وعلمتو شلون يمسكها علمود ما توكع
.
.
كال فتحي كماطها وفتحتو واخذتو وخليتها بحضنو شو هذا خرب ضحك ويكول باوعي رجليها شكدوتهن وايديها شصغرهن كلتلو اي لانها صغيرة هيج صغيرات
.
.
كال يعني اني جنت مثلها كلتلو اي باوع لمصطفى وكال لا لا كلتلو شنو لا كال مصطفى مستحيل جان هيج كلتلو ليش كال ما تشوفيه شكدو بس ايدو بكدج
.
.
كاضم وكع بالكاع من الضحك هو وشاهين مصطفى على اساس يريد يسوي نفسو زعلان بس من حجى هيج هيثم ضحك على كلامو
.
.
بقى يلعب وياها لحد ما تعبت وصارت تبجي اخذتها منو ونومتها مرن كم يوم طبيعيات لحد ما صار عمر رانية 6 ايام
.
.
جنا مقررين ثاني يوم يذبحلها مصطفى راس غنم ويوزعو على عمامو بالليل جنا نتعشى ما حسينا الا صارت هند تتوجع وانخبصو بيها واخذوها الحجية وكاضم للمستشفى
.
.
وبعدها مصطفى كال لشاهين ابقى بالبيت واني راح الحكهم وركب سيارتو وراح وراهم نص ساعة تقريبا واتصل كال عدها ولادة واحتمال نتأخر شوية انتو اقفلو البيت ونامو
.
.
بس ماكدرنا ننام لان بالنا مشغول على هند الله يعينها ويسهللها بقينا ندعيلها وننتظر على نار وكل دقيقة نحسها عمر واحنا ننتظر
.
.
واني ولارا كاعدات وساكتات مانعرف حتى شنو نحجي علمود نلتهي ونكضي وقت الانتظار وسبحان الله بهالموقف ضاع كل الكلام من بالنا بقينا ننتظر للفجر من اذن صليت الفجر ورجعت اتصلت على مصطفى
.
.
مصطفى: الو هلا جنى
جنى: شصار وياكم
مصطفى: بعد ما صار شي
.
.
جنى: يعني ما جابت
مصطفى: لا والله شوية ولادتها صعبة
جنى: ياربي سترك وشراح تسوون
.
.
مصطفى: شنسوي قابل ننتظر وندعيلها
جنى: دا احجي وياه وسمعت صوت الحجية اجت عدهم تركتو يحجي وياها واسمع صوت كاضم بس الصوت مو واضح وماعرف شدا يحجون وبعدها رجعلي
.
.
مصطفى: ها جنى تسمعيني
جنى: اي وياك
مصطفى: الحمدلله اجتها بنت
.
.
جنى: وشلونها هي والبنت
مصطفى: الحمدلله صحتهن كلش زينة وبس ترتاح راح نسجللها خروج
جنى: تمام اذا شفتها سلملي عليها
.
.
مصطفى: الله يسلمج
جنى: يلا باي
مصطفى: بايات بنيتي
.
.
جنى: قبل ما اسكر منو سمعت اصوات عندو عرفت اهل هند موجودين وسكرت منو وبشرت لارا وكلش فرحت انو صارلها بنت وصحتهن ثنينهن زينة
.
.
بعدها رضعت رانية وبدلت ملابسها ونومتها بحضني ونمنا ما كعدت لل 10 الصبح على صوت رانية اول ما فتحت عيوني لكيت مصطفى متمدد يمي يريد ينام
.
.
كلتلو ها جبتوها كال اي كمت رضعت رانية وبدلت ملابسها ونزلت تحت لكيتها نايمة بالصالة والبنية يمها حطيت رانية بحضن الحجية وشلت بنت هند
.
.
جانت كلش حلوة كلتلها لا تباوعين هيج ترا بنيتي احلى ضحكت وكالت اني الج بس خلي يصير بي حيل الا انتف شعرج شاهين جان كاعد يحجي ويا كاضم
.
.
باوعت عليه كلتلو شاهين لكينا عاروس ثانية لصوفي كال والله اني احتاريت بينهن الله يعين صوفي بنات عمامو ثنينهن صاكات
.
.
كاضم: دولي انت وابنك
شاهين: اذا ما اخلي يشلع كلب بنتك
كاضم: هم مصدك نفسك انت وابنك جنو راس مريدي
.
.
شاهين: هههههه دباوع لبنتك ركبتي احلى منها
كاضم: هند شو ساكتة ما تخوفيه مثل من تخوفيني
شاهين: ههههههههه افه عليك
.
.
جنى: يلا كومو تريكو واتركوها ترتاح مو تتناكرون يم راسها وهي تعبانة
كاضم: اي والله تعبانة كون التعب بي ولا بيها
.
.
هند: سلامتك ربي ما يشوفك تعب
كاضم: الله يسلمج يا روحي
شاهين: بعد بعد موع فد مرة احسن
.
.
جنى: دفعتهم علمود يطلعون من الصالة والكل يضحك على سوالفهم وتركناها تنام وترتاح لان من يجن النسوان ماراح تكدر تنام وتاخذ راحتها
.
.
من تريكو كاضم صعد لغرفتو والحجية راحت تنام وشاهين طلع للمضيف والظهر بعد الغدا اجن ام هند واختها وخطية امها مبين عليها التعب لان جانت وياهم بالمستشفى
.
.
ومن راجعين رايحة نايمة شوية بالبيت واجت هي وبنتها وقمنا بواجبها وهي لان تعرف شكد نحب هند وتعرف الحجية زينة ويانا جانت مرتاحة ومو شايلة هم هند انو تحتاج شي
.
.
وصار نفس الروتين الي صار وياي هم اجن نسوان سلمن عليها وتحمدن الها بالسلامة وبقى هالروتين لمدة 3 ايام تقريبا
.
.
والحجية اهتمت بيها اكثر مني لان هي ولادتها صارت اصعب مني وجانو شوية خايفين عليها بس الحمدلله بعد 3 ايام كلش تحسنت
.
.
وصارت تمشي وتروح وترجع طبيعي بس شوية تحس بتعب اذا تصعد الدرج او تشتغل شي لهذا اني ولارا ما نخليها تشتغل علمود ما تتعب
.
.
هسا خلي احجيلكم شوية عن كاضم بهاي الايام من كعد العصر باول يوم نزل يريد يكعد يم هند ولكى النسوان موجودات وطلع من البيت والمغرب اجى
.
.
وبقى كاعد يمها هي والطفلة حتى عشى ما تعشى يكول ما مشتهي واخذ الطفلة وكعد بصفحة ويحجي وياها كأنها مرة جبيرة مو طفلة ما تفهم من الدنيا شي
.
.
وجان يتخبل اذا واحد من اخوانو يصنف عليها وشاهين طار من الفرح وصار كل ما يضوج يستفز كاضم ويكضيها ضحك عليه وكاضم يتخبل بعد اكثر
.
.
ومن يشوف البيت مابيه نسوان فورا ياخذ بنتو ويصعد للغرفة ويبقى هناك لحد ما تبجي وبجيبها على هند ومن تسكت يرجع ياخذها حتى هند تكول بعد يومين يطردني علمودها وتضحك
.
.
كلتلها لو مصطفى يسوي هيج ويا رانية الا اتخبل عليه وجانو مختلفين عالاسم اخير شي استقرو على اسم ليلى الي هو اسم الحجية لان جان عاجب هند وكاضم
.
.
والحجية تستاهل ان الواحد يسمي عليها واني لو مصطفى كايلي نسمي رانية ليلى جان ما رفضت بس هو طلع يفكر بي قبل نفسو وسماها على اسم ماما الله يرحمها
.
.
ويارب يرزق رانية الصغيرة حياة سعيدة وعمر طويل ويفرحني بيها وما يمسها سوء طول العمر
.
.
باليوم الرابع بعد ولادة هند اجتمعو مصطفى وكاضم والحجية واتفقو بعد 3 ايام يعني من يصير عمر ليلى اسبوع يذبحون تميمتين لرانية وليلى
.
.
ومصطفى سأل الحجية اذا يصير يوزعوهن بدون ما يعزمون عليهن ولا لا كالت بكيفكم الشرع محلل جميع التصرفات
.
.
سواء تعزمون عليهن او توزعون نص وتتركون نص او توزعوهن كلهن او تقسموهن مثل الاضحية(يعني ثلث للاقارب وثلث للفقراء وثلث يبقى للعائلة)
.
.
ومصطفى كال الافضل انو نوزعهن واذا بقى شي يبقى للبيت واذا ما بقى شي مو فد مشكلة وكاضم وافق على رايو والحلو بالموضوع فرق العمر بينهن اسبوع واحد يعني راح يذبحولهن ثنينهن بنفس اليوم
.
.
جنا كاعدين واجى هيثم كعد يمي وكال انطيني رانية كلتلو ما تقبل زعلانة عليك كال ليش كلتلو زعلانة تكول خالو ليش ما يجي صارلو 3 ايام
.
.
كال جان عندكم نسوان عيب اجي دنكت عليها وعلى اساس احجي وياها كلتلو يلا وافقت وحطيتها بحضنو ودنك هو عليها وكال لا تزعلين علي بس عيب اجي واكو نسوان هنا
.
.
هند: هيثومي منو احلى رانية ولا ليلى
هيثم: باوع لكاضم ورجع باوعلها .. والله مسكينة
هند: باستغراب .. ليش
هيثم: تريدين بنتج تطلع حلوة وكاضم ابوها
.
.
جنى: شاهين جان يشرب جاي من كال هيج هيثم الا طلع الجاي من خشمو ومصطفى الي ما يحب يضحك بصوت عالي ضحكتو وصلت لسابع جار
.
.
الحجية خطية تريد تشرب جاي وماتكدر من الضحك هند رغم انقصفت بنتها بس شبعت ضحك لان انقصف كاضم كام كاضم وهيثم حط رانية بحضني وانهزم ولحكو كاضم ومسكو
.
.
وكال لمصطفى اني بشاربك شيخنا وكامو مصطفى يفزع لهيثم وشاهين يفزع لكاضم وما نسمع بس صوت ضحكهم شاهين عاف مصطفى ووكع بالكاع ويكول قسم بالله هالطفل هذا بلوة طيرة جبهة نفرين بثانية وحدة
.
.
دا يتعاركون واجت امي مخطوف لونها تكول شنو هالصوت من شافتهم يضحكون كالت صوتكم واصل لعندنا عبالي صاير شي كال شاهين ماكو شي بس ابنج طير جبهة كاضم وبنتو
.
.
وحجالها الي كالو هيثم ورغم ضحكت بس سوت نفسها عصبية علمود تخوف هيثم كاللها كاضم عوفيه قابل احنا غريبين وهو دا يتشاقة وسحبو من ايدو وكعدو ثنينهن بالصالة
.
.
وماما عافتو رجعت للبيت كلت لمصطفى شرايك نروح لاهلي ماطول اكو وقت كال امشي كمت بدون ما ابدل ملابس وحتى عباية ما لبست لان بس افتر ورا البيت وادخل لبيتهم
.
.
بس لفيت رانية زين لان الجو بيه هوا شوية بارد لان بداية شتاء من وصلنا على اهلي نزلت البطانية مالتها وخليها بحضني بكماطها واخذها مني بابا
.
.
كلتلو اذا تريد افتحلك كماطها لان مو وقت نومها كال افتحيه وفعلا فتحت كماطها واخذتو ورجعتها على بابا وشايلها وطاير بيها ويكول هاي اول حفيدة الي
.
.
وشوية واجى هيثم علمود ينام لان عندو مدرسة وكالي بابا علمود الجامعة كلتلو محتارة برانية ماعرف وين اخليها هند ملتهية بليلى ولارا بمصطفى
.
.
وماكدر احملهن مسؤولية رانية فوك المسؤولية الي عدهن والحجية ما زوجت مصطفى واخوانو علمود تربي اطفالهم فحاليا مو مقررة علمودها
.
.
ومصطفى كال خلي بعد ما نخلص من شغلة التميمتين نتشاور ونشوفلنا حل مناسب وبقينا عدهم لوقت النوم ورجعنا للبيت ورضعت رانية وكمطتها وحطيتها بفراشها ونمنا كلنا
.
.
.......... يتبع
لايك وتعليق حلو مثلكم ❤
حطولنا ارائكم وتعليقاتكم ❤